“ቅድሚ ውልደት ኣብ እተገብረ ምርመራ ኺርከብ ዚኽእል ዝነበረ ጕድለት ሒዞም እተወልዱ” ውሉዳት፡ ንሰብ ሞያ ሕክምና ብ“ጌጋ ህይወት” ድሕሪ ደጊም ኪኸስስዎም ከም ዘይክእሉ፡ Haaretz.com ሓቢራ። ወለዲ ግና ናይቲ “ንስንኩል ውሉድ ንምዕባይ ዜውጽእዎ ተወሳኺ ወጻኢታትን ኣብ ኵሉ ህይወቱ ዜድልዮ ንምምላእ ዚገብርዎ ጻዕርን” ካሕሳ ንምርካብ፡ ብ“ጌጋ ውልደት” ኪኸስሱ ይኽእሉ እዮም።

ኣብ ኣውስትራልያ፡ ካብ 10 ሰብ ሓዳር እቶም 8 ብዘይ መርዓ ተኣኻኺቦም እዮም ዚነብሩ።

ሚኒስትሪ ጥዕና ግሪኽ ዘውጽኦ ስታቲስቲክስ ከም ዝሓበሮ፡ እቲ ኣብ ዓመተ 2010 ኣብተን ናይ መጀመርታ ሓሙሽተ ኣዋርሕ ዘጋጠመ ርእሰ ቕትለት፡ ምስቲ ኣብ ዓመተ 2011 ኣብተን ናይ መጀመርታ ሓሙሽተ ኣዋርሕ ዘጋጠመ ኺነጻጸር ከሎ፡ ብ40 ሚእታዊት ወሲኹ። እዚ ወሰኽ እዚ ኸኣ ምስቲ ኣብ ቀረባ እዋን ዘጋጠመ ቝጠባዊ ቕልውላው ዚተሓሓዝ እዩ።

ብመሰረት ቤት ምኽሪ መከላኸሊ ባህርያዊ ጸጋታት፡ ብደረጃ ሃገርለኸ ዳርጋ 40 ሚእታዊት ምግቢ ይባኽን እዩ። ንኣብነት፡ 7 ሚእታዊት እኽሊ ኣይዕጸድን፡ 17 ሚእታዊት ኣብ ኣብያተ ምግብን እንዳ ሻህን ዚቐርብ ምግቢ ኸይተበልዐ ይተርፍ፡ ስድራ ቤታት ከኣ ካብቲ ዝዓደጋኦ ምግቢ 25 ሚእታዊት ዚኸውን ይጕሕፋኦ።

ኣብ ቀረባ እዋን፡ እታ ኣብ ዓለም ዝነኣሰት ነፋሒቶ ኣብ ማዳጋስካር ተረኺባ። ንውሓታ 29 ሚሊ ሜተር እዩ። እተን ቡናዊ ዝሕብረን ነፋሒቶ፡ ኣመና ንኣሽቱ ኻብ ምዃነን እተላዕለ፡ ኣብ ጽፍሪ ሓደ ሰብ ኮፍ ኪብላ ይኽእላ እየን። ኰይኑ ግና፡ መንበሪአን ኣብ ሓደጋ ስለ ዝወደቐ፡ ኪጸንታ ይኽእላ እየን።