Te faatiaraa a Mareko 8:1-38

  • Faatamaa Iesu e 4 000 tane (1-9)

  • Aniraa i te hoê tapao (10-13)

  • Hopue a te mau Pharisea e ta Heroda (14-21)

  • Faaorahia te hoê matapo i Betesaida (22-26)

  • Faaite Petero o vai te Mesia (27-30)

  • Tohuhia to Iesu pohe (31-33)

  • Pǐpǐ mau a Iesu (34-38)

8  I taua mau mahana ra, e nahoa rahi â tei ruru mai e aita ta ratou e maa faahou. Pii ihora ïa Iesu i te mau pǐpǐ ia haere mai e na ô atura:  “Ua aroha roa vau i teie nahoa,+ a toru atura hoi mahana to ratou faaearaa ia ˈu nei e aita ta ratou e maa.+  Ia tuu vau ia ratou ia hoˈi i to ratou fare ma te poia,* e matapoirihia ratou i nia i te purumu, e mea atea to vetahi faaearaa.”  Parau maira râ ta ˈna mau pǐpǐ: “I teie vahi moˈemoˈe, ihea e noaa mai ai te faraoa e paia ˈi teie mau taata?”  Ui atura Iesu: “Ehia faraoa ta outou?” Parau maira ratou: “E hitu.”+  Faaue ihora oia i te nahoa ia parahi. Rave ihora oia i na faraoa e hitu, haamauruuru aˈera i te Atua, ofati ihora i te faraoa e horoa ˈtura i ta ˈna mau pǐpǐ e na ratou i opere na te nahoa.+  E maa iˈa atoa ta ratou. Haamaitai atura Iesu i te Atua no te reira e parau atura ia ratou ia opere atoa ˈtu.  Tamaa aˈera ïa ratou, paia ˈtura e haaputu atura te mau pǐpǐ i te toea faraoa i roto e hitu farii* rahi î maitai.+  Piri i te 4 000 tane tei tamaa. Tuu ihora Iesu ia ratou ia hoˈi. 10  Haere ihora oia e ta ˈna mau pǐpǐ i nia i te poti e fano atura i te tuhaa fenua o Dalemanuta.+ 11  Haere maira te mau Pharisea e mârô ia ˈna, a ani ai i te tahi tapao no te raˈi mai no te râmâ ia ˈna.+ 12  Horuhoru roa ihora oia e na ô atura: “No te aha teie nei uˈi e imi ai i te tahi tapao?+ Oia mau ta ˈu e parau atu: Aita e tapao e horoahia ˈtu i teie nei uˈi.”+ 13  Vaiiho ihora oia ia ratou, hoˈi atura i nia i te poti e fano atura i te tahi aˈe pae. 14  Ua moˈe râ i te mau pǐpǐ i te rave i te faraoa, e hoê anaˈe faraoa+ ta ratou i nia i te poti. 15  Faaara papu atura Iesu ia ratou: “A haapao maitai, a ara i te hopue a te mau Pharisea e te hopue a Heroda.”+ 16  Haamata aˈera ratou i te tatamaˈi no te mea aita hoê i rave i te faraoa. 17  A ite ai Iesu i te reira, na ô atura oia: “Eaha outou e tatamaˈi ai i te mea aita outou i rave i te faraoa? Aita â outou i taa ˈtura? Aita â outou i maramarama ˈtura? 18  ‘E mata to outou, aita outou e ite ra? E tariˈa to outou, aita outou e faaroo ra?’ Aita outou e haamanaˈo ra 19  i to ˈu ofatiraa i na faraoa+ e pae no na tane e 5 000, ehia farii ta outou i faaî?” Na ô maira ratou: “Hoê ahuru ma piti.”+ 20  “I to ˈu ofatiraa i na faraoa e hitu no na tane e 4 000, ehia farii* rahi î maitai ta outou i rave?” Na ô maira ratou: “E hitu.”+ 21  Na ô atura oia: “Aita â outou i maramarama ˈtura?” 