Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Eperera 2014

Te mauruuru ra anei oe e te haapao maira Iehova?

Te mauruuru ra anei oe e te haapao maira Iehova?

“Tei te mau vahi atoa nei to Iehova mata, i te hi‘oraa mai i te ino e te maitai.”—MAS. 15:3.

1, 2. Mea taa ê ta Iehova hi‘oraa mai ia tatou i ta te mau taviri hoho‘a hi‘opoaraa i te tereraa pereoo. A faataa na.

MEA rahi te fenua e faaohipa nei i te mau taviri hoho‘a no te hi‘opoa i te tereraa pereoo e no te haruharu i te mau ati purumu. Ia tupu noa ’tu te hoê ati purumu e ua taie te taata faahoro, e itehia ïa oia e te feia mana o te tapea ia ’na. Maoti teie mau taviri hoho‘a, mea fifi roa ’tu â ïa no te taata ia ape i te mau faahopearaa o ta ratou mau ohipa.

2 Teie râ, mai tera atoa anei ïa ta Iehova, to tatou Metua î i te here, hi‘oraa mai ia tatou? Te parau ra iho â te Bibilia e “tei te mau vahi atoa” to Iehova mata. (Mas. 15:3) Te auraa anei ïa e te tamoemoe noa ra oia i te mau taime e ofati ai tatou i ta ’na mau ture? Te tiai noa ra anei o ’na i te faautua ia tatou i te taime iho â e hape ai tatou? Aita roa ’tu! (Ier. 16:17; Heb. 4:13) Te hi‘o maira Iehova no to ’na here ia tatou e no to ’na hinaaro ia maitai e ia oaoa tatou.—Pet. 1, 3:12.

3. Eaha na ravea e pae e haapao ai te Atua ia tatou ma te here?

3 Na te aha e tauturu mai ia taa e te hi‘o maira te Atua no to ’na here ia tatou? E hi‘o mai tatou e nafea oia e na reira ’i. (1) Ma te faaara mai mai te peu e e hinaaro ino to tatou,  (2) ma te a‘o mai ia hahi ê tatou, (3) ma te aratai mai maoti te mau aratairaa o ta ’na Parau, (4) ma te tauturu mai ia û tatou i te mau fifi rau, e (5) ma te haamaitai mai ia ite oia i te maitai i roto ia tatou.

TE HOÊ ATUA HAAPAO MAITAI O TE FAAARA MAI

4. No te aha Iehova i faaara ’i ia Kaina e tei “te uputa” te hara?

4 E hi‘o mai tatou na mua e nafea te Atua e faaara mai ai mai te peu e e hinaaro ino to tatou. (Par. 1, 28:9) No te taa i teie ravea e haapao ’i te Atua ia tatou, a hi‘o na i ta ’na i rave i to Kaina ‘ririraa’ no te mea aita o ’na i fariihia e te Atua. (A taio i te Genese 4:3-7.) Ua faaue Iehova ia Kaina ia ‘rave i te maitai.’ Aita ana‘e, ua faaara Iehova e tei “te uputa” te hara. Na ô atura te Atua: “Ei nia ’‘e oe ia ’na.” Te hinaaro ra oia ia faaroo Kaina i te faaararaa e ia “itehia mai” aore ra ia farii-maitai-hia oia. Maoti hoi te farii maitai a te Atua e maitai noa ’i to ’na taairaa e o ’Na.

5. E nafea Iehova e faaara mai ai mai te peu e e hinaaro ino to tatou?

5 E tatou ïa i teie mahana? E ite roa to Iehova mata eaha to roto i to tatou aau. Eita ïa e nehenehe e huna i to tatou mau hinaaro e mana‘o. Te hinaaro ra to tatou Metua î i te here ia haere tatou na te e‘a parau-tia. Eita râ oia e faahepo mai. Na roto i ta ’na Parau te Bibilia, e faaara mai oia ia hahi ê tatou. E nafea ïa? Ia taio tatou i te Bibilia i te mau mahana atoa, e pinepine tatou i te tapao i te hoê irava o te tauturu mai ia haavî i te mau hinaaro ino. E faaite atoa mai paha ta tatou mau papai Kerisetiano i te tahi fifi ta tatou e farerei nei e e nafea ia faaafaro atu. E i ta tatou mau putuputuraa, e fana‘o tatou pauroa i te mau a‘oraa o te tae mai i te taime tano!

6, 7. (a) Ua faaineinehia te mau papai no te mau mirioni taata. No te aha e nehenehe ai e parau e e haapapuraa te reira o te here o te Atua no oe? (b) E nafea oe e fana‘o ai i te haapao maitai a Iehova?

