Go long ol haf insaed long hem

Go long lis blong ol haf

?Yumi Save Givhan Long Narafala Olsem Wanem?

?Yumi Save Givhan Long Narafala Olsem Wanem?

FRANÇOIS we i wan elda, i talem se: “Afta long wan eleksen, oli fosem plante taosen Witnes blong Jehova blong oli kamaot long ol haos blong olgeta. I no moa gat naf kakae mo meresin, mo ol kakae we i stap, oli sas we oli sas. Ol bang oli no moa open, mo ol masin blong karemaot mane oli no moa wok.”

Long taem ya, ol Witnes we oli stap olbaot long kantri ya, oli kam hivap long ol Haos Kingdom. Ale, ol brata long branj ofis oli sanem mane mo ol narafala impoten samting, blong oli seremaot long olgeta. Ol enemi oli blokem ol rod. Be oli letem ol trak blong olgeta long branj ofis nomo i pas. From we oli save se, ol Witnes oli no sapotem wan long ol grup ya.

François i talem se: “Taem mifala i stap ron long trak blong go long Haos Kingdom, ol man oli stap sut long masket long fored blong mifala. Be ol bolet oli stap klisim mifala nomo. Mifala i luk wan soldia i resis i kam long mifala, i holem masket long han blong hem. Mifala i tanemraon hareap mo mifala i spid blong gobak long branj ofis. Mifala i talem tangkiu long Jehova, from we mifala i no ded. Long nekis dei, i gat 130 brata mo sista oli go long Haos Kingdom, be olgeta oli sef nomo. Mo sam narafala oli kam long branj ofis. Mifala i givhan long olgeta kasem we trabol ya i finis. Mifala i leftemap tingting blong olgeta, mo mifala i givim sam samting we oli nidim.”

François i gohed i talem se: “Ol brata mo sista long kantri ya, oli raetem plante leta i go long branj ofis blong talem bigfala tangkiu long olgeta. Oli talem se, taem oli luk olsem wanem ol brata mo sista long kantri ya, oli givhan bigwan long olgeta long trabol taem ya, hemia i pulum olgeta blong trastem moa Jehova.”

Taem ol brata mo sista blong yumi oli kasem trabol from wan disasta, no maet wan trabol we man nomo i mekem, yumi no mas talem long olgeta se: “Yufala i go putum klos blong yufala i wom, mo yufala i kakae.” Nogat. (Jem. 2:15, 16) Defren olgeta, yumi mas givim ol samting we olgeta oli nidim. Yumi mas mekem olsem ol disaepol blong Jisas we taem ol Kristin brata mo sista blong olgeta oli sot long kakae, ‘ol man blong Jisas oli tingbaot se bambae olgeta evriwan oli mas sanem sam mane olsem we oli save mekem, blong givhan long ol brata blong olgeta, we oli stap long Judia.’—Wok 11:28-30.

Taem yumi kam wan Witnes blong Jehova, yumi mas glad blong givhan long ol man. Be yumi mas tingbaot tu se ol man oli nidim blong save God. (Mat. 5:3) Yumi mas mekem olgeta oli luksave se oli nidim God long laef blong olgeta. Mo yumi givhan long olgeta blong oli kasem save long hem. From samting ya, Jisas i talem long yumi se yumi mas go prij mo tijim ol man. (Mat. 28:19, 20) Yumi wanwan i mas yusum taem blong yumi, paoa blong yumi, mo mane blong yumi blong sapotem wok ya. Samtaem yumi yusum ol presen mane blong givhan long ol man long taem blong trabol. Be fas rod blong yusum ol presen mane ya, hemia blong mekem se gud nius i go kasem plante moa ples. Taswe, yumi mas soemaot se yumi lavem God mo ol man raonabaot long yumi.—Mat. 22:37-39.

 Ol man we oli stap sapotem wok blong ol Witnes blong Jehova long fulwol, oli save sua se ol presen mane we oli givim, ogenaesesen blong Jehova i yusum long rod we i stret. ?Yu yu rere blong givhan long ol brata mo sista we oli kasem trabol? ?Yu yu wantem sapotem wok ya blong talemaot gud nius? Sipos yes, ale taem “yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.”—Prov. 3:27.