Go long ol haf insaed long hem

Go long lis blong ol haf

Tingting Blong Yumi i Mas Wekap Blong Yumi Prea

Tingting Blong Yumi i Mas Wekap Blong Yumi Prea

“Yufala i mas wekap we tingting blong yufala i klia gud, . . . nao yufala i save prea.”—1 PITA 4:7.

1, 2. (1) ?From wanem i impoten we yumi ‘wekap we tingting blong yumi i klia gud, nao yumi save prea’? (2) ?Wanem ol kwestin we i gud yumi askem?

WAN man we bifo hem i stap sekiuriti long naet, i talem se: “Jes bifo we i brok delaet, long taem ya nao i hadwok blong man i stap wekap.” Ating ol narafala man we oli stap sekiuriti long naet, oli agri long samting ya. Yumi save skelem samting ya wetem taem we yumi stap long hem. Yumi stap long taem ya we klosap nao wol blong Setan i lus. Hem i olsem tudak, mo ol Kristin oli mas traehad blong stap wekap. (Rom 13:12) Yumi save kasem trabol sipos yumi slip long saed blong spirit. !Taswe, i impoten tumas we yumi gohed blong ‘wekap we tingting blong yumi i klia gud, nao yumi save prea!’—1 Pita 4:7.

2 From we yumi stap klosap tumas long en blong rabis wol ya blong Setan, i gud yumi askem se: ‘?Olsem wanem long prea blong mi? ?Mi mi stap yusum evri fasin blong prea, mo mi mi stap prea oltaem? ?Mi mi stap prea oltaem from ol narafala? ?Mi mi stap prea nomo from ol samting we mi nomo mi wantem mo mi nidim? ?From wanem i impoten blong mi prea blong God i sevem mi?’

YUMI MAS YUSUM EVRI FASIN BLONG PREA

3. ?Wanem sam fasin blong prea?

3 Taem Pol i raetem leta long ol Kristin long Efesas, hem i tokbaot “evri fasin blong prea.” (Efes. 6:18, NW) Taem yumi prea long Jehova, plante taem yumi askem long hem blong i givim samting we yumi nidim, mo blong i givhan long yumi blong winim ol trabol. Baebol i talem se Jehova i “stap ansa long ol prea,” mo from we hem i lavem yumi, hem i lesin long yumi taem yumi prea long hem. (Sam 65:2) Be taem yumi prea, yumi no mas askem ol samting we yumi nomo yumi nidim. Yumi mas prea blong presem Jehova, talem tangkiu long hem, mo askem strong long hem blong i mekem wan samting.

4. ?From wanem yumi mas presem Jehova oltaem, taem yumi prea?

4 I gat plante risen from wanem yumi mas presem Jehova  taem yumi prea. Wan risen hemia taem yumi tingbaot “ol bigbigfala wok we hem i mekem.” Mo tu yumi wantem presem hem from we “nem blong hem i hae we i hae.” (Ridim Ol Sam 150:1-6.) Yu traem luk long Ol Sam 150. Long sikis vas, oli talem 13 taem se yumi mas presem Jehova. Wan narafala man blong raetem Sam i soemaot se hem i lavem Jehova tumas, taem hem i singsing se: “Ol tingting blong yu i stret gud, mo from samting ya, mi mi stap leftemap nem blong yu seven taem long wan dei.” (Sam 119:164) I stret nomo we yumi presem Jehova. Taswe, yumi mas prea blong presem hem “seven taem long wan dei.” Hemia i min se oltaem.

5. ?Taem yumi prea blong talem tangkiu long Jehova, hemia i save givhan long yumi olsem wanem?

5 Wan narafala fasin blong prea, hemia blong talem tangkiu long Jehova. Long leta we Pol i raetem i go long ol Kristin long Filipae, hem i talem se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem.” (Fil. 4:6) Yumi laef long ol las dei blong wol blong Setan, mo plante man oli no stap “talem tangkiu.” From samting ya, i impoten we yumi prea wetem fulhat blong yumi, blong talem tangkiu long Jehova from ol blesing we hem i givim long yumi. Olsem nao, bambae yumi no kam olsem ol man long wol. (2 Tim. 3:1, 2) Ol man long wol oli no moa gat fasin ya blong talem tangkiu. From samting ya, sipos yumi no lukaot gud, yumi save tekem fasin blong olgeta. Be sipos yumi talem tangkiu long Jehova taem yumi prea, bambae yumi glad mo bambae yumi no komplen from ol samting long laef blong yumi. (Jud 16, NW) Taem ol hed blong famle oli prea wetem famle blong olgeta mo oli talem tangkiu long Jehova, samting ya bambae i pulum woman blong olgeta mo ol pikinini tu blong oli gat fasin ya blong talem tangkiu long Jehova.

