Te faatiaraa a Mareko 2:1-28
2 Tau mahana râ i muri aˈe, hoˈi maira Iesu i Kaperenaumi e atutu atura te parau e tei te fare oia.+
2 Ruru maira e rave rahi taata e apǐ roa ihora te fare e te tomoraa atoa. Haamata ˈtura Iesu i te faaite i te parau apî oaoa.+
3 Afaihia maira te hoê hapepa tei amohia e e maha taata.+
4 No te rahi râ o te taata, aita ˈtura i tae ia ratou ia afai i te hapepa ia Iesu ra. Faaapoo atura ratou i te tapoˈi fare i nia noa mai i te vahi to reira Iesu, e haapou maira i te hapepa o te tarava ra i nia i te roˈi.
5 I to Iesu iteraa i to ratou faaroo,+ na ô ihora oia i te hapepa: “Ta ˈu tamaiti, ua faaorehia ta oe mau hara.”+
6 Te parahi ra te tahi mau papai parau i reira, te feruriruri ra i roto i to ratou aau:+
7 “Eaha teie nei taata e na reira ˈi i te parau? Te faaino ra oia i te Atua. O te Atua anaˈe hoi te nehenehe e faaore i te hara.”+
8 Taa oioi ihora ia Iesu to ratou huru feruriraa e na ô atura: “Eaha outou e feruri ai mai tera i roto i to outou aau?+
9 Eaha hoi te mea ohie aˈe ia parau i te hapepa: ‘Ua faaorehia ta oe mau hara,’ aore ra: ‘A tia, a rave i to oe roˈi, a haere?’
10 E faaite râ vau ia outou e e mana to te Tamaiti a te taata nei+ e faaore i te hara i te fenua.”+ Na ô atura oia i te hapepa:
11 “Te parau atu nei au ia oe: A tia i nia, a rave i to oe roˈi e a haere i to oe fare.”
12 Tia aˈera taua taata ra, rave ihora i to ˈna roˈi e haere atura i rapae na mua ia ratou pauroa. Maere roa ihora ratou pauroa e faahanahana ˈtura i te Atua a na ô ai: “A tahi ra tatou a ite ai i te ohipa mai teie.”+
13 Haere faahou atura Iesu na te pae miti. E nahoa rahi tei haere mai ia ˈna ra e haapii ihora oia ia ratou.
14 A haere noa ˈi Iesu, ite atura oia ia Levi te tamaiti a Alephaia e parahi ra i te fare aufauraa tute, e na ô atura: “A pee mai ia ˈu.” Tia aˈera taua taata ra e pee maira ia ˈna.+
15 I muri aˈe, a tamaa noa ˈi Iesu* i roto i te fare o Levi, e rave rahi titau tute e taata rave hara e tamaa atoa ra* e o ˈna e ta ˈna mau pǐpǐ. Mea rahi o ratou tei pee ia ˈna.+
16 I te iteraa te mau papai parau a te mau Pharisea e te tamaa ra Iesu e te feia rave hara e te titau tute, na ô maira ratou i ta ˈna mau pǐpǐ: “Te tamaa ra oia e te mau titau tute e te feia rave hara?”
17 Faaroo ihora Iesu i taua parau ra e na ô atura: “E ere te taote no te feia oraora maitai, no te feia maˈi râ. Ua haere mai hoi au e titau i te feia rave hara ia tatarahapa, eiaha râ te feia parau-tia.”+
18 Ua matau te mau pǐpǐ a Ioane e te mau Pharisea i te haapae i te maa. Haere maira ratou e ui ia Iesu: “E peu matauhia e te mau pǐpǐ a Ioane e te mau pǐpǐ a te mau Pharisea ia haapae i te maa, no te aha ïa ta oe mau pǐpǐ e ore ai e na reira atoa?”+
19 Na ô atura ïa Iesu: “Aita e tumu ia haapae te mau hoa o te tane faaipoipo+ i te maa a faaea noa mai ai oia i rotopu ia ratou, e ere anei? A faaea noa ˈi te tane faaipoipo ia ratou ra, eita e tano ia haapae ratou i te maa.
20 E tae mai râ te mau mahana e hopoi-ê-hia ˈi te tane faaipoipo,+ i reira ïa ratou e haapae ai i te maa.
21 Aita e taata e tafai i te ahu apî i nia i te ahu tahito. Ia na reira oia, e tô te ahu apî i nia i te ahu tahito, a rahi atu ai te mutu.+
22 Aita atoa e taata e tuu i te uaina apî i roto i te mau pute uaina* tahito. Ia na reira oia, e mahae te mau pute e e mâuˈa te uaina. E tuuhia râ te uaina apî i roto i te mau pute uaina apî.”
23 I to Iesu haereraa na roto i te mau faaapu sitona i te Sabati, hutihuti aˈera ta ˈna mau pǐpǐ i te huero sitona a haere noa ˈi ratou.+
24 Na ô maira te mau Pharisea: “A hiˈo na! Eaha ta oe mau pǐpǐ e rave ai i tei opanihia i te Sabati?”
25 Parau atura râ oia: “Aita outou i taio i ta Davida i rave a ere ai oia i te maa e a poia ˈi oia e to ˈna mau taata?+
26 Ia au i te aamu o te tahuˈa tiaau ra o Abiatara,+ ua tomo Davida i roto i te fare o te Atua e ua amu i te mau pane pûpûhia,* tei opanihia i te taata atoa ia amu. O te mau tahuˈa anaˈe te nehenehe e amu i te reira.+ Ua horoa atoa oia i te tahi na to ˈna mau taata.”
27 Na ô atura oia: “Ua haamau te Atua i te Sabati no te taata,+ aita râ oia i hamani i te taata no te Sabati.
28 No reira, o te Fatu atoa te Tamaiti a taata nei no te Sabati.”+
Nota i raro i te api
^ Aore ra “a tarava noa ˈi Iesu i te amuraa maa.”
^ Aore ra “e tarava atoa ra i te amuraa maa.”
^ Pute uaina iri animara.
