خاندان کی خوشی کا راز

اپنے ساس سُسر کے ساتھ اَن‌بن سے نپٹنا

جینی * کہتی ہے:‏ مائیکل کی ماں مجھے نیچا دکھانے کا کوئی موقع ہاتھ سے نہیں جانے دیتی۔‏ دوسری طرف میرے ماں‌باپ بھی میرے شوہر کو بالکل پسند نہیں کرتے۔‏ وہ اُس کے ساتھ بہت بُری طرح پیش آتے ہیں۔‏ اِسی لئے ہم دونوں ایک دوسرے کے والدین کے ساتھ ملنے سے گھبراتے ہیں۔‏

رائن کہتا ہے:‏ میری ماں کا خیال تھا کہ کوئی بھی اَور عورت اُس کے بچوں کی اچھی طرح دیکھ‌بھال نہیں کر سکتی۔‏ اِس لئے اُس نے پہلے دن سے ہی میری بیوی جینی میں نقص نکالنے شروع کر دئے۔‏ جینی کے ماں‌باپ بھی میرے ساتھ ایسا ہی کرتے تھے۔‏ وہ ہمیشہ مجھے نیچا دکھانے کی کوشش کرتے تھے۔‏ اِس کا نتیجہ یہ نکلا کہ مَیں اور جینی اپنےاپنے ماں باپ کی طرفداری کرتے اور ایک دوسرے کو جلی‌کٹی سناتے تھے۔‏

ساس سُسر کے ساتھ اَن‌بن کو اکثر مزاحیہ انداز میں پیش کِیا جاتا ہے۔‏ مگر حقیقت میں یہ ایک سنجیدہ معاملہ ہے۔‏ انڈیا کی ایک خاتون رینا بیان کرتی ہے:‏ ”‏میری ساس کئی سال تک ہم میاں‌بیوی کے درمیان دراڑ ڈالنے کی کوشش کرتی رہی۔‏ مَیں اپنی ساس کو تو کچھ نہیں کہہ سکتی تھی اِس لئے اپنا سارا غصہ اپنے شوہر پر نکال دیتی تھی۔‏ میرا شوہر ہمیشہ اِسی شش‌وپنج میں رہتا تھا کہ ایک اچھا شوہر بن کر بیوی کا ساتھ دے یا پھر ایک اچھے بیٹے کا فرض نبھائے اور اپنی ماں کا ساتھ دے۔‏“‏

مگر سوال یہ پیدا ہوتا ہے کہ بعض ساس سُسر اپنے شادی‌شُدہ بچوں کی زندگی میں دخل‌اندازی کیوں کرتے ہیں؟‏ اِس مضمون کے شروع میں جینی کا ذکر کِیا گیا ہے۔‏ اُس کے خیال میں اِس مسئلے کی ایک وجہ یہ ہے کہ ”‏ساس سُسر کو یہ بات ایک آنکھ نہیں بھاتی کہ اُن سے عمر اور تجربے میں کم کوئی شخص آکر اُن کے بیٹے یا بیٹی کی ذمہ‌داری سنبھال لے۔‏“‏ اِس سلسلے میں رینا کا شوہر دلیپ کہتا ہے کہ ”‏بہت سی تکلیفیں اُٹھا کر اپنے بچوں کو پالنے والے ماں‌باپ یہ محسوس کرنے لگتے ہیں کہ اب اُن کی کوئی وقعت نہیں رہی۔‏ اُنہیں یہ فکر ستاتی ہے کہ اُن کا بیٹا یا بیٹی ابھی ناسمجھ ہے اِس لئے اُسے ازدواجی زندگی کے مسائل سے نپٹنا نہیں آتا۔‏“‏

لیکن سچ تو یہ ہے کہ بعض‌اوقات شوہر اور بیوی خود ہی ساس سُسر کو اپنے معاملے میں مداخلت کرنے کی اجازت دیتے ہیں۔‏ اِس سلسلے میں آسٹریلیا کے رہنے والے مائیکل اور لیانہ کی مثال پر غور کریں۔‏ مائیکل بیان کرتا ہے:‏ ”‏لیانہ کے خاندان کے سبھی افراد ایک دوسرے کے بہت قریب تھے اور ہر معاملے پر آپس میں کُھل کر بات کرتے تھے۔‏ ہماری شادی کے بعد بھی لیانہ ضروری فیصلے  کرنے کے لئے میری بجائے اکثر اپنے باپ سے مشورہ لیتی تھی۔‏ اگرچہ اُس کا باپ اچھا مشورہ دیتا تھا توبھی مجھے یہ بات بالکل پسند نہیں آتی تھی کہ جو فیصلے ہم دونوں کو مل کر کرنے چاہئیں وہ اُن کے لئے کسی اَور کے پاس جائے۔‏“‏

