Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) EPERERA 2014

Eita e nehenehe e tavini e piti fatu

Eita e nehenehe e tavini e piti fatu

“E ore te taata e tia ia faaroo i te fatu toopiti. . . . O outou nei hoi, e ore e tia ia faaroo i te Atua e te Mamona [aore ra tao‘a].”—MAT. 6:24.

1-3. (a) Eaha te mau fifi i te pae moni ta e rave rahi e faaruru nei, e mea nafea vetahi i te tamataraa i te faatitiaifaro i te reira? (A hi‘o i te hoho‘a matamua.) (b) Eaha te mau haapeapearaa e hiti mai no nia i te haapaoraa i te tamarii?

TE FAATAA ra o Maria *: “Pauroa te mahana, ua rohirohi roa o Tihoti ta ’u tane ia ho‘i mai oia na te ohipa mai. Aita râ te moni i navai no to matou hinaaro o te mau mahana atoa. Ua hinaaro vau e haamâmâ i ta ’na hopoia e e hoo mai na ta mâua tamaiti ia Timi i te tahi mau mea au mau ta to ’na mau hoa haapiiraa e fana‘o ra.” Ua hinaaro atoa Maria e tauturu i te tahi atu fetii e e haaputu i te moni no a muri a‘e. E rave rahi o to ’na mau hoa tei haere i te ara ia rahi atu â te moni. Ia feruri râ oia i tera tere, aita to ’na mana‘o i papu roa. No te aha?

2 Ua haapeapea o Maria i te vaiiho i to ’na utuafare here e te mau ohipa Kerisetiano ta ratou i rave amui. Ua mana‘o atoa oia ia vetahi tei na reira. E au ra e te tamau noa ra to ratou utuafare i te tavini ia Iehova. Ua feruri râ o Maria e nafea oia e haapao ai ia Timi ia haere o ’na i te fenua ê. E nehenehe anei o ’na e ‘haapii i ta ’na tamaiti ma te a‘o a Iehova’ maoti te Internet?—Eph. 6:4.

3 Ua imi Maria i te aratairaa. Aita ta ’na tane i hinaaro ia haere Maria noa ’tu e ua parau o ’na e eita oia e tamata i te tapea ia ’na. Ua faaitoito te mau matahiapo e te tahi atu o te amuiraa ia ’na eiaha e reva. Area râ te mau tuahine e rave rahi, ua faaitoito atu ïa  ratou ia reva ma te na ô: “Mai te peu e mea here na oe i to oe utuafare, a haere. E tavini noâ oe ia Iehova.” Noa ’tu to ’na taiâ, apa ’tura Maria ia Tihoti, aroha ’tura ia Timi e reva ’tura no te hoê ohipa i te fenua ê. Ua haapapu atu râ oia: “Eita vau e reva maoro.” *

TE MAU HOPOIA UTUAFARE E TE MAU FAAUERAA TUMU BIBILIA

4. (a) No te aha e rave rahi taata e faarue ai i to ratou fenua? (b) E pinepine na vai e haapao i ta ratou tamarii?

4 Eita Iehova e hinaaro e vaiiho i ta ’na mau tavini i roto i te veve iti rahi. Mai tahito mai â, ua riro te faarueraa i to ’na fenua no te tahi atu ei ravea no te arai i te veve. (Sal. 37:25; Mas. 30:8) Ia ore ratou e poia, ua tono te patereareha ra o Iakoba i ta ’na mau tamaiti i Aiphiti no te hoo mai i te maa. * (Gen. 42:1, 2) I teie mahana, aita te rahiraa o te taata o te maiti e haere i te tahi atu fenua e vaiiho ra i to ratou utuafare no te mea ua poia ratou. No te mea paha mea rahi ta ratou tarahu. Area vetahi ê, te hinaaro nei ïa ratou e haamaitai i te huru oraraa o to ratou utuafare. Ia naea ia ratou tera mau fa noa ’tu te fifi i te pae moni, e rave rahi o te faaoti i te ora atea i to ratou utuafare, i to ratou iho anei fenua aore ra na te ara. E pinepine ratou i te vaiiho i ta ratou tamarii apî e na te hoê o na metua e haapao, na te hoê tamarii huru paari a‘e, na te papa e te mama ruau, na te tahi atu fetii aore ra na te hoa. Noa ’tu e mea mauiui no te mau taata o tei haere i te tahi atu fenua ia vaiiho i to ratou hoa faaipoipo aore ra tamarii, te na reira nei e rave rahi no te mea aita e ravea.