6 Te faaite papu ra teie mau faaararaa atoa e te haapao maira Iehova ia tatou taitahi ma te here. Parau mau, mea maoro te papairaahia te Bibilia, ua faaineine te faanahonahoraa a te Atua i te mau papai no te mau mirioni taata e no te amuiraa taatoa te mau a‘oraa e horoahia ra i te mau putuputuraa. Teie râ, te ani ra Iehova ia oe ia faaroo i ta ’na Parau ia rave hoi oe i te mea maitai. Tapao faaite ïa e te tâu‘a ra Iehova ia oe ma te here.

E tauturu mai to tatou mana‘o haava haapiihia e te Bibilia ia ape i te mau fifi atâta (A hi‘o i na paratarafa 6, 7)

7 No te fana‘o i te mau faaararaa a te Atua, e mea tia ia ite tatou na mua roa e te haapao mau ra oia ia tatou. E mea titauhia ïa ia farii tatou i ta ’na Parau, ma te tutava i te tinai i te mau mana‘o aita e au ra i te Atua. (A taio i te Isaia 55:6, 7.) Ia haapao maite tatou i te mau faaararaa i horoahia mai, eita tatou e fifihia. Tera râ, mai te peu e e hema tatou i to tatou mau hinaaro ino, eaha te tauturu ta to tatou Metua î i te here e horoa mai?

TE A‘O MAIRA TO TATOU METUA Î I TE HERE

8, 9. E nafea te a‘oraa Bibilia o te horoahia mai e te hoê taata e haapapu ai e te haapao maira Iehova? A faataa.

8 Ua ite tatou e te haapao maira Iehova a a‘o mai ai oia. (A taio i te Hebera 12:5, 6.) Parau mau, eita tatou e au ia a‘ohia tatou. (Heb. 12:11) Ia horoa mai râ te hoê taata i te a‘oraa no ǒ mai i te Bibilia, mea faufaa roa ia taa no te aha o ’na e na reira ’i. Aita o ’na e na reira ra no te faahuru ê ia tatou. Te ite nei râ o ’na e te fifi ra to tatou taairaa e o Iehova. Te faataa  ra o ’na i te taime e te tutava ra o ’na i te faaite mai maoti te Bibilia e nafea ia ho‘i ia Iehova ra. E farii tatou i tera a‘oraa, no ǒ mai hoi te reira ia Iehova ra.

9 Ei hi‘oraa, i hi‘o noa na te hoê taeae i te mau hoho‘a faufau hou a riro mai ai ei taeae. Faaea a‘era o ’na i tera peu a haapii ai i te parau mau. I muri a‘e, ua hoo mai o ’na i te hoê niuniu afaifai apî e haamata faahou a‘era i te hi‘o i te mau hoho‘a faufau i nia i te Internet. (Iak. 1:14, 15) E au ra e te vai noa ra tera hiaai i roto ia ’na mai te arahu o te ama noa ra. I te hoê mahana, ua horoa o ’na i ta ’na niuniu afaifai i te hoê matahiapo e fa mai nei te mau reni Internet e itehia ’i te hoho‘a faufau. Horoa oioi a‘era tera matahiapo i te a‘oraa i te taeae. Ua faaroo maitai o ’na i te a‘oraa e i te pae hopea ua faaea i tera peu ino. Te ite nei Iehova i te mau hara ta tatou e rave huna nei e e nehenehe o ’na e a‘o mai hou a ino roa ’i to tatou mau taairaa e o ’na. Te mauruuru mau nei tatou ia Iehova i te haapaoraa mai ia tatou.

E TAUTURU MAI TE FAAOHIPARAA I TE MAU ARATAIRAA BIBILIA

10, 11. (a) E nafea oe e nehenehe ai e imi i te aratairaa a te Atua? (b) A faataa na i te hi‘oraa o te hoê utuafare o tei pee ma te î i te paari i te aratairaa a Iehova.

10 Ua himene te fatu salamo ia Iehova: “E riro oe i te aratai ia ’u i ta oe ra parau.” (Sal. 73:24) A hinaaro ai i te aratairaa, ‘eiaha tatou e haamoe’ ia Iehova. E hi‘opoa ana‘e i ta ’na Parau no te ite i to ’Na mana‘o. Eita noa te faaohiparaa i te mau aratairaa Bibilia e tauturu ia tatou i te pae varua. I te tahi taime, e tauturu atoa mai te reira ia haapao i to tatou mau hinaaro i te pae materia.—Mas. 3:6.

