Te faatiaraa a Mareko 13:1-37
13 A haere ai Iesu i rapaeau i te hiero, parau maira hoê o ta ˈna mau pǐpǐ: “Orometua, a hiˈo na i te faahiahia o teie mau ofai e o teie mau paturaa!”+
2 Na ô atura râ Iesu: “Te ite ra oe i teie mau paturaa rarahi, e ore roa e vaiihohia te hoê ofai i nia iho i te tahi, e huri-pauroa-hia i raro.”+
3 Te parahi ra Iesu i nia i te mouˈa Oliveta e itehia ˈtu ai te hiero, i haere mai ai Petero, Iakobo, Ioane e o Anederea ia ˈna ra, o ratou anaˈe, e ui maira:
4 “A faaite mai na, afea teie mau mea e tupu ai e eaha te tapao e ua fatata te hopea o teie mau mea atoa?”+
5 Na ô atura ïa Iesu: “A ara ia ore outou ia vare i te taata.+
6 Mea rahi te haere mai ma to ˈu iˈoa, a na ô ai: ‘O vau te Mesia,’ e mea rahi te vare.
7 Ia faaroo atoa outou i te tamaˈi e te parau o te tamaˈi, eiaha e riaria. Ia tupu teie mau mea e tia ˈi, aita â râ te hopea i tae mai atura.+
8 “E aro hoi te tahi nunaa i te tahi atu nunaa e te tahi faatereraa i te tahi atu faatereraa,+ e tupu te aueueraa fenua i tera e tera vahi e e tupu atoa te oˈe.+ E haamataraa teie o te mauiui rahi.+
9 “Outou râ, a ara ia outou iho. E tuu te taata ia outou i te haavaraa,+ e rutuhia outou i roto i te mau sunago+ e e tuuhia i mua i te mau tavana e te mau arii no ˈu nei, ia ite hoi ratou i ta outou e tiaturi ra.+
10 Na mua râ, ia porohia te parau apî oaoa i te mau nunaa atoa.+
11 E ia afaihia outou i te haavaraa, eiaha e haapeapea eaha ta outou e parau, a parau râ i tei horoahia ˈtu i taua hora ra, e ere hoi o outou te paraparau ra, o te varua moˈa râ.+
12 E tuu atoa te taata i to ˈna taeae e te metua tane i ta ˈna tamarii ia haapohehia, e orure hau te mau tamarii i to ratou mau metua, a tuu atu ai ia ratou ia haapohehia.+
13 E hae te taata atoa ia outou no to ˈu nei iˈoa.+ Te taata râ tei faaoromai tamau* e tae noa ˈtu i te hopea,+ e ora ïa.+
14 “Ia ite râ outou i te mea faufau o te haamou,+ ia tia hoi i te vahi e ore e tano ia tia i reira (ia feruri maite te taata taio e taa ˈi ia ˈna teie parau), ia horo ïa te feia e parahi ra i Iudea i te mau mouˈa.+
15 Eiaha te taata i nia iho i to ˈna tafare e pou mai e eiaha e tii i te tahi mea i roto i to ˈna fare,
16 eiaha atoa te taata i roto i te faaapu e hoˈi i muri e tii i to ˈna ahu tapoˈi.
17 Ua ati te mau vahine hapû e te mau vahine e aiû ta ratou i taua mau mahana ra!+
18 A tamau i te pure ia ore ta outou hororaa ia tupu i te tau toˈetoˈe,
19 e ati hoi to te reira mau mahana+ aita i tupu aˈenei mai te omuaraa mai o te ao ta te Atua i poiete, e tae roa mai i teie mahana, e o te ore e tupu faahou.+
20 Ahiri aita Iehova* i haapoto i taua mau mahana ra, aita e taata e ora. Ua haapoto râ oia i te reira no te feia ta ˈna i maiti.+
21 “E ia na ô atoa mai te taata: ‘A hiˈo! Tei ǒ nei te Mesia,’ aore ra: ‘A hiˈo! Tei ǒ oia,’ eiaha e tiaturi atu.+
22 E tia mai hoi te mau Mesia haavare e te mau peropheta haavare+ e e faatupu ratou i te mau tapao e te mau ohipa faahiahia mau no te tamata i te haavare i te feia maitihia.
23 Outou râ, a ara ïa.+ Ua faaite atea ˈtu vau i te mau mea atoa.
24 “I taua râ mau mahana ra, i muri aˈe i taua ati ra, e haapoiri te mahana, eita te avaˈe e anaana mai,+
25 e topa te mau fetia mai te raˈi mai e e ueuehia te mau mea puai o te raˈi.
26 I reira ratou e ite ai i te Tamaiti a te taata nei+ ia haere mai i roto i te mau ata ma te puai rahi e te hanahana.+
27 E i reira oia e tono ai i te mau melahi e e haaputuputu ai i to ˈna mau taata maitihia mai apatoerau, apatoa, hitia o te râ e tooa o te râ, mai te hopea o te fenua e tae roa ˈtu i te hopea o te raˈi.+
28 “A haapii na no nia i teie faahohoˈaraa o te tumu suke: I te tupuraa mai iho â te amaa apî e te oteoraa mai te omou, ua ite ïa outou e ua fatata te tau tupuraa.+
29 Oia atoa ia ite outou i teie mau mea ia tupu, ua ite ïa outou e tei te uputa te Tamaiti a te taata nei.+
30 Oia mau ta ˈu e parau atu: E ore roa teie nei uˈi e mou e tupu ai teie mau mea atoa.+
31 E mou te raˈi e te fenua,+ ta ˈu râ mau parau, e ore roa ïa e mou.+
32 “No nia i te reira mahana aore ra te hora, aita te hoê i ite, aita atoa te mau melahi i te raˈi e aita atoa te Tamaiti, o te Metua anaˈe râ.+
33 A haapao maitai, a ara,+ aita hoi outou i ite afea teie mau mea e tupu ai.+
34 E au ïa i te hoê taata tei reva i te ara, a vaiiho mai ai i to ˈna fare e na ta ˈna mau tavini e haapao,+ o te rave i ta ratou iho ohipa, e a faaue ai i te tiai uputa ia ara.+
35 A ara noa ïa, aita hoi outou i ite afea te fatu fare e haere mai ai,+ peneiaˈe i te ahiahi, i te tuiraa po aore ra hou te aahiata,* i te poipoi roa,+
36 ia ore outou ia roohia mai e ana e te taoto ra outou.+
37 Ta ˈu râ e parau ia outou, o ta ˈu ïa e parau i te taata atoa: A ara noa.”+
Nota i raro i te api
^ Aore ra “o te faaoromai tamau ra.”
^ Hiˈo i te tuhaa hau A5.
^ Hel: “ia totereo te moa.”
