Bushe Ifilonganino fya Mapepo Fifwile Ukulalwako Inkondo?

Ba Alberto abaali abashilika pa myaka mupepi na 10 batile: “Ilyo twali mu kuya ku nkondo, shimapepo alitupaalile. Atile, ‘Lesa ali na imwe.’ Lelo natontonkenye ukuti, ‘Ndeya mu kwipaya abantu, lelo Baibolo itila “wilaipaya.”’”

Ba Ray baali bashilika ilyo kwali Inkondo ya Calo iya Bubili. Bushiku bumo baipwishe shimapepo ukuti: “Ilyo mwacingila muno mu bwato, mwacipepelela fwe bashilika ukuti tukayecimfya. Bushe abalwani besu na bo tabalecita cimo cine?” Shimapepo ayaswike ukuti, te kuti tumfwikishe ifyo Shikulu acita ifintu.

Mwipapa sana nga tamumfwikishe umo uyu shimapepo aloseshe.

BUSHE CINSHI BAIBOLO ISAMBILISHA?

Yesu atile, ifunde ilyacindama sana pa mafunde ya kwa Lesa lya kuti, “uletemwa umunobe nge fyo waitemwa we mwine.” (Marko 12:31) Bushe Yesu atile tufwile ukutemwa abanensu pa mulandu fye wa cifulo uko bekala nelyo icalo bafumako? Awe, iyo. Aebele abasambi bakwe ukuti: “Nga muletemwana, e lyo bonse bakeshiba ukuti muli basambi bandi.” (Yohane 13:34, 35) Bali no kutemwana sana ica kuti na bantu bonse e ko bali no kubeshibila ukuti basambi ba kwa Yesu. Na kuba, mu nshita ya kwipaya abasambi banabo, e baali no kubafwila.

Abena Kristu ba kubalilapo balekonka ifyo Yesu alandile. Icitabo ca The Encyclopedia of Religion citila: “Bashimapepo ba mu macalici ya kubalilapo bamo, ukubikako fye na Tertullian na Origen, balisumiine ukuti Abena Kristu tabalefwaya ukwipaya abantu banabo, ne ci e calengele balekaana ukuba abashilika ba bena Roma.”

BUSHE INTE SHA KWA YEHOVA BALALWAKO INKONDO?

Apo Inte sha kwa Yehova bekala mu fyalo ifyalekanalekana, ifyalo nga filelwishanya, na bo bene balaculilamo. Na lyo line, balesha sana na maka ukulatemwa abantu bambi.

Ku ca kumwenako, ilyo kwali ukwipayana kwa baHutu na baTutsi mu 1994 ku Rwanda, Inte sha kwa Yehova shena tashaleipayako abantu bambi. Na kuba, baNte ba mitundu yalekanalekana baleibika mu kaposa mweo pa kuti fye bacingilile abanabo. Ilyo baikete baNte babili abaHutu abacingilile bamunyinabo abaTutsi, abashilika abaHutu abo beta ati ba Interahamwe batile, “Twalamwipaya pantu ni mwe mulengele abaTutsi ukubutuka.” Ku ca bulanda, baNte bonse babili abaHutu, balibepeye.—Yohane 15:13.

Bushe kuti mwatila ifyo Inte sha kwa Yehova shicita filomfwana na mashiwi Yesu alandile pa kuba no kutemwa kwa cine cine?

[Abatusuminishe ukubomfya icikope]

Based on U.S. Army photo

[Amashiwi pe bula 5]

Bushe intungulushi sha mapepo shilasambilisha abantu ukuba no kutemwa kwa Bwina Kristu?