جانور خدا کی بڑائی کرتے ہیں

جانوروں پر غور کرنے سے ہم یہوواہ خدا کی عظمت کا اندازہ لگا سکتے ہیں۔‏ اُس نے اپنی ہر مخلوق کی ضرورت کو پورا کرنے کا بندوبست کِیا ہے۔‏ (‏زبور ۱۴۵:‏۱۶‏)‏ انسان اپنے خالق کی کارروائیوں پر اعتراض کرنے کے لائق نہیں۔‏ ایوب کو یہی سبق سیکھنا تھا۔‏ وہ صادق شخص تو ضرور تھا لیکن ”‏اُس نے خدا کو نہیں بلکہ اپنے آپکو راست ٹھہرایا۔‏“‏—‏ایوب ۳۲:‏۲؛‏ ۳۳:‏۸-‏۱۲؛‏ ۳۴:‏۵‏۔‏

خدا نے جانوروں کی مثال دے کر ایوب کو سکھایا کہ خالق کی کارروائیوں پر اعتراض کرنا غلط ہے۔‏ آئیے ہم ذرا یہوواہ خدا کے الفاظ پر غور کریں جو اُس نے اس موقعے پر ایوب سے کہے تھے۔‏

جنگلی جانوروں کو انسان کی ضرورت نہیں

ایوب جانوروں کے متعلق خدا کے سوالوں کا جواب نہیں دے سکتا تھا۔‏ (‏ایوب ۳۸:‏۳۹-‏۴۱‏)‏ انسان کی مدد کے بغیر ہی یہوواہ خدا شیرببروں اور کوّوں کو خوراک مہیا کرتا ہے۔‏ کوّے خوراک کی تلاش میں دُور دُور پھرتے تو ہیں لیکن دراصل خدا انہیں کھلاتا ہے۔‏—‏لوقا ۱۲:‏۲۴‏۔‏

 جنگلی جانوروں کے بارے میں خدا کے سوالوں پر غور کرنے سے ایوب شرمندہ ہو گیا۔‏ (‏ایوب ۳۹:‏۱-‏۸‏)‏ کیا انسان پہاڑ کی جنگلی بکریوں اور ہِرنیوں کی حفاظت کر پاتا ہے؟‏ انکے پاس جانا ہی مشکل ثابت ہوتا ہے۔‏ (‏زبور ۱۰۴:‏۱۸‏)‏ خدا نے ہِرنی کو اس فطرت کیساتھ خلق کِیا ہے کہ بچوں کو جنم دیتے وقت وہ خود کو گھنے جنگلات میں چھپاتی ہے۔‏ وہ اپنے بچوں کی خوب دیکھ‌بھال کرتی ہے جب تک کہ وہ ’‏موٹے تازہ نہ ہوتے ہیں۔‏‘‏ تب اسکے بچے ”‏نکل جاتے ہیں اور پھر نہیں لوٹتے“‏ کیونکہ وہ خود اپنا گزارہ کرنے کے قابل ہو جاتے ہیں۔‏

گورخر یعنی زیبرا بیابان میں بےروک‌ٹوک پھرتا ہے۔‏ اسکے علاوہ جنگلی گدھے پر بوجھ نہیں لادا جا سکتا ہے۔‏ وہ پہاڑیوں پر ”‏ہریالی کی تلاش میں رہتا ہے۔‏“‏ جنگلی گدھا کبھی شہر آ کر انسان کے ہاتھ چارا نہیں حاصل کرے گا کیونکہ وہ اپنی آزادی کو نہیں گنوانا چاہتا۔‏ اگر انسان اُسکے نزدیک جانے کی کوشش بھی کرتا ہے تو جنگلی گدھا ”‏ہانکنے والے کی ڈانٹ کو نہیں سنتا“‏ کیونکہ وہ فوراً بھاگ جاتا ہے۔‏