5, 6. (a) Eaha ta Iesu i haapii no nia i te oaoa e te hau? (b) No teihea mau tao‘a materia ta Iesu i haapii i ta ’na mau pǐpǐ ia pure? (c) E nafea Iehova e haamaitai ai ia tatou?

5 I te tau o Iesu, e rave rahi taata veve. Ua mana‘o paha ratou e ahani mea rahi a‘e ta ratou moni, e ite atu â ïa ratou i te oaoa e te hau. (Mar. 14:7) Aita Iesu i hinaaro ia tiaturi ratou i te mau mea eita e vai maoro. Ua hinaaro râ oia ia tiaturi ratou ia Iehova, no ǒ mai hoi ia ’na ra te mau haamaitairaa mure ore. I roto i ta ’na A‘oraa i nia i te mou‘a, ua haapii Iesu e no to tatou auhoaraa e o Iehova e fana‘o ai tatou i te oaoa e te hau mau. Aita te reira i taaihia i te tao‘a materia aore ra i ta tatou iho mau tutavaraa.

6 I roto i te pure tuiroo a Iesu, ua haapii mai oia ia tatou ia pure eiaha no te hoê oraraa fana‘o, no to tatou râ mau hinaaro mau o te mau mahana atoa, ‘te maa e au ia tatou i teie nei mahana.’ Ua haapapu oia i te feia e faaroo ra ia ’na: “Eiaha e haapue noa i te tao‘a na outou i teie nei ao . . . e haapue râ i te tao‘a na outou i nia i te ra‘i.” (Mat. 6:9, 11, 19, 20) E nehenehe tatou e tiaturi e e haamaitai mai Iehova ia tatou mai ta ’na i fafau. E ere noa te haamaitairaa a te Atua i te hoê tapao o ta ’na farii maitai, e haa râ oia ma te horoa i ta tatou iho e hinaaro mau ra. No reira, te ravea hoê no te fana‘o i te oaoa mau e te oraraa hau, o te tiaturiraa ïa i to tatou Metua aupuru eiaha râ i te moni.—A taio i te Mataio 6:24, 25, 31-34.

7. (a) Ua horoa Iehova i te hopoia e haapao i te mau tamarii ia vai? (b) No te aha mea faufaa ’i e o na metua e piti te haapao i ta raua mau tamarii?

7 Te ‘imiraa na mua i ta te Atua parau-tia,’ o te amo-atoa-raa ïa i te mau hopoia utuafare mai ta Iehova e hinaaro ra. Te itehia ra i roto i te ture a Mose teie faaueraa tumu e tano no te mau Kerisetiano: E mea tia ia haapii te mau metua i ta ratou tamarii ia tavini i te Atua. (A taio i te Deuteronomi 6:6, 7.) Ua horoa te Atua i tera hopoia i te mau metua, eiaha i to ratou mau metua ruhiruhia aore ra  i te tahi atu. Ua faataa te arii Solomona: “E faaroo mai, e tau tamaiti, i te a‘o a to metua tane, e eiaha e faarue i te faaitoito a to metua vahine.” (Mas. 1:8) Ua hinaaro Iehova e o na metua toopiti te aratai e te haapii i ta raua tamarii. (Mas. 31:10, 27, 28) Mea rahi ta te mau tamarii e nehenehe e haapii mai i to ratou na metua a faaroo ai ia raua ia aparau no nia ia Iehova i te mau mahana atoa e a ite ai i to raua hi‘oraa.

TE MAU FAAHOPEARAA MANA‘O-ORE-HIA

8, 9. (a) Eaha te mau tauiraa te tupu pinepine ia ora atea te hoê metua i to ’na utuafare? (b) Eaha te mau faahopearaa ino i te pae aau e i te pae morare ta te faataa-ê-raa e faatupu?

