Te faatiaraa a Mareko 5:1-43
5 Tae atura ratou i tera ˈtu pae o te roto, i te tuhaa fenua o Geregasa.+
2 I te pouraa mai iho â Iesu na nia mai i te poti, farereihia maira oia e te hoê taata tei uruhia e te hoê varua viivii, mea na roto mai oia i te menema.*
3 I faaea na oia i reira e aita e taata i nehenehe e taamu ia ˈna i te fifi auri.
4 Ehia taime te taamuraahia to ˈna rima e avae i te fifi auri. Ua mutu râ e ua huˈahuˈa roa te fifi auri ia ˈna e aita i mau i te taata ia tapea ia ˈna.
5 I te po e te ao, na te menema e te mau mouˈa, i tutuô noa na e i otioti hanoa na oia ia ˈna i te ofai.
6 I to ˈna râ iteraa ˈtu ia Iesu i te atea ê, horo maira oia e tipapa ihora oia i mua ia ˈna.+
7 Tuô maira taua taata ra a na ô ai: “Eaha ta oe ohipa i ǒ nei, Iesu te Tamaiti a te Atua Teitei? Ia horeo mai oe i te ora o te Atua e eita oe e haamauiui ia ˈu.”+
8 I parau na hoi Iesu ia ˈna: “Haere i rapae i tera taata, oe te varua viivii.”+
9 Ui atura râ Iesu: “O vai to oe iˈoa?” Pahono maira oia: “O Nuu, mea rahi hoi matou.”
10 Onoono maira oia ia Iesu eiaha e tiavaru ia ratou i rapae i taua fenua ra.+
11 E nǎnǎ puaa+ tei te pae mouˈa e amu haere ra i te maa.+
12 Taparu aˈera te mau varua ia Iesu: “A tuu ia matou i roto i te mau puaa.”
13 Faatia ihora oia. Haere maira te mau varua viivii i rapae e tomo aˈera i roto i te mau puaa. Horo atura te nǎnǎ, piri i te 2 000 puaa, e topa ˈtura i roto i te miti na nia mai i te mato* e paremo aˈera.
14 Horo ê atura râ te mau tiai puaa e faatia na te oire e na te mataeinaa i te ohipa i tupu e haere maira te taata e hiˈo.+
15 Haere maira ratou ia Iesu e ite aˈera i te taata tei uruhia na e te nuu demoni, te parahi ra, e ahu to ˈna e ua afaro te feruriraa. Mǎtaˈu ihora ratou.
16 Faatia atoa ˈtura te feia tei ite mata i tei tupu i nia i te taata tei uruhia e te demoni e i nia i te mau puaa.
17 Parau onoono maira ratou ia Iesu ia faarue mai i to ratou fenua.+
18 Te haere ra Iesu i nia i te poti, taparu maira te taata tei uruhia na e te demoni ia pee atoa oia ia ˈna.+
19 Aita râ Iesu i farii, ua na ô atu râ: “A hoˈi i to oe fare, i to oe mau fetii, e a faatia ˈtu i te mau mea atoa ta Iehova* i rave no oe e i to ˈna aroharaa* ia oe.”
20 Haere atura taua taata ra e faaite na Dekapoli* i te mau mea atoa ta Iesu i rave no ˈna. Maere ihora te taata atoa.
21 Hoˈi atura Iesu i te tahi aˈe pae o te miti na nia i te poti. Tei tatahi â oia i ruru mai ai te hoê nahoa rahi i pihai iho ia ˈna.+
22 Tae maira te hoê aratai o te sunago, o Iaeiro te iˈoa, e i to ˈna iteraa ia Iesu, tuturi ihora oia i to ˈna pae avae.+
23 Taparuparu maira oia: “E maˈi rahi to ta ˈu tamahine iti.* Haere mai na e tuu i to rima i nia ia ˈna+ ia ora oia.”
24 Haere atura Iesu na muri ia ˈna. Pee atoa maira e rave rahi taata e piri roa maira ia Iesu.
25 Te vai ra te hoê vahine, 12 matahiti+ to ˈna tapahi-noa-raa.+
26 Ua mauiui roa hoi oia i roto i te rima o te taote e rave rahi, a pau roa ˈi ta ˈna moni e aita hoê aˈe apî. Ua rahi roa ˈtu râ to ˈna maˈi.
