Yaba nanaid daggega

Menú baid daggega

Índice daggega

Jehovági sunmagmalad

dule

Bibliagine ¿nue igi soglenai?

 CAPÍTULO 19

Mer anmar Babgi bangue

Mer anmar Babgi bangue
  • ¿Ibu obare Bab Dummad sabgued?

  • ¿Igi anmar Babgi bangussulile?

  • ¿Ibu ibmar nuegan Jehová imaggoe e gala arbamaladga?

¿Neg undar gunaidgi Jehová be bendaggedga be imagmogoe?

1, 2. Emi ibagi anmar, ¿bia duggued amisale?

IGARBA be gudiidgi neg onaggwiar be daggarsunnad. Mar daggarmade, mar gollomade geb degiidgi bela belad dii wialid. Be abarmadeled duggued neg amigega. Degi be abarmagmaidgi igarba neg sii be daggalid. Duggued neg nued dagle be daggalid. ¡Be yeer iddosaled!

2 Emi ibagi anmarga neg undar gunamogad, ibmar isgana yaisurgusad. Agga bur bule dulemar isgumaid. Deyob neggunai inigwale anmardi nabir dugguega neg nued amisaled. ¿Bia anmar duggunaoe? Be daggena Bibliagi soglenaid: “An Bab Jehovága soged: Be an dugguedid, be an gar ganguedid, an Bab Dummad, an begi bensulid” (Salmo 91:2).

3. ¿Ibu anmar imagger gebe Jehová nabir anmar bendaggega?

3 Be iddogena, Jehová, dule dummad maidi nabir anmar oduggusaled. Igi anmarga neg guardibe Jehová anmar bendaggoed. Ar edina bela dulemargi obined. Anba aggar anmar gusale Jehovádi nabir  gannar anmar onugued. ¿Ibu anmar imagger gebe Jehová nabir anmar bendaggega? Mer anmar egi benguer gebed. Bibliagi anmarga soglenaid: “Bab Dummad bemar sabgumai guega, mer egi bangumalo[ye]” (Judas 21, TNM). Degsoggu, Bab anmar sabgumai guega mer anmar egi banguer gebed. Anmar egi bangusulile Jehová anmar bendaggoed. Auggi, ¿igi anmar bela belad Bab Dummad binar gusale?

BE BINSAE IGI BAB BE SABGUMAI

4, 5. ¿Igi Bab Dummad anmar sabe na oyomai?

4 Bab anmar sabgumaidgi mer anmar banguega anmar dagger gebed igi Jehová nue anmar sabe na oyomai. We libroba be Biblia igar durdasadgi be binsaena. Jehová anmarga we nabbaneg nasisad anmar yeer iddodi egi guega. Mas buggidar egi urbisbalid, dii nasisbalid, sabbi durbamar urbisad, ibmar durgan urbisbalid, geb bela neg yeer dagle imasbalid. Bab Dummad Biblia e ibedbarsoggua Bibliagi anmarga sogmaid biddi e nuga geb igi dabali. Anba Bibliagi anmarga soglenabalid, nabbanegse e massi Jesús barmiarye, anmar ular wilegega geb anmar ular burgwebaliga (Juan 3:16). Jesús anmar ular burgwisadbali emidi yoogidse nabir anmar ibmar nuegan niggusmogaled.

5 Unnila Jesús anmar ular burgwisadbarbii anmar yoogidse ibmar nuegan nigguosulid. Ar Jehová nibneggi e Reino sisbalid. We Reino anmarga bela wile iddoged obelogoedid, geb Nabbaneg yeer dagle imagbaloed. ¡Be iddogena! Aagi geb anmar sadegu yeer iddodii gudi gudoed, bar anmar urwed abargi gudi guosulid (Salmo 37:29). Emidi anba yoo we ibmar gusoggua, Jehová e gardagi igar mesisadi anmar bendaggoed anmar nued gudi guega. Auggi Jehová imagmabalid anmar nabir ese golega. Wegine wis bibbisaar soglesad, Jehová igi nue anmar sabgumai.

