سبق 3
کیا خوشخبری واقعی خدا کی طرف سے ہے؟
1. بائبل کس کی طرف سے ہے؟
یہ خوشخبری کہ انسان ہمیشہ تک زمین پر رہیں گے، بائبل میں پائی جاتی ہے۔ (زبور 37:29) بائبل 66 کتابوں پر مشتمل ہے۔ خدا نے یہ کتابیں 40 آدمیوں سے لکھوائیں۔ پہلی پانچ کتابوں کو موسیٰ نبی نے آج سے کوئی 3500 سال پہلے لکھا۔ اور آخری کتاب کو یسوع مسیح کے شاگرد یوحنا نے تقریباً 1900 سال پہلے لکھا۔ بائبل کو لکھنے والوں نے کس کے خیال درج کئے؟ خدا نے اپنی پاک روح کے ذریعے اُن تک اپنا پیغام پہنچایا۔ (2-سموئیل 23:2) بائبل کو لکھنے والوں نے جو کچھ لکھا، وہ اُن کے خیال نہیں بلکہ خدا کے خیال تھے۔ لہٰذا بائبل خدا کی طرف سے ہے۔ 2-تیمتھیس 3:16؛ 2-پطرس 1:20، 21 کو پڑھیں۔
ویڈیو ”بائبل کس کی طرف سے ہے؟“ دیکھیں۔
2. ہم کیسے جانتے ہیں کہ بائبل واقعی خدا کی طرف سے ہے؟
بائبل میں بہت سی ایسی پیشینگوئیاں پائی جاتی ہیں جو پوری ہوئیں۔ اِس سے ہمیں پتہ چلتا ہے کہ بائبل خدا کی طرف سے ہے کیونکہ کوئی انسان مستقبل کے بارے میں نہیں جان سکتا۔ (یشوع 23:14) صرف خدا ہی جانتا ہے کہ آئندہ کیا ہوگا۔ یسعیاہ 42:9؛ 46:10 کو پڑھیں۔
بائبل واقعی ایک خاص کتاب ہے۔ اِس کا ترجمہ سینکڑوں زبانوں میں کِیا گیا ہے اور اِس کی اربوں کاپیاں چھاپی گئی ہیں۔ حالانکہ بائبل بہت صدیاں پہلے لکھی گئی لیکن جدید سائنس اِس میں بتائی گئی باتوں کی تصدیق کرتی ہے۔ بائبل کو 40 مختلف آدمیوں نے لکھا لیکن پھر بھی اُن کی باتوں میں کوئی اختلاف نہیں پایا جاتا۔ جب لوگ اِس میں بتائی گئی باتوں پر عمل کرتے ہیں تو اُن کی زندگی میں بہتری آتی ہے۔ اِس کے علاوہ بائبل میں ایک ایسے خدا کی جھلک نظر آتی ہے جس کی ذات محبت ہے۔ اِن سب باتوں کی وجہ سے لاکھوں لوگوں کو یقین ہو گیا ہے کہ بائبل واقعی خدا کا کلام ہے۔ 1-تھسلنیکیوں 2:13 کو پڑھیں۔
ویڈیو ”ہم کیسے جانتے ہیں کہ بائبل واقعی خدا کی طرف سے ہے؟“ دیکھیں۔
3. بائبل میں کیا کچھ بتایا گیا ہے؟
بائبل میں بتایا گیا ہے کہ خدا نے انسان کو ہمیشہ تک زمین پر فردوس میں رہنے کا موقع دیا تھا لیکن انسان نے اِس موقعے کو گنوا دیا۔ پوری بائبل میں یہ خوشخبری پائی جاتی ہے کہ خدا اب بھی چاہتا ہے کہ زمین پر دوبارہ سے فردوس قائم ہو اور انسان اِس میں ہمیشہ تک زندہ رہیں۔ مکاشفہ 21:4، 5 کو پڑھیں۔
بائبل میں خدا کے حکم اور اصول بھی پائے جاتے ہیں۔ اِس کے علاوہ اِس میں بتایا گیا ہے کہ خدا مختلف موقعوں پر انسانوں کے ساتھ کیسے پیش آیا۔ اِن واقعات پر غور کرنے سے آپ خدا کی صفتوں کے بارے میں جان سکتے ہیں۔ بائبل میں یہ بھی بتایا گیا ہے کہ آپ خدا کے دوست کیسے بن سکتے ہیں۔ زبور 19:7، 11؛ یعقوب 2:23؛ 4:8 کو پڑھیں۔
4. آپ پاک کلام کو سمجھنے کے لئے کیا کر سکتے ہیں؟
یہ کتاب جو آپ کے ہاتھ میں ہے، پاک کلام کو سمجھنے میں آپ کے کام آئے گی۔ اِس میں تعلیم دینے کا وہی طریقہ استعمال کِیا گیا ہے جو یسوع مسیح نے استعمال کِیا تھا۔ وہ پاک صحیفوں کا حوالہ دیتے تھے اور پھر اُن کا مطلب سمجھاتے تھے۔ لوقا 24:27، 45 کو پڑھیں۔
جو خوشخبری خدا کی طرف سے ہے، وہ دل کو موہ لیتی ہے۔ لیکن پھر بھی کچھ لوگ اِس میں دلچسپی نہیں لیتے اور کچھ لوگ تو اِسے سُن کر ناراض ہو جاتے ہیں۔ ایسے لوگوں کی وجہ سے ہمت نہ ہاریں۔ آپ اُسی صورت میں ہمیشہ کی زندگی حاصل کرنے کی اُمید رکھ سکتے ہیں اگر آپ خدا کو اچھی طرح سے جانتے ہیں۔ یوحنا 17:3 کو پڑھیں۔