BUSHE MULEIBUKISHA?

Bushe mwalibelenga bwino bwino bamagazini ba Ulupungu lwa kwa Kalinda aba nomba line? Moneni nga kuti mwayasuka ifipusho ifili pe samba:

Bushe Abena Kristu balingile ukubomfya Baibolo kwati ya maleele?

Abantu abengi basumina ukuti nga bakupukula Baibolo pe bula ilili lyonse no kubelenga icikomo icili conse ico babalilapo ukumona, ninshi ifilembelwe pali ico cikomo e fyalabafwa. Abena Kristu ba cine tababomfya Baibolo muli uyu musango. Lelo, balabelenga Baibolo no kukonka ifyo isambilisha no kwishiba ifyo Lesa atungulula.—12/15, ibula 3.

“Calo” nshi icileya?

“Icalo” icileya bantu abashicita ifyo Lesa afwaya. (1 Yoh. 2:17) Isonde na bantu aba cishinka tafyakonaulwe.—1/1, amabula 5-7.

Bushe Abele acili alanda shani kuli ifwe nangu ca kuti alifwa? (Heb. 11:4)

Acili alelandila mu citetekelo. Tufwile ukusambilila kuli Abele no kumupashanya. Nga twasambililako ku fyo acitile e lyo no kumupashanya, cili kwati tuleumfwa uko alelanda kuli ifwe.—1/1, ibula 12.

Fintu nshi fimo ifingatutalusha kuli Lesa ifyo tufwile ukucenjelako?

Fimo ni fi: Incito, ifya kuleseshamo icitendwe ne fya kutambatamba, ukwampana na lupwa uwatamfiwa, ifya kupangapanga, ukusakamikwa pa bumi, ukutemwa indalama, ne cilumba.—1/15, amabula 12-21.

Finshi twingasambililako ku kuicefya kwa kwa Mose?

Mose taali uwa cilumba ilyo ali intungulushi, aleshintilila pali Lesa. Tatufwile ukuleka icifulo twakwata, ukulumbuka, nelyo ifyo twacenjelamo ukutulenga ukuba ne cilumba; lelo, tufwile ukucetekela Yehova. (Amapi. 3:5, 6)—2/1, ibula 5.

Ni kwi ukukekala abakabuuka?

Impendwa fye iinono, 144,000 e bakekala ku muulu. Lelo abengi abakabuuka bakekala pe sonde, kabili bakaba ne subilo lya kwikala umuyayaya.—3/1, ibula 6.

Bushe calolele mwi ukuti abena Israele tabali ‘abasembululwa mu mutima’? (Yer. 9:26)

Abena Israele bali bacipondoka kabili balekabila ukuleka fyonse ifyalelenga imitima yabo ukutalama, e kutila ifyo baletontonkanya, ifyo batemenwe, nelyo ifyo balecita ifyalefulwisha Lesa. (Yer. 5:23, 24)—3/15, amabula 9-10.

Finshi fyalengele ukuti Yesu abe ne nsansa?

Alitemenwe sana ukucita ukufwaya kwa kwa Lesa. Alitemenwe sana Wishi kabili alitemenwe na bantu. Yesu alishibe ukuti Wishi alimutemenwe kabili alesekela muli ena. Ifi e fintu ifyacindama ifilenga umuntu ukuba ne nsansa.—4/1, amabula 4-5.

Ni bani baba mu kuteyanya kwa kwa Lesa ukwa pe sonde?

Mwaba Ibumba Litungulula, amakomiti ya misambo, bakangalila benda, amabumba ya baeluda, ifilonganino, na bakasabankanya.—4/15, ibula 29.

Bushe filya Lesa akandile abantu babipa filanga ukuti munkalwe?

Yehova tasekela mu mfwa ya babifi. (Esek. 33:11) Ifyo acitile kale filanga ukuti alabala asoka abantu ilyo talabonaula. Ici cilenga twacetekela ukuti tukapusuka ilyo akaleta ubupingushi.—5/1, amabula 5-6.

Bushe abena Israele pa kwipaya ifipondo balefikulikila pa cimuti?

Iyo. Inko shimbi e fyo shalecita lelo abena Israele bena te fyo balecita. Pa nshita balelemba Amalembo ya ciHebere, bampulamafunde baletala babepaya, nalimo ukubapoola amabwe. (Lebi 20:2, 27) Lyena limo icitumbi balecikulikila pa cimuti pa kuti bambi basambilileko.—5/15, ibula 13.

Mulandu nshi abantu bafililwa ukuleta umutende?

Nangu ca kuti abantu balicita ifintu fingi, Lesa tabapangile ukuti baleiteka. (Yer. 10:23) Apo Satana e uteka icalo, abantu te kuti balete umutende. (1 Yoh. 5:19)—6/1, ibula 16.