Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) EPERERA 2014

 AAMU

Ihea te taviniraa taime taatoa i te aratairaa ia ’u?

Ihea te taviniraa taime taatoa i te aratairaa ia ’u?

A feruri ai i na 65 matahiti i roto i te taviniraa taime taatoa, e nehenehe au e parau ma te tia e ua î to ’u oraraa i te oaoa. E ere i te auraa e aita e taime oto e toaruaru. (Sal. 34:12; 94:19) I te rahiraa o te taime, e oraraa oaoa e te faufaa mau to ’u!

I TE 7 no Tetepa 1950, ua riro mai au ei melo no te utuafare o te Betela i Brooklyn. I tera tau, i taiohia na i te Betela e 355 taeae e tuahine no e rave rahi fenua mai te 19 e tae atu i te 80 matahiti. E Kerisetiano faatavaihia e rave rahi o ratou.

TO ’U HAAMATARAA I TE TAVINI IA IEHOVA

I to ’u bapetizoraahia, 10 matahiti

Ua haapii mai to ’u mama ia ’u ia tavini i to tatou Atua oaoa. (Tim. 1, 1:11) Mea apî â vau a haamata ’i oia i te tavini ia Iehova. I te 1 no Tiurai 1939, i te ahururaa o to ’u matahiti, ua bapetizohia vau i te hoê tairururaa (parauhia i teie mahana te tairururaa haaati) i Columbus i Marite. Fatata hoê hanere o matou tei haere i te hoê vahi tarahuhia no te faaroo i te oreroraa parau haruharuhia a Joseph Rutherford, “Faatereraa haavî aore ra Tiamâraa.” I te afaraa o te oreroraa parau, ua ruru mai te hoê nahoa taata i rapaeau i te piha iti i reira matou. Ua tomo taue a‘era ratou i roto, ua tapea i ta matou putuputuraa e ua aratai ia matou i rapaeau i te oire. Putuputu a‘era matou i te fare o te hoê taeae e ere i te mea atea roa i te oire no te faaroo i te toea o te porotarama. Mai ta oe e nehenehe e mana‘o, aita roa ’tu i moe ia ’u te mahana a bapetizohia ’i au!

Ua faaitoito to ’u mama i te aratai ia ’u i roto i te parau mau. Noa ’tu e e taata maitai to ’u papa, mea iti roa to ’na anaanatae no te haapaoraa e no to ’u nei mau taairaa e te Atua. Ua faaitoito rahi mai râ o mama e te tahi atu mau Ite o te amuiraa no Omaha.

NAFEA VAU I TE RAVERAA I TE HOÊ FAAOTIRAA FAUFAA?

A fatata ’i ta ’u parau tuite tuarua i te noaa, mea titauhia ia rave au i te hoê faaotiraa no nia i ta ’u e rave i to ’u oraraa. I te tau faafaaearaa haapiiraa taitahi o te tau veavea, na muri i te tahi mau Kerisetiano hoê matahiti to matou, i rave na vau i te taviniraa pionie i te tau faafaaearaa (te taviniraa pionie tauturu i teie mahana).

Ua tonohia e piti taeae apî faaea taa noa ei tiaau ratere i roto i ta matou tuhaa fenua, o John Chimiklis e Ted Jaracz. No noaa noa ’tura ta raua parau tuite o te hituraa o te piha haapiiraa no Gileada. Ua maere roa vau i te iteraa e e 20 tiahapa noa matahiti to raua. E 18 ïa to ’u matahiti i tera taime e ua fatata ta ’u parau tuite tuarua i te noaa. Te haamana‘o noa ra vau i ta te  taeae Chimiklis i ani mai ia ’u no nia i ta ’u e rave i to ’u oraraa. I to ’u faaiteraa ’tu, ua faaitoito mai oia ia ’u: “A haere i roto i te taviniraa taime taatoa. Aita roa ’tu oe i ite ihea te reira e aratai ai ia oe.” Ua putapû roa vau i tera a‘oraa e i te hi‘oraa o teie na taeae. No reira, i muri iho i te noaaraa mai i ta ’u parau tuite, ua riro mai au ei pionie i 1948.

UA RIRO MAI AU EI MELO O TE BETELA

I Tiurai 1950, ua haere au e to ’u na metua i te tairururaa nunaa rau i te Yankee Stadium i New York. I reira to ’u apitiraa i te putuputuraa no te feia e hinaaro ra e tavini i te Betela. Ua faaî e ua horoa ’tura vau i te parau aniraa o tei faaite i to ’u hinaaro e tavini i reira.

