Pala o Luca 9:1-62

  • O Isus sicavel codolen Deșudui sar te jian andi predicarea (1-6)

  • O Irod pușel-pe con si o Isus (7-9)

  • O Isus del te han 5 000 murșen (10-17)

  • O Petru phenel că o Isus si o Cristoso (18-20)

  • O Isus phenel că va avela mudardo (21, 22)

  • So însemnol te aves iech ciacio discipolo (23-27)

  • Cana parudea-pe o Isus angla le discipoli (28-36)

  • Iech șiavo ande savo si iech beng silo sastiardo (37-43a)

  • O Isus phenel pale că va avela mudardo (43b-45)

  • Le discipoli han-pe anda con si o mai baro (46-48)

  • Con na-i contra amenghe silo amența (49, 50)

  • O Isus nai-lo primime ande iech gav samariteano (51-56)

  • So însemnol te jias pala o Isus (57-62)

9  Pala codoia vo achardea codolen Deșudui hai dea-len zuralimos te încalaven avri sea le benga hai te sastiaren nasfalimata. 2  Hai bișialdea-len te phenen i vestea lași anda o Regato le Devlesco hai te sastiaren le nasfalen, 3  hai phendea lenghe: „Te na len chanci tumența anda o drom, nici rovli, nici traista habeneschi, nici manro, nici love; hai te na len tumența nici dui gada. 4  Tha, ande orisavo chăr jian andre, așen code hai de othar te tiliaren mai dur. 5  Hai, dacă le manușa ci primin tumen, te maren tele o prafo pa tumare pânre cana jian avri anda codo foro, caște jianen că o Del phendea lenghe so trebulas te cheren*”. 6  Atunci von tiliarde dromeste hai phirde gav gavestar, hai phende i vestea lași peste sea hai sastiarde le nasfalen. 7  O Irod, o conducătoro andai Galileea, așundea sea so întâmplosardea-pe hai ci mai hachiarelas chanci, că chichiva phenenas că o Ioan sas-lo uștiado andal mule*, 8  aver phenenas că avilea o Ilie, hai aver că uștilea andal mule iech mașcar le profeți* andal purane ghiesa. 9  O Irod phendea: „Le Ioanosco șăro șindem-les. Atunci con si codo anda caste așunav cadala buchia?”. Hai camelas te dichel-les. 10  Cana risaile parpale, le apostoli phende le Isusosche sea le buchia cai von cărde-len. Atunci vo lea-len hai gălea lența ande iech foro cai bușiolas Betsaida, caște aven corcore. 11  Tha but manușa arăsle te jianen cadai buchi hai găle pala leste. Vo primisardea-len lașimasa hai astardea te del duma lența anda o Regato le Devlesco; hai sastiardea le nasfalen. 12  Cana pașiolas i riat, avile leste codola Deșudui hai phende lesche: „Mech le manușen te jian andel gava hai andel thana de pașă caște arachen penghe iech than cai te soven hai so te han, anda codoia că cade sam ande iech than garado”. 13  Tha vo phendea lenghe: „Den-len tumen vareso te han”. Von phende lesche: „Na-i amen chanci numai panji manre hai dui mașe. Numai dacă jias amen te chinas haben anda sea cadala manușa”. 14  Code sas cam 5 000 murșa. Tha vo phendea pesche discipolenghe: „Șion-len te beșen tele andel grupuri chidine po 50 jene”. 15  Von cărde cadea hai savore beșle tele. 16  Vo lea le panji manre hai le dui mașe, vazdea pesche iacha caring o cerii hai phendea iech manglimos le Devlesche*. Pala codoia phaglea le manre hai astardea te del-len le discipolenghe caște șion-len angla le manușa. 17  Cadea că, savore hale ji cana ciailile; hai sas chidine le cotora cai așile: 12 coșuri. 18  Mai târzio, cana manghelas-pe le Devlesche corcoro, le discipoli avile leste, hai vo pușlea-len: „Con phenen le manușa că som?”. 