27 I to ˈna faarooraa i te mau parau atoa no nia ia Iesu, haere maira oia i muri ia ˈna na roto i te nahoa e tapea maira i to ˈna ahu,+
28 i parau noa na hoi oia: “Ia tapea noa ˈtu vau i to ˈna ahu, e ora ïa to ˈu maˈi.”+
29 Mau ihora to ˈna tapahi. Taa ˈtura ia ˈna e ua ora to ˈna maˈi ino.
30 Ite ihora Iesu e e mana no roto mai ia ˈna+ tei haere i rapae, fariu atura i muri i roto i te nahoa e ui atura: “Na vai i tapea i to ˈu ahu?”+
31 Pahono maira râ ta ˈna mau pǐpǐ: “Te ite ra oe i te nahoa tei piri roa ia oe, e te ui ra oe: ‘Na vai i tapea ia ˈu?’”
32 Hiˈo atura oia e ati noa ˈˈe ia ˈna ia ite oia i tei na reira ia ˈna.
33 Haere maira taua vahine ra ma te mǎtaˈu e te rûrû, ua ite hoi oia i tei tupu i nia ia ˈna. Tuturi ihora oia i mua ia Iesu a faaite roa ˈtu ai i te parau mau.
34 Na ô atura Iesu: “Ta ˈu tamahine, no to oe faaroo i ora ˈi oe. A haere, eiaha oe e haapeapea,+ e ia ora mai oe i to oe maˈi ino.”+
35 A paraparau noa ˈi oia, haere maira te tahi mau taata na te fare mai o te aratai o te sunago e na ô maira: “Ua pohe ta oe tamahine! Eiaha e haapeapea faahou i te Orometua.”+
36 Faaroo ihora râ Iesu i ta ratou parau, e na ô atura i te aratai o te sunago: “Eiaha oe e mǎtaˈu,* a faatupu noa râ i te faaroo.”+
37 Aita oia i faatia i te taata ia na muri ia ˈna, o Petero anaˈe râ e o Iakobo e Ioane te taeae o Iakobo.+
38 Haere aˈera ratou i te fare o te aratai o te sunago e ite atura Iesu i te taata e maniania ra, e taˈi ra e e auê ra.+
39 Tomo ihora oia i roto i te fare e na ô atura: “Eaha outou e taˈi ai e e maniania ˈi? Aita te potii i pohe, te taoto nei râ.”+
40 Ata faaooo aˈera ratou ia ˈna. I muri aˈe râ i to ˈna faaueraa ia tuuhia ratou i rapaeau, tapea maira oia i te metua tane e te metua vahine o te potii e na pǐpǐ tei na muri ia ˈna e tomo atura i te vahi to reira te potii.
41 Rave ihora oia i te rima o te tamahine e na ô atura: “Talita kumi,” teie te auraa ia hurihia: “E teie nei tamahine iti, te parau atu nei au ia oe, a tia mai!”+
42 Tia ihora te tamahine e hahaere atura. (E 12 matahiti to ˈna.) I reira iho, oaoa roa ihora na metua.
43 Faaue ihora oia ia ratou ma te onoono* eiaha e faaite i te ohipa i tupu+ e parau atura ia horoahia te maa na te potii.
Nota i raro i te api
^ Aore ra “menema haamanaˈoraa.”
^ Aore ra “pari.”
^ Hiˈo i te tuhaa hau A5.
^ Aore ra “aroha-hamani-maitai-raa.”
^ Aore ra “i na oire hoê ahuru.”
^ Aore ra “Ua fatata ta ˈu tamahine iti i te pohe.”
^ Aore ra “A faaea i te taiâ.”
^ Aore ra “Faaue maitai ihora oia ia ratou.”