Noa ’tu e aita to ’u papa i patoi i ta ’u taviniraa pionie e ia faaea vau i te fare, ua mana‘o oia e e mea tia ia horoa vau maa moni no te aufau i to ’u piha e i te maa. I te hoê mahana, i te omuaraa o te ava‘e Atete, ua haere au i ta matou afata rata hou a haere ai e imi i te ohipa. Ite atura vau i te hoê rata na ’u no Brooklyn mai. Ua tarimahia te reira e Nathan Knorr o tei papai: “Ua tapae mai ta oe aniraa no te tavini i te Betela. Ua taa ia ’u e e farii oe e faaea i te Betela no te toea o to oe oraraa. Te hinaaro nei ïa vau ia haere mai oe i te Betela i te 124 Columbia Heights, Brooklyn, New York, i te 7 no Tetepa 1950.”

I taua mahana ra a ho‘i mai ai to ’u papa na te ohipa mai, ua parau atura vau ia ’na e ua itehia e au i te hoê ohipa. Ua na ô oia: “Mea maitai, ihea oe e rave ai i te ohipa?” Ua parau atura vau, “I te Betela i Brooklyn, 10 tara Marite [fatata 1 000 F CFP] i te ava‘e.” Ua huru ê roa oia, ua parau râ oia e mai te peu e tera ta ’u i maiti, na ’u ïa e tutava ia manuïa te reira. Aita i maoro roa, i te tairururaa i te Yankee Stadium i 1953, ua bapetizohia oia!

E to ’u hoa pororaa, Alfred Nussrallah

Ma te oaoa, ua titau-atoa-hia to ’u hoa pororaa o Alfred Nussrallah i te Betela i te hoê â taime. Ua ratere ïa mâua no te haere i ǒ. I muri a‘e, ua faaipoipo oia e ua haere raua ta ’na vahine o Joan i Gileada, i roto i te taviniraa mitionare i Lebanona e i muri iho i roto i te taviniraa ratere i Marite.

HOPOIA I TE BETELA

Ta ’u hopoia matamua i te Betela, tei roto ïa i te Tuhaa tahoêraa buka. Te papai matamua ta ’u i tahoê, o te buka ïa Eaha ta te haapaoraa i rave no te huitaata nei? (Beretane). I muri iho e vau ava‘e i roto i te Tuhaa tahoêraa buka, ua afaihia vau i te Tuhaa taviniraa i raro a‘e i te aratairaa a te taeae Thomas Sullivan. Mea oaoa ia ohipa e o ’na e ia fana‘o i te paari e te haroaroa i te pae varua tei noaa ia ’na i te roaraa o te mau matahiti i roto i te faanahonahoraa.

I muri a‘e fatata e toru matahiti i roto i te Tuhaa taviniraa, ua parau mai o Max Larson, te tiaau o te fare neneiraa, e te hinaaro ra te taeae Knorr e farerei ia ’u. Ua mana‘o vau e e ohipa hape paha ta ’u i rave. Ua topa râ te hau i to te taeae Knorr parauraa mai e te hinaaro nei oia e ite e ua opua anei au e faarue i te Betela. Ua hinaaro oia i te hoê taata no te ohipa i roto i ta ’na piha ohipa no te hoê taime poto e e nehenehe anei ta ’u e amo i tera hopoia. Ua faaite au e aita vau e hinaaro ra e faarue i te Betela. Inaha, e fana‘oraa taa ê no ’u ia ohipa e 20 matahiti i roto i ta ’na piha ohipa.

Mea pinepine vau i te parau e aita roa ’tu vau i aufau i te haapiiraa ta ’u i fana‘o a ohipa ai au e te mau taeae mai ia Sullivan e Knorr, oia atoa te tahi atu mau taeae mai ia Milton Henschel, Klaus Jensen, Max Larson, Hugo Riemer e Grant Suiter. *

 Mea naho maitai te ohipa a te mau taeae o matou i te haaraa no te maitai o te faanahonahoraa. Ua ohipa te taeae Knorr ma te rohirohi ore ia haere maitai te ohipa i taaihia i te Basileia i mua. No te feia i rave i te ohipa e o ’na, mea ohie ia paraparau atu ia ’na. Noa ’tu e mea taa ê to matou mana‘o, e nehenehe ta matou e faahiti i te reira a tiaturi noa mai ai oia.

