ንደቅኻ ምሃሮም

ዶርቃስ እትፍቶ ዝነበረት ስለምንታይ እያ፧

ኵልና ብሰባት ክንፍቶ ንደሊ ኢና። ንስኻኸ ኸምኡ ዲኻ እትደሊ፧— * መጽሓፍ ቅዱስ ብዛዕባ ሓንቲ ብብዙሓት ሰባት እትፍቶ ዝነበረት ዶርቃስ እትበሃል ሰበይቲ ይነግረና እዩ።

ዶርቃስ ኣብታ ኣብ ጥቓ ባሕሪ መዲተራነያን እትርከብ ከተማ ዮጴ እያ እትነብር ነይራ። የሩሳሌም ከኣ ካብ ዮጴ፡ ኣስታት 56 ኪሎ ሜተር ጥራይ ርሒቓ ትርከብ ነበረት። ዶርቃስ ሓንቲ ኻብቶም ቐዳሞት ደቀ መዛሙርቲ የሱስ እያ ነይራ።

ዶርቃስ ኣዝያ እትፍቶ ዝነበረት ስለምንታይ ይመስለካ፧— መጽሓፍ ቅዱስ፡ ብዙሕ ጽቡቕ ነገራት ትገብርን ንኻልኦት ህያብ ትህብን ከም ዝነበረት ይገልጽ እዩ። ንመበለታት፡ ማለት ሰብኡተን ንዝሞትወን ኣንስቲ፡ ጽቡቕ ክዳውንቲ ትሰፍየለን ነበረት። ብዘይካዚ፡ ልክዕ ከም የሱስ፡ ንብዙሓት ሰባት ብዛዕባ እቲ ናይ ሓቂ ኣምላኽ ዝዀነ የሆዋ ትነግሮም ነበረት።

 ንዶርቃስ እንታይ ሕማቕ ነገር ከም ዘጋጠማ ትፈልጥዶ፧— ሓሚማ ሞተት። ኵሎም ፈተውታ ድማ ሓዘኑ። ናብቲ ሃዋርያ ጴጥሮስ ዝነበሮ ኣስታት 16 ኪሎ ሜተር ርሒቑ ዚርከብ ቦታ ኸኣ ሰባት ለኣኹ። እዞም ሰባት እዚኣቶም፡ ንጴጥሮስ ቀልጢፉ ኺመጽእ ለመንዎ። ሽዑ ጴጥሮስ ምስ መጸ፡ ናብቲ ዶርቃስ ዝነበረትሉ ላዕለዋይ ደርቢ ኸደ። ኵላተን እተን ኣንስቲ እናበኸያ፡ ነቲ ዶርቃስ ዝሰፈየትለን ክዳውንቲ ንጴጥሮስ የርእያኦ ነበራ።

ድሕሪኡ፡ ጴጥሮስ ንዅሎም ሰባት ካብቲ ኽፍሊ ኣውጽኦም። ንሱን ካልኦት ሃዋርያትን ቅድሚኡ ተኣምራት ገይሮም ይፈልጡ እኳ እንተ ነበሩ፡ ንምዉት ዘተንስአ ግና ኣይነበረን። እሞኸ ጴጥሮስ እንታይ ዝገበረ ይመስለካ፧—

ጴጥሮስ ኣብ ጥቓ እቲ ሬሳ ተምበርኪኹ ናብ የሆዋ ጸለየ። ድሕሪኡ ንዶርቃስ ንኽትትንስእ ነገራ። ንሳ ኸኣ ተንስአት። ጴጥሮስ ድማ ኢዱ ዘርጊሑ፡ ደው ንኽትብል ሓገዛ። ነተን መበለታትን ንኻልኦት ሰባትን ጸዊዑ፡ ዶርቃስ ከም ዝተንስአት ኣርኣዮም። ክሳዕ ክንደይ ከም እተሓጐሱ ኽትግምቶ ትኽእልዶ፧—

ካብቲ ብዛዕባ ትንሳኤ ዶርቃስ ዚገልጽ ታሪኽ እንታይ ክትመሃር ከም እትኽእል እሞ ሕስብ ኣብሎ። ብቐዳምነት፡ ንኻልኦት ሰባት ትሕግዝ እንተ ዄንካ፡ ብዙሓት ሰባት ኪፈትዉኻ እዮም። ልዕሊ ዅሉ ግና፡ ኣምላኽ ኪዝክረካን ኪፈትወካን እዩ። ነቲ ንኻልኦት ሰባት እትገብሮ ሰናይ ነገራት ፈጺሙ ኣይኪርስዖን እዩ። ኣብታ ጽድቂ ዚነብረላ ሓዳስ ዓለም ድማ ዓስቢ ናይ ዘለኣለም ህይወት ኪህበካ እዩ።

ኣብ መጽሓፍ ቅዱስካ ኣንብብ

ግብሪ ሃዋርያት 9:36-43

ራእይ 21:3-5

[እግረ-ጽሑፍ]