واقعی ساس سُسر کے ساتھ اَن‌بن ازدواجی بندھن کو خطرے میں ڈال دیتی ہے۔‏ کیا آپ بھی کسی ایسے ہی مسئلے کا سامنا کر رہے ہیں؟‏ آپ اپنے ساس سُسر کے ساتھ کیسے گزارہ کر رہے ہیں؟‏ آئیں دو حالتوں کا جائزہ لیں اور دیکھیں کہ آپ اِن سے کیسے نپٹ سکتے ہیں۔‏

پہلی صورتحال:‏ آپ کا جیون‌ساتھی اپنے ماں‌باپ سے بہت پیار کرتا ہے۔‏ سپین کا رہنے والا لوئس نامی شوہر کہتا ہے:‏ ”‏میری بیوی کا خیال تھا کہ اگر ہم اُس کے والدین سے کہیں دُور گھر لے کر رہیں گے تو اِس سے ظاہر ہوگا کہ وہ اُن سے محبت نہیں کرتی۔‏ لیکن جب میرے والدین ہمارے بیٹے کی پیدائش کے بعد ہر روز اُسے ملنے آتے تھے تو میری بیوی بہت ناراض ہوتی تھی۔‏ اِسی بات کو لے کر ہم میں اکثر جھگڑا ہوتا تھا۔‏“‏

قابلِ‌غور بات:‏ ازدواجی بندھن کے متعلق بائبل کہتی ہے کہ شادی کے بعد ”‏مرد اپنے ماں‌باپ کو چھوڑے گا اور اپنی بیوی سے ملا رہے گا اور وہ ایک تن ہوں گے۔‏“‏ (‏پیدایش ۲:‏۲۴‏)‏ ”‏ایک تن“‏ ہونے کا مطلب صرف اکٹھے رہنا نہیں ہے۔‏ اِس کا مطلب ہے کہ شوہر اور بیوی ایک نیا خاندان بناتے ہیں جو اُن کے ماں‌باپ کے خاندان سے بالکل الگ ہو تا ہے۔‏ (‏۱-‏کرنتھیوں ۱۱:‏۳‏)‏ اِس کے باوجود شوہر اور بیوی دونوں کو اپنے والدین کی عزت کرنی اور اُن کو توجہ دینی چاہئے۔‏ (‏افسیوں ۶:‏۲‏)‏ لیکن اگر آپ کو محسوس ہوتا ہے کہ آپ کا جیون‌ساتھی آپ سے زیادہ اُن کو توجہ دیتا ہے تو پھر آپ کیا کر سکتے ہیں؟‏

آپ کیا کر سکتے ہیں؟‏ اِس صورتحال پر دانشمندی سے غور کریں۔‏ کیا واقعی آپ کا جیون‌ساتھی اپنے ماں‌باپ سے بہت پیار کرتا ہے جبکہ آپ اپنے ماں‌باپ کے اتنے قریب نہیں ہیں؟‏ اگر ایسا ہے تو یہ بات اِس صورتحال پر کتنا گہرا اثر کرتی ہے؟‏ کیا آپ حسد کرنے لگے ہیں؟‏—‏امثال ۱۴:‏۳۰؛‏ ۱-‏کرنتھیوں ۱۳:‏۴؛‏ گلتیوں ۵:‏۲۶‏۔‏

اِن سوالوں کے جواب دینے کے لئے یہ بہت ضروری ہے کہ آپ صاف‌دلی سے اپنا جائزہ لیں۔‏ اگر ساس سُسر کی وجہ سے آپ دونوں میں اکثر جھگڑا ہوتا ہے تو دراصل آپ کے ساس سُسر نہیں بلکہ آپ کی اپنی شادی‌شُدہ زندگی میں کوئی مسئلہ ہے۔‏

