1-2. Buat kmanek saida mak akontese iha loron Pentekostes 33 EC?

LORON-DOMINGU dadeer iha Jeruzalein tinan 33 EC, no tempu neʼe mak loron Pentekostes. Maizumenus dixípulu naʼin-120 halibur iha kuartu ida iha andár leten. (Após 1:13-15; 2:1) Loron balu antes neʼe, Jesus haruka sira atu hein iha Jeruzalein tanba sira sei simu prezente espesiál ida. (Após 1:4, 5) Saida mak akontese tuirmai?

² “Derrepente deʼit sira rona lian tarutu ida husi lalehan hanesan anin neʼebé huu makaʼas, no uma laran tomak sai nakonu ho lian neʼe.” Tuirmai sira “haree buat neʼebé hanesan ahi-lakan kiʼik-kiʼik” tun ba dixípulu ida-idak nia ulun leten, “no sira hotu sai nakonu ho espíritu santu”. (Após 2:2-4) Jeová fakar sai ninia espíritu santu iha dalan neʼebé kmanek ba grupu neʼe. (Após 1:8) Sira sai ema primeiru neʼebé Maromak hili liuhusi espíritu santu * no hetan esperansa atu ukun hamutuk ho Jesus iha lalehan.

3. Tanbasá mak dixípulu sira iha loron Pentekostes la duvida katak Maromak hili ona sira atu bá lalehan?

³ Se iha loron neʼebá, Ita mak dixípulu ida neʼebé halibur hamutuk iha kuartu iha andár leten, klaru katak Ita sei la haluha akontesimentu neʼe. Buat ruma neʼebé haree hanesan ahi kiʼik-kiʼik tun mai no hela iha Ita-nia ulun leten, no Ita komesa koʼalia língua seluk. (Após 2:5-12) Ita sei la duvida katak Maromak hili ona Ita liuhusi ninia espíritu santu atu bá lalehan. Maibé Maromak sei hili ema hotu iha  dalan neʼebé kmanek no iha tempu neʼebé hanesan ka lae? Lae. Tanbasá ita dehan nuneʼe?

4. Ema hotu iha apóstolu sira-nia tempu simu esperansa atu bá lalehan iha tempu hanesan deʼit ka lae? Esplika toʼok.

⁴ Mai ita koʼalia kona-ba bainhira mak Maromak hili ema ida atu bá lalehan. Iha loron Pentekostes 33 EC Maromak la hili deʼit ema Kristaun naʼin-120. Tuir loloos, Maromak mós hili ema maizumenus naʼin-3.000 tan liuhusi espíritu santu. Sira simu esperansa atu bá lalehan kuandu sira hetan batizmu. (Após 2:37, 38, 41) Maibé depois neʼe, laʼós ema hotu simu esperansa atu bá lalehan kuandu sira hetan batizmu. Ema Samaria sira simu sira-nia esperansa neʼe tempu balu depois sira hetan batizmu. (Após 8:14-17) Cornélio no ninia umakain simu esperansa neʼe iha dalan neʼebé úniku. Sira simu esperansa neʼe antes sira hetan batizmu.—Após 10:44-48.

