Roma 1:1-32

  • Kumprimentus (1-7)

  • Paulo hakarak atu vizita Roma (8-15)

  • Ema laran-loos sei moris tanba fiar (16, 17)

  • Ema aat la iha razaun atu la fiar Maromak (18-32)

    • Bele haree Maromak nia hahalok liuhusi ninia kriasaun (20)

1  Husi Paulo, Kristu Jesus nia atan, neʼebé nia bolu ona atu sai apóstolu. Nia hili* haʼu atu fó sai liafuan diʼak kona-ba Maromak.+  Maromak promete nanis ona kona-ba liafuan diʼak neʼe liuhusi ninia profeta sira iha Eskritura sagrada.  Liafuan diʼak neʼe kona-ba ninia Oan-Mane, neʼebé moris iha rai nuʼudar David nia bei-oan.+  Oan-Mane neʼe hetan moris-hiʼas husi mate+ liuhusi espíritu santu nia kbiit, no ida-neʼe hatudu katak nia mak Maromak nia Oan.+ Oan-Mane neʼe mak ita-nia Naʼi Jesus Kristu.  Nia hatudu laran-diʼak neʼebé boot mai haʼu* no hili haʼu nuʼudar apóstolu ida,+ atu nuneʼe ema husi nasaun hotu bele hatudu fiar no halo tuir nia+ hodi fó hahiʼi ba ninia naran.  Imi mós parte husi nasaun sira-neʼe no Maromak mós bolu imi atu bele sai Jesus Kristu nian.  Haʼu hakerek ba imi hotu iha Roma, imi neʼebé Maromak hadomi, neʼebé nia bolu nuʼudar ema santu:* Haʼu harohan ba ita-nia Aman Maromak no Naʼi Jesus Kristu atu hatudu laran-diʼak neʼebé boot ba imi no haraik dame ba imi.  Ulukliu, haʼu fó obrigadu ba haʼu-nia Maromak liuhusi Jesus Kristu kona-ba imi hotu, tanba ema iha mundu tomak koʼalia ona kona-ba imi-nia fiar.  Tanba haʼu halo serbisu sagradu ho haʼu-nia laran tomak ba Maromak bainhira haʼu haklaken liafuan diʼak kona-ba ninia Oan-Mane, no Maromak mak sai sasin ba haʼu katak haʼu nunka para atu temi kona-ba imi iha haʼu-nia orasaun,+ 10  no haʼu husu katak se bele karik haʼu sei bá haree imi se ida-neʼe mak Maromak nia hakarak. 11  Tanba haʼu hakarak tebes atu hasoru imi, atu nuneʼe haʼu bele fahe liafuan ruma* neʼebé sei ajuda imi atu hametin imi-nia relasaun ho Maromak; 12  ka, atu ita bele anima no hametin malu+ liuhusi ita-nia fiar, imi-nia fiar no mós haʼu-nian. 13  Maibé maun-alin sira, haʼu hakarak imi hatene katak, dala barak ona haʼu planu atu bá haree imi, hodi nuneʼe haʼu bele haree rezultadu diʼak husi haʼu-nia serbisu haklaken iha neʼebá hanesan mós iha nasaun sira seluk, maibé toʼo agora sempre iha buat ruma neʼebé hanetik haʼu. 14  Haʼu iha obrigasaun* ba ema Gregu no ba ema estranjeiru,* ba ema matenek no ba ema beik. 15  Tan neʼe, haʼu hakarak tebes atu fó sai mós liafuan diʼak ba imi neʼebé iha Roma.+ 16  Haʼu la moe kona-ba liafuan diʼak neʼe,+ tanba tuir loloos, ida-neʼe mak dalan neʼebé Maromak hatudu ninia kbiit atu fó salvasaun ba ema hotu neʼebé iha fiar,+ ulukliu ba ema Judeu,+ no tuirmai ba ema Gregu.+ 17  Tanba sira neʼebé iha fiar haree katak liuhusi liafuan diʼak neʼe mak Maromak hatudu sai ninia hahalok loos no ida-neʼe hametin sira-nia fiar,+ hanesan hakerek nanis ona: “Ema laran-loos sei moris tanba fiar.”