Tok Blong Jeova i Wan Samting We i Laef

Ol Bigfala Poen Long Buk Blong Fas Kronikel

KLOSAP 77 yia i pas nao we ol man Jiu oli kambak long ples blong olgeta afta we oli bin wok slef long Babilon. Tempol ya we Distrikejen Serubabel i bin wokem, i stanap blong 55 yia. Ol man Jiu oli kambak long ples blong olgeta from wan impoten risen, hemia blong stanemap bakegen trufala wosip long Jerusalem. Be biaen, olgeta oli no moa glad blong wosip long Jeova. I rili nidim blong leftemap tingting blong olgeta bakegen, mo hemia nao wanem we buk blong Fas Kronikel long Baebol i mekem long olgeta.

Buk blong Fas Kronikel i tokbaot ol samting we oli hapen long wan taem blong 40 yia, stat long taem we King Sol i ded go kasem taem we King Deved i ded. Pris Esra nao i raetem buk ya long yia 460 B.K.T. * Yumi intres long buk ya blong Fas Kronikel from we hem i givhan long yumi blong kasem save fasin blong mekem wosip long tempol mo i givimaot save long saed blong laen blong Mesaea. From we buk ya i haf blong Baebol, taswe ol toktok we oli stap insaed long hem oli save mekem bilif blong yumi i kam strong mo oli mekem se save we yumi gat long Baebol i gru moa.​—Hibrus 4:12.

WAN IMPOTEN LIS BLONG OL NEM

(1 Kronikel 1:​1–9:44)

Lis ya blong ol nem we Esra i raetem i nambawan from tri risen: blong lukaotgud se ol man ya nomo we oli gat raet oli save holem wok blong pris, blong halpem olgeta blong luksave pis graon we oli save kasem olsem presen blong ol bubu blong olgeta, mo blong mekem se laen we i blong go kasem Mesaea i no lus. Lis ya bambae i givhan long ol man Jiu blong lukluk i gobak long taem blong faswan man mo woman bifo. I gat ten laen blong man stat long Adam i go kasem Noa mo narafala ten laen bakegen stat long Noa i go kasem Ebraham. Afta we Esra i raetem nem blong ol pikinini boe blong Ismael, ol pikinini boe blong Ebraham we hem i gat wetem woman slef blong hem Ketura, mo ol pikinini boe blong Esao, hem i tokbaot laen we i kamaot long ol 12 pikinini boe blong Isrel.​—1 Kronikel 2:1.

I gat wan longfala lis blong nem blong ol man we oli kamaot long laen blong Juda from we King Deved i kamaot long laen ya nao, we hem i laen blong ol king. I gat 14 laen blong man stat long Ebraham i go kasem Deved mo 14 laen bakegen stat long Deved i go kasem taem we ol man Jiu oli go kalabus long Babilon. (1 Kronikel 1:​27, 34; 2:​1-15; 3:​1-17; Matiu 1:17) Esra i mekem wan lis blong ol nem blong olgeta we oli kamaot long laen blong Isrel long narasaed Jodan Reva long is, mo i joenem ol laen blong Livae tu long lis ya. (1 Kronikel 5:​1-24; 6:1) Biaen Esra i raetem nem blong ol narafala laen blong Isrel we oli stap long narasaed Jodan Reva long wes mo laen blong Benjamin tu. (1 Kronikel 8:1) Mo tu, Esra i raetem nem blong ol faswan man we oli kambak stap long Jerusalem afta we oli bin wok slef long Babilon.​—1 Kronikel 9:​1-16.

Ansa Blong Sam Kwestin Long Saed Blong Baebol:

1:18​—?Hu i papa blong Sela, hem i Kaenan no Apaksad? (Luk 3:​35, 36) Apaksad nao i papa  blong Sela. (Jenesis 10:24; 11:12) Tok ya “Kaenan” long Luk 3:36 i wan narafala tok blong talem “ol man Koldia.” Sipos i olsem, bambae faswan hanraet i rid se “pikinini blong man Koldia ya Apaksad.” Mo tu maet tufala nem ya Kaenan mo Apaksad i blong tokbaot semfala man nomo. Yumi no mas fogetem se impoten samting hemia se tok ya “pikinini blong Kaenan” i no stap long samfala hanraet.​—Luk 3:36.

2:15​—?Deved i namba seven boe blong Jese? Nogat. Jese i gat eit boe mo Deved i lasbon long ol boe ya. (1 Samuel 16:​10, 11; 17:12) Wan long ol boe blong Jese i ded taem hem i yang yet taswe hem i no gat pikinini blong hem. From we hem i no gat pikinini, bambae hem i no gat wan laen blong hem taswe Esra i no raetem nem blong hem.

