Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) EPERERA 2014

A faaitoito, o Iehova to oe tauturu!

A faaitoito, o Iehova to oe tauturu!

‘A faaitoito e ia parau e, O te Fatu ra o Iehova to ’u tauturu.’—HEB. 13:6.

1, 2. No te aha e ere ai i te mea ohie no te tahi taata ia faarue i ta ’na ohipa i te ara no te ho‘i i to ’na utuafare? (A hi‘o i te hoho‘a matamua.)

“A RAVE ai au i te ohipa i te ara, e tiaraa teitei to ’u, e mea aufau-maitai-hia,” ta Tamatahi * ïa e haamana‘o ra. “I to ’u râ haamataraa i te haapii i te Bibilia e te mau Ite no Iehova, taa ’tura ia ’u e e hopoia faufaa ’tu â ta ’u: te haapaoraa i to ’u utuafare eiaha noa i te pae tino, i te pae varua atoa râ. Mea na reira vau i te ho‘iraa mai i te fare.”—Eph. 6:4.

2 Ua ite o Tamatahi e tera iho â te hinaaro o Iehova. E ere râ i te mea ohie. E titauhia hoi ia faatupu faahou oia i te taairaa piri e ta ’na vahine e tamarii, e ia noaa mai maa moni. E nafea oia e na reira ’i? E tauturu anei te amuiraa ia ratou?

IA AFARO FAAHOU TE ORARAA UTUAFARE E TE TAVINIRAA

3. Eaha te tupu i nia i te tamarii ia ora hoê o na metua i te ara?

3 Ua fa‘i Tamatahi, “Aita vau i tâu‘a i ta ’u mau tamarii i te taime iho â râ i hinaaro ai ratou i te aratairaa î i te here. Aita vau i pihai iho ia ratou no te taio i te mau aamu Bibilia, no te pure, no te tauahi ia ratou e no te hauti e o ratou.” (Deut. 6:7) Te haamana‘o  ra o Ana, ta ’na tamahine matahiapo: “I taiâ rii na vau i te mea e aita to ’u papa i te fare. Ua matau noa matou ia ’na i to ’na hoho‘a mata e toparaa reo. I to ’na ho‘iraa mai, ua huru ê roa vau ia tauahi mai oia ia ’u.”

4. No te aha mea fifi ai no te hoê papa e ora ra i te ara ia amo maitai i ta ’na hopoia ei upoo utuafare?

4 Mea fifi roa ’tu â no te hoê papa e ora ra i te ara ia amo i ta ’na hopoia ei upoo utuafare. Te faataa ra Moea, te vahine a Tamatahi: “I amo na vau e piti hopoia, ta te mama e ta te papa. Ua matau ïa vau i te rave i te rahiraa o te mau faaotiraa o te utuafare. I to Tamatahi ho‘iraa mai, e mea tia ia haapii au eaha mau na te auraro Kerisetiano. Tae roa mai i teie mahana, i te tahi taime mea titauhia ia haamana‘o vau e tei reira ta ’u tane.” (Eph. 5:22, 23) Te na ô ra Tamatahi: “Ua matau ta ’u mau tamahine i te ani i to ratou mama te faatiaraa no te rave i te tahi mea. Mea titauhia ïa ia haapii au i te amo i ta ’u hopoia mai te hoê Kerisetiano.” Ua taa ia Tamatahi e Moea te faufaaraa ia ite ta raua mau tamarii e te rave amui nei raua i te mau faaotiraa.

5. (a) I to Tamatahi ho‘iraa mai na te ara, ua aha oia ia afaro faahou to ’na mau taairaa e to ’na utuafare? (b) Eaha te faahopearaa?