+ 18  Tanba husi lalehan, Maromak hatudu sai ninia hirus+ hasoru ema neʼebé la halo tuir nia no mós ema neʼebé la hatudu hahalok loos. Sira halo buat neʼebé la loos hodi hanetik ema atu hatene lia-loos.+ 19  Sira tenke hatene Maromak tanba nia fó sai ona buat barak ba sira ho momoos.+ 20  Maski ema labele haree Maromak ho matan, maibé sira bele haree ninia hahalok sira ho klaru hahú husi tempu neʼebé nia kria mundu.* Kuandu ema hanoin kona-ba buat neʼebé nia kria,+ sira bele haree ninia kbiit neʼebé iha ba nafatin+ no ninia pozisaun nuʼudar Maromak.+ Tan neʼe, sira la iha razaun atu la fiar Maromak. 21  Tanba maski sira hatene Maromak, sira la fó glória ba nia nuʼudar Maromak no sira la fó agradese ba nia. Sira-nia neon mamuk ona no sira la komprende.*+ 22  Maski sira dehan katak sira matenek, maibé sira beik. 23  Sira la fó glória ba Maromak neʼebé labele mate, maibé sira fó fali glória ba estátua neʼebé modelu hanesan ema neʼebé bele mate no ba estátua neʼebé modelu hanesan manu sira, animál ain haat sira, no animál neʼebé dolar.*+ 24  Tan neʼe, Maromak husik sira atu halo tuir deʼit sira-nia hakarak neʼebé foʼer iha sira-nia laran hodi hafoʼer sira-nia isin. 25  Sira troka lia-loos kona-ba Maromak ho lia-bosok, no sira adora no halo serbisu sagradu ba kriasaun duké ba Kriadór, Ida neʼebé merese atu simu hahiʼi ba nafatin. Amen. 26  Tan neʼe mak Maromak husik sira atu tuir deʼit sira-nia hakarak seksuál neʼebé aat tebes,+ tanba feto sira iha sira-nia leet husik ona hakarak seksuál neʼebé hanesan baibain hodi halo fali buat neʼebé la loos,+ 27  nuneʼe mós ho mane sira, sira la halo ona relasaun seksuál hanesan baibain ho feto, maibé sira-nia laran hakarak makaʼas atu halo relasaun ho mane.+ Sira-nia hahalok neʼe mak foʼer tebes no sira simu kastigu ba sira-nia an rasik tanba sira-nia sala.+ 28  Sira lakohi rekoñese Maromak,* nuneʼe Maromak husik sira atu iha hanoin neʼebé sala no halo buat neʼebé la diʼak.+ 29  Sira-nia neon nakonu ho buat hotu neʼebé la loos,+ buat aat, kaan-teen,+ hahalok aat, nakonu ho laran-moras,+ oho ema,+ istori malu, lohi ema,+ hakarak atu haterus ema seluk,+ konta ema nia vida,* 30  koʼalia aat ema seluk,+ odi Maromak, la respeitu ema, loko an, gaba an, halo planu aat oioin, kontra inan-aman,+ 31  la iha kbiit atu komprende,+ la halo tuir buat neʼebé sira promete, la hatene hadomi ema no la hatudu laran-sadiʼa. 32  Maski ema sira-neʼe hatene didiʼak Maromak nia ukun-fuan neʼebé tuir justisa, neʼebé dehan katak ema neʼebé halo hahalok sira-neʼe merese mate,+ maibé sira kontinua halo nuneʼe no mós apoia ema neʼebé halo buat sira-neʼe.

Nota-rodapé

Ka “haketak”.
Orj., “ami”.
Ka “prezente Maromak nian”.
Ka “tusan”.
Ka “ema neʼebé laʼós ema Gregu”. Orj., “ema bárbaru”.
Liuliu husi tempu neʼebé nia kria ema.
Ka “no sira-nia laran sai nakukun”.
Ka “reptil”.
Ka “Sira lakohi hatene Maromak ho loloos”.
Ka “koʼalia bisubisu”.