5. Tuir 2 Korinto 1:21, 22, saida mak akontese bainhira Maromak hili ema ida atu bá lalehan?

⁵ Mai ita koʼalia mós kona-ba buat neʼebé akontese bainhira Maromak hili ema ida atu bá lalehan liuhusi espíritu santu. Karik ema balu foufoun sente susar atu simu katak Jeová hili ona sira. Karik sira hanoin: ‘Tanbasá Maromak hili haʼu?’ Karik ema seluk la sente hanesan neʼe. Maski sira-nia sentimentu la hanesan, maibé apóstolu Paulo esplika buat neʼebé akontese ba ema hotu neʼebé Maromak hili atu bá lalehan: “Bainhira imi fiar ona, Maromak tau sinál * ba imi liuhusi espíritu santu neʼebé nia promete ona no nia halo ida-neʼe liuhusi Kristu. Espíritu neʼe mak hanesan garantia katak ita sei simu liman-rohan.” (Éf 1:13, 14) Entaun Jeová uza ninia espíritu santu atu hatudu ho klaru ba ema Kristaun sira-neʼe katak nia hili ona sira. Iha dalan neʼe, espíritu santu “mak hanesan garantia” ka promesa neʼebé Maromak fó ba sira katak iha futuru sira sei moris ba nafatin iha lalehan, laʼós iha rai.—Lee 2 Korinto 1:21, 22.

6. Ema neʼebé Maromak hili presiza halo saida atu bele hetan ninia kolen?

 ⁶ Kuandu Maromak hili ema ida atu bá lalehan, neʼe katak ema neʼe sei simu duni ninia kolen ka lae? Lae. Maski nia fiar metin katak Maromak hili ona nia, maibé nia tenke hanoin-hetan konsellu neʼe: “Maun-alin sira, sai badinas liután atu imi bele fiar katak imi mak ema neʼebé Maromak bolu no hili ona, tanba se imi kontinua halo buat sira-neʼe, imi sei la husik imi-nia fiar.” (2 Ped 1:10) Entaun, maski Maromak hili ona ema Kristaun ida atu bá lalehan, maibé ema neʼe bele simu ninia kolen só deʼit se nia laran-metin nafatin.—Flp 3:12-14; Ebr 3:1; Apok 2:10.

7. Oinsá mak ema ida hatene katak Maromak hili ona nia atu bá lalehan?

⁷ Maibé oinsá mak ema ida hatene katak Maromak hili ona nia atu bá lalehan? Ita bele hetan resposta neʼebé klaru iha Paulo nia liafuan ba ema Kristaun iha Roma neʼebé Maromak “bolu nuʼudar ema santu”. Paulo hatete: “Maromak nia espíritu la lori ita atu sai atan no halo ita taʼuk, maibé lori ita atu sai nuʼudar oan-hakiak, no ho espíritu neʼe mak ita bolu: ‘Abba, Aman!’ Espíritu neʼe rasik fó sasin iha ita-nia laran katak ita mak Maromak nia oan.” (Rom 1:7; 8:15, 16) Entaun liuhusi espíritu santu, Maromak hatudu sai ho klaru ba ema neʼebé nia hili katak sira iha esperansa atu bá lalehan.—1 Tes 2:12.

8. Tuir 1 João 2:20, 27, tanbasá ema Kristaun neʼebé Maromak hili ona la presiza ema seluk atu fó-hatene ba sira katak sira atu bá lalehan?

⁸ Bainhira Jeová fó konvite ba ema atu bá lalehan, nia la halo sira sente duvida iha sira-nia neon no laran kona-ba neʼe. (Lee 1 João 2:20, 27.) Klaru katak hanesan ema sira seluk, ema neʼebé Maromak hili atu bá lalehan presiza simu hanorin husi Jeová liuhusi kongregasaun. Maibé sira la presiza ema ida atu fó-hatene ba sira katak Maromak hili ona sira. Jeová uza ninia espíritu santu neʼebé forsa boot liu iha universu atu hatudu sai ho klaru ba sira katak Maromak hili ona sira!

9. Tuir Éfeso 1:18, mudansa saida mak ema ida sente bainhira Maromak hili nia atu bá lalehan?

⁹ Ohin loron Maromak la hili ninia atan barak atu bá lalehan, tan neʼe karik sira sente susar atu komprende kona-ba buat neʼebé akontese kuandu Maromak hili ema ida atu bá lalehan. Tuir loloos, Maromak kria ema atu moris ba nafatin iha rai, laʼós iha lalehan. (Gén 1:28; Sal 37:29) Maibé Jeová hili ona ema balu atu moris iha lalehan. Tan neʼe, bainhira nia hili sira, nia troka hotu sira-nia esperansa no hanoin, atu nuneʼe sira hein namanas atu moris iha lalehan.—Lee Éfeso 1:18.