5 Ua rave Tamatahi i te mau mea atoa tei tia ia ’na ia afaro faahou to ’na mau taairaa e to ’na utuafare e no te tauturu ia ratou ia faatupu i te taairaa e o Iehova. Ua hinaaro oia e haapii i ta ’na mau tamarii eiaha noa ma te parau e te here ra oia ia Iehova, ma te faaite roa ’tu râ i te reira. (Ioa. 1, 3:18) Ua haamaitai anei Iehova ia Tamatahi? Te na ô ra Ana: “Ua ite maitai matou i ta ’na mau tutavaraa no te riro ei metua tane maitai e no te haafatata-faahou-raa mai ia matou. Ia ite matou e te hinaaro nei oia e tavini atu â i roto i te amuiraa, e oaoa roa matou. Te tamata ra te ao nei i te faaatea ê ia tatou ia Iehova. Ua tiatonu to matou na metua i te parau mau, e ua tutava atoa matou i te na reira. Ua haapapu mai o papa e eita roa ’tu oia e vaiiho faahou ia matou, e o ta ’na iho â i rave. Mai te peu e aita o ’na i na reira, aita paha vau i roto i te faanahonahoraa a Iehova i teie mahana.”

A FARII E E TUHAA ATOA TA OE

6. Eaha te haapiiraa ta te tahi mau metua i huti mai i te roaraa o te tama‘i?

6 Te faaite ra te tahi mau faatiaraa e i te roaraa o te tama‘i i te pae Europa apatoa, parauhia Balkans, e mea oaoa te mau tamarii a te mau Ite no Iehova noa ’tu te oraraa fifi i reira. No te aha? Aita te mau metua i nehenehe faahou e haere i te ohipa. E faaea ïa ratou i te fare no te haapii, hauti e aparau e ta ratou tamarii. Eaha te haapiiraa? Ta te mau tamarii e hinaaro mau ra, o to ratou ïa mau metua i pihai iho ia ratou, e ere i te moni aore ra te tao‘a. Oia mau, mai ta te Parau a te Atua e faataa ra, e maitai mai te mau tamarii ia rave te mau metua i te taime no te haapao maitai e no te haapii ia ratou.—Mas. 22:6.

7, 8. (a) Eaha ta te tahi mau metua e faaruru ia ho‘i ratou i te fare? (b) E nafea te metua e nehenehe ai e faaafaro i to ratou taairaa e ta ratou tamarii?

7 E faaruru vetahi mau metua o te ho‘i i te fare i te inoino aore ra te tâu‘a ore o ta ratou mau tamarii. E parau atu ïa ratou: “E te mau haapaeraa atoa ta ’u i rave no outou, aita iho â outou i mauruuru?” Tera râ, na te metua o tei faarue i te fare atoa te hape i ino ai te haerea o te tamarii. E nafea ïa o ’na?

8 A ani i te tauturu a Iehova ia taa ’tu â ia oe i te huru aau o to oe utuafare. Ia aparau oe ia ratou, a haapapu atu e a farii e e tuhaa atoa ta oe i roto i tera fifi. E nehenehe te hoê tatarahapa mau e tauturu atu. Ia ite to oe apiti e ta oe tamarii e te faaitoito noa ra oe i te rave i te mea maitai, e taa ia ratou  e te hinaaro mau ra oe e na reira. A faaoromai e eiaha e tuu. E nehenehe oe e fana‘o faahou e ma te mǎrû noa i te here e te faatura o to utuafare.

A HAMANI MAITAI I TO OE UTUAFARE

9. No te hamani maitai i to ’na iho utuafare, no te aha eita ’i e titauhia ia tapi i te hoê oraraa fana‘o?

9 Ua faaue te aposetolo Paulo e ia ore te mau Kerisetiano ruhiruhia e nehenehe e haapao ia ratou iho, na te mau tamarii e mootua e tahoo, aore ra e faaho‘i, i te maitai i te mau metua. Te faaitoito ra râ Paulo i te mau Kerisetiano atoa ia mauruuru noa i ta ratou e hinaaro mau â i te mau mahana atoa, mai te maa, te ahu e te nohoraa. Eiaha tatou e tapi i te hoê oraraa fana‘o aore ra i te moni maitai no a muri a‘e. (A taio i te Timoteo 1, 5:4, 8; 6:6-10.) No te hamani maitai i to ’na utuafare, eita e titauhia ia imi te hoê Kerisetiano i te tao‘a materia i roto i teie ao e fatata i te mou. (Ioa. 1, 2:15-17) Eiaha tatou e vaiiho i “te haavare o te tao‘a” aore ra “te peapea o teie nei ao” ia haafifi i to tatou utuafare, a ore atu ai e mau maite i te ora mure ore i roto i te ao apî parau-tia a te Atua!—Mar. 4:19; Luka 21:34-36; Tim. 1, 6:19.

