Ababelenga Ino Magazini Balepusha Ukuti

Bushe Lesa Alasenda Abana Pa Kuti Babe Bamalaika Ku Muulu?

Umwana umunono nga afwa, ifibusa fya lupwa lufwililwe balesha ukusansamusha abafwililwe pa kubeba ukuti, “Lesa afwile alefwaya malaika na umbi ku muulu.” Bushe imwe kuti mwatipo shani, bushe ifi balanda fya cine?

Kwena nga cishinka ukuti Lesa e ulenga abana abanono ukufwa pa kuti akwete bamalaika na bambi ku muulu, ninshi takwata luse kabili mubi. Lelo Baibolo yena te fyo ilanda iyo. (Yobo 34:10) Umufyashi umwaume uwakwata uluse, te kuti asende umwana wa bene ukumufumya ku bafyashi bakwe no kumutwala ku lupwa lwakwe pa kuti lukulileko. Nomba takwaba umufyashi uuli onse pano calo uwaba no luse nga Yehova, pantu ukutemwa e mibele ikalamba akwata. (1 Yohane 4:8) Pa mulandu ne citemwiko icikalamba akwata, te kuti acite icintu ca bunkalwe ica musango yu.

Ipusheni mwe bene ukuti, ‘Bushe kwena Lesa alafwaya bamalaika na bambi ku muulu?’ Baibolo itila imilimo yonse iyo Lesa abomba isuma kabili yalifikapo. (Amalango 32:4) Balya bene bamalaika iminshipendwa abo abumbile, e bo alefwaya kabili tababuliile. (Daniele 7:10) Bushe nalimo Lesa alilufyenye no kupanga bamalaika abanono? Awe! Lesa Wa Maka Yonse te kuti apange icilubo ca musango uyu. Yehova kwena alisala abantunse bamo abakaba bamalaika mu Bufumu bwa mu muulu, lelo pa nshita bafwilapo tababa abaice.—Ukusokolola 5:9, 10.

Umulandu na umbi Lesa ashingasendela abana abanono ukubafumya pe sonde no kubasangusha bamalika ku muulu, wa kuti ifi te fyo Lesa umwine alefwaya abana ukuba ukufuma fye pa kutendeka. Mwi bala lya Edeni, Lesa aebele Adamu na Efa ati: “Fyaleni, fuleni, kumaneni pe sonde no kulimapo.” (Ukutendeka 1:28) Abana bupe ukufuma kuli Lesa, kabili balicindama pantu nga batwalilila ukufula, ukufwaya kwa kwa Lesa ukwa kuti isonde lisulemo abantu abalungama e lyo kwingacitika. Talefwaya ukuti abana baleikala fye pe sonde inshita inono e lyo pa numa basanguke malaika. Baibolo yalilondolola bwino ukutila abana “bupyani ubufuma kuli Yehova.” (Amalumbo 127:3) Bushe Yehova, Lesa wa citemwiko, kuti apokolola ubupe ubo apeele abafyashi? Awe nakalya!

Umwana nga afwa ukwabula ukwenekela abafyashi balaba no bulanda nga nshi kabili imitima ilakalipa icine cine. Lelo bushe umwana nga afwa ninshi calaala capwa? Baibolo yalaya ukuti Lesa akabuusha iminshipendwa ya bantu abafwa pa kuti bakekale muli paradaise pano pene pe sonde. Elenganyeni ifyo cikawama ilyo abana bakabuuka ne mibili iisuma no kuba na balupwa lwabo na kabili. (Yohane 5:28, 29) Lesa afwaya abaice ukukula, ukwikala bwino, no kusambilila pali ena ne fyo afwaya isonde ukuba. Kanshi abana abanono abafwa tabaya ku muulu no kusanguka bamalaika, lelo balolela ukwisabuuka no kwikala pano pene pe sonde muli paradaise. Nomba line ilyo Kabumba watutemwa akalateka, bonse abakalamba na banono bakalasekelela mu kupepa Yehova Lesa umuyayaya.