Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) EPERERA 2014

A pee i te faaroo o Mose

A pee i te faaroo o Mose

“No te faaroo i ore i tia ’i ia Mose, a paari ai oia ra, ia mairihia o te tamaiti a te tamahine a Pharao.”—HEB. 11:24.

1, 2. (a) I te 40raa o to ’na matahiti, eaha te faaotiraa ta Mose i rave? (A hi‘o i te hoho‘a matamua.) (b) No te aha Mose i maiti ai i te amui i te nunaa o te Atua e hamani-ino-hia ra?

UA ITE Mose i ta te fenua Aiphiti e pûpû mai. Ua ite oia i te mau nohoraa aano o te feia tao‘a rahi. E melo oia no te utuafare o te arii. Ua ‘haapiihia oia i te mau parau paari a to Aiphiti’ mai te ohipa rimaî, te ihi reva teitei, te numeraraa e te tahi atu mau ihi. (Ohi. 7:22) Ua fana‘o oia i te faufaa, te mana e te haamaitairaa taa ê ta te hoê taata no Aiphiti e moemoeâ noa!

2 I te 40raa râ o to ’na matahiti, ua rave Mose i te hoê faaotiraa tei faahuru ê paha i te utuafare arii Aiphiti o tei faaamu ia ’na. Ua maiti oia i te amui i te mau tîtî, eiaha râ e ora mai te tahi taata noa no Aiphiti. No te aha? No to ’na faaroo. (A taio i te Hebera 11:24-26.) Aita Mose i hi‘o noa i te ao ite-mata-hia e haaati ra ia ’na. No to ’na taairaa piri e te Atua, ua tiaturi oia ia Iehova, “tei ore e itea ia hi‘o.” E ua tiaturi atoa e e tupu ta te Atua mau parau fafau.—Heb. 11:27.

3. Eaha na uiraa e toru ta teie tumu parau e pahono mai?

3 Eiaha atoa tatou e hi‘o noa i ta to tatou mata e ite ra. Ia riro râ tatou ei ‘taata i noaa te faaroo.’ (Heb. 10:38, 39) No te haapuai i to tatou faaroo, e hi‘opoa ana‘e i tei papaihia no Mose i roto i te Hebera 11:24-26. A na reira ’i tatou, e imi ana‘e i te pahonoraa o teie mau uiraa: Mea nafea te faaroo i te turairaa ia Mose ia haapae  i te mau hinaaro o te tino? I to ’na faahaparaahia, mea nafea te faaroo i te tautururaa ia ’na ia haafaufaa i ta ’na mau haamaitairaa i roto i te taviniraa i te Atua? E no te aha Mose i ‘haapao maitai ai i te utua ei hoo,’ aore ra i tiatonu ai i te haamaitairaa?

UA HAAPAE OIA I TE MAU HINAARO O TE TINO

4. Eaha ta Mose i ite no nia i te navenave o te hara?

4 Ma te faaroo, ua ite Mose e e taime poto noa to ‘te navenave o te parau ino,’ aore ra o te hara. Ua mana‘o paha te tahi atu e noa ’tu te rahi o te haamoriraa idolo e te peu tahutahu i Aiphiti, teie te nunaa puai o te ao nei. Area te nunaa o te Atua, te faatîtîhia ra ïa. Ua ite râ Mose e e nehenehe ta te Atua e taui i te tupuraa. Noa ’tu e e au ra e te ruperupe ra te feia o te haapao noa ra i to ratou hinaaro, ua papu ia Mose e e mou te feia ino. Aita ’tura ïa oia i hema i te navenave poto noa o te hara.

5. Eaha te tauturu mai ia ore ia hema i te navenave poto noa o te hara?

5 E nafea oe e ore ai e hema i te navenave poto noa o te hara? Eiaha roa ’tu e haamoe e e ore te navenave o te hara e vai maoro. Ma te faaroo, a haamana‘o e ‘te mou nei teie nei ao e to ’na mau hinaaro atoa.’ (Ioa. 1, 2:15-17) A feruri maite i te faahopearaa e tupu i nia i te feia hara e ore e tatarahapa. Tei nia iho ratou i te hoê vahi atâta, a mou roa ’tu ai. (Sal. 73:18, 19) I mua i te faahemaraa ia rave i te hara, a ui: ‘Teihea oraraa ta ’u e hinaaro no ’u a muri a‘e?’

6. (a) No te aha i ore ai i tia ia Mose ‘ia mairihia oia ei tamaiti na te tamahine a Pharao’? (b) I to outou mana‘o, no te aha e faaotiraa maitai ai ta Mose i rave?