10. “Moris dala ida tan” signifika saida? (Haree mós nota-rodapé.)

¹⁰ Bainhira Maromak hili ema Kristaun atu bá lalehan liuhusi espíritu santu, sira “moris dala ida tan” ka “moris mai husi leten”. * Jesus mós fó sai katak susar atu esplika ba ema neʼebé Maromak la hili kona-ba saida mak Kristu nia alin sira sente bainhira “moris dala ida tan”, ka “moris husi Maromak nia espíritu”.—João 3:3-8; nota.

11. Esplika toʼok kona-ba mudansa neʼebé akontese bainhira Maromak hili ema ida atu bá lalehan.

¹¹ Oinsá mak ema Kristaun nia hanoin troka bainhira Maromak hili sira atu bá  lalehan? Antes Jeová hili ema Kristaun sira-neʼe, sira hafolin esperansa atu moris ba nafatin iha rai. Sira hein namanas ba tempu neʼebé Jeová sei halakon buat aat hotu no halo rai neʼe sai paraízu. Karik sira imajina kona-ba hasoru fali sira-nia família ka belun neʼebé mate ona. Maibé bainhira Maromak hili sira atu bá lalehan, sira-nia hanoin komesa troka. Tanbasá? Neʼe laʼós tanba sira la gosta ona esperansa atu moris iha rai. Sira la troka sira-nia hanoin tanba estrese ka hasoru susar. Sira la derrepente deʼit sente katak moris iha rai sei halo sira baruk. Maibé, Jeová uza ninia espíritu santu atu troka dalan neʼebé sira hanoin no esperansa neʼebé sira hafolin.

12. Tuir 1 Pedro 1:3, 4, ema neʼebé Maromak hili ona atu bá lalehan sente oinsá kona-ba sira-nia esperansa?

¹² Ema neʼebé Maromak hili ona atu bá lalehan karik sente katak sira la merese atu simu priviléjiu neʼe. Maibé sira nunka duvida katak Maromak hili ona sira. Sira-nia laran nakonu ho ksolok no agradese bainhira hanoin kona-ba esperansa iha futuru.—Lee 1 Pedro 1:3, 4.

13. Ema neʼebé Maromak hili atu bá lalehan sente oinsá kona-ba sira-nia moris iha rai?

¹³ Neʼe katak ema neʼebé Maromak hili ona hakarak mate ka lae? Apóstolu Paulo fó resposta ba pergunta neʼe. Nia kompara sira-nia isin hanesan tenda ida no hatete: “Tuir loloos, ita neʼebé sei hela iha tenda neʼe halerik no sente todan tebes. Neʼe laʼós tanba ita hakarak hasai tenda neʼe, maibé tanba ita hakarak tau fali ida seluk, hodi nuneʼe moris bele tolan tiha buat neʼebé sei mohu.” (2 Kor 5:4) Ema Kristaun sira-neʼe la sai baruk atu moris iha rai no lakohi atu mate lalais. Tuir loloos sira gosta moris no loroloron sira hakarak uza moris neʼe atu serbí Jeová hamutuk ho sira-nia família no belun. Maibé, sira sempre hanoin-hetan sira-nia esperansa furak kona-ba futuru.​—1 Kor 15:53; 2 Ped 1:4; 1 João 3:2, 3; Apok 20:6.