19  Von phende lesche parpale: „O Ioan o Botezătorii; aver phenen o Ilie, hai aver phenen că uștilea andal mule iech mașcar le profeți andal purane ghiesa”. 20  Hai vo phendea lenghe: „Tha tumen con phenen că som?”. O Petru phendea lesche: „Tu san o Cristoso le Devlesco!”. 21  Atunci vo poruncisardea lenghe te na phenen chanicasche cadai buchi; 22  hai vo mai phendea: „O Șiavo le manușesco trebul te nachel prin but ducha, te avel urâme le phurendar, le bare rașaiendar hai le sicaitorendar la Legeache* hai te avel mudardo, hai o trinto ghies te avel uștiado andal mule”. 23  Pala codoia o Isus phendea savorenghe: „Dacă varecon camel te avel pala mande, te na mai trail anda peste, tha te lel ande fiesavo ghies pesco stâlpo* hai te avel vi mai dur pala mande. 24  Că con camel te salvil peschi viața va hasarela-la, tha con hasarel peschi viața anda mande, codo va salvila-la. 25  Cadea că, so miștimos si ieche manușes dacă del peschi zor te avel-les sea i lumea tha hasarel sau rimosarel peschi viața? 26  Dacă varecasche si lajiav manța hai sosa phenav me, vi le Șiavesche le manușesco va avela lesche lajiav lesa cana va avela ande pesco zuralimos* hai ando zuralimos pesche Dadesco hai le îngerengo sfânto. 27  Tha ciaces phenav tumenghe că chichiva mașcar codola cai beșen cade ci va jianena so si o merimos ji cana ci va dichena mai anglal o Regato le Devlesco”. 28  Hai, ciaces, cam ohto ghiesa pala so phendea cadala dumes, lea pesa le Petros, le Ioanos hai le Iacovos hai gălea opre po plain caște manghel-pe le Devlesche. 29  Hai, ando timpo so manghelas-pe le Devlesche, lesco mui parudea-pe, hai lesco hureaimos cărdilea cadea de parno că strălucilas. 30  Hai dichta, dui murșa denas duma lesa: cadala sas o Moise hai o Ilie. 31  Cadala avile ande iech bari lumina cai strălucilas* hai astarde te den duma anda sar va tiliarela vo andai lumea, hai cadaia trebulas te pherel-pe ando Ierusalimo. 32  O Petru hai codola cai sas-le lesa sovenas. Tha, cana uștile cu sea, dichle că vo strălucilas ande iech bari lumina* hai dichle le duie murșen cai beșenas lesa. 33  Hai, ando timpo so cadala duriarenas-pe lestar, o Petru phendea le Isusosche: „Sicaitorina, so mișto că sam cade! Te vazdas trin țărhe: iech anda tute, iech anda o Moise hai iech anda o Ilie”. Tha vo ci jianelas so phenelas. 34  Cana încă phenelas cadala buchia, avilea iech noro, cai astardea te șiol peschi ușial* pe lende. Cana o noro pachiardea-len* cu sea, von daraile zurales. 35  Hai anda o noro așundea-pe iech glaso cai phenelas: „Cado si mânro Șiavo, codo alosardo! Te așunen lestar!”. 36  Cana așundea-pe o glaso, o Isus sas-lo corcoro. Tha, ande codola ghiesa von ci phende chanicasche so dichle. 37  Ando coaver ghies, cana găle tele pa o plain, but manușa avile angla o Isus. 38  Hai dichta că iech mașcar le manușa astardea te del cingar: „Sicaitorina, mangav tut, ajutisar mânre șiaves, anda codoia că si mânro corcoro șiavo! 39  Dichta că iech spirito neujo* încărel-les tela pesco zuralimos hai de fiesavi data cana astarel-les vo del cingar de iechdata; o spirito neujo cherel-les te izdral zurales hai o șiavo cherel spume co mui hai, chiar vi pala so cherel lesche but nasul, phares tiliarel lestar. 40  Manglem che discipolen te încalaven avri le benghes, tha ci daisarde”. 41  O Isus phendea: „O, manușa bi pachiamasco cai train ande cadala ghiesa* hai si tumen iech phiraimos nasul! Ji cana va trebula te așiav tumența hai te cherav phares buchi caște ajutiv tumen? An che șiaves cade”. 