“N fa ɔ dunman’n n kleli”

“N fa ɔ dunman’n n kleli sran bɔ a fa be mɛn i afiɛn mannin min’n. [...] N fa ɔ dunman’n n kleli be yɛ ń wá fá klé.”​—ZAN 17:6, 26, ANUÃSƐ FUFLƐ.

?Ndɛ sɔ’n i bo’n yɛle benin? Kɛ Zezi dí i junman’n, ɔ boli Ɲanmiɛn i dunman’n, ɔ maan sran’m be sili i. Zezi kanngannin Ɲanmiɛn Ndɛ’n nun kpɛ sunman. Kɛ ɔ́ yó sɔ’n ɔ boli Ɲanmiɛn i dunman’n wie. (Lik 4:16-21 *) Ɔ kleli i sɔnnzɔnfuɛ’m be kɛ be srɛ Ɲanmiɛn se kɛ: “Siɛ, maan ɔ dunman’n yo sanwun.”​—Lik 11:2, Anuãsɛ Fuflɛ.

Like nga klistfuɛ klikli’m be yoli’n: Akoto Piɛli seli asɔnun kpɛnngbɛn nga be o Zerizalɛmu lɔ’n be kɛ Ɲanmiɛn niannin nvlenvle’m be nun sran mun yɛ “ɔ fali be nun wie mun yoli nvle kun naan i dunman tran be su.” (Sa Nga Be Yoli’n 15:14) Akoto’m be nin sran uflɛ wie’m be boli jasin fɛ’n be seli kɛ “sran kwlaa ng’ɔ flɛ e Min’n [“Zoova,” NW] ɔ́ fíte nun.” (Sa Nga Be Yoli’n 2:21; Rɔmfuɛ Mun 10:13) Asa ekun’n, fluwa nga be bɔbɔ be klɛli’n, be nun’n, be boli Ɲanmiɛn i dunman’n. Kɛ be wuli Zezi m’ɔ́ fá dí afuɛ kɔe 300, be wieli Zuifu’m be mmla fluwa kun mɔ be flɛ i Tosefta, i klɛ. Fluwa sɔ’n kan Klistfuɛ’m be fluwa nga be kpɔfuɛ’m be yrali be’n i ndɛ se kɛ: “Be nga be bo Zezi i jasin’n ɔ nin be nga be flɛ be minim [mɔ atrɛkpa’n be yɛle Zuifu nga be kacili Klistfuɛ’n] be fluwa nga be klɛli’n, sɛ be su wɔ be nun’n, nán be yi be sin’n nun fite. Sanngɛ maan be yaci be sin nun lɛ naan be yra. I fluwa sɔ mun o, i Ɲanmiɛn i dunman’n ng’ɔ o be nun nin o, maan be yaci be lɛ naan be yra.”

?Wan yɛ ɔ yo i sɔ wie andɛ ɔ? Biblu kun mɔ Amlɛnkɛn’m be lɔ asɔnun kun m’ɔ suan Église du Christ i su kpɛn’m be nuan sɛli su kɛ ɔ fata kɛ be di su’n, i su fitilɛ nun’n, be seli kɛ: “Ɲanmiɛn ti kunngba cɛ. Ɔ maan Zuifu’m b’a faman dunman kun sa b’a flɛmɛn i kun, kɛ be se kɛ Ɲanmiɛn’m be sɔnnin sa naan i ti’n, ɔ fata kɛ be fa dunman kun be flɛ i naan b’a wun ngbaciɛ ng’ɔ o ɔ nin Ɲanmiɛn kun nga’m be afiɛn’n. Be yoli sɔ lele naan Klistfuɛ’m b’a ju su. Ɔ maan ɔ fataman kɛ asɔnun’n ɔ fa dunman kun sa flɛ Ɲanmiɛn.” I ti’n, Biblu’n sɔ’n nun’n, be fali Ɲanmiɛn i tɔnndɔnlɛ dunman “MIN’N” be kacili Ɲanmiɛn i dunman bɔbɔ ba’n. Koko nun wa’n, asɔnun Katoliki’m be ti’n m’ɔ o Vatikan lɔ’n, ɔ klɛli fluwa kun ko mannin asɔnun Katoliki’m be su kpɛn mun. Ɔ seli be kɛ: “Ɲanmiɛn i dunman’n mɔ be klɛ i wie kɛ YHWH, * kɛ amún tó jue’n yɛ kɛ amún srɛ́ Ɲanmiɛn’n, ɔ fataman kɛ amun fa wla nun. Nán amun bo dunman sɔ’n.”

?Wan mun yɛ andɛ be bo Ɲanmiɛn i dunman’n yɛ be fa dunman sɔ’n kle sran mun ɔn? I nun nga Sɛrgɛyi te yo gbanflɛn kan’n, m’ɔ o klɔ nga be flɛ i Kirgizistan i su lɔ’n, ɔ niannin flimu kun. Flimu sɔ’n nun’n, be flɛli Ɲanmiɛn kɛ Zoova. Lele m’ɔ́ fá dí afuɛ blu’n, w’a timan Ɲanmiɛn i dunman’n kun. I sin’n, Sɛrgɛyi wa ko trannin Amlɛnkɛn’m be mɛn’n nun lɔ. Kɛ ɔ o lɔ’n, cɛn kun’n, Zoova i Lalofuɛ nɲɔn be toli i i awlo lɔ kpɛkun be kleli i Ɲanmiɛn i dunman’n Biblu’n nun. Kɛ Sɛrgɛyi wunnin kɛ sran wie’m be lo lɛ naan be bo Ɲanmiɛn i dunman Zoova’n, ɔ yoli i fɛ kpa. I ng’ɔ yo fɛ’n, yɛle kɛ fluwa kun m’ɔ tu ndɛ’m be bo’n i nun’n, kɛ bé kán “Ɲanmiɛn Zoova” i ndɛ’n, be seli kɛ “i yɛ ɔ ti Ɲanmiɛn mɔ like fi nunmɛn i sin’n niɔn. Yɛ i yɛ ɔ ti Ɲanmiɛn kunngba cɛ mɔ Zoova i Lalofuɛ’m be su i ɔ.”​—Webster’s Third New International Dictionary.

[Ja ngua lɛ ndɛ mun]