پھر خدا نے جنگلی سانڈ یعنی بیل کے بارے میں بات کی۔‏ (‏ایوب ۳۹:‏۹-‏۱۲‏)‏ اس جانور کے بارے میں ایک عالم نے یوں لکھا:‏ ”‏قدیم زمانے میں لوگوں نے جنگلی بیل کی لاتعداد تصویریں پتھروں پر کُندہ کیں۔‏ اسے شیرببر کی طرح خطرناک شکار خیال کِیا جاتا تھا۔‏ بہت سی تصویروں پر بادشاہ کے علاوہ گُھڑسوار اور پیادے بھی جنگلی بیلوں کا شکار کرتے ہوئے دکھائے گئے ہیں۔‏“‏ جنگلی بیل کو جوئے میں جوتنے کی کوششیں سراسر بےکار ہیں۔‏—‏زبور ۲۲:‏۲۱‏۔‏

پرندے یہوواہ کی بڑائی کرتے ہیں

پھر خدا پرندوں کے بارے میں ایوب سے سوال کرنے لگا۔‏ (‏ایوب ۳۹:‏۱۳-‏۱۸‏)‏ اُردو بائبل کے کیتھولک ورشن ترجمے میں ایوب ۳۹:‏۱۳ کا ترجمہ یوں کِیا گیا ہے:‏ ”‏کیا شترمُرغ کا بازو لقلق یا شاہین کے پَر کی طرح ہے؟‏“‏ لقلق یعنی سارس اپنے پَر پھیلا کر فضا کی اُونچائیوں تک پہنچ جاتا ہے۔‏ (‏یرمیاہ ۸:‏۷‏)‏ شترمُرغ اپنے بڑے بڑے پَر مارتے تو ہیں لیکن وہ اُڑ نہیں سکتے۔‏ وہ لقلق کی طرح اپنا گھونسلا درختوں میں بھی نہیں بنا سکتے۔‏ (‏زبور ۱۰۴:‏۱۷‏)‏ اسکی بجائے وہ ریت میں ایک گڑھا کھودتے ہیں جس میں وہ انڈے دیتے ہیں۔‏ حالانکہ یوں لگتا ہے کہ وہ اپنے انڈے زمین پر چھوڑ کر چلے جاتے ہیں لیکن اصل میں وہ اُنکی حفاظت کیلئے حاضر رہتے ہیں۔‏ ریت میں چھپائے ہوئے انڈے صحیح درجۂ‌حرارت پر گرم رہتے ہیں۔‏

جب انڈوں کو کسی شکاری کی طرف سے خطرہ ہوتا ہے تو شترمُرغ انڈے چھوڑ کر بھاگ جاتا ہے۔‏ دیکھنے والوں کو شاید ایسا لگے کہ ’‏خدا نے شترمُرغ کو عقل سے محروم رکھا‘‏ ہے۔‏ لیکن ایک انسائیکلوپیڈیا میں اس عجیب حرکت کی وضاحت یوں کی گئی ہے:‏ ”‏دراصل یہ [‏شترمُرغ]‏ کی ایک چال ہے۔‏ وہ شکاریوں کی توجہ انڈوں سے ہٹانے کیلئے اپنے بازو مار کر بھاگنے لگتا ہے۔‏“‏

شترمُرغ ”‏گھوڑے اور اُسکے سوار دونوں کو ناچیز“‏ کیوں سمجھتا ہے؟‏ ایک اَور انسائیکلوپیڈیا میں یوں بیان کِیا گیا ہے:‏ ”‏شترمُرغ اُڑ تو نہیں سکتا لیکن  بڑی تیزی سے دوڑ سکتا ہے۔‏ وہ ۱۵ فٹ (‏تقریباً ۴ میٹر)‏ لمبے ڈگ بھرتا ہے اور اُسکی رفتار ۴۰ میل (‏۶۴ کلومیٹر)‏ فی‌گھنٹہ تک پہنچ سکتی ہے۔‏“‏

گھوڑے کا جمال

پھر خدا نے ایوب کی توجہ گھوڑوں پر دلائی۔‏ (‏ایوب ۳۹:‏۱۹-‏۲۵‏)‏ پُرانے زمانے میں سپاہی گھوڑوں پر سوار ہو کر جنگ لڑتے تھے۔‏ گھوڑے ایسے جنگی رتھوں کو بھی کھینچا کرتے تھے جن پر چلانے والے کے علاوہ دو سپاہی سوار ہوتے تھے۔‏ میدانِ‌جنگ میں گھوڑا ہنہنا کر بےصبری سے ٹاپ مارتا تھا۔‏ وہ لڑائی کے شوروغل سے نہیں گھبراتا اور تلوار سے بھی مُنہ نہیں موڑتا تھا۔‏ تُرہی کی آواز سنتے ہی گھوڑا ہن‌ہن کرتا اور ”‏زمین‌پیمائی“‏ یعنی دُشمنوں پر چڑھائی کرتا تھا۔‏ وہ سوار کا ہر حکم بجا لاتا تھا۔‏

