Ano an depresyon?

“Inuul-olan ngan nabubuktot ako hin uraura; nagmamasubo ako ha bug-os nga adlaw.”—Salmo 38:6.

AN GINSISIRING HAN MGA EKSPERTO

Ha panapanahon nasusubo kita. Kondi iba an depresyon tungod kay usa ini nga sakit ha emosyon nga maiha mawara, nakakapanluya, ngan nakakaulang ha adlaw-adlaw nga buruhaton. Tigamni nga iba-iba an opinyon han mga eksperto ha kon ano an “normal” nga kasubo ngan an masisiring nga “sakit ha emosyon.” Kondi may mga naabat hin duro nga kasubo nga usahay gin-uupdan hin pag-abat hin kawaray-pulos ngan pagkakonsensya.

AN GINSISIRING HAN BIBLIA

An Biblia naghihisgot hin kalalakin-an ngan kababayin-an nga inabat hin duro nga kasubo. Pananglitan, hi Hana inabat hin “kapaitan han iya kalag”—mga pulong nga nangangahulogan hin “ruba an kasingkasing” ngan “mabidoon gud.” (1 Samuel 1:10) Makausa, hi propeta Elias liwat nasubo gud salit nag-ampo hiya ha Dios nga ‘kuhaon an iya kinabuhi’!—1 Hadi 19:4.

An mga Kristiano ha siyahan nga siglo ginsagdonan nga “liawon an mga nasusubo.” (1 Tesalonica 5:14) Sumala ha usa nga reperensya, an “mga nasusubo” nga gin-unabi hito nga teksto mahimo magtudlok hadton “temporaryo nga nabubug-atan han mga problema ha kinabuhi.” Matin-aw, an magtinumanon nga katawohan ha panahon han Biblia nasubo liwat hinduro.

 Sayop ba han usa kon nadidepres hiya?

“An ngatanan nga butang nga hinimo han Dios parapriho naghaharoy ngan nagsasakit.”—Roma 8:22.

AN GINSISIRING HAN BIBLIA

Igintututdo han Biblia nga an sakit resulta han pagrebelde han siyahan nga mag-asawa. Pananglitan, an Salmo 51:5 nasiring: “Ha karat-an natawo ako; ngan ha sala iginmabdos ako han akon iroy.” Dugang pa, an Roma 5:12 nasiring nga “pinaagi han usa nga tawo [an siyahan nga tawo nga hi Adan] an sala sinulod ha kalibotan ngan an kamatayon pinaagi han sala, tungod hito an kamatayon inabot ha ngatanan nga tawo kay hira ngatanan nakasala.” Tungod kay nakapanunod kita han pagkadiri-hingpit ni Adan, kita ngatanan nagkakasakit ha pisikal ngan ha aton emosyon. Salit an Biblia nasiring: “An ngatanan nga butang nga hinimo han Dios parapriho naghaharoy ngan nagsasakit.” (Roma 8:22) Pero, may paglaom nga iginhahatag an Biblia nga diri maihahatag han bisan hin-o nga doktor—an saad han Dios nga usa nga mamurayawon nga bag-o nga kalibotan diin waray na mga sakit ngan balatian, upod na an depresyon.—Pahayag 21:4.

Paonan-o mo malilikyan nga madaog han depresyon?

“Hi Jehova hirani hadton may masinakitnon nga kasingkasing, ngan nagluluwas hiya hadton mga mabinasulon an espiritu.”—Salmo 34:18.

KON KAY ANO NGA KINAHANGLAN MO ITO HIBAROAN

Diri mo pirme makukontrol an imo kahimtang, ngan usahay naaapektohan ka han diri mag-opay nga panhitabo. (Eklesiastes 9:11, 12) Pero may-ada ka mahihimo basi diri ka madaog han depresyon.

AN GINSISIRING HAN BIBLIA

An Biblia nasiring nga an mga may sakit nagkikinahanglan hin doktor. (Lucas 5:31) Salit kon may-ada ka nakakapanluya nga sakit ha emosyon, maopay nga magpakonsulta. Ginpapabug-atan liwat han Biblia an kapulsanan han pag-ampo. Pananglitan, an Salmo 55:22 nasiring: “Ibutang an imo dinara ha bawbaw ni Jehova, ngan ikaw iya kabubuligan; Diri gud hiya makakailob nga pagkikiwahon an matadong.” An pag-ampo diri la kay nagpapaopay han pagbati; ito an pakiistorya kan Jehova, an Dios nga “hirani hadton may masinakitnon nga kasingkasing.”—Salmo 34:18.

Makakabulig liwat an pagsumat han imo inaabat ha usa nga duok nga sangkay. (Proberbios 17:17) “Gin-aghat ako han usa nga igkasi-Saksi nga mag-istorya mahitungod han akon depresyon,” siring ni Daniela nga usa nga Saksi ni Jehova. “Bisan kon ginlikyan ko nga pag-istoryahan ito ha sulod hin damu ka tuig, nakita ko nga ini ngay-an an akon ginkikinahanglan. Naggaan gud an akon pag-abat katapos ko ig-istorya ito.”