3:17​—?Sealtiel i pikinini blong Jehoeakin (Jekonaea). ?Ale, from wanem Luk 3:27 i talem se Sealtiel i pikinini boe blong Neri? Jehoeakin i papa blong Sealtiel. Be, ating Neri i bin givim gel blong hem long Sealtiel blong i kam waef blong hem. Ale, Luk i tokbaot man blong gel ya blong Neri olsem se hem i pikinini blong Neri. Luk i mekem sem fasin ya tu, taem hem i tokbaot Josef se hem i pikinini blong Heli, be Heli i papa blong Meri.​—Luk 3:23.

3:​17-19​—?Olsem wanem Serubabel, Pedaea mo Sealtiel oli famle? Serubabel hem i pikinini boe blong Pedaea we i brata blong Sealtiel. Be, samtaem Baebol i tokbaot Serubabel olsem pikinini boe blong Sealtiel. (Matiu 1:12; Luk 3:27) Maet i olsem from we Pedaea i ded mo Sealtiel nao i lukaot long Serubabel. No maet taem Sealtiel i ded we hem i no gat pikinini boe blong hem, Pedaea i mared long woman blong Sealtiel mo tufala i lukaot long Serubabel we i kam olsem fasbon long famle ya.​—Dutronome 25:​5-10.

5:​1, 2​—?Wanem samting we Josef i kasem from raet we hem i gat olsem fasbon? Josef i kasem tu samting olsem we wan fasbon pikinini i gat raet blong kasem. (Dutronome 21:17) Taswe hem i kam papa blong tu laen​—laen blong Efrem mo laen blong Manase. Ol wanwan narafala man Isrel oli kam papa blong wan laen nomo.

Ol Lesen Blong Yumi:

1:1–9:44. Ol laen blong man stat bifo finis i kam oli pruvum se fulwan plan ya long saed blong tru wosip i stanap long wan trufala samting, i no wan kastom stori.

4:​9, 10. Jabes i prea wetem fulhat blong hem long Jeova blong i givim bigfala graon long hem bakegen blong moa man we oli fraetgud long God oli save stap long hem. Jeova i ansa long prea blong hem. Taem yumi stap wok strong long wok ya blong mekem disaepol, yumi nidim tu blong prea long Jeova wetem fulhat blong yumi blong moa man oli kam mekem wosip long Hem.

5:​10, 18-22. Taem King Sol i rul, ol laen blong Isrel we oli stap long is saed blong Jodan Reva oli winim ol laen blong Hega long faet, nating se namba blong ol man long laen blong Hega i bigwan moa. Oli save winim ol laen ya from we ol soldia blong olgeta oli trastem Jeova mo oli prea long hem blong i givhan long olgeta. I gud yumi trastem Jeova fulwan taem yumi stap mekem faet ya long saed blong spirit agensem ol enemi blong yumi we oli plante i bitim long yumi.​—Efesas 6:​10-17.

9:​26, 27. Wok ya we ol Livaet oli mekem blong gad long ol doa i wan impoten wok. Oli holem ol ki blong ol doa blong ol rum we oli tabu insaed long tempol. Oli mas ol man we ol narafala oli save trastem olgeta evri dei taem oli stap openem ol doa. Jeova i givim wan wok long yumi, hemia blong go luk ol man long ol teritori blong yumi  mo halpem olgeta blong oli kam mekem wosip long Jeova. Yumi mas ol man we ol narafala oli save trastem yumi olsem ol Livaet ya we oli stap gad long ol doa.

DEVED I KING

(1 Kronikel 10:​1–29:30)

Haf ya i stat wetem stori blong King Sol mo ol trifala boe blong hem we oli bin ded long faet ya agensem ol man Filistia long Hil blong Gilboa. Deved, pikinini boe blong Jese, i kam king long laen blong Juda. Olgeta man long ol laen blong Isrel oli kam hivap long Hebron mo oli putumap hem i king long Isrel. (1 Kronikel 11:​1-3) Smoltaem biaen hem i winim Jerusalem. Biaen, ol man Isrel oli tekem bokis blong kontrak i go long Jerusalem “we oli stap singsingaot bigwan, mo oli glad we oli glad tumas. . . . oli stap blu long trampet, . . . mo oli stap plei gita.”​—1 Kronikel 15:28.