8 Hou a faarue ai i to ratou utuafare no te haere i te fenua ê, e tamata te taata i te feruri i te mau fifi e haapaeraa ta te reira e titau ra. Mea iti râ tei mana‘o i te mau faahopearaa atoa. (Mas. 22:3) * I muri iti noa ’‘e i te revaraa, e mauiui iti rahi to Maria i te ora atea i to ’na utuafare. Hoê â huru no ta ’na tane e ta ’na tamaiti. E pinepine Timi i te ani ia ’na: “No te aha oe i faarue ai ia ’u?” Ua faaoti Maria e reva no tau ava‘e noa. Ua riro râ te reira ei matahiti. Ua ite oia i te mau tauiraa peapea mau i roto i to ’na utuafare. E ere faahou Timi mai i na mua ’‘e e aita oia i faaite faahou i to ’na mau huru aau i to ’na mama. Ma te oto, te haamana‘o ra Maria: “Aita oia e here faahou ra ia ’u.”

9 Eita ana‘e te mau metua e ora amui e ta ratou mau tamarii mai te hoê utuafare, e nehenehe ratou e fifihia i te pae aau e oia atoa i te pae morare. * Ia au i te faito matahiti o te tamarii e te maororaa o te faataa-ê-raa, mea mauiui atu â te reira. Ua faataa ’tu Maria ia Timi e ua rave oia i te haapaeraa no to ’na maitai. No Timi râ, e au ra e ua faarue to ’na mama ia ’na. I te omuaraa, ua mihi oia ia ’na. I muri a‘e râ a ho‘i mai ai oia e hi‘o ia raua, aita Timi i oaoa tei reira ana‘e o ’na. Mai te tahi atu mau tamarii o tei vaiihohia, ua mana‘o Timi e aita e au faahou i to ’na mama to ’na auraro e here.—A taio i te Maseli 29:15.

Na roto i te Internet, eita oe e nehenehe e tauahi i ta oe tamarii (A hi‘o i te paratarafa 10)

10. (a) Mai te aha to te tamarii huru ia horoa noa mai to ’na metua i te mau tao‘a materia a ora noa ’i i te ara? (b) Eaha te ore e nehenehe e rave ia tamata te hoê metua i te haapii i ta ’na tamarii tei te fenua ê ana‘e oia?

10 No to ’na atea, ua tamata Maria e mono i te reira ma te hapono i te moni e te mau tao‘a materia. Ua taa râ ia ’na e te atea noa ’tura oia i ta ’na tamaiti e ma te opua-ore-hia, ua faaitoito oia ia Timi ia tuu i te mau tao‘a materia na mua ’‘e ia Iehova e i te utuafare. (Mas. 22:6) Ua matau o Timi i te parau ia ’na: “Eiaha e ho‘i mai, a hapono noa mai i te mau  ô.” Haamata ’tura o Maria i te taa e eita ta ’na e nehenehe e haapii i ta ’na tamaiti ma te papai i te rata, ma te taniuniu aore ra ma te tauaparau ia ’na maoti te Internet. Te faataa ra oia: “Na roto i te Internet, eita oe e nehenehe e tauahi i ta oe tamarii aore ra e apa ’tu ia ’na hou o ’na a taoto ai.”

Eaha te fifi ta oe e nehenehe e faaruru a ora atea ’i i to oe hoa faaipoipo? (A hi‘o i te paratarafa 11)

11. (a) E nafea te oraraa i te fenua ê no te rave i te ohipa e haafifi ai i te faaipoiporaa? (b) I teihea taime i taa ’i ia Maria e e mea tia ia ho‘i o ’na i to ’na ra utuafare?

11 Ua fifi-atoa-hia te taairaa o Maria e o Iehova. Ua amui atu o ’na i ta ’na amuiraa hoê noa taime i te hebedoma aore ra iti a‘e. Ua fifi-atoa-hia to ’na taairaa e ta ’na tane. Ua patoi oia i te titauraa a te paoti ia taoto ia ’na. E i te mea e eita ta Tihoti e o Maria e nehenehe e paraparau no nia i to raua mau fifi te tahi i te tahi, ua faaite raua taitahi i to raua huru aau i te tahi atu taata e fatata roa raua i te faaturi. Ua taa ia Maria e noa ’tu aita raua i faaturi, te fifi ra to raua faaipoiporaa. Te faaue ra te Bibilia i te mau hoa faaipoipo ia haapao i to raua mau hinaaro i te pae aau e i te pae taatiraa. E mea tia ia faataa te mau hoa faaipoipo i te taime o raua ana‘e no te haapao i to te tahi e te tahi hinaaro e maitai. I te mea râ e te ora atea ra o Tihoti e o Maria, aita ta raua e nehenehe. (Sire 1:2; Kor. 1, 7:3, 5) Aita atoa ta raua e nehenehe e haamori amui ia Iehova e ta raua tamaiti. Ua parau Maria: “I to ’u faarooraa i te hoê tairururaa e mea faufaa te haamoriraa utuafare tamau no te ora ’tu i te mahana rahi o Iehova, ua taa ’tura ia ’u e e mea tia ia ho‘i au i te fare.” Ua titauhia ia haamaitai faahou oia i te mau taairaa e to ’na utuafare e to ’na auhoaraa e o Iehova.