6 Maoti atoa to ’na faaroo i maiti maitai ai Mose i ta ’na ohipa. “No te faaroo i ore i tia ’i ia Mose, a paari ai oia ra, ia mairihia o te tamaiti a te tamahine a Pharao.” (Heb. 11:24) Aita Mose i feruri e e nehenehe oia e tavini i te Atua ei melo o te aorai o te arii, a faaohipa ’tu ai i ta ’na faufaa e fana‘oraa taa ê no te tauturu i to ’na mau taeae Iseraela. Aita roa ’tu, ua faaoti râ Mose e here ia Iehova ma to ’na aau, to ’na ora e to ’na puai atoa. (Deut. 6:5) Ua paruru ta ’na faaotiraa ia ’na i te mauiui rahi. Aita hoi i maoro, ua haru te mau Iseraela iho i te rahiraa o te mau tao‘a a Aiphiti, ta ’na i haapae. (Exo. 12:35, 36) Ua faahaehaahia Pharao e ua haapohehia. (Sal. 136:15) O Mose râ, ua faaorahia ïa e ua faaohipa te Atua ia ’na no te aratai i te nunaa taatoa i te vahi papu. E auraa mau â to to ’na oraraa.

7. (a) Ia au i te Mataio 6:19-21, no te aha e feruri ai no nia i te tau no a muri a‘e? (b) A horoa i te hoê hi‘oraa o te faaite ra i te taa-ê-raa o te mau tao‘a materia e tao‘a pae varua.

7 Mai te peu e e tavini apî oe no te Atua, e nehenehe te faaroo e tauturu ia oe ia maiti maitai i te ohipa. E nafea? E haerea paari ia faanaho oe i to oe oraraa no a muri a‘e. Teie râ, e turai te faaroo i te mau parau fafau a te Atua ia oe ia aha? Ia haapue i te tao‘a no te hoê oraraa a muri a‘e taime poto aore ra mure ore? (A taio i te Mataio 6:19-21.) Ua farerei Sophie, mea ite roa oia i te ori, i teie tupuraa. Ua fana‘o oia i te moni tauturu e te mau tiaraa nounouhia i roto i te mau taiete ori na Marite. Te parau nei oia: “Mea au roa ia faatenitenihia oe. Inaha, to nia a‘e ïa vau i to ’u mau hoa. Aita râ vau i oaoa.” I te hoê mahana, mataitai atura Sophie i te DVD Les jeunes s’interrogent . . . Que vais-je faire de ma vie? Taa ’tura ia ’na e ua horoa mai teie nei ao i te manuïaraa e te faateniteniraa, aita râ i turai ia ’na ia haamori ia Iehova ma te aau atoa. Pure atura oia ia Iehova ma to ’na aau atoa e faarue atura oia i to ’na toroa ori. Eaha to ’na mana‘o i teie nei i ta ’na faaotiraa? Te na ô ra oia: “Aita roa ’tu vau e mihi ra i to ’u oraraa na mua ’‘e. I teie mahana, mea oaoa vau hanere i nia i te hanere. E pionie mâua ta ’u tane. E ere mâua i te taata tuiroo, mea riirii râ. Te haapao nei râ Iehova ia mâua, e piahi Bibilia ta mâua e e fa pae varua atoa. Aita roa ’tu vau e tatarahapa ra.”

8. Eaha te a‘oraa Bibilia e nehenehe e tauturu i te hoê taata apî ia rave i te faaotiraa no to ’na oraraa?

 8 Ua ite Iehova eaha te mea maitai no oe. Ua parau Mose: “Eaha to te Atua no oe na to Iehova hinaaro ia oe, maori râ e, ia mǎta‘u oe i to Atua ia Iehova, e ia haere i to ’na atoa ra mau e‘a, e ia hinaaro oe ia ’na; e ia haamori oe i to Atua ra ia Iehova ma to aau atoa, e ma to varua [aore ra ora] atoa; e ia haapao maite oe i te mau parau a Iehova, e ta ’na ra mau haapaoraa, i ta ’u e parau atu ia oe i teie nei mahana ia maitai oe ra.” (Deut. 10:12, 13) Mea apî â oe, a maiti i te hoê toroa o te tauturu ia oe ia here ia Iehova e ia tavini ia ’na ‘ma to aau atoa e ma to ora atoa.’ E nehenehe oe e tiaturi e e maitai oe i tera huru faaotiraa.