6. Jehová be sabgumasoggua, ¿ibu be imagmogoe?

6 Emidi be binsamogana: “Jehová be sabgumasoggua,  ¿ibu be imagmogoe?”. Dulemar soggardaed, an sabgumasoggu: “An Jehová sabgumogar gebye”. ¿Igi bedi sogmosun na? Jesús weyob igar mesisad: “Bab Dummad be Dummad, bela belad be gwagegi be sabguoed, bela belad be san[gi] [...] degi, bela belad be binsaedgi be sabguoed” (Mateo 22:37). Degsoggu, ibmar soggwenna ular be Jehová sabguosulid ar buggidar bega ibmar ugmaid. Auggi unnila binsa be Jehová binar iddogosulid.

7. Bab sabguegala, ¿unnila binsa anmar Bab binar iddo guoe? Ibigala be deyob binsae.

7 Bibliagi soglenaid, Bab Dummad sabguedi unnila binsa Bab binar iddo gued obarsurye. We Bab binar iddo gued nueddo ar aabali anmar Bab sabgudoed. Anmar we ibmar nueggwa mag iddo guegala wegi sogoena: manzana gwag nue abeleged manzana sanmaggega. Auggi be manzana niggubiele ¿be yeer iddosale unnila bega e gwag uglesadba? Suli. Ar igi manzana gwag nue abelege manzana sanmaggega, Jehová binar iddo gued nue abelemogad Jehová sabgudega. Aaga Bibliagi soglenaid: “Ar Bab Dummad sabgulegedi, E Igar Mamaidba nanalegedgi sabguleged, ar E Igar Mamaid duddusursulid” (1 Juan 5:3). Degsoggu anmar nue Bab Dummad sabele mag daglegoed anmar ibmar imaggedba (Mateo 7:16-20 absogo).

8, 9. ¿Igi mag daglegoe anmar Jehová sabe geb anmar yeer iddoge anmarga ibmar imagmaidba?

8 Anmar Bab igarmarba igar saele geb eba anmar dabalile mag daglegoed anmar nue Bab sabe. Ar undarsulid Jehová igarmarba ibmar imagged. Ar Jehová, e igarmar mesisad anmar bendaggega, nabir anmar yeer iddodi gudi guega (Isaías 48:17, 18). Anmar Jehová sogedba gudiile mag daglegoed anmar yeer iddoge Jehová anmarga  ibmar nuegan imagmaidba. Dogdar iddolleged emi ibagi buggidar dulemar Bab igar bai dagsurmalad. Jesús gudigu dulemar bai Bab igar dagsasurmaladyobi anmardi gubisurmalad. Ebbenne Jesús e anbe mergu dulemar boni niggad onugusgua, unnila dule wargwena gannar birisad Jesúsga sogega, nued an iddoye be an onugusadba (Lucas 17:12-17). Anmardi bur we duleyobi gubimogad.

9 Degsoggu, ¿ibu igarmar Jehová mesissunna anmar eba daega? Abar bad we librogi soglesnanaed. Auggi anmar wis gannar ebinsaoena. Ar anmar e igarmarba daele anmar egi banguosulid, Bab Dummad anmar sabgumai gudoed.

MER BIBBISAAR BABGI BANGUO

10. ¿Ibigala anmar Jehová igar durdagnai gued abelege?

10 Anmar Jehová igar durdagged abeleged mer egi banguega. Ar Jehová igar durdaglegeddina berguosulid. Emisgi be binsaena, be sabburba gudii muddiggi na be soo ogasad wis bega neg uwe saega ¿bei soo gidde be daggele be bai  dagsasulile? Be abesuliled bei ginned. Nabir soo duu gasii guega be sabban odo odo imagger gebed, degsoggu be Jehová igar durdagnai imagmogar gebed mer egi be banguega (Proverbios 2:1-5).