A‘ORAA MAITAI E A‘ORAA INO

12. Eaha te a‘oraa Bibilia te nehenehe e horoa i te feia o te ora atea ra i to ratou utuafare?

12 A opua ’i oia e ho‘i i te fare, ua rau te mana‘o ta ’na i faaroo. Ua haapopou te mau matahiapo o ta ’na amuiraa ia ’na no to ’na faaroo e itoito. Area râ te tahi atu o tei ora atea atoa i to ratou apiti e utuafare aita ïa. Aita ratou i pee i to ’na hi‘oraa. Ua tamata râ ratou i te faataui i to ’na mana‘o ma te parau: “E ho‘i oioi mai iho â oe i ǒ nei. Eita e navai te moni ia ho‘i oe i te fare. E nafea oe?” Eiaha e faahiti i tera mau parau haaparuparu. E mea tia ia a‘o te mau hoa Kerisetiano “i te mau vahine apî ra ia aroha i ta ratou mau tane, ia aroha hoi i ta ratou mau tamarii [e] ia parahi i te utuafare,” to ratou iho utuafare. ‘Eita ïa te parau a te Atua e faainohia.’—A taio i te Tito 2:3-5.

13, 14. No te aha e titauhia ’i te faaroo no te tuu ia Iehova na mua ’‘e i te mau hinaaro o to tatou utuafare? A faataa.

13 Mea rahi te taata o tei faarue na i to ratou fenua tei paari i roto i te mau ta‘ere i reira mea faufaa a‘e te tutuu e te utuafare, te mau metua iho â râ. E titauhia te faaroo puai  i te hoê Kerisetiano no te faaoaoa ia Iehova ma te ore e pee i te mau peu matauhia aore ra i te mau hinaaro o te utuafare.

14 A feruri na i te aamu o Carin: “A fanau ai au i ta ’u tamaiti ra ia Don, te ohipa ra mâua ta ’u tane i te fenua ê e no haapii noa ’tura vau i te Bibilia. Ua tiai to ’u utuafare ia afai atu vau ia Don i to ’u na metua no te haapao ia ’na e tae roa i te taime e pue ai te moni.” Ua mârô o Carin e na ’na iho e haapao ia Don. Ua parau râ to ’na fetii, oia atoa ta ’na tane, e e taata hupehupe o ’na e ua faaooohia o ’na. Te parau ra o Carin: “I tera taime, aita vau i taa maitai eaha te fifi ia vaiiho ia Don i to ’u na metua tau matahiti noa. Ua ite râ vau e ua horoa Iehova i te hopoia e haapao i ta mâua tamaiti ia mâua ra, to ’na mau metua.” A hapû faahou ai o Carin, ua faaue ta ’na tane e ere i te Ite no Iehova ia haamarua i tera tamarii. Ua haapuai te faaotiraa maitai ta Carin i rave i na mua ’tu i to ’na faaroo e ua mau papu â oia no Iehova. I teie nei, te oaoa ra oia, ta ’na tane e ta raua tamarii i te ora amui. Ahani Carin i afai hoê o na tamarii aore ra na tamarii e piti e na te tahi atu e haapao, mea taa ê roa paha to ratou oraraa i teie nei.

15, 16. (a) A faataa na i ta te hoê tuahine i ite i to ’na tamarii-rii-raa. (b) No te aha oia i faaoti ai e ore e na reira i nia i ta ’na iho tamahine?

15 Te faatia ra te hoê Ite no Iehova o Vicky te i‘oa: “Tau matahiti i te maoro, ua paari au e to ’u mama ruau a haapao noa ’i to ’u na metua i to ’u tuahine apî a‘e. A ho‘i ai au i to ’u na metua ra, ua taui to ’u huru aau no raua. Mea ohie no to ’u tuahine ia faaite ia raua i to ’na mana‘o, ia tauahi ia raua e mea piri roa to ratou taairaa. No ’u râ, e ere au i te mea piri roa i to ’u na metua. Noa ’tu e ua paari mai au, mea fifi no ’u ia faaite i to ’u mau mana‘o hohonu. Ua haapapu mâua to ’u tuahine i to mâua na metua e e aupuru mâua ia raua a paari ai raua. E na reira râ vau no te mea na ’u tera hopoia. Area râ to ’u tuahine, e na reira o ’na no to ’na here ia raua.”