6, 7. ?Askem strong long Jehova i minim wanem? ?Yumi save askem strong long Jehova blong hem i mekem wanem?

6 Wan narafala fasin blong prea hemia blong askem strong long Jehova. Hemia i min se yumi talemaot ol dip filing blong yumi long Jehova. ?Yumi save askem strong long Jehova blong hem i mekem wanem? Yumi save askem blong hem i givhan long yumi taem ol man oli agensem yumi, mo taem yumi kasem wan strong sik we yumi save ded from. Long taem olsem, i stret nomo blong yumi askem strong long Jehova blong i givhan long yumi. ?Be olsem wanem? ?Long ol taem ya nomo yumi save prea strong long Jehova?

7 Blong kasem ansa blong kwestin ya, i gud yumi tingbaot prea we Jisas i tijim ol man blong hem long hem, taem hem i tokbaot nem blong God, Kingdom blong God, mo samting we God i wantem. (Ridim Matiu 6:9, 10.) Wol ya i fulap long ol rabis fasin, mo ol gavman oli no save givim ol stamba samting we ol man oli nidim. From samting ya, yumi mas askem strong blong nem blong God i tabu, mo blong Kingdom blong hem i karemaot rul blong Setan. Mo tu, i gud we yumi prea blong Jehova i mekem samting we hem i wantem i kamaot long wol ya, olsem we i kamaot finis long heven. Yes, tingting blong yumi i mas wekap oltaem, mo yumi yusum evri fasin blong prea.

YUMI MAS PREA OLTAEM

8, 9. ?From wanem yumi no mas jajem Pita mo ol narafala aposol from we oli slip?

8 Pita i talem se ol Kristin oli mas ‘wekap we tingting blong olgeta i klia gud, nao oli save prea.’ Be i gat wan taem we hem tu i no wekap blong i prea. Hem i wan long ol disaepol we oli slip taem Jisas i stap prea long garen blong Getsemane. Nating se Jisas i talem long olgeta se oli ‘mas lukaot gud, oli mas prea’ oltaem, be olgeta oli no mekem.—Ridim Matiu 26:40-45.

9 Bitim we yumi jajem Pita mo ol narafala aposol from we oli slip, yumi mas tingbaot se oli taed tumas from we oli bin mekem plante samting long dei ya. Oli rerem lafet blong Pasova mo oli mekem lafet ya long naet ya. Biaen, Jisas i givim ol save long saed blong kakae blong Masta,  blong ol disaepol blong hem oli save gohed blong mekem Memoriol blong tingbaot ded blong hem. (1 Kor. 11:23-25) Baebol i talem se: “Oli sing long wan Sam, mo biaen oli aot, oli go long hil ya we nem blong hem, ‘Hil blong Tri ya Olif.’” Oli mas wokbaot longwe lelebet, i gotru long ol smosmol rod blong Jerusalem blong kasem ples ya. (Mat. 26:30, 36) Taem oli kasem ples ya, ating medel naet i pas finis. Sipos yumi stap long garen blong Getsemane long naet ya, ating yumi tu yumi slip. Ol disaepol oli taed, be Jisas i no tok daonem olgeta. Hem i talem long olgeta se: “Tru, tingting blong yufala i strong, be bodi blong yufala i slak.”

Nating se Pita i mekem mastik, be hem i lanem blong ‘wekap we tingting blong hem i klia gud, nao i save prea’ (Yu luk haf 10, 11)

10, 11. (1) ?Mastik we Pita i mekem i tijim wanem long hem? (2) ?Yu yu lanem wanem long stori blong Pita?

10 Samting we i hapen long Pita long naet ya, i mekem hem i harem nogud tumas, mo hem i lanem wan impoten lesen tu. Jisas i bin talem finis long ol disaepol blong hem se: “Long naet ya, bambae bilif blong yufala evriwan i save foldaon from mi.” Be Pita i ansa se: “!Maet bilif blong olgeta ya evriwan i save foldaon, be mi, bilif blong mi bambae i no save foldaon samtaem!” Ale Jisas i talem se bambae Pita i giaman tri taem se i no save hem. Be Pita i girap i talem se: “Nating sipos olgeta oli wantem kilim mi mi ded wetem yu, be bambae mi no save talem se mi no save yu.” (Mat. 26:31-35) Tok blong Jisas i kamtru, taem Pita i giaman se hem i no save Jisas. Biaen, taem Pita i luksave samting we hem i mekem, hem i harem nogud bitim mak, nao hem i “krae we i krae.”—Luk 22:60-62.