10. No te aha e haerea paari ai eiaha e faarahi i te tarahu?

10 Ua ite Iehova e e hinaaro iho â tatou maa moni. Eita râ te moni e paruru e e tauturu ia tatou mai te paari no ǒ mai i te Atua ra. (Koh. 7:12; Luka 12:15) E pinepine eita te taata e feruri i te mau haamâu‘araa ia reva ratou i te ara no te ohipa. Aita atoa e haapapuraa e e monihia ratou i ǒ. E fifi atâta râ te tupu mai. Mea rahi tei ho‘i i te fare e te tarahu rahi a‘e. Tavini atura ïa ratou i te feia ta ratou i tipee aore ra i tarahu i te moni. Aita ’tura ïa i vata no te tavini ia Iehova. (A taio i te Maseli 22:7.) E haerea paari eiaha e faarahi i te tarahu.

11. E nafea te faanahoraa i te hoê tapura faufaa e tauturu ai i te mau utuafare?

11 Ua ite Tamatahi e ia manuïa ta ’na faaotiraa e faaea i pihai iho i to ’na utuafare, ia haapao maitai ïa oia i ta ratou mau haamâu‘araa. Ua faanaho ïa raua ta ’na vahine i te tahi tapura faufaa ia au i te mau mea ta ratou e hinaaro mau â. E ere iho â ïa teie tapura faufaa mai ta ratou i matau noa na. Ua turu atu râ ratou pauroa ma te ore e haamâu‘a i te moni no te mau mea e ere i te mea faufaa roa. * Te na ô ra o Tamatahi: “Ei hi‘oraa, ua tatara mai au i ta ’u mau tamarii mai te fare haapiiraa taa ê no te tuu ia ratou i te fare haapiiraa a te hau.” Ua pure o ’na e to ’na utuafare ia itehia mai ia ’na te hoê ohipa o te ore e haafifi i ta ratou porotarama pae varua. Mea nafea Iehova i te pahonoraa i ta ratou mau pure?

12, 13. Eaha ta Tamatahi i rave no te aupuru i to ’na utuafare, e mea nafea Iehova i te haamaitairaa i ta ’na faaotiraa e faaohie i to ’na oraraa?

12 I na matahiti matamua e piti, ua navai noa te moni ohipa a Tamatahi no te faatamaa i to ’na utuafare. I faaohipa na ratou i te moni faaherehere e ua rohirohi roa Tamatahi. Teie râ, e tae ratou i te mau putuputuraa atoa e te pororaa. Ua faaoti Tamatahi e eita oia e rave i te tahi ohipa o te faaatea ê ia ’na i to ’na utuafare. Te na ô ra oia: “Ua haapii vau i te rave i te ohipa rau. Aita ana‘e te tahi ohipa, e rave ïa vau i te tahi atu.”

E nehenehe anei oe e haapii i te rave i te ohipa rau no te haapao i to oe utuafare? (A hi‘o i te paratarafa 12)

13 I te mea e e aufau riirii noa oia i ta ’na mau tarahu, e mea tia ia aufau atoa o ’na i te moni taime. Ua farii râ oia i te na reira ia nehenehe o ’na e to ’na utuafare e tavini ia Iehova. Te parau ra o Tamatahi: “I teie nei, ua iti mai ta ’u moni, ahuru i nia i te hanere o ta ’u i fana‘o na i te ara. Aita râ matou i ere i te maa. ‘Aore te rima o Iehova i poto.’  Faaoti atura matou e riro ei pionie.” I muri rii a‘e, ua maitai mai ta ratou faanavairaa faufaa, e mea ohie a‘e atura no Tamatahi i te haapao i to ’na utuafare.—Isa. 59:1.

IA FAAHEPO TE FETII

14, 15. Eaha ta te mau utuafare e nehenehe e rave ia faahepohia ratou ia haapae i te mau ohipa Kerisetiano no te mau ohipa materia? Eaha paha te tupu ia horoa ratou i te hi‘oraa maitai?