42  Cana o șiavo pașiolas caring o Isus, o beng șiudea-les ca i phuv hai cărdea-les te izdral zurales. Tha, o Isus dea cingar caring o spirito neujo, sastiardea le șiaves hai dea-les lesche dadesche. 43  Hai savore așile uimime cana dichle o baro zuralimos le Devlesco. Ando timpo so savore așile uimime sea le buchiandar cai cherelas-len, vo phendea pesche discipolenghe: 44  „Așunen mande hai na bâstren cadala dumes: O Șiavo le manușesco va avela dino andel vast le manușenghe”. 45  Tha von ci hachiarenas so phenelas lenghe. Mai but, lesche dumes sas-le garade lendar ca von te na hachiaren-len; hai daranas te pușen-les sar trebunas te hachiaren codola dumes. 46  Atunci von astarde te han-pe anda savo mașcar lende si o mai baro. 47  Anda codoia că jianelas so si ande lengo ilo, o Isus lea ieche șiavorres, șiutea-les pașa peste 48  hai phendea lenghe: „Con primil cadale șiavorres ande mânro anav primil vi man hai con primil man primil vi Codoles cai bișialdea man. Că codo cai phiravel-pe sar o mai țâno mașcar tumende, codo si o baro”. 49  O Ioan phendea lesche: „Sicaitorina, dichleam varecas cai încalavelas avri benga ande chio anav hai camleam te așiavas-les, anda codoia că na-i iech mașcar codola cai aven pala tute ande iech than amența”. 50  Tha o Isus phendea lesche: „Na mai den tumari zor te așiaven-les, că con na-i contra tumenghe silo tumența”. 51  Hai, anda codoia că pașiolas o timpo te avel lino co cerii, vo camelas but te jial co Ierusalimo. 52  Cadea că, vo bișialdea chichivan mașcar lesche discipoli angla leste. Von tiliarde hai găle andre ande iech gav cai beșenas le samariteni caște cheren pregătiri anda leste. 53  Tha von ci primisarde-les anda codoia că vo camelas te jial co Ierusalimo. 54  Cana dichle cadai buchi, le discipoli Iacov hai Ioan phende: „Raia, cames te phenas te avel iag anda o cerii hai te thabarel-len?”. 55  Tha vo risailea caring lende hai ortosardea-len. 56  Hai găle ande iech aver gav. 57  Sar jianas po drom, varecon phendea lesche: „Va avela te jiav pala tute oricai jias”. 58  Tha o Isus phendea: „Le vulpi cheren penghe thana cai te beșen hai le ciriclean andal ceruri silen cuiburi, tha le Șiaves le manușesco na-i les cai te șiol tele pesco șăro”. 59  Pala codoia phendea avere jenesche: „Av pala mande!”. O manuș phendea: „Raia, mech man mai anglal te jiav te prahov mânre dades”. 60  Tha vo phendea lesche: „Mech le mulen te prahon penghe mulen, tha tu jia hai de duma peste sea anda o Regato le Devlesco”. 61  Hai aver jeno phendea lesche: „Me avav pala tute, Raia, tha mech man te jiav mai anglal te lav manghe ghies lașio codolendar anda mânro chăr”. 62  O Isus phendea: „Niciech manuș cai cherel buchi i phuv* hai dichel parpale le buchiande cai mechlea-len palal ci silo lașio anda o Regato le Devlesco”.

Note de subsol

^ Lit. „sar mărturia anda lende”.
^ Sau „jiuvindime”.
^ Sau „phendea iech binecuvântarea”.
^ Lit. „scribi”.
^ Cade o stâlpo referil-pe ca le pharimata hai ducha cai anel-len o fapto te aves iech discipolo le Isusosco. Dich o Dicționaro.
^ Lit. „gloria”.
^ Lit. „andi gloria”.
^ Lit. „leschi gloria”.
^ Sau „umbra”.
^ Sau „acoperisardea-len”, „uciardea-len”.
^ Sau „iech beng”.
^ Lit. „cadai generația”.
^ Lit. „șiutea o vast po plugo”.

Le drepturi de autor anda cadai publicația