شادی میں اکثر مسائل کی وجہ یہ ہوتی ہے کہ شوہر اور بیوی معاملات کو ایک نظر سے نہیں دیکھتے۔‏ کیا آپ مسائل کو اپنے ساتھی کی نظر سے دیکھنے کی کوشش کر سکتے ہیں؟‏ (‏فلپیوں ۲:‏۴؛‏ ۴:‏۵‏)‏ میکسیکو میں رہنے والے آڈریان نامی شوہر نے ایسا ہی کِیا۔‏ وہ کہتا ہے کہ ”‏میری بیوی کے والدین کے گھر کا ماحول اچھا نہیں تھا۔‏ اِس لئے مَیں اپنے ساس سُسر سے زیادہ میل‌جول نہیں رکھتا تھا۔‏ ایک وقت آیا کہ مَیں نے اُن کے ساتھ تعلقات بالکل ہی ختم کر دئے۔‏ اِس سے ہم دونوں میاں‌بیوی میں جھگڑے ہونے لگے کیونکہ میری بیوی اپنے خاندان،‏ خاص طور پر اپنی ماں کو چھوڑنا نہیں چاہتی تھی۔‏“‏

آخرکار آڈریان کو اِس مسئلے کا مناسب حل مِل گیا۔‏ وہ بیان کرتا ہے:‏ ”‏مَیں جانتا ہوں کہ میری بیوی کا اپنے والدین سے زیادہ میل‌جول اُس پر بُرا اثر ڈالتا ہے لیکن اگر مَیں اُسے اُن سے بالکل ہی نہ ملنے دوں تو اِس سے اَور بھی زیادہ مسائل پیدا ہو سکتے ہیں۔‏ لہٰذا،‏ مَیں نے اپنے ساس سُسر کے ساتھ مناسب تعلقات قائم رکھنے کی کوشش کی ہے۔‏“‏ *

عملی مشورت:‏ آپ دونوں مل کر لکھیں کہ آپ کو ساس سُسر کے سلسلے میں کونسے بنیادی مسائل کا سامنا ہے۔‏ آپ کچھ ایسے شروع کر سکتے ہیں ”‏میرا خیال ہے کہ .‏ .‏ .‏ “‏ اِس کے بعد اپنے صفحے ایک دوسرے کو دے دیں۔‏ اب دونوں مل کر سنجیدگی سے غور کریں کہ آپ اِن مسائل کو کیسے حل کر سکتے ہیں۔‏

دوسری صورتحال:‏ آپ کے ساس اور سُسر ہمیشہ آپ دونوں کی زندگی میں دخل‌اندازی کرتے اور آپ کی مرضی کے بغیر ہی مشورے دیتے رہتے ہیں۔‏ قازقستان سے نیلہ نامی ایک عورت کہتی ہے کہ ”‏شادی کے پہلے سات سال ہم اپنے سُسرال والوں کے ساتھ رہے۔‏ میرے ساس سُسر ہمیشہ اِس بات پر جھگڑا کرتے تھے کہ ہم اپنے بچوں کی صحیح طرح دیکھ‌بھال نہیں کرتے۔‏ اِس کے علاوہ اُنہیں میرا کھانا پکانا اور صفائی کرنا بھی پسند نہیں تھا۔‏ مَیں نے اپنے شوہر اور ساس سُسر سے اِس مسئلے پر بات کی مگر جھگڑا اَور بڑھ گیا۔‏“‏

 قابلِ‌غور بات:‏ شادی کے بعد آپ اپنے ماں‌باپ کے اختیار کے تحت نہیں رہتے۔‏ بائبل بیان کرتی ہے کہ ”‏ہر مرد کا سر مسیح اور عورت کا سر مرد“‏ یعنی اُس کا شوہر ہے۔‏ (‏۱-‏کرنتھیوں ۱۱:‏۳‏)‏ لیکن ہم پہلے دیکھ چکے ہیں کہ شوہر اور بیوی دونوں کو والدین کی عزت کرنی چاہئے۔‏ اِسی لئے امثال ۲۳:‏۲۲ میں ہمیں نصیحت کی گئی ہے:‏ ”‏اپنے باپ کا جس سے تُو پیدا ہوا شنوا ہو اور اپنی ماں کو اُس کے بڑھاپے میں حقیر نہ جان۔‏“‏ لیکن اگر آپ کے والدین یا پھر ساس سُسر زبردستی اپنی بات منوانے کی کوشش کرتے ہیں تو آپ کیا کریں گے؟‏