16 Te parau ra o Vicky: “Te hinaaro nei to ’u mama ia afai au i ta ’u tamahine ia ’na ra e na ’na e haapao, mai ta ’na i rave a afai ai ia ’u i to ’na mama ra. Ma te faatura, ua patoi au. Te hinaaro ra mâua ta ’u tane e haapii i ta mâua tamarii no nia ia Iehova. E aita vau e hinaaro ra e haafifi i to ’u taairaa no a muri a‘e e ta ’u tamahine.” Ua ite Vicky e ia manuïa te reira, mea faufaa ia tuu ia Iehova e ta ’Na mau faaueraa tumu na mua roa i te mau fa i te pae moni e te mau hinaaro o te utuafare. Ua parau Iesu ma te papu: “E ore te taata e tia ia faaroo i te fatu toopiti,” oia hoi i te Atua e te mau tao‘a.—Mat. 6:24; Exo. 23:2.

E ‘HAAMANUÏA’ IEHOVA I TA TATOU MAU TUTAVARAA

17, 18. (a) Eaha te mau parau fafau ta te mau Kerisetiano mau e nehenehe e tiaturi noa? (b) E hi‘opoa mai tatou i teihea mau uiraa i roto i to muri nei tumu parau?

17 Ua faaoti to tatou Metua ra o Iehova i te tauturu ia tatou ia fana‘o i te mau mea ta tatou e hinaaro mau ra ia tuu tatou i te Basileia e ta ’na parau-tia na mua roa. (Mat. 6:33) Ua fafau Iehova i te horoa i te hoê “haapuraa” o te ore e titau ra ia ofati i te mau faaueraa tumu Bibilia, noa ’tu eaha te fifi ta tatou e faaruru. (A taio i te Korinetia 1, 10:13.) E nafea o ’na e na reira ’i? Ia pure e ia faaroo tatou ia Iehova, e faaite tatou i to tatou tiaturi ia ’na. (Sal. 37:5, 7) E ite o ’na i ta tatou mau tutavaraa e e ‘haamanuïa’ oia i te reira ma te horoa mai i te mau mea atoa ta tatou e hinaaro mau ra.—A hi‘o i te Genese 39:3.

18 Eaha ta tatou e nehenehe e rave no te faaafaro i te mau fifi o te faataa-ê-raa? Eaha te tahi mau ravea ohie e nehenehe e faaohipa no te haapao i to tatou utuafare ma te ore e vaiiho ia ratou? E nafea tatou e faaitoito ai ia vetahi ia rave i te mau faaotiraa ia au i te reira? E hi‘opoahia teie mau uiraa i to muri nei tumu parau.

^ par. 1 Ua tauihia te mau i‘oa.

^ par. 3 Noa ’tu e te faataa ra teie tumu parau i te mau vahine o te haere e ohipa i te ara, ua tano atoa te mau faaueraa tumu i roto no te tane.

^ par. 4 I roto i to ratou mau tere taitahi i Aiphiti, e haere atea paha te mau tamaiti a Iakoba i to ratou utuafare, hau atu e toru hebedoma i te maoro. I muri a‘e a haere ai o Iakoba e ta ’na mau tamaiti e ora i Aiphiti, ua apee atu ta ratou mau vahine e tamarii.—Gen. 46:6, 7.

^ par. 8 A hi‘o i te A ara mai na! no Mati–Eperera 2013, “Faarue i to ’na fenua no te tahi atu—Moemoeâ e te tupuraa mau.”

^ par. 9 Ia au i te mau parau faataa no e rave rahi fenua, e nehenehe te mau fifi e tupu mai ia vaiihohia te apiti aore ra te tamarii no te rave i te ohipa i te fenua ê. Te fifi paha mai te faaturi, te peu mahu aore ra te taotoraa i te fetii piri. E fifihia paha te mau tamarii i te fare haapiiraa. E riri hanoa paha ratou, e ahoaho, e hepohepo aore ra e hinaaro e haapohe ia ratou.