I te hoê taime, ua faaitoito taeae Knorr ia ’u ia haapao maite i te mau ohipa tei parauhia e mea haihai. Ei hi‘oraa, ua faaite mai oia e e tiaau o ’na o te fare neneiraa i na mua ’‘e. E i taniuniu na taeae Rutherford ia ’na ma te parau: “Taeae Knorr, ia haere mai oe e tamaa, a afai mai na i te tahi mau tumâ parau. Te hinaaro nei au i te reira i nia i ta ’u iri raveraa ohipa.” I tera iho â taime ua haere taeae Knorr i te piha vairaa tauihaa, ua tuu i tei anihia ’tu i roto i ta ’na pute e ua afai i te reira i te piha ohipa a taeae Rutherford i te avatea. E ohipa haihai roa te reira, no taeae Rutherford râ, mea faufaa ïa. Na ô mai nei taeae Knorr ia ’u: “Mea au roa na ’u e te vai ra te penitara faaoeoehia i nia i ta ’u iri raveraa ohipa. No reira, a haapao na e te vai ra te penitara i ǒ nei i te mau poipoi atoa.” E rave rahi matahiti to ’u haapaoraa e ia oeoe noa ta ’na mau penitara.

Pinepine taeae Knorr i te paraparau no nia i te faufaaraa ia faaroo maite ia anihia mai ia haapao i te tahi ohipa taa maitai. I te hoê mahana, ua faataa mai oia i te mau faaueraa papu no te rave i te tahi ohipa, aita râ vau i faaroo maitai. Fifi atura oia. No to ’u peapea rahi, papai a‘era vau i te hoê rata no te faaite i to ’u tatarahapa rahi e e mea maitai a‘e ia tuuhia vau i roto i te tahi atu piha ohipa. I taua noa poipoi ra, ua haere mai taeae Knorr a na ô ai: “Robert, tei ia ’u ra ta oe rata. Parau mau, ua hape oe. Ua paraparau tâua no nia i te reira. Papu maitai ia ’u e e haapao maitai atu â oe. Haere mai, e ho‘i ana‘e i ta tâua ohipa.” Ua au roa vau i to ’na huru maitai i nia ia ’u.

TE HINAARO E FAAIPOIPO

I muri mai i to ’u taviniraa i te Betela e vau matahiti i te maoro, aita ’tu opuaraa ta ’u i te faaea-noa-raa i te Betela. Ua taui râ. A faatupuhia ’i te tairururaa nunaa rau i te Yankee Stadium e i te Polo Grounds i 1958, ua ite au ia Lorraine Brookes. Ua farerei ê na vau i teie tuahine i 1955 a tavini ai oia ei pionie i Montréal, i Kanada. Ua faahiahia roa vau i to ’na huru no nia i te taviniraa taime taatoa e i to ’na aau tae i te haere i te mau vahi atoa i reira te faanahonahoraa a Iehova e tono ai ia ’na. I hinaaro noa na Lorraine e haere i te Haapiiraa no Gileada. I te 22raa o to ’na matahiti, ua fariihia oia i te 27raa o te piha haapiiraa no Gileada i 1956. I muri mai i te tufaraa parau tuite no Gileada, ua tonohia oia ei mitionare i Beresilia. I 1958, ua farerei â mâua Lorraine e ua farii o ’na i ta ’u aniraa e faaipoipo. Opua ’tura mâua e faaipoipo i te matahiti i muri iho ma te tiaturi e e fariihia mâua i roto i te taviniraa mitionare.

 I to ’u faaiteraa ia taeae Knorr i ta ’u opuaraa, ua parau mai oia ia tiai e toru â matahiti e ia tavini noa i te Betela i Brooklyn. I tera tau, no te faaea i te Betela i muri a‘e i te faaipoiporaa, e titauhia ahuru a‘e matahiti taviniraa i te Betela no te hoê e e toru a‘e matahiti no te tahi atu. Ua farii ïa Lorraine i te tavini e piti matahiti i te Betela i Beresilia e hoê matahiti i te Betela i Brooklyn hou a faaipoipo ai mâua.