11 Mastik we Pita i mekem i tijim hem se hem i no mas trastem hem wan tumas. Prea nao i givhan long hem. ?Yumi save samting ya olsem wanem? From we Pita nao i givim advaes ya se: ‘Yufala i mas wekap we tingting blong yufala i klia gud, nao yufala i save prea.’ ?Olsem wanem? ?Yumi stap folem advaes ya? ?Yumi stap prea oltaem blong soemaot se yumi dipen long Jehova? I gud we yumi lesin long advaes blong aposol Pol we i talem se: “Man we i ting se i stap stanap strong, hem i mas lukaot gud, blong bambae i no foldaon bakegen.”—1 Kor. 10:12.

JEHOVA I ANSA LONG PREA BLONG NEHEMAEA

12. ?From wanem Nehemaea i soemaot wan gudfala eksampol long yumi?

12 Yumi save tingbaot Nehemaea we i stap karem waen blong King Ataksekses blong Pesia. Hemia klosap 450 yia B.K.T. * Nehemaea i prea long Jehova wetem fulhat blong hem. Hemia wan gudfala eksampol long yumi. Baebol i talem se blong plante dei finis, Nehemaea i stap ‘livim kakae mo i stap prea long God’ from ol man Isrel long Jerusalem we oli stap long trabol. (Neh. 1:4) Taem Ataksekses i askem long Nehemaea se from wanem fes blong hem i nogud, Nehemaea i talemaot trabol we i kasem Jerusalem. Biaen King i askem long hem se: “?Bambae mi  mi mekem olsem wanem blong givhan long yu?” Baebol i talem se: “Nao [Nehemaea] i prea long God blong heven.” (Neh. 2:2-4) ?Wanem samting i kamaot from? Jehova i ansa long prea blong hem mo i mekem rod blong givhan long ol man Isrel. (Neh. 2:5, 6) !Ating samting ya i mas mekem bilif blong Nehemaea i strong!

13, 14. ?Yumi mas mekem wanem blong bilif blong yumi i strong, mo no letem Setan i winim yumi?

13 Sipos yumi prea oltaem olsem Nehemaea, bilif blong yumi bambae i kam strong moa. Setan i no gat sore, mo plante taem hem i spolem yumi taem yumi no gat paoa. Sipos yumi sik bigwan no tingting blong yumi i foldaon, maet yumi harem se God i no tinghae long taem we yumi spenem long wok blong prij evri manis. Samfala oli stap harem nogud yet, taem oli tingbaot ol mastik we oli mekem bifo. Setan i wantem we yumi harem se yumi nating nomo. Hem i traem blong yusum ol nogud tingting olsem, blong mekem bilif blong yumi i no moa strong. Be sipos tingting blong yumi i wekap blong yumi prea, bambae bilif blong yumi i stap strong oltaem. Baebol i talem se bilif blong yumi i olsem wan bigfala sil we i save “blokem ol ara ya blong Setan, we faea i laet long hem.”—Efes. 6:16.

Sipos yumi wekap we tingting blong yumi i klia gud blong yumi prea, bambae yumi stanap strong taem ol samting oli traem yumi (Yu luk haf 13, 14)

14 Sipos tingting blong yumi i wekap blong yumi prea, bambae yumi no sek taem wan samting we yumi no tingbaot i traem yumi, mo bambae yumi no lego Jehova. Taem wan samting i traem yumi, yumi mas prea long God kwiktaem, olsem Nehemaea i mekem. Jehova nomo i save givhan long yumi blong yumi stanap strong.

YUMI MAS PREA FROM OL NARAFALA

15. ?Wanem ol kwestin we i gud yumi askem?