UA HAAFAUFAA OIA I TE MAU HOPOIA NO Ǒ MAI I TE ATUA RA

9. A faataa na no te aha mea teimaha ’i paha no Mose ia amo i ta ’na hopoia.

9 No Mose, “e tao‘a rahi . . . te mau faainoraa, i te Mesia nei, i te mau tao‘a atoa o Aiphiti ra.” (Heb. 11:26) Ua riro Mose mai “te Mesia,” aore ra “Tei faatavaihia.” Te auraa ïa e ua maitihia oia e Iehova no te aratai ia Iseraela i rapae au ia Aiphiti. Ua ite maite Mose e mea teimaha ta ’na hopoia e e riro atoa ei “faainoraa.” Ua vahavaha atoa hoê o na Iseraela i na mua ’tu: “Na vai oe i faariro ei tavana e ei haava ia matou nei?” (Exo. 2:13, 14) I muri a‘e, ua ani roa ’tu Mose ia Iehova: “Eaha hoi Pharao e faaroo mai ai ia ’u?” (Exo. 6:12) Ia ineine oia i mua i te mau faainoraa, ua faaite Mose ia Iehova i to ’na mau mǎta‘u e haapeapearaa. Mea nafea Iehova i te tautururaa ia Mose ia amo maite i ta ’na hopoia fifi mau?

10. Mea nafea Iehova i te tautururaa ia Mose ia amo i ta ’na hopoia?

10 A tahi, ua haapapu atu Iehova ia Mose: “Ei pihai-atoa-iho ïa vau ia oe.” (Exo. 3:12) Te piti, ua faaitoito atu Iehova ma te faataa ’tu hoê o te tuhaa o te auraa o to ’na i‘oa: “Te vai nei au o vau e vai nei.” * (Exo. 3:14) Te toru, ua horoa oia ia Mose te mana semeio no te haapapu e na Iehova i tono ia ’na. (Exo. 4:2-5) Te maha, ua maiti Iehova ia Aarona ei apiti e ei auvaha no Mose no te tauturu ia ’na ia amo maite i ta ’na hopoia. (Exo. 4:14-16) I te pae hopea o to ’na oraraa, ua papu maitai ia Mose e e tauturu te Atua i ta ’na mau tavini ia amo maite i te mau hopoia ta ’Na i horoa na ratou. O ta ’na ïa i haapapu ia Iosua, to ’na mono: “O Iehova iho hoi te na mua ia oe, e ei pihai-atoa-iho oia ia oe; e ore oia e faarue ia oe, e ore e taiva ia oe: eiaha e taiâ, eiaha roa e mǎta‘u.”—Deut. 31:8.

11. No te aha Mose i haafaufaa rahi ai i ta ’na hopoia?

11 Maoti te tauturu a Iehova, ua haafaufaa rahi Mose i ta ’na hopoia teimaha ma te faariro i te reira ei mea hau a‘e “i te mau tao‘a atoa o Aiphiti ra.” Noa ’tu râ, eaha te taviniraa a Pharao ia faaauhia i te taviniraa i te Atua Mana hope? Eaha te faufaaraa ia riro ei tamaiti hui arii no Aiphiti ia faaauhia i te riroraa ei “te Mesia,” aore ra tei faatavaihia, a Iehova? Ua haamaitaihia Mose no to ’na haerea mauruuru. Ua fana‘o oia i te taairaa piri taa ê e o Iehova o tei horoa ia ’na te mana rahi a aratai ai oia i te nunaa Iseraela i te Fenua tǎpǔhia.—Deut. 34:10-12.

12. Eaha te mau fana‘oraa taa ê no ǒ mai ia Iehova râ e mea tia ia haafaufaa?

12 E hopoia atoa ta tatou. Maoti ta ’na Tamaiti, ua horoa mai Iehova i te hoê toroa taviniraa, mai ta Paulo e te tahi atu o tei na reira. (A taio i te Timoteo 1, 1:12-14.) E fana‘oraa taa ê ta tatou pauroa: e poro i te parau apî maitai. (Mat. 24:14; 28:19, 20) E tavini taime taatoa vetahi. Te tavini atoa ra te mau taeae feruriraa paari i roto i te amuiraa  ei tavini tauturu e ei matahiapo. Tera râ, e nehenehe to oe utuafare o tei ore i farii i te parau mau aore ra te tahi atu e haafeaa mai no nia i te faufaaraa o teie mau fana‘oraa taa ê. E faaino atoa paha ia oe no ta oe mau haapaeraa. (Mat. 10:34-37) Mai te peu e ua manuïa ratou i te haaparuparu ia oe, e haamata paha oe i te mana‘o e mea faufaa anei ta oe mau haapaeraa aore ra e nehenehe anei iho â ta oe e amo i ta oe hopoia. Ia tupu noa ’tu te reira, e nafea te faaroo e tauturu ai ia oe ia tutava noa?