I na matahiti matamua e piti o to mâua momo‘araa, hoê noa ravea no te paraparau, te rata. Mea moni roa ia taniuniu e aita atoa e poroi roro uira i tera tau! I to mâua faaipoiporaa i te 16 no Tetepa 1961, na te taeae Knorr i vauvau i ta mâua oreroraa parau faaipoiporaa. Auê ïa fana‘oraa taa ê! Parau mau, e au ra e mea maoro mau tera mau matahiti tiairaa. I teie nei râ, a hi‘o ai ma te mauruuru rahi e te oaoa i na 50 tiahapa matahiti faaipoiporaa, mea hoona iho â ia faaoromai!

I to mâua mahana faaipoiporaa. Mai te pae aui: Nathan Knorr, Patricia Brookes (te tuahine o Lorraine), Lorraine e o vau, Curtis Johnson, Faye e Roy Wallen (to ’u na metua)

HOPOIA TAA Ê

I 1964, ua fana‘o vau i te haamaitairaa taa ê e tere na te mau fenua ei tiaau ratere amaa. I tera tau, aita te mau vahine e nehenehe e apee i ta ratou tane i roto i to ratou mau tere. I 1977, ua faatanohia te reira. Haamata ’tura te mau vahine i te reva na muri iho i ta ratou tane. I tera matahiti to mâua Lorraine apeeraa ia Grant e Edith Suiter i roto i te mau tere i te mau amaa i Heremani, Auteteria, Heleni, Kupero, Turekia e Iseraela. Ia amuihia, fatata e 70 fenua na te ao i terehia e au.

I te hoê o taua mau tere ra i Beresilia i 1980, ua haere matou i te oire no Belém. I tavini na Lorraine ei mitionare i ǒ. Ua haere atoa matou e farerei i te mau taeae i Manaus. A horoahia ’i te hoê oreroraa parau i te hoê tahua tuaro, ua ite matou i te hoê pǔpǔ o te parahi amui ra. Aita ratou i pee i te peu tumu matauhia e to Beresilia, oia hoi e apa te mau vahine i nia i te paparia e e aroha rima noa te mau taeae te tahi i te tahi. No te aha hoi?

O to tatou mau hoa Kerisetiano here teie o tei ora i roto i te hoê puhapa lepera i roto i te ururaau haumi no Amazonie. No te maitai o vetahi ê, ua faataa ê ratou ia ratou ma te ore e tapea roa ’tu i te tahi atu taata o tei tae mai. Ua haaputapû mau râ ratou i to matou aau e eita roa ’tu e moe ia matou to ratou mata oaoa! Ua tano iho â te mau parau a Iehova: “E himene hua to ’u ra mau tavini i te oaoa aau ra.”—Isa. 65:14.

E ORARAA OAOA E TE FAUFAA MAU

E feruri pinepine mâua Lorraine i ta mâua taviniraa ia Iehova i nia hau atu e 60 matahiti. Ua oaoa roa mâua i te haamaitairaa a Iehova ma te vaiiho ia ’na ia aratai mai i roto i ta ’na faanahonahoraa. Noa ’tu e eita ta ’u e nehenehe faahou e ratere na te ao mai i na mua a‘e, e nehenehe ta ’u e rave i ta ’u ohipa i te mau mahana atoa ei tauturu no te Tino aratai. Te ohipa nei au e te Tomite o te mau tiaau e te Tomite taviniraa. Te haafaufaa rahi nei au i teie fana‘oraa taa ê e turu i te huitaeae na te ao nei i nia i te hoê faito haihai. Te maere noa ra mâua i te ite i te rahiraa tane e vahine apî o tei rave i te taviniraa taime taatoa mai te hi‘oraa o Isaia o tei parau: “Teie au; o vau ta oe e tono.” (Isa. 6:9) Te haapapu nei teie rahiraa taata i te tanoraa o te mau parau ta te tiaau haaati i parau mai mea maoro i teie nei: “A haere i roto i te taviniraa taime taatoa. Aita roa ’tu oe i ite ihea te reira e aratai ai ia oe.”

^ par. 20 No te mau aamu o te tahi o teie mau taeae, a hi‘o i roto i teie mau numera o Te Pare Tiairaa reo Farani: Thomas Sullivan (1 no Atopa 1966); Klaus Jensen (1 no Tetepa 1971); Max Larson (1 no Tetepa 1989); Hugo Riemer (15 no Tiunu 1965); e Grant Suiter (1 no Titema 1983).