Deved i talem se hem i wantem tumas blong wokem wan haos blong trufala God. Jeova i wantem se Solomon nao i wokem haos blong Hem be hem i mekem wan kontrak wetem Deved long saed blong wan Kingdom. Jeova i mekem Deved i winim plante enemi blong Isrel long faet. Frut we i kamaot from wan sensas we i no folem loa hemia se 70,000 man oli ded. Afta we enjel i talem long Deved blong i wokem wan olta blong Jeova, Deved i girap i go pemaot wan pis graon long man ya Aravnaha (Onan) we i laen blong Jebus. Deved i stat “mekemrere plante samting” blong wokem wan “nambawan” haos blong Jeova long graon ya. (1 Kronikel 22:5) Deved i seraotem ol Livaet long ol grup mo i givim wok long olgeta. Long Baebol, Fas Kronikel nomo i tokbaot moa ol wok ya we ol Livaet oli mekem. King mo ol man blong hem oli glad blong givim fri nomo ol samting blong wokem haos blong God. Deved i rul 40 yia nao i ded. Hem i wan king we i “rijman, mo ol man oli stap ona gud long hem, mo biaen, pikinini blong hem Solomon i tekem ples blong hem i kam king.”​—1 Kronikel 29:28.

Ansa Blong Sam Kwestin Long Saed Blong Baebol:

11:11​—?From wanem vas ya i talem se Jasobeam i kilim i ded 300 man, be long semfala stori blong 2 Samuel 23:8 i talem se hem i kilim 800 man? Long ol trifala strong man blong Deved, Jasobeam nao we narafala nem blong hem Josebasebet, i lida blong olgeta. Tufala narafala strong man ya hemia Eleasara mo Sama. (2 Samuel 23:​8-11) Risen from wanem tufala stori ya oli defren hemia se ating tufala i tokbaot tu defren faet we semfala man nomo i mekem.

11:​20, 21​—?Abisae i holem wan posisen we i sem mak long trifala strong man ya blong Deved? Abisae i no wan long ol trifala strong man blong Deved. Seken Samuel 23:​18, 19, i talem se Abisae i lida blong 30 man mo hem i gat hae nem moa i bitim ol narafala man ya. Abisae i karem hae nem we i klosap sem mak long ol trifala strong man ya blong Deved from we hem i winim wan faet we i klosap sem mak long faet we Jasobeam i winim.

12:8​—?Long wanem fasin fes blong ol soldia blong Gad i olsem “fes blong laeon”? Ol soldia ya oli bin joen long ol soldia blong Deved long draeples. Ol hea blong olgeta oli gru i kam longfala. Taem oli gat ol longfala hea, samting ya i mekem we oli luk olsem laeon we i wael mo i strong.

13:​5, NW​—?Wanem ya “reva blong Ijip”? Samfala oli ting se tok ya i minim wan haf blong Nael Reva. Be, bighaf blong ol man oli kasem save se tok ya i minim “bigfala krik ya we i mak blong graon blong ol man Ijip,” long saotwes blong Promes Lan.​—Namba 34:​2, 5; Jenesis 15:18.

16:​1, 37-40; 21:​29, 30; 22:19​—?Wanem plan blong wosip we i gohed long Isrel stat long taem we oli tekem Bokis blong Kontrak i go long Jerusalem kasem taem we haos tempol i finis? Taem Deved i tekem Bokis ya i go long Jerusalem mo i  putum insaed long wan smol haos tapolen we hem i wokem, Bokis ya i no bin stap long haos tapolen blong God blong plante yia. Bokis ya i stap nomo insaed long smol haos tapolen ya. Haos tapolen blong God i stap long Gibeon mo long ples ya, Hae Pris ya Sadok mo ol brata blong hem oli stap mekem ol sakrefaes we i folem Loa. Plan ya i gohed olsem gogo kasem taem we oli finisim blong wokem tempol long Jerusalem. Taem tempol i finis, oli tekemaot haos tapolen blong God long Gibeon mo oli tekem i go long Jerusalem. Mo oli karem Bokis blong Kontrak i kam insaed long Rum ya we i Tabu we i Tabu blong tempol.​—1 King 8:​4, 6.

Ol Lesen Blong Yumi:

13:11. Taem ol traehad blong yumi oli no karem frut, i gud we yumi lukluk gud from wanem i olsem i bitim we yumi kam kros mo yumi blemem Jeova. Deved i mekem olsem. Hem i lanem samting from ol mastik blong hem mo biaen hem i karem Bokis blong kontrak i go long Jerusalem folem rod we i stret blong mekem. *

14:​10, 13-16; 22:​17-19. Oltaem yumi mas kam klosap long Jeova tru long prea mo lukaot ol rod blong hem bifo we yumi mekem eni wok we i save spolem yumi long saed blong spirit.

16:​23-29. Wosip blong Jeova i mas stap oltaem long fasples long laef blong yumi.