11 Ei hi‘oraa, te ora nei te hoê utuafare rarahi i Philipino i roto i te hoê fare faaapu ta ratou e tarahu nei. E pionie tamau te papa e te mama. Ua maere roa ratou a faatae ai te fatu o te faaapu i te hoê parau papai o tei faaite e eita ratou e nehenehe faahou e ora i reira. Ua taa ia ratou i muri iho e ua pari haavare te tahi taata ia ratou i te haerea tia ore. Ua haapeapea te taeae, aita hoi o ’na i ite ihea ratou e ora ’i. Ua tiaturi râ o ’na ia Iehova e ua parau: “E aupuru mai Iehova. E haapao noa o ’na i to tatou mau  hinaaro noa ’tu eaha te tupu.” Ua pee te utuafare i te mau aratairaa Bibilia e mea faatura e mea hau noa ratou noa ’tu te mau pariraa. Tau mahana i muri iho, parau a‘era te fatu o te faaapu e e nehenehe ratou e faaea noa i reira. Ua maere roa o ’na i to ratou haerea i mua i te mau pariraa i taui ai o ’na i to ’na mana‘o e i horoa atoa ai i te tâpû fenua rahi a‘e no te faaapu. (A taio i te Petero 1, 2:12.) Mea papu, ia pee tatou i te mau aratairaa Bibilia, e tauturu Iehova ia tatou i te mau taime fifi.

TE HOÊ HOA O TE TAUTURU MAI IA FAAOROMAI I TE FIFI

12, 13. I roto i teihea mau tupuraa e uiui ai vetahi e te haapao mau ra anei te Atua i to ratou mauiui?

12 I te tahi râ mau taime, e vai noa mai te tahi fifi. Mea maoro paha ïa tatou i te faaruru-noa-raa i te hoê ma‘i, te patoiraa a te mau melo utuafare aore ra te hamani-ino-raa. Te fifi mau atoa ra paha tatou e te hoê melo o te amuiraa no te mea mea taa ê to ’na huru i to tatou.

13 Ei hi‘oraa, e huru ê paha oe i te parau a te hoê taeae. E parau paha oe: ‘Eita tera mau mea e itehia i roto i ta te Atua faanahonahoraa!’ Teie râ, e fana‘o tera taeae i te mau hopoia i roto i te amuiraa e e au ra e mea auhia o ’na. E mana‘o paha oe: ‘Eaha hoi tera huru? Aita Iehova e ite ra? No te aha o ’na e vaiiho noa ’i i tera ohipa?’—Sal. 13:1, 2; Hab. 1:2, 3.

14. No te aha Iehova e vaiiho ai i te mau taeae ia a‘o mai ia tatou?

14 Mea rahi a‘e te ohipa ta Iehova e ite nei e e nehenehe o ’na e vaiiho i te hoê tupuraa no te mau tumu faufaa. Ei hi‘oraa, e huru ê paha tatou a horoa mai ai te hoê taata i te a‘oraa no te mea i to tatou mana‘o, e ere tera a‘oraa i te mea tano. Mea taa ê râ paha to te Atua mana‘o. Peneia‘e ua tano iho â tatou i te a‘oraahia. I roto i to ’na aamu, ua faatia te taeae Karl Klein e i te hoê taime ua a‘o-maitai-hia o ’na e te taeae Joseph Rutherford. Tau taime i muri a‘e, ua aroha atu te taeae Rutherford ia ’na ma te oaoa, aita râ o ’na i pahono roa ’tu. Ua taa i te taeae Rutherford e te huru ê noa ra te taeae Klein no te mea ua a‘ohia o ’na. Faaara a‘era o ’na i te taeae Klein: “A ara! E noaahia oe e te Diabolo.” Ua tauturu mau teie a‘oraa i te taeae Klein. A riro mai ai ei melo o te Tino aratai, ua parau o ’na e e tiaraa to to tatou mau taeae no te a‘o mai ia tatou. E ia riri tatou ia ratou no te tahi a‘oraa, e haru te Diabolo ia tatou. O ta ’na ïa i haapii mai. *

15. Eaha te haamana‘o no te ore e fiu a tiai ai ia tauturu atu Iehova ia oe i roto i te hoê tupuraa fifi?

15 E nehenehe tatou e fiu ia ore te hoê tupuraa fifi e hope. E nafea ïa? A feruri na e te faahoro ra oe i te hoê pereoo i nia i te purumu rahi a maumau atu ai te tereraa pereoo. Aita oe i ite ehia taime e titauhia ia tiai. Ia ore oe e faaoromai a imi atu ai i te tahi atu purumu, peneia‘e e moe oe a taere roa ’tu ai. Oia atoa, ia pee maite oe i te mau aratairaa i roto i te Parau a te Atua, e tapae iho â oe i te vahi hinaarohia.