آپ کیا کر سکتے ہیں؟‏ ٹھنڈے دماغ سے یہ سمجھنے کی کوشش کریں کہ اُن کے دخل‌اندازی کرنے کی وجہ کیا ہے۔‏ اِس مضمون کے شروع میں ہم نے رائن کے بارے میں پڑھا تھا۔‏ وہ اِس سلسلے میں بیان کرتا ہے:‏ ”‏بعض‌اوقات والدین محض یہ ظاہر کرنا چاہتے ہیں کہ بچوں کو ابھی بھی اُن کی ضرورت ہے۔‏“‏ پس کبھی‌کبھار ایسا بھی ہوتا ہے کہ والدین جان‌بوجھ کر مداخلت نہیں کرتے۔‏ لہٰذا،‏ پاک کلام کی اِس نصیحت پر عمل کرنے سے اِس مسئلے پر قابو پایا جا سکتا ہے کہ ”‏اگر کسی کو دوسرے کی شکایت ہو تو ایک دوسرے کی برداشت کرے اور ایک دوسرے کے قصور معاف کرے۔‏“‏ (‏کلسیوں ۳:‏۱۳‏)‏ تاہم،‏ اگر ساس سُسر کی مداخلت کی وجہ سے آپ دونوں میاں‌بیوی میں جھگڑا ہونے لگتا ہے توپھر کیا کِیا جانا چاہئے؟‏

بعض شادی‌شُدہ جوڑے سمجھ گئے ہیں کہ اُنہیں اپنے والدین کو کس حد تک مداخلت کرنے کی اجازت دینی چاہئے۔‏ اِس کا یہ مطلب نہیں کہ آپ والدین کو اپنے ذاتی معاملات میں بولنے سے بالکل ہی منع کر دیں۔‏ * اکثر آپ اپنی بات‌چیت یا کاموں سے یہ ظاہر کر سکتے ہیں کہ آپ کا جیون‌ساتھی آپ کی زندگی میں کتنی زیادہ اہمیت رکھتا ہے۔‏ مثال کے طور،‏ جاپان سے ماسایوکی نامی ایک شوہر کہتا ہے:‏ ”‏اگر والدین اپنی سوچ کا اظہار کرتے بھی ہیں تو فوراً اُن سے متفق نہ ہو جائیں۔‏ یاد رکھیں کہ آپ ایک نئے خاندان کی بنیاد ڈال رہے ہیں۔‏ اِس لئے پہلے یہ جاننے کی کوشش کریں کہ آپ کا ساتھی اُن کے مشورے کے بارے میں کیسا محسوس کرتا ہے۔‏“‏

عملی مشورت:‏ اپنے ساتھی کے ساتھ بات کریں کہ کس طرح والدین کی طرف سے مداخلت اُن کی شادی‌شُدہ زندگی میں لڑائی‌جھگڑے کا باعث بن رہی ہے۔‏ ایک بار پھر دونوں مل کر بیٹھیں اور لکھیں کہ آپ کن حالات میں اُنہیں مداخلت کرنے کی اجازت نہیں دیں گے۔‏ آپ جو بھی فیصلہ کرتے ہیں اُس پر قائم رہیں۔‏ لیکن یہ سب کچھ کرتے وقت اپنے والدین کے ساتھ احترام سے پیش آنا کبھی نہ بھولیں۔‏

ساس سُسر کے جذبات کو سمجھنے سے بھی بہت سے جھگڑوں پر قابو پایا جا سکتا ہے۔‏ اِس کے علاوہ،‏ اُن کے ساتھ نااتفاقی کو اپنی ازدواجی زندگی میں خرابی پیدا کرنے کی اجازت ہرگز نہ دیں۔‏ اِس سلسلے میں جینی بیان کرتی ہے:‏ ”‏بعض‌اوقات ہم دونوں میاں‌بیوی اپنے والدین کو لے کر بہت جذباتی ہو جاتے تھے۔‏ یہ بات صاف ظاہر تھی کہ اپنےاپنے والدین کی خامیوں کے بارے میں بات‌چیت کرنا ہم دونوں کے لئے بہت ہی تکلیف‌دہ تھا۔‏ لہٰذا،‏ اپنے لڑائی جھگڑوں پر قابو پانے کے لئے سب سے پہلے ہم نے ایک دوسرے کو اپنے ساس سُسر کی کمزوریوں کے طعنے دینا بند کر دیا۔‏ اِس کا نتیجہ یہ نکلا ہے کہ ہم دونوں ایک دوسرے کے بہت قریب آ گئے ہیں۔‏“‏

‏[‏فٹ‌نوٹ]‏

خود سے پوچھیں .‏ .‏ .‏

▪ میرے ساس سُسر میں کونسی اچھی خوبیاں ہیں؟‏

▪ مَیں اپنے جیون‌ساتھی کو نظرانداز کئے بغیر کیسے اپنے والدین کے لئے عزت دکھا سکتا ہوں؟‏