18:3. Jeova i Man we i mekem ol promes blong hem oli kamtru. Tru long Deved, Jeova i mekem promes blong hem i kamtru, we hem i talem se bambae i givim olgeta kantri blong Kenan stat long “krik ya long saot we i mak blong graon blong ol man Ijip, i go kasem Yufretes Reva long not” long olgeta we oli kamaot biaen long laen blong Ebraham.​—Jenesis 15:18; 1 Kronikel 13:5.

21:​13-15. Jeova i stopem enjel blong i no moa gohed blong spolem ol man long Jerusalem from we Jeova i gat filing long ol man blong hem we oli stap safa. Yes, ‘Jeova i gat sore.’ *

22:​5, 9; 29:​3-5, 14-16. Nating se Jeova i no talem long Deved blong i wokem haos tempol blong hem be Deved i soemaot we hem i wantem givim samting wetem gladhat blong hem. ?From wanem? From we hem i luksave se olgeta samting we hem i kasem finis oli kamaot long Jeova we fasin blong hem i gud tumas. Semfala tingting no filing ya i mas pusum yumi blong givim presen wetem gladhat blong yumi.

24:​7-18. Plan ya blong seraotem ol pris long 24 grup we Deved i stanemap, i stap gohed yet taem enjel blong Jeova i kamtru long Sekaraea, papa blong Jon Baptaes, mo i talemaot se bambae Jon i bon. Long taem ya Sekaraea i stap mekem wok blong pris long tempol from we hem i wan memba blong “wan grup blong ol pris we nem blong grup ya Abia.” (Luk 1:​5, 8, 9) Tru wosip i joen wetem stori blong ol trufala man be i no ol kastom stori. Yumi save kasem plante blesing taem yumi joen wetem “slef ya we i stret mo waes” long wosip blong Jeova tede we i folem oda.​—Matiu 24:​45, NW.

Mekem Wok Blong Jeova ‘Wetem Wan Tingting We i Glad’

Fas Kronikel i no jes tokbaot ol laen blong ol man. Hem i tokbaot tu, taem we Deved i karem Bokis blong Kontrak i go long Jerusalem, ol bigfala faet we Deved i winim, taem we ol laen blong Isrel oli mekemrere blong wokem haos tempol mo taem we Deved i seraotem ol Livaet long ol grup blong oli mekem wok olsem pris. I sua se olgeta samting we Esra i tokbaot long Fas Kronikel i bin givhan long ol man Isrel mo i halpem olgeta blong gat tingting we i strong moa long saed blong wosip blong Jeova long haos tempol.

!Deved i soem wan nambawan eksampol blong putum wosip blong Jeova long fasples long laef blong hem! Deved i wantem mekem wil blong God i bitim we hem i lukaot blong kasem spesel wok blong leftemap hem wan nomo. I gud yumi folem advaes blong Deved se yumi mas mekem wok blong Jeova ‘long olgeta tingting blong yumi, mo wetem wan tingting we i glad.’​—1 Kronikel 28:9.

[Ol Futnot]

[Tok blong pija long pej 8]

(Lukluk niuspepa)

4026 B.K.T. Adam Ol Laen stat long Adam go

kasem Noa (1, 056 Yia)

130 Yia ⇩

 

Set

 

105 ⇩

 

Enos

 

90 ⇩

 

Kenan

 

70 ⇩

 

Mahalalel

 

65 ⇩

 

Jared

 

162 ⇩

 

Inok

 

65 ⇩

 

Metusela

 

187 ⇩

 

Lamek

 

182 ⇩

 

2970 B.K.T. Noa 2970 B.K.T. NOA i bon

Ol laen stat long Noa go

502 Yia ⇩ kasem Ebraham (952 yia)

 

Sem

BIGFALA WOTA I RON 2370 B.K.T.

 

100 ⇩

 

Apaksad

 

35 ⇩

 

Sela

 

30 ⇩

 

Eba

 

34 ⇩

 

Peleg

 

30 ⇩

 

Rehu

 

32 ⇩

 

Serug

 

30 ⇩

 

Naho

 

29 ⇩

 

Teraha

 

130 ⇩

 

2018 B.K.T. Ebraham 2018 B.K.T. EBRAHAM i bon

Stat long Ebraham go kasem Deved i gat:

100 Yia 14 laen blong man (911 yia)

 

Aesak

 

60 ⇩

 

Jekob

 

samwe 88 ⇩

 

Juda

 

⇩

Peres

 

⇩

 

Hesron

 

⇩

 

Ram

 

⇩

 

Aminadab

 

⇩

 

Nason

 

⇩

 

Salmon

 

⇩

 

Boas

 

⇩

 

Obed

 

⇩

 

Jese

 

⇩

 

1107 B.K.T. DEVED i bon