Jehová sabguedi soo gasiiyobid, mer ginnega anmar egi sabban odoger gebed

11. Jesús ibmar sogsad iddosmargu e sordagan, ¿igi guarmala?

11 Jesús abesad e sordagan bela belad Jehová sabgumaladi geb e Gaya Burba nue binar gumarbalidi. Jesús durgusgua e sordagan warbogala nueggwa sogsad igi Bab gardagi ibmar soglenaidba ibmar imasa. ¿Igi e sordagan abin iddosmala? Sorba wemar sogsamalad: “Anmarga igarba Bab Dummad Gardagi sunmagdanigu, anmar [...] ¿nue weligwar iddodani gussursi?” (Lucas 24:32).

12, 13. a) Bur bule dulemar, ¿igi Bab igar dagmala geb igi Biblia dagdamarbali? b) ¿Igi be imasale mer be Jehovági banguega?

12 Bibliagi be ibmar durdadgua, ¿yeer be iddossurmoga? Be yeer iddosar gebed. Ar buggidar dulemar Biblia durdader deyob iddoddamalad. Auggi igi be nabir Bab sabgudii gusale mer egi banguega. Emidi bega ibigwensur guosulid. Anmardi dulemar Babgi binsabugsulidyobi dabisulid. Ar Jesús sogsad anmar ibagi “ibmar isgana yaisulidba, [...] sabgued bergudo[ye]” (Mateo 24:12). Degsoggu, ¿ibu be imasale mer be Jehovági banguega geb Bibliagi ibmar durdasad mer be iebaliga?

13 Nabbi bur bule Jehová igar durdagnai sao, geb Jesucristo igar durdagnai sabalo (Juan 17:3). Geb be Biblia absodele nueggwa binsadao: “¿Jehová dule igi daedye we an odurdagge? ¿Igi wegi an ibmar durdasad an bendagge an nabir bur bule Jehová sabguega an gwagegi, an sangi, geb an binsaedgi?” (1 Timoteo 4:15, TNM, absogo). Weyob be Biblia absogega alamagnaile be Jehová sabgudii gudoed.

14. Bab anmar sabgumai guega, ¿ibigala nue abelege anmar ese goledi?

14 Anmar Jehovásega bali bali gorbalile anmar Jehová sabgudii guoed (1 Tesalonicenses 5:17). Capítulo 17 gine anmar durdasad, Bab nued anmargi binsaedbali anmarga  sogmaye, anse gormaloye. Ar igi anmar ai nued niggubiele bali bali ebo sunmagger gebe. Anmar bali bali Bab Dummadse gormogale e ai nuedga anmar gumogoed. Babse gollalir anmar binsassuli yogasaar gannar gannar ega ibmar sogbisulid. Ar igi mimmi na e babbo sunmagge, aayob anmar Jehovábo sunmagbimogad. Auggi anmar dodoaggwa ebo sunmaggosulid, anmar gwagegi binsadiidi anmar ega sogoed (Salmo 62:8). Degsoggu Babga arbaega nue abeleged anmar nueggwa Biblia walagwengi durdagged, geb anmar ese gorbalidi. Weyob anmar imaggele Jehová anmar sabgumaoed geb anmar egi ibigwensur banguosulid.

BABGA ARBAED YEER IDDO DULE SAED

15, 16. ¿Ibigala Bab igargi sunmagged ibmar nuedi?

15 Inbaggwa walagwengi anmar Babga ibmar imagged, neggi Biblia durdagsiirdibe, Babse gorsiirdibe. Auggi emidi anmar sunmaggoed emar abargi Babga ibmar imaggedgi: Bibliagi ibmar durdasad emarga sogmogadi. ¿Bad be emarga sunmagdimoga Bibliagi be ibmar durdasadgi? Degiile, be yeer iddosmogar gebed Bab igargi be emarga sunmasadba (Lucas 1:74). Anmar Jehová igargi dulemarga sunmaggele, bela Cristo sordaganga arbaed uglesad anmar imagnamogad: Bab Reino ibmar nuegan imaggoedgine sunmaggedi (Mateo 24:14 geb 28:19, 20 absogo).