14. Saida deʼit mak la hatudu katak Maromak hili ema ida atu bá lalehan liuhusi espíritu santu?

¹⁴ Karik Ita hanoin katak Maromak hili ona Ita atu bá lalehan liuhusi ninia espíritu santu. Se nuneʼe, hanoin kona-ba pergunta importante sira-neʼe: Ita laran-manas tebes atu halo Jeová nia hakarak ka lae? Ita sente katak Ita badinas tebes atu haklaken ka lae? Ita mak estudante Bíblia neʼebé badinas no gosta aprende kona-ba “buat kleʼan husi Maromak” ka lae? (1 Kor 2:10) Ita sente katak Jeová haraik ona bensaun furak ba Ita-nia serbisu haklaken ka lae? Ita sente katak Ita iha responsabilidade boot atu hanorin ema seluk kona-ba Maromak ka lae? Ita haree ona Jeová ajuda Ita iha dalan espesífiku iha Ita-nia moris ka lae? Se Ita hatán sin ba pergunta sira-neʼe hotu, neʼe katak Maromak hili ona Ita atu bá lalehan ka lae? Lae. Tanbasá? Tanba Maromak nia atan hotu bele sente hanesan neʼe maski sira iha esperansa atu bá lalehan ka lae. Tuir loloos, se Ita duvida uitoan katak Maromak hili ona Ita liuhusi ninia espíritu, neʼe hatudu katak Maromak la hili Ita. Ema sira neʼebé Jeová hili atu bá lalehan la duvida katak Jeová hili ona sira! Sira hatene ho klaru!

15. Oinsá mak ita hatene katak laʼós ema hotu neʼebé simu espíritu santu iha esperansa atu bá lalehan?

¹⁵ Bíblia temi ema laran-metin barak neʼebé simu espíritu santu maibé sira la  iha esperansa atu moris iha lalehan. Jeová nia espíritu santu dirije David. (1 Sam 16:13) Espíritu santu ajuda nia atu komprende buat kleʼan kona-ba Jeová no mós dirije nia atu hakerek parte balu iha Bíblia. (Mc 12:36) Maski nuneʼe, apóstolu Pedro hatete katak “David la saʼe ba lalehan”. (Após 2:34) João Batista sai “nakonu ho espíritu santu”. (Lc 1:13-16) Jesus hatete katak la iha ema ida mak boot liu fali João, maibé Jesus mós dehan katak João la sai parte ba Ukun lalehan nian. (Mt 11:10, 11) Jeová uza ninia espíritu santu atu fó kbiit ba ema sira-neʼe atu halo buat kmanek oioin, maibé nia la uza espíritu neʼe atu hili sira hodi moris iha lalehan. Neʼe katak sira ladún laran-metin hanesan ema sira neʼebé Maromak hili atu ukun iha lalehan ka lae? Lae. Maibé Jeová sei halo sira moris-hiʼas fali iha paraízu iha mundu.—João 5:28, 29; Após 24:15.

16. Ohin loron, Maromak nia atan barak hein namanas ba kolen saida?

¹⁶ Ohin loron Maromak nia atan barak la iha esperansa atu moris iha lalehan. Sira hein namanas atu moris iha rai bainhira Maromak nia Governu mak sei ukun sira hotu. Abraão, Sara, David, João Batista no mós mane no feto sira seluk iha Bíblia nia tempu mós iha esperansa neʼebé hanesan.—Ebr 11:10.

17. Iha lisaun tuirmai, ita sei hetan resposta ba pergunta saida deʼit?

¹⁷ Ohin loron sei iha ema balu iha rai neʼebé Maromak hili atu bá lalehan, tan neʼe mosu pergunta balu. (Apok 12:17) Porezemplu, ema sira neʼebé atu bá lalehan presiza hanoin oinsá kona-ba sira-nia an? Se ema ida iha Ita-nia kongregasaun komesa han paun no hemu tua-uvas iha Memoriál, Ita presiza hanoin oinsá kona-ba sira? Oinsá se ema sira neʼebé hatete katak Maromak hili ona sira atu bá lalehan kontinua aumenta? Ita presiza hanoin barak kona-ba neʼe ka lae? Ita sei hetan resposta ba pergunta sira-neʼe iha lisaun tuirmai.