14 I te fenua e rave rahi, te mana‘o ra te taata e e titauhia ia horoa ratou i te moni e te ô na te fetii e na te hoa. “E peu matauhia teie i ǒ matou e mea au na matou e horoa,” ta Tamatahi ïa e faataa ra. Te na ô atoa ra râ oia: “Te vai ra te taotiaraa. E faataa ïa vau ma te mǎrû i to ’u fetii e e horoa ’tu vau i ta ’u e nehenehe ma te ore e haafifi i te mau hinaaro e i te porotarama pae varua o to ’u utuafare.”

15 Ia ho‘i vetahi i te fenua aore ra ia faaoti ratou e faaea i pihai iho i te utuafare, e pinepine te fetii i te riri, te vahavaha e te inoino ia ratou. Te tiaturi ra hoi te fetii ia ratou no te faatamaa i te utuafare. E parau roa ’tu vetahi e mea ino ratou. (Mas. 19:6, 7) Te parau ra te tamahine a Tamatahi ra o Ana: “Ia ore matou e haapae i te mau ohipa Kerisetiano no te mau maitai materia, e taa paha ia vetahi o to matou fetii e mea faufaa to matou oraraa Kerisetiano. E nafea râ e taa ’i ia ratou ia pee noa matou i ta ratou aniraa?”—A hi‘o i te Petero 1, 3:1, 2.

A TIATURI I TE ATUA

16. (a) E nafea te hoê taata e ‘haavare ai ia ’na iho’? (Iak. 1:22) (b) Teihea faaotiraa ta Iehova e haamaitai?

16 I to te hoê tuahine tei vaiiho mai i ta ’na tane e tamarii taeraa ’tu i te hoê fenua moni, ua parau oia i te mau matahiapo: “E haapaeraa rahi ta matou i rave ia tae mai au i ǒ nei. Ua vaiiho roa ta ’u tane i ta ’na hopoia matahiapo. Mea maitai e e haamaitai Iehova i teie tere.” E haamaitai iho â Iehova i te mau faaotiraa i ravehia ma te tiaturi ia ’na. Eita râ oia e haamaitai i te hoê faaotiraa aita e tuati ra i to ’na hinaaro, mai te peu iho â râ ua vaiihohia te tahi fana‘oraa taa ê no te mau tumu tano ore.—A taio i te Hebera 11:6; Ioane 1, 5:13-15.

17. No te aha e imi ai i ta Iehova aratairaa hou a rave ai i te faaotiraa? E nafea tatou e na reira ’i?

17 A imi i ta Iehova aratairaa hou a rave  ai i te faaotiraa, eiaha i muri iho. A pure ia ’na ia horoa mai i to ’na varua mo‘a, to ’na paari e ta ’na aratairaa. (Tim. 2, 1:7, Te Faufaa Api) A uiui: ‘Ua ineine au i te faaroo ia Iehova i roto i teihea mau tupuraa? E na reira atoa anei au noa ’tu te hamani-ino-raa?’ Mai te peu e e, ua ineine anei oe i te faaroo ia ’na noa ’tu e eita oe e ora i te hoê oraraa fana‘o? (Luka 14:33) A ani i te a‘oraa Bibilia i te mau matahiapo e a faaohipa i ta ratou mau a‘oraa. E faaite ïa oe i to oe faaroo e tiaturi i ta Iehova parau fafau e tauturu ia oe. E ere na te mau matahiapo e faaoti no oe, e nehenehe râ ratou e tauturu ia oe ia rave i te mau faaotiraa e oaoa noa ’i oe.—Kor. 2, 1:24.