16 Apóstol Pablo bela belad Bab igargi sunmagged binar gusad, aaga sogsad, Bab igargi sunmaggedi egardi ibmar nuedye (2 Corintios 4:7). Jehová ibmar imaggoedgi sunmaggedi bur arbaed nuedid. Ar Jehovádina dulemaryobsulid geb anmar bendagmabalid. Anmar Bab igargi dulemarga sunmagdiile nabir dulemar Bab aiga gusmarmogaled geb nabir yoogidse sadegu gudi gusmarmogaled. ¿Arbaed baid nabir yeer iddo dule imasale? Anmar Jehovági dulemarga sunmaggele geb Bibliagi sunmagbalile bur bule  anmar egi bensur gudoed, geb bur bule anmar Jehová sabgudbaloed. Weyob anmar alamagnaile Jehová nued dagged (Hebreos 6:10). Degsoggu anmar alamagdiile Bab igargi sunmaggega Jehová anmar sabgumai gudmogoed (1 Corintios 15:58, TNM, absogo).

17. ¿Ibigala gwae Bab igargi sunmagleged abelege?

 17 Mer iego, gwae Bab Reinogi sunmagged abeleged. Bibliagi soglenaid: “Gaddig Bab Dummad gaya burbagi nue be sunmaggo” (2 Timoteo 4:2). ¿Ibiga gwae we Reinogi sunmagged abelege? Ar Bibliagi soglenaid: “Bab Jehová e urwed dummad iba baddo walig gudaniggid, aa iba gwae gwae modaniggid” (Sofonías 1:14). Degsoggu Jehová iba binna binna melledanisulid aa ibagi Jehová dulemar isganagan obelogoed. ¡Dulemar we ibmar wisgued abeleged! Ar dulemar mag iddo gued abeleged emi ibagi Jehovábali igar saed abeleye, ar dulemar isganagan obeloged iba “sogedba gunoniggoed” (Habacuc 2:3).

18. ¿Ibigala anmar Cristo sordagan sunsogmaladba Jehovágala arbamogadi?

18 Jehová abeged e sordaganba be ega arbamogadi. Aaga Bibliagi soglenaid: “Degisoggu, anmar binsamarsun igi anmar saer gebe, adi, na mudsub mudsub na gaddig sabgumalagar, degi, na ibmar nuegan imagmarbaligar. Melle dulemar baigan damaladyobi, bular danaggwaa onmagsuli [...] gumalo. Bur na be[mar] mudsub mudsub ogannobuggwa [...] gumar, adi, gaddig Bab Dummadba nanamalagar. Bab Dummad ibagan warmagdani be[mar] daggarmalar, bur bule [...] onmagbuggwa gumalo” (Hebreos 10:24, 25). Anmar Cristo sordaganba igar iddoged negse nanamogale, nabir anmar emar abargi Bab nug odummosii gumogoed. Geb anmar na mudsub mudsub ogannobaloed.

19. ¿Ibu anmar imaggoe Cristo sordagan yaggi anmar na bela belad sabgudii guega?

19 Anmar Jehová sordaganba igar iddogedse nanamogale, bela dulemar bamalad mag dagge anmar gudbaloed, geb aamala anmar aimarga gudmaloed. Bur nuedid anmar dulemar bamalad ibmar nuegan imagdiidgi addagged, ar igi Jehová anmar ibmar nuegan imagdiidbi dagmamoga. Mer binsao Cristo sordagan noar ibmar imaggosurmarye. Ebinsao bela anmar noedbiid, geb bela emarbii  dulemar gwae gwae gwagsurmalad Babba ibmar imaggega (Colosenses 3:13 absogo). Dulemar Babgi bangudisurmaladba be aggao, aamala be aimarga be imaggo, degiile be bela belad Jehovábali aggadmogoed. Be, Jehovágala e sordaganba arbamogale Jehová be sabgumai gudoed, geb ibigwensur be egi banguosulid. Emidi anmar daggoena igi Jehová dulemar egi bangudisurmalad bendagge.

