Ni Lesa Fye E Wingapususha Isonde

“ICINTU CISUMA ICABUUTA KABILI ICA BLUU.” Ifi e fyo umuntu umo uwasambilila pa fya mu muulu, Edgar Mitchell, alondolwele isonde ilyo amwene ifyo limoneka mu mfifi.

Lesa alibombeshe pa kupangila abantunse isonde. Ilyo apangile isonde bamalaika ‘baliweleshe.’ (Yobo 38:7) Ilyo twasambilila pa fintu fya kupapusha ifyaba pe sonde, na ifwe kuti twawelesha nelyo ukutasha Lesa. Pano isonde paliba ifintu ifingi ifilenga ukuti ifya mweo ne fimenwa filoba. Ku ca kumwenako, ifimenwa fibomfya ulubuuto ukufuma ku kasuba, umwela wa carbon dioxide, e lyo na menshi pa kuti fi-ipangile ifya kulya. Ici cilenga ukuti kuleba umwela wa oxygen, uufwaikwa sana pa kuti tutwalilile aba mweo.

Baibolo itila Lesa apeele umuntunse umulimo wa kusakamana isonde. (Ukutendeka 1:28; 2:15) Lelo pa kuti ifintu fitwalilile ukuba bwino pano isonde, umuntu aalingile ukucindamika ifyalipo. Na kuba, aalingile ukutemwa isonde apeelwe ukwikalamo. Aalingile ukufwaya ukulalisunga bwino nga filya fine lyapangilwe bwino. Lelo umuntu alikwete insambu ya kuisalila ifyo umwine alefwaya ukucita, kanshi nga alefwaya kuti aonaula isonde no kukaanalisunga bwino. Kabili ifi fine e fyo acita. Pa mulandu wa kuti umuntu ali-itemwa kabili wa mulekelesha, ifyafumamo fyalibipa nga nshi.

Ifyabipa fimo ifyafumamo ni ifi: (1) Ukubungaula ifimuti kulelenga ukuti umwela wa carbon dioxide ufule nga nshi, kabili ici cilelenga imicele ukulabipa icine cine. (2) Ukubomfya sana imiti ya kwipailako utushishi kulelofya utushishi utwingi nga nshi utubomba incito iyacindama nga nshi, pamo ngo kulenga ifimenwa ukutwala. (3) Ukwipaya sana isabi e lyo no kukowesha babemba ne mimana kulelenga isabi ukuya lilecepelako nga nshi. (4) Ukukanabomfya bwino ifya pano calo kulelenga ukuti ficepe sana kabili baleti ici cilelenga isonde ukulakaba nga nshi. Abasambilila bamo baleti ukusunguluka kwa menshi makasa aya ku fitungu fyatalalisha ifya ku kapinda ka ku kuso na ku kulyo e kulelanga ukuti isonde lilekaba nga nshi.

Apo shino nshiku kulecitika ifintu ifingi pamo nga ifinkukuma, ifilala, ifipowe, imfula ukulokesha, e lyo na mafya yambi aya musango uyu, bamo kuti batila isonde na lyo nomba nalikalipa, e co lilecushisha abantu. Lesa apeele abantu isonde ukuti baleikalapo ukwabula ukulipila. (Ukutendeka 1:26-29) Lelo, ifilecitika muno nshiku filelanga ukuti abantu abengi tabafwaya ukusunga bwino lino isonde ilyayemba. Nomba abantu babika fye amano ku fyo bafwaya fye ukucita e lyo na ku milimo yabo. Tabasunga bwino isonde, kabili nge fyo Ukusokolola 11:18 kwasobele, abantu “baleonaula isonde.”

Ukusesema kwa mu Baibolo kulanga ukuti Lesa Wa Maka Yonse, Yehova, Kabumba wa fyonse ifyaba pa calo, alisosa ukuti inshita naifika iya kulofya abantu abashisunga bwino isonde. (Sefania 1:14; Ukusokolola 19:11-15) Ilyo isonde talilaonaikilila, Lesa akacitapo cimo, bwangu bwangu. * (Mateo 24:44) Cine cine, ni Lesa fye e wingapususha isonde.

[Futunoti]