15 Jisas i prea strong from Pita blong bilif blong hem i no foldaon. (Luk 22:32) Wan Kristin man bifo we nem blong hem Epafras, i folem fasin blong Jisas blong prea from ol narafala. Hem i traehad blong prea from ol Kristin long Kolosi. Pol i talem long ol Kristin ya se: “Oltaem [Epafras]  i stap prea strong from yufala. Hem i stap askem long God, blong bambae yufala i stanap strong long bilif blong yufala, we yufala i kasemgud fasin blong Masta blong yumi mo yufala i savegud hem, mo we bambae yufala i strong blong mekem olgeta samting we God i wantem.” (Kol. 4:12) I gud yumi askem se: ‘?Mi mi traehad blong prea strong from ol Kristin brata raon long wol? ?Hamas taem mi prea from ol brata mo sista we oli kasem trabol long wan disasta? ?Wetaem i laswan taem we mi traehad blong prea from olgeta we oli gat bigfala wok long ogenaesesen blong Jehova? ?Long ol dei we i pas, mi mi prea from ol brata mo sista long kongregesen we oli kasem hadtaem?’

16. ?I impoten we yumi prea from ol narafala? Yu eksplenem.

16 Taem yumi prea long Jehova from ol brata mo sista blong yumi, samting ya i save givhan bigwan long olgeta. (Ridim 2 Korin 1:11.) I tru se Jehova i no nidim we yumi prea bakegen mo bakegen, blong hem i givhan long ol narafala. Nating se i olsem, hem i glad blong luk se yumi tingbaot ol narafala long prea, mo hem i ansa long prea blong yumi. From samting ya, yumi mas tingbaot se i wok blong yumi blong prea from ol narafala. Yumi mas mekem olsem Epafras. Yumi soemaot se yumi lavem ol Kristin brata mo sista blong yumi mo yumi tingbaot olgeta, taem yumi traehad blong prea from olgeta. Sipos yumi mekem olsem, bambae yumi harem gud from we Baebol i talem se: “Man we i stap givim presen i go, hem i save harem gud moa, i winim man we i stap kasem presen blong hem.”—Wok 20:35.

KLOSAP NAO BAMBAE GOD I SEVEM YUMI

17, 18. Sipos yumi wekap we tingting blong yumi i klia gud blong yumi prea, ?samting ya bambae i givhan long yumi olsem wanem?

17 Jes bifo we Pol i talem se “klosap tudak i finis, delaet i kamtru long yumi,” hem i raetem se: “Yufala i mas mekem olsem, from we yufala i savegud taem ya we yumi stap long hem naoia. Hem i taem blong yufala i wekap, yufala i no moa slip. Fastaem, taem we yumi jes bilif long Kraes, taem ya we bambae [God] i sevem yumi i stap longwe lelebet long yumi. Be naoia, taem ya i stap kam klosap moa.” (Rom 13:11, 12) Niufala wol ya we God i promes long hem i klosap, mo i no longtaem, God bambae i sevem yumi. Naoia i no moa taem blong yumi slip long saed blong spirit. Yumi wanwan i mas gat taem blong prea long Jehova. Yumi no mas letem ol samting long wol ya, oli tekemaot taem ya. Be yumi mas ‘wekap we tingting blong yumi i klia gud, nao yumi save prea.’ Sipos yumi mekem olsem, bambae yumi ‘tabu, yumi man blong God, mo yumi mekem ol fasin we hem i wantem,’ taem yumi stap wet blong dei blong Jehova i kamtru. (2 Pita 3:11, 12) Fasin blong laef blong yumi bambae i soemaot sipos yumi stap wekap gud long saed blong spirit, mo sipos yumi bilif strong se en blong rabis wol ya i klosap. Yumi mas “prea oltaem.” (1 Tes. 5:17) Yumi mas mekem olsem Jisas. Yumi mas lukaot wan ples we i kwaet blong yumi save prea long Jehova. Sipos yumi tekem taem blong prea long Jehova, bambae yumi kam klosap long hem. (Jem. 4:7, 8) !Hemia wan nambawan blesing!

18 Baebol i talem se: “Long laef blong Kraes long wol ya, hem i stap prea long God, i stap askem ol samting long hem, i stap krae bigwan, we wota blong ae blong hem i stap ron. God i gat paoa blong sevem hem blong hem i no ded, mo from we tingting blong Kraes i stap daon, God i harem hem.” (Hib. 5:7) Jisas i prea long Jehova mo i askem strong long hem blong i givhan long hem. Mo hem i holemstrong long Jehova gogo kasem we hem i ded. From samting ya, Jehova i mekem hem i laef bakegen, mo i givim laef long hem long heven we bambae hem i no moa save ded samtaem. Yumi tu yumi save holemstrong long Jehova nomata wanem samting i traem yumi long fiuja. Yes, sipos oltaem yumi wekap we tingting blong yumi i klia gud blong yumi prea, bambae yumi save kasem laef we i no save finis.

[Futnot]

^ par. 12 B.K.T. i minim Bifo Kristin Taem.