ایک عالم نے یوں لکھا:‏ ”‏عربی گھوڑی باگڈور کے ہلانے پر فوراً چل دیتی ہے۔‏ اس میں اُسکا مزاج بالکل بھیڑ کی طرح ہوتا ہے۔‏ لیکن جب گھوڑی کو عربی قبیلوں کا جنگی نعرہ سنائی دیتا ہے اور وہ سوار کے ہاتھ میں نیزہ دیکھتی ہے تو گھوڑی کی آنکھوں میں شعلے بھڑکنے لگتے ہیں۔‏ اُسکی گردن کمان کی طرح تن جاتی ہے اور نتھنے پھڑکنے لگتے ہیں۔‏ وہ اپنی دُم اور ایال کھڑے کر دیتی ہے جو ہوا میں لہرانے لگتے ہیں۔‏“‏

شاہین اور عقاب کی شان

پھر خدا نے چند دوسرے پرندوں کا ذکر کِیا۔‏ (‏ایوب ۳۹:‏۲۶-‏۳۰‏)‏ ’‏باز جنوب کی طرف اپنے بازو پھیلاتا ہے۔‏‘‏ ایک کتاب (‏گِنِس بُک آف ریکارڈز‏)‏ کے مطابق دُنیا کا سب سے تیزرفتار پرندہ شاہین کی ایک قسم ہے۔‏ پرواز میں اسکی رفتار ۳۴۹ کلومیٹر [‏۲۱۷ میل]‏ فی‌گھنٹہ تک پہنچ سکتی ہے۔‏ کتاب میں یوں بیان کِیا گیا ہے:‏ ”‏شاہین تب اتنی تیزی سے اُڑتا ہے جب وہ پرندوں کا شکار کرتا ہے یا پھر جب وہ دوسرے شاہینوں کو متاثر کرنے کی کوشش میں ہوتا ہے۔‏“‏

عقاب بھی پرواز میں ۱۳۰ کلومیٹر [‏۸۰ میل]‏ کی رفتار اختیار کر سکتا ہے۔‏ اسلئے ایوب نے کہا تھا کہ جتنی تیزرفتاری سے عقاب اُڑ سکتا ہے اتنی ہی تیزی سے انسان کی زندگی گزر جاتی ہے۔‏ (‏ایوب ۹:‏۲۵،‏ ۲۶‏)‏ جس طرح عقاب تھکے بغیر گھنٹوں تک پرواز کر سکتا ہے اسی طرح ہم خدا کی بخشی ہوئی طاقت سے اُسکی خدمت جاری رکھنے کے قابل رہتے ہیں۔‏ (‏یسعیاہ ۴۰:‏۳۱‏)‏ عقاب ایک ایسی جگہ کی طرف اُڑتا ہے جہاں گرم ہوا آسمان کی طرف چڑھتی ہے۔‏ پھر جب عقاب ہوا کے سہارے بڑی بلندی تک پہنچ جاتا ہے تو وہ ہوا کے ایک دوسرے چڑھاؤ کی طرف اُڑنے لگتا ہے۔‏ اسطرح وہ زور لگائے بغیر گھنٹوں تک پرواز کر سکتا ہے۔‏