16. No te aha ’tu â Iehova e maiti ai i te vaiiho noa i te tahi fifi ia tupu?

16 E nehenehe Iehova e vaiiho noa i te tahi fifi ia tupu no te faaineine ia tatou. (A taio i te Petero 1, 5:6-10.) E ere na te Atua e haafifi ra ia tatou. (Iak. 1:13) O ‘to enemi te diabolo’ te tumu o te rahiraa o te mau fifi. Ua ite râ te Atua e e nehenehe  te hoê tupuraa fifi e tauturu mai ia tatou ia paari mai i te pae varua. Te ite ra o ’na i to tatou mauiui e e ara o ’na ia ore te reira ia maoro roa no te mea ‘te tiai ra oia ia tatou.’ Te haapao maitai ra Iehova ia oe a faaruru ai oe i te fifi. A tiaturi e e tauturu mai o ’na ia oe ia matara mai i teie mau fifi.—Kor. 2, 4:7-9.

HAAMAITAIHIA E TA TE ATUA FARII MAITAI

17. Te imi ra Iehova ia vai ma, e no te aha?

17 Te hi‘o ra te Atua i to tatou oraraa no te hoê tumu au mau. Na roto i te peropheta Hanani, ua parau te Atua i te arii Asa: “Te hi‘o nei te mata o Iehova i to te ao atoa nei, ia horoa mai oia i te etaeta i te feia i tia te aau ia ’na.” (Par. 2, 16:9) Ua ite te Atua e aita i tia, aore ra i hoê, to Asa aau. Teie râ, e ‘horoa o ’na i te etaeta’ ia oe ia tamau oe i te rave i te mea tia.

18. Eaha te haamana‘o no nia ia Iehova ia mana‘o oe e aita oe e auhia ra? (A hi‘o i te hoho‘a matamua.)

18 Te hinaaro ra te Atua ia ‘imi tatou i te maitai,’ ia ‘hinaaro i te maitai’ e ia “rave i te maitai.” E nehenehe ïa o ’na e “aroha mai,” aore ra e faaite mai i ta ’na farii maitai. (Am. 5:14, 15; Pet. 1, 3:11, 12) Te ite e te haamaitai nei Iehova i te feia parau-tia. (Sal. 34:15) A haamana‘o na ei hi‘oraa i na vahine faafanau Hebera o Sipera e o Pua. A faatîtîhia ’i te mau Iseraela i Aiphiti, ua faaue Pharao ia raua ia haapohe i te mau aiû Hebera tamaroa atoa te fanauhia. Ua mǎta‘u rahi a‘e râ teie na vahine i te Atua. No to raua mana‘o haava tei tu i te hinaaro o te Atua, aita raua i na reira. I muri a‘e, ua noaa atoa mai ta Sipera e ta Pua tamarii. (Exo. 1:15-17, 20, 21) Ua ite Iehova i te ohipa maitai ta raua i rave. I te tahi taime, e mana‘o paha tatou e aita e taata e haapao ra i te maitai ta tatou e rave. Te haapao nei râ Iehova i te mau mea maitai atoa ta tatou i rave e e haamaitai mai oia.—Mat. 6:4, 6; Tim. 1, 5:25; Heb. 6:10.

19. Mea nafea te hoê tuahine i te haapiiraa e te ite ra Iehova i te mau mea maitai e ravehia ra?

19 Ua haapii mai te hoê tuahine Honegeria i Auteteria e ua ite te Atua i ta ’na mau tutavaraa. Ua horoahia ia ’na ra te vahi nohoraa o te hoê taata reo Honegeria ta ’na e nehenehe e poro atu. Oioi a‘era o ’na i te haere i tera vahi, aita râ e taata. I te tahi mau taime e au ra e e taata to roto i te fare o te ore râ e pahono mai. Ua vaiiho o ’na i te mau papai, i te rata e i ta ’na numera niuniu. I muri a‘e i te haere-noa-raa i tera vahi hoê matahiti e te afa, matara mai nei te opani! Ua fariihia o ’na e te hoê vahine mǎrû o tei parau: “E e, a tomo mai. Ua taio vau i te mau mea atoa ta oe i vaiiho mai e te tiai ra vau ia oe.” No to ’na mariri ai taata, ua rapaauhia teie vahine e te chimiothérapie e aita o ’na i ineine i te farerei i te taata. Ua farii o ’na i te haapii i te Bibilia. Oia mau, ua haamaitai te Atua i te tuahine no ta ’na mau tutavaraa!

20. Eaha to mana‘o i te haapao maitai o Iehova ia oe?

20 Mai ta tatou i hi‘opoa mai, te ite ra Iehova i te mau mea atoa ta tatou e rave ra e te imi ra o ’na i te aau o te taata atoa. Aita tatou e mana‘o ra e te tamata ra o ’na i te ite mai aore ra i te haruharu i te mau hape atoa ta tatou i rave. Te haafatata ’tu nei râ tatou ia Iehova no te mea te haapao maira oia e te hinaaro mau ra oia e tauturu mai e e haamaitai mai no te maitai ta tatou e rave.

^ par. 14 Ua piahia te aamu o te taeae Klein i roto i Te Pare Tiairaa o te 1 no Me 1985 (Farani).