18. Na vai e aupuru i te hoê utuafare? I roto râ i teihea mau tupuraa e nehenehe ai tatou e tauturu atu?

18 Te “hopoia” e aupuru i te utuafare i te mau mahana atoa, ua horoa ’tu ïa Iehova i te upoo utuafare ra. E haapopou e e pure ana‘e no te mau taeae e amo i taua hopoia ra ma te ore e faarue i to ratou utuafare noa ’tu te faaheporaa e te hinaaro e na reira. E nehenehe tatou e faaite atu i te here mau e te aroha, aore ra aumihi, ia tupu te tahi ati aore ra rapaauraa ru. (Gal. 6:2, 5; Pet. 1, 3:8) E nehenehe anei oe e horoa maa moni ia hinaaro-ru-hia te reira aore ra e tauturu i te hoê hoa Kerisetiano ia noaa ta ’na ohipa i ǒ nei? Mai te peu e e, eita ïa e titauhia ia faarue oia i to ’na utuafare no te imi i te ohipa i te ara.—Mas. 3:27, 28; Ioa. 1, 3:17.

A HAAMANA‘O E O IEHOVA TO OE TAUTURU!

19, 20. No te aha te mau Kerisetiano e nehenehe ai e tiaturi e e tauturu Iehova ia ratou?

19 Te faaitoito maira te mau Papai: “Ei parahiraa nounou tao‘a ore to outou, ia mauruuru i ta outou i noaa ra; o te Atua iho hoi tei parau mai e, E ore roa vau e taiva ia oe, e ore roa vau e faarue ia oe, e ore, e ore roa ’tu. E tia ’i ia tatou ia faaitoito e ia parau e, O te Fatu to ’u tauturu, e ore au e mǎta‘u i ta te taata e rave mai ia ’u nei.” (Heb. 13:5, 6) E nafea te reira e tupu ai i teie mahana?

20 Te parau ra te hoê matahiapo i te hoê fenua veve: “E pinepine te taata i te parau e mea oaoa roa te mau Ite no Iehova. Ua tapao atoa ratou e mea nehenehe noa te faaahuraa o te mau Ite no Iehova tei veve e e au ra e mea navai a‘e ratou ia vetahi ê.” Te tuati ra te reira i ta Iesu i fafau i te feia e tuu i te Basileia i te parahiraa matamua. (Mat. 6:28-30, 33) Mea here iho â na Iehova, to oe Metua i te ra‘i, ia oe e te hinaaro ra oia i te mea maitai a‘e no oe e no ta oe mau tamarii. “Te hi‘o nei te mata o Iehova i to te ao atoa nei, ia horoa mai oia i te etaeta i te feia i tia te aau ia ’na.” (Par. 2, 16:9) No to tatou maitai i horoa mai ai oia i ta ’na mau faaueraa, tera atoa i taaihia i te oraraa utuafare e te mau hinaaro i te pae materia. Ia haapao tatou i te reira, te faaite ra ïa tatou i to tatou here e tiaturi ia ’na. “Teie hoi te hinaaro i te Atua, o te haapao i ta ’na ra parau: e ere hoi ta ’na parau i te mea teimaha.”—Ioa. 1, 5:3.

21, 22. No te aha oe i faaoti ai e tiaturi ia Iehova?

21 Te na ô ra Tamatahi: “Ua ora atea vau i ta ’u vahine e tamarii, eita e nehenehe e ho‘i faahou i muri. Aita râ vau e faahapa noa ra ia ’u. Ua onahia e rave rahi hoa o matou te raveraa i te ohipa, e ere râ ratou i te mea oaoa. Te faaû nei to ratou utuafare i te fifi rahi. To matou râ utuafare, mea oaoa roa ïa! Te faahiahia nei au i te ite e o te mau ohipa Kerisetiano na mua roa ta te tahi atu mau taeae i ǒ nei, noa ’tu te veve, e haapao nei. Te ite nei matou paatoa i te tanoraa o ta Iesu parau fafau.”—A taio i te Mataio 6:33.

22 A faaitoito! A maiti i te faaroo ia Iehova e a tiaturi ia ’na. Ia here oe ia Iehova, i to oe apiti e ta oe mau tamarii, e amo oe i ta oe hopoia Kerisetiano ei upoo utuafare. I reira ïa oe e ite ai e ‘o Iehova to oe tauturu.’

^ par. 1 Ua tauihia te mau i‘oa.

^ par. 11 A hi‘o i te anairaa tumu parau “Comment gérer votre argent,” o te Réveillez-vous! no Tetepa 2011.