13. E nafea Iehova e tauturu ai ia tatou ia amo maite i te mau hopoia ta ’na i horoa mai?

13 Ma te faaroo, a taparu ia Iehova i ta ’na tauturu. A faaite atu i to oe mau mǎta‘u e haapeapearaa. Na Iehova i horoa mai i te hopoia, e tauturu ïa o ’na ia oe ia rave maite i te reira. E nafea? Mai ta ’na i rave a tauturu ai oia ia Mose. A tahi, e haapapu mai Iehova: “E faaetaeta vau ia oe, e tauturu vau ia oe: oia ïa, e mau vau ia oe i tau rima atau parau-tia ra.” (Isa. 41:10) Te piti, e haamana‘o oia ia oe e e nehenehe ta ’na mau parau fafau e tiaturihia: “O ta ’u i parau ra, o ta ’u ïa e faatupu; ua opuahia e au ra, e na ’u ïa e rave.” (Isa. 46:11) Te toru, e horoa mai Iehova i “te mana rahi maitai” no te rave i ta oe taviniraa. (Kor. 2, 4:7) Te maha, e tauturu to tatou Metua aupuru ia oe ia amo noa i ta oe hopoia maoti te hoê fetii Kerisetiano mau i te ao nei no te ‘haamahanahana e te faatupu i te maitai te tahi i te tahi.’ (Tes. 1, 5:11) A tauturu ai Iehova ia oe ia amo i ta oe mau hopoia, e tiaturi atu â oe ia ’na e e haafaufaa oe i ta oe mau fana‘oraa taa ê i roto i ta ’na taviniraa mai te mau tao‘a tei rahi a‘e i te tahi noa ’tu tao‘a i nia i te fenua.

UA TIATONU OIA I TE HAAMAITAIRAA

14. No te aha i papu ai ia Mose e e haamaitaihia oia?

14 ‘Ua haapao maitai Mose i te utua ei hoo,’ aore ra ua tiatonu oia i te haamaitairaa. (Heb. 11:26) Noa ’tu e ua taotiahia to ’na ite no nia i te tau a muri a‘e, ua vaiiho Mose i te reira ia ohipa i nia i to ’na huru feruriraa. Mai ia Aberahama to ’na tupuna, ua tiaturi Mose e e nehenehe Iehova e faatia faahou i te feia pohe. (Luka 20:37, 38; Heb. 11:17-19) Ua tiaturi Mose i te mau haamaitairaa no a muri a‘e. Ua tauturu te reira ia ’na ia ore e hi‘o i to ’na 40 matahiti horo-ê-raa e na 40 matahiti i roto i te medebara mai te hoê oraraa mâu‘a. Aita oia i ite i te mau mea atoa no nia i te tupuraa o te mau parau fafau a te Atua. Maoti râ to ’na faaroo, ua tia ia ’na ia ite i te mau haamaitairaa itea ore.

15, 16. (a) No te aha e titauhia ’i ia tiatonu i ta tatou haamaitairaa? (b) Eaha te mau haamaitairaa ta oe e hinaaro e fana‘o i raro a‘e i te faatereraa a te Basileia?

 15 Te haapao maite ra anei oe i ta oe haamaitairaa ei hoo? Mai ia Mose, aitâ tatou i ite i te mau mea atoa no nia i te mau parau fafau a te Atua. Ei hi‘oraa, aita tatou i ite i te taime e tupu ai te ati rahi. (Mar. 13:32, 33) Tera râ, mea rahi a‘e to tatou ite no nia i te paradaiso i to Mose. Noa ’tu e aita tatou i ite i te taatoaraa o te mau mea rii e tupu, ua navai te mau parau fafau a te Atua no nia i te oraraa i raro a‘e i te Basileia o te Atua no te haapao maite i te reira. E faahoho‘a ana‘e i te ao apî i roto i to tatou feruriraa. E turai mai te reira ia mata na i te imi i te Basileia. Nafea ïa? A feruri na: E hoo anei oe i te hoê fare mai te peu e mea iti ta oe i ite no nia i te reira? Eita roa ’tu! Oia atoa, eita tatou e faaohipa i to tatou oraraa no te tapi i te hoê tiaturiraa papu ore. E tauturu mai te faaroo ia faahoho‘a maitai i roto i to tatou feruriraa i te oraraa a faatere mai ai te Basileia.