22  Tae atura ratou i Betesaida. Aratai maira to reira mau taata i te hoê matapo ia Iesu ra, e taparu maira ia ˈna ia tapea i taua matapo ra.+ 23  Rave maira Iesu i te rima o te matapo e aratai ihora ia ˈna i rapaeau mai i te oire, parai atura i te huare i nia i to ˈna mata,+ a tuu atu ai i to ˈna rima i nia iho ia ˈna e ui atura: “Eaha ta oe e ite ra?” 24  Hiˈo maira taua taata ra e na ô maira: “Te ite nei au i te taata, e au hoi i te tumu raau, te hahaere nei râ ratou.” 25  Tuu faahou ihora Iesu i to ˈna rima i nia i te mata o taua taata ra. Ora maira to ˈna mata e ite maitai atura i te mau mea atoa. 26  Tuu ihora oia ia ˈna ia hoˈi i te fare a na ô ai: “Eiaha e hoˈi i te oire rii.” 27  Reva ˈtura Iesu e ta ˈna mau pǐpǐ i te mau oire rii i Kaisarea Philipi. A haere noa ˈi ratou, ui atura oia i ta ˈna mau pǐpǐ: “O vai au i ta te taata parauraa?”+ 28  Na ô maira ratou: “O Ioane Bapetizo,+ o Elia+ râ ta te tahi pae, e ta te tahi atu, hoê ïa o te mau peropheta.” 29  Ui atura oia: “E outou, o vai au i ta outou parauraa?” Pahono maira Petero: “O te Mesia oe.”+ 30  Faaue maitai atura oia ia ratou eiaha e faaite i te taata o vai oia.+ 31  Haamata atoa ˈtura oia i te haapii ia ratou e ia roohia te Tamaiti a te taata nei i te mauiui rahi e tia ˈi, ia vahavahahia oia e te mau aratai ati Iuda, te mau tahuˈa tiaau e te mau papai parau, ia haapohehia+ e ia faatiahia mai e toru mahana i muri iho.+ 32  Aita iho â oia i huna i te parau. Aratai rii ê ihora râ Petero ia Iesu e tamaˈi atura ia ˈna.+ 33  Huri tua maira Iesu, hiˈo atura i ta ˈna mau pǐpǐ, tamaˈi ihora ia Petero e na ô atura: “Haere na muri mai ia ˈu, Satani! No te mea e ere to oe manaˈo i to te Atua, to te taata râ.”+ 34  Pii atura oia i te nahoa e ta ˈna mau pǐpǐ e na ô atura: “Te taata e hinaaro e pee mai ia ˈu, ia haapae ïa ia ˈna iho e ia rave i ta ˈna pou haamauiuiraa,* a pee noa mai ai ia ˈu.+ 35  O tei faaherehere hoi i to ˈna ora,* e ere ïa oia i te reira. O tei ere râ i to ˈna ora* no ˈu nei e no te parau apî oaoa, e noaa faahou mai ïa ia ˈna te reira.+ 36  Eaha hoi te apî ia noaa i te hoê taata te ao taatoa, a ere ai râ oia i to ˈna ora?*+ 37  Eaha hoi ta te hoê taata e horoa no to ˈna ora?*+ 38  Te taata hoi o te haama ia ˈu e i ta ˈu mau parau i roto i teie nei uˈi faaturi* e te hara, e haama atoa ïa te Tamaiti a te taata nei ia ˈna+ ia haere mai oia ma te hanahana o to ˈna Metua e te mau melahi moˈa.”+

Nota i raro i te api

Aore ra “aita ratou i tamaa.”
Aore ra “farii maa.”
Aore ra “farii maa.”
Hiˈo i te titionare.
Heleni pusuke. Hiˈo i te titionare.
Heleni pusuke. Hiˈo i te titionare.
Heleni pusuke. Hiˈo i te titionare.
Heleni pusuke. Hiˈo i te titionare.
Aore ra “taiva.”