ALAMAGGO ‘NUED GUDI GUEGA’

20, 21. ¿Ibu obare bur “nued gudi gued”, geb ibigala yeer iddollegoe degi anmar gudi guder?

20 Jehová imaggoed dulemar egi bangudisurmaladi yoogidse nued gudi guega, auggi ¿igi nued gudi gumaloe? Bule nue gudii na be iddomosunna, buggidar dulemar na nue gudii iddodamalad. Ar bunnodidii na iddomalad, mas gunned nigga geb gobed nigga. Emisgi anmarga neg nueganbiile sun anmar sogdagoed: “¡Nue gudii an na iddodo!”. Degi inigwale Bibliagindi soglenaid dule wargwensaar emi ibagi nue gudisurye.

Bab abeged be ‘bur nued gudi gued’, ¿be deyob gudi guoe?

21 Biblia anmarga soged anmar alamaggoye “bur nued gudi guega” (1 Timoteo 6:19, TNM). ‘Nued gudi guedye’ soglenaidi yoogidse anmar gudi guoed obarnaid. Yoogidse anmar isguedsuli gunoniggile, gebbe saglaun Bab dulemar gudi gued abesanayobi anmar gudi gudoed. Ar anmar neg yeer daglegedgi gudi gudele bar bonigan iddogosulid, urwed iddogosurbalid nue yeer iddodii anmar gudoed degiirdi soglegodo anmar bur ‘nued gudiye’, ar sadegua anmar gudi gudoed (1 Timoteo 6:12). ¿Deyob be gudi sabisurmoga?

22. ¿Igi be yoogidse ‘bur nued gudi gusale’?

22 ¿Igi anmar nue alamagnai gusale ‘bur nued gudi guega’? Pablo sogsabalid Cristo sordagan “ibmar nuegan saedgi alamagmalo[ye], ibmar nueganbi sadii gumalo[ye]” (1 Timoteo 6:18, TNM). Degsoggu anmar nued gudi guega Biblia sogedba anmar daer gebed. Auggi soglege, ¿anmar  ibmar nuegan imaggedba yoogidse bur ‘nued gudi gudoye’? Suli, anmar yoogidse nued gudi guega “Bab Dummad anmargi nued binsaer[gebed]” (Romanos 5:15). Degi inigwale Jehovádi ega arbamaladga ibmar nuegan imagbied. Jehová abeged anmar yoogidse nued gudi guedi. Abeged neg nuedgi anmar sadegua yeer iddodi gued. Dule Jehovági bangudisulile neg nuedgi gudi guoed.

23. ¿Ibigala nuedi mer anmar Babgi banguedi?

23 Anmar we ibmargi binsaed abeleged: “¿Bibliagi sognaiyobi an Babga arbadimodibe?”. Bane bane anmar deyob ibmar imagdiile sogledo anmar igar nuedba nadabye. Degiirdi anmar bibbisaar benguosulid Jehová anmar bendagmaidi. Jehová na e sordagan bendagmai guoed emi ibagi neg beedse gunaidgi. Geb Jehová anmar sedoed neg nued owarmadaniggidse. ¡Yeer iddollegoed Jehová anmar bendasar! ¡Yeer anmar iddogoed neg isgunaid abargi anmardi igar nued imagdii gusadba! Emi ibagi anmar Babba igar sadiile, anmar sadegu ‘bur nued gudi gudoed’, gebbe saglaun Jehová dulemar gudi gued abesanayobi anmar gudi gudoed.

NABBI WISGUEGA

BIBLIA DURDAGLEGED IGAR

¿Ibiga nue Biblia durdagged abelege?

Millónba mergu dulemar Bibliagi we igar balamismalad. Anmar abeged be Biblia durdagmogad.