Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) EPERERA 2014

Ua ite anei oe?

Ua ite anei oe?

I te tau Bibilia, eaha te auraa ia hahae te hoê taata i to ’na ahu?

TE FAATAA ra te mau Papai i te tahi mau tupuraa i reira te taata i te hahaeraa i to ratou ahu. E maere paha te taata taio i teie mahana i teie huru raveraa. Tera râ, i rotopu i te mau ati Iuda, e faaiteraa te reira o to ratou hepohepo rahi, mauiui, haama, riri aore ra oto.

Ei hi‘oraa, i to Reubena iteraa e aita ta ’na opuaraa no te faaora i to ’na taeae ia Iosepha i tupu, “ua hahae ihora oia i to ’na ahu” no te mea ua hoo-tîtî-hia Iosepha. Ua mana‘o to raua metua ra o Iakoba e ua amuhia Iosepha e te hoê animara taehae e ‘ua hahae ihora i to ’na ahu.’ (Gen. 37:18-35) I to Ioba parauraahia e ua pohe te taatoaraa o ta ’na mau tamarii, ‘ua hahae oia i to ’na ahu.’ (Ioba 1:18-20) ‘Ua haea [aore ra hahae] te hoê vea i to ’na ahu’ a haere ai oia i mua i te tahu‘a rahi ra o Eli no te faaara ’tu e ua pau to Iseraela i te tama‘i, ua pohe na tamaiti e piti a Eli e ua ravehia te afata faufaa. (Sam. 1, 4:12-17) I to Iosia faarooraa i te parau o te Ture i te taioraahia i mua i to ’na aro, ua ite atura oia i te hape a te nunaa e “ua hahae ihora i to ’na ahu.”—Arii 2, 22:8-13.

I to Iesu haavaraahia, ‘ua hahae te tahu‘a rahi Kaiapha i tana ahu’ a mana‘o ai oia e te faaino ra Iesu i te Atua. (Mat. 26:59-66) I faaue na te hoê tutuu a te mau orometua ati Iuda i te taata ia hahae i to ratou ahu a faaroo ai i te i‘oa o te Atua ia faainohia. I muri a‘e râ i te haamouraahia te hiero i Ierusalema, ua na ô ratou e “aita e faufaa no te taata i teie mahana ia hahae i to ratou ahu a faaroo ai i te i‘oa o te Atua ia faainohia, a‘unei e mutumutu roa ’i te reira.”

Te mea papu, aita e faufaa i mua i te aro o te Atua ia hahae te hoê taata i to ’na ahu mai te peu e aita o ’na e oto mau ra. No reira Iehova i parau ai i to ’na nunaa ia ‘hahae i to ratou aau eiaha i to ratou ahu e ia fariu mai ia ’na ra.’—Ioe. 2:13.