عقاب ”‏بلندی پر اپنا گھونسلا بناتا ہے۔‏“‏ یہوواہ خدا نے اسے ایسی فطرت کیساتھ خلق کِیا ہے کہ وہ اُونچی سے اُونچی چٹانوں پر اپنے بچوں کو محفوظ رکھتا ہے۔‏ ”‏اُسکی آنکھیں اُسے دُور سے دیکھ لیتی ہیں۔‏“‏ عقاب کی خاص صلاحیت یہ ہے کہ جب وہ بڑی تیزی سے شکار پر جھپٹتا ہے تو وہ اپنی آنکھیں شکار پر جمائے رکھتا ہے۔‏ عقاب کبھی‌کبھار جانوروں کی لاشیں بھی کھاتا ہے۔‏ اسلئے یہ کہنا درست ہے کہ ”‏جہاں مقتول ہیں وہاں [‏عقاب]‏ بھی ہیں۔‏“‏ لیکن اکثر وہ چھوٹے جانوروں کا شکار کرکے انہیں اپنے بچوں کو کھلاتا ہے۔‏

ایوب کی تنبیہ کی جاتی ہے

جانوروں کے بارے میں ایوب سے چند اَور سوال کرنے سے پہلے خدا نے اُسکی تنبیہ کی۔‏ ایوب نے اس پر کیسا ردِعمل دکھایا؟‏ اُس نے بڑی عاجزی سے خدا کی تنبیہ پر کان لگائے۔‏—‏ایوب ۴۰:‏۱-‏۱۴‏۔‏

 ہم ایوب سے کہی ہوئی خدا کی باتوں سے ایک اہم اصول حاصل کر سکتے ہیں۔‏ انسان اپنے خالق کی کارروائیوں پر اعتراض کرنے کے لائق نہیں۔‏ ہمیں اپنے چال‌چلن اور اپنی باتوں سے خدا کو خوش کرنا چاہئے۔‏ ہمیں یہی فکر لاحق ہونی چاہئے کہ یہوواہ کا نام پاک مانا جائے اور اُسکی حاکمیت ثابت کی جائے۔‏

ہپوپوٹیمس کی طاقت

پھر یہوواہ خدا ہپوپوٹیمس کے بارے میں بات کرنے لگا۔‏ (‏ایوب ۴۰:‏۱۵-‏۲۴‏)‏ اس جانور کی لمبائی ۴ تا ۵ میٹر [‏۱۲-‏۱۵ فٹ]‏ تک اور اُسکا وزن ۶۰۰،‏۳ کلوگرام [‏۰۰۰،‏۸ پونڈ]‏ تک پہنچ سکتا ہے۔‏ واقعی،‏ ہپوپوٹیمس ”‏کی طاقت اُسکی کمر“‏ یعنی اُس کے پیٹھ کے پٹھوں میں ہے۔‏ اُس کی ٹانگیں بہت چھوٹی ہیں اس لئے وہ اپنا پیٹ راستے میں پڑے ہوئے پتھروں پر گھسیٹتا ہے۔‏ لیکن اُسے کوئی تکلیف نہیں پہنچتی کیونکہ اُس کے پیٹ کی جِلد بہت مضبوط ہے۔‏ ہپوپوٹیمس کے بڑے جسم،‏ اُس کے چوڑے مُنہ اور طاقتور جبڑوں کے سامنے انسان بہت چھوٹا اور کمزور لگتا ہے۔‏

ہپوپوٹیمس دریا میں رہتا ہے لیکن وہ خشکی پر آ کر ”‏گھاس کھاتا ہے۔‏“‏ اور واقعی وہ گھاس کا پورے کا پورا ٹیلا کھا سکتا ہے۔‏ ہپوپوٹیمس روزانہ ۹۰ تا ۱۸۰ کلوگرام [‏۲۰۰-‏۴۰۰ پونڈ]‏ گھاس چرتا ہے!‏ پھر وہ کنول کے درخت کے نیچے یا بیدوں کے سائے میں لیٹتے ہوئے کھانا ہضم کرتا ہے۔‏ اگر دریا میں پانی بہت چڑھ بھی جائے تو وہ سخت بہاؤ میں تیر سکتا ہے۔‏ ایوب ہپوپوٹیمس کے بڑے بڑے دانتوں سے خوب واقف تھا۔‏ اسلئے وہ اُسکی ناک کو چھید کر اس میں پھندا لگانے کی بےوقوفی کبھی نہیں کرتا۔‏