Auê i te oaoa i te paraparau i te mau tavini taiva ore mai ia Mose! (A hi‘o i te paratarafa 16)

16 No te ite papu atu â i roto i to feruriraa te hoho‘a o te Basileia o te Atua, a tiatonu i to oe oraraa i roto i te paradaiso. A faaohipa i to oe feruriraa. Ei hi‘oraa, ia hi‘opoa oe i te oraraa o te feia faahitihia e te Bibilia o te faatiahia mai i te ora i roto i te paradaiso, teie ta oe e nehenehe e feruri: Eaha ta ’u e nehenehe e ani atu ia faatiahia mai ratou? Eaha ta ratou e ani mai no nia i to ’u oraraa i te anotau hopea? Mai te aha to ’u oaoa a farerei ai i to ’u mau tupuna tei ora e senekele na mua ’tu e a haapii ai ia ratou no nia i ta te Atua i rave no ratou? Mai te aha to ’u oaoa a haapii ai au no nia i te mau animara oviri e rave rahi ma te hi‘o ia ratou ia faaea hau noa? Mai te aha to ’u taairaa e o Iehova o te piri atu â a naea mǎrû noa ’i ia ’u te tia-roa-raa?

17. E nafea te faahoho‘a-maitai-raa i roto i to tatou feruriraa i ta tatou haamaitairaa no a muri a‘e e tauturu mai ai?

17 E tauturu mai te faahoho‘a-maitai-raa i roto i to tatou feruriraa i ta tatou haamaitairaa no a muri a‘e ia tapea i te paari, ia oaoa e ia rave i te mau faaotiraa niuhia i nia i te hoê a muri a‘e mure ore. Ua papai Paulo i te mau Kerisetiano faatavaihia: “I tiai râ tatou i tei ore i itea e tatou, te mana‘o nei hoi tatou i te reira ma te fatimauu ore.” (Roma 8:25) No te mau Kerisetiano atoa e ora i te fenua e a muri noa ’tu teie faaueraa. Aitâ tatou i fana‘o atura i ta tatou haamaitairaa. No to tatou râ faaroo puai e tamau noa ’i tatou i te tiai i te reira. Mai ia Mose, eiaha e faariro i te mau matahiti o ta tatou taviniraa ia Iehova ei taime mâu‘a. Ua papu râ ia tatou e “te mau mea e hi‘ohia nei hoi, no vaivai a‘e ïa; area te mau mea hi‘o-ore-hia ra, e tia mau â ïa i te vairaa.”—A taio i te Korinetia 2, 4:16-18.

18, 19. (a) No te aha e aro ai no te tapea noa i to tatou faaroo? (b) Eaha ta tatou e hi‘opoa mai i roto i to muri nei tumu parau?

18 E tauturu te faaroo ia tatou ia “ite i te mau mea aore e hi‘ohia nei.” (Heb. 11:1) Eita ïa te hoê taata e ite i te faufaaraa o te taviniraa a Iehova. No ratou, “e mea maamaa” te mau tao‘a pae varua. (Kor. 1, 2:14) O tatou nei râ, te tiaturi nei tatou e ora e a muri noa ’tu e e ite i te tia-faahou-raa, te mau mea ta te taata o teie nei ao e ore e nehenehe e ite. No te mau philosopho i te tau o Paulo, e taata paraparau noa o ’na o te ore i ite i ta ’na e parau ra. I teie atoa mahana, te mana‘o nei te rahiraa o te taata e “mea maamaa” te tiaturiraa o ta tatou e poro ra.—Ohi. 17:18.

19 Mai te mea ra e e te ora nei tatou i roto i te hoê ao aita e faaroo, e mea tia ia aro tatou no te faaite noa i to tatou faaroo. A taparu ia Iehova “ia ore ia mure to oe faaroo.” (Luka 22:32) A taa maitai eaha te mau faahopearaa o te hara, te faufaaraa ia tavini ia Iehova e to oe tiaturiraa o te ora mure ore. Maoti râ te faaroo, ua nehenehe ia Mose ia ite hau atu â i teie mau mea. I roto i to muri nei tumu parau, e hi‘o mai tatou mea nafea te faaroo i te tautururaa ia ’na ia ite “i tei ore e itea ia hi‘o ra.”—Heb. 11:27.

^ par. 10 No nia i te mau parau itehia i roto i te Exodo 3:14, ua faataa te hoê aivanaa Bibilia e aita hoê a‘e mea e nehenehe e tapea ia Iehova ia faatupu i to ’na hinaaro. Ua papai oia: “E nehenehe teie i‘oa [Iehova] e riro ei haapuraa no te mau Iseraela.” E horoa te reira i te tiaturiraa e te tamahanahanaraa atoa hinaarohia.