TAEM yumi kasem wan presen we i spesel tumas, hemia i mas pulum yumi blong mekem sam samting blong talem tangkiu. Jisas i soemaot samting ya afta we hem i hilim ten man we oli gat sik ya leprosi. Wan long ol ten man ya “i kambak bakegen, i stap singaot bigwan blong presem God.” Nao Jisas i talem se: “Mi mi ting se i gat ten man we bodi blong olgeta i kam klin. ?Wehem ol narafala naen man ya?” (Luk 17:12-17) ?Yumi lanem wanem long stori ya? !I isi nomo blong yumi fogetem gudfala samting we narafala i mekem long yumi!

Ransom i defren long ol narafala presen. Hem i spesel moa long ol presen we God i givim. ?Taswe, yu yu mas mekem wanem long presen ya?

• Save God we i givim presen ya. Ransom i no wan otomatik samting we i givim laef we i no save finis long olgeta man. Jisas i soemaot samting ya taem hem i prea long God se: “Mo laef ya we i no save finis, hemia se man i gohed blong save yu we yu nomo yu tru God, mo i save Jisas Kraes we yu yu sanem hem i kam.” (Jon 17:3, NW) Sipos wan man i talem long yu se taem yu smol, wan man i sevem laef blong yu, i sua se bambae yu wantem tumas  blong savegud man ya, mo se from wanem hem i sevem laef blong yu. Jehova God we i givim presen ya ransom blong sevem laef blong yu, hem i wantem se yu save hem mo yu fren gud wetem hem. Baebol i talem se: “Yufala i mas stap klosap long God nao hem bambae i kam stap klosap long yufala.”—Jemes 4:8.

• Soemaot se yu bilif long ransom. “Man we i bilif long Pikinini ya blong God, hem i gat laef ya we i no save finis.” (Jon 3:36) ?I minim wanem blong soemaot se yu bilif? I min se yu mas soemaot long ol aksen blong yu. Yu mas mekem sam samting blong soemaot se yu bilif long ransom. (Jemes 2:17) ?Wanem samting? Sipos yu wantem se wan presen i blong yu, yu mas pusum han blong yu i go mo yu tekem. Long sem fasin, yu mas akseptem ransom ya. ?Yu akseptem olsem wanem? Yu lanem ol samting we God i wantem se yu mekem, mo yu folem long laef blong yu. * Yu prea long God blong i fogivim yu mo blong tingting blong yu i klin long fes blong hem. Taem yu prea, yu mas trastem fulwan se ransom nao bambae i mekem se olgeta man we oli bilif long ransom ya, bambae oli gat laef we i no save finis, oli gat pis, gud helt, mo gud laef.—Hibrus 11:1.

• Joen long miting blong tingbaot ded blong Jisas. Jisas i stanemap wan impoten miting we i stap hapen evri yia, blong yumi tingbaot samting we yumi kasem from ransom. Hem i tokbaot miting ya se: “Oltaem yufala i mas mekem samting ya blong tingbaot mi bakegen.” (Luk 22:19) Ol Witnes blong Jehova bambae oli holem impoten miting ya long Tusde 11 Eprel 2017, afta we san i godaon. Long miting ya, bambae i gat wan tok blong wan aoa, we i eksplenem mining blong ded blong Jisas, mo olsem wanem ded blong hem i givhan long yumi tede mo long fiuja. Las yia, i gat samwe long 20 milian man raon long wol we oli joen long impoten miting ya. Mifala i glad blong singaot yu blong yu joen wetem mifala, blong harem gud long spesel presen ya we God i givim.