مگرمچھ کوئی خوف نہیں جانتا

اسکے بعد خدا نے مگرمچھ کے بارے میں سوال کئے۔‏ (‏ایوب ۴۱:‏۱-‏۳۴‏)‏ کیا ایوب اپنے بچوں کو مگرمچھ کیساتھ کھیلنے دیتا؟‏ ہرگز نہیں۔‏ اگر ایک شخص مگرمچھ کو چھوئے بھی تو لڑائی اتنی سخت ہوگی کہ وہ پھر کبھی ایسا نہ کرے گا۔‏ اس جانور کا سامنا کرنے کا خطرہ کون مول لینا چاہے گا؟‏

جب مگرمچھ صبح کے وقت اپنا سر پانی میں سے اُٹھاتا ہے تو ”‏اُسکی آنکھیں صبح کے پپوٹوں کی طرح“‏ جگمگاتی ہیں۔‏ اُسکی جِلد ایسے مضبوط ڈھالوں پر مشتمل ہے جو ایک دوسرے سے اسطرح جڑی ہوئی ہیں کہ نہ تو تلوار اور نہ ہی بھالے ان میں گھس سکتے ہیں۔‏ یہاں تک کہ بندوق کی گولیاں بھی مگرمچھ کی جِلد کو چھید نہیں سکتیں۔‏ اسکے پیٹ کی تیز ڈھالیں کیچڑ میں جو نشان لگاتی ہیں وہ کھیت میں ہینگے کے نشان کی طرح ہوتے ہیں۔‏ جب مگرمچھ پانی کو زور سے ہلاتا ہے تو اُٹھنے والی جھاگ مرہم کی طرح لگتی ہے۔‏ اپنی بکتر سی جِلد،‏ اپنے بڑے دانت اور اپنی زبردست دُم کی وجہ سے مگرمچھ کوئی خوف نہیں جانتا۔‏

ایوب اپنی غلطی تسلیم کرتا ہے

خدا کی تنبیہ سُن کر ایوب نے تسلیم کِیا کہ ”‏مَیں نے جو نہ سمجھا وہی کہا یعنی ایسی باتیں جو میرے لئے نہایت عجیب تھیں جنکو مَیں جانتا نہ تھا۔‏“‏ (‏ایوب ۴۲:‏۱-‏۳‏)‏ ایوب کی دلی توبہ کی وجہ سے خدا نے اُسے بہت سی برکتوں سے نوازا۔‏ اسکے ساتھ ساتھ خدا نے اُسکے ساتھیوں کی سختی سے تنبیہ کی۔‏—‏ایوب ۴۲:‏۴-‏۱۷‏۔‏

ہمیں ایوب سے کہی ہوئی خدا کی باتوں پر دھیان دینا چاہئے۔‏ ہم بھی ان تمام سوالوں کا جواب نہیں دے سکتے جو خدا نے ایوب سے پوچھے تھے۔‏ لیکن اُسکی بنائی ہوئی چیزوں پر غور کرنے سے ہم یہوواہ خدا کی عظمت کا اندازہ ضرور لگا سکتے ہیں۔‏ اسلئے ہمیں خدا کی تخلیق کی دلی قدر کرنی چاہئے۔‏

‏[‏صفحہ ۱۳ پر تصویر]‏

جنگلی بکری

‏[‏صفحہ ۱۳ پر تصویر]‏

کوّا

‏[‏صفحہ ۱۳ پر تصویر]‏

شیرنی

‏[‏صفحہ ۱۴ پر تصویر]‏

زیبرا

‏[‏صفحہ ۱۴ پر تصویر]‏

شترمُرغ اپنے انڈوں کی حفاظت کیلئے حاضر رہتا ہے

‏[‏صفحہ ۱۴ پر تصویر]‏

شترمُرغ کے انڈے

‏[‏صفحہ ۱۴،‏ ۱۵ پر تصویر]‏

شاہین

‏[‏تصویر کا حوالہ]‏

Falcon: © Joe McDonald/Visuals Unlimited

‏[‏صفحہ ۱۵ پر تصویر]‏

عربی گھوڑی

‏[‏صفحہ ۱۵ پر تصویر]‏

عقاب

‏[‏صفحہ ۱۶ پر تصویر]‏

ہپوپوٹیمس

‏[‏صفحہ ۱۶ پر تصویر]‏

مگرمچھ