Pala o Luca 13:1-35

  • „Dacă ci fal tumen nasul anda tumare păcatea, savore va avena mudarde” (1-5)

  • I pilda anda o cașt cai cherel smochine (6-9)

  • Iech jiuvli banghi sili sastiardi ando sabato (10-17)

  • I pilda anda i cuchin muștareschi hai anda i drojdia (18-21)

  • Trebul te das amari zor te jias andre po udar tang (22-30)

  • O Irod, ‘codoi vulpea’ (31-33)

  • Le Isusos duchal-les anda o Ierusalimo (34, 35)

13  Atunci, chichiva mașcar codola cai sas-le code phende le Isusosche andal galileeni cai o Pilat mudardea-len ando timpo so anenas jertfe*. 2  Vo phendea lenghe: „Pachian că codola galileeni nachle prin cadala buchia anda codoia că sas-le mai păcătoși sar sea le coaver galileeni? 3  Phenav tumenghe că nici. Dacă ci fal tumen nasul anda tumare păcatea*, vi tumen va avena mudarde savore. 4  Sau codola 18 jene opral save pelea o turno anda Siloam hai mule, pachian că sas-le mai doșale sar sea le coaver manușa cai beșen ando Ierusalimo? 5  Phenav tumenghe că nici. Dacă ci fal tumen nasul anda tumare păcatea, savore va avena mudarde, cadea sar von”. 6  Pala codoia phendea vi cadai pilda: „Iech manuș șiutea ande peschi răz iech cașt cai cherelas smochine hai avilea te dichel dacă barilea vareso pe leste, tha ci arachlea chanci. 7  Atunci phendea codolesche cai lelas sama pi răz: «Dichta că nachle deja trin bărșa de cana avav te dichav dacă barilea vareso pe cado smochino, tha ci arachlem chanci. Șin-les! Sostar te încărel o than de ivea?». 8  Codo cai lelas sama pi răz phendea lesche: «Raia, mai mech-les iech bărș. Va avela te ujiarav i phuv de pașa leste hai te șioav lesche bălegaro*. 9  Hai, dacă va cherela fructea, si zurales mișto, tha dacă nici, va avela te șines-les»”. 10  Ande iech ghies cana încărelas-pe o sabato, vo sicavelas le manușen ande iech sinagoga*. 11  Hai dichta că code sas iech jiuvli ande savi sas iech spirito neujo* cai cărdea-la te avel nasfali 18 bărșa; voi sas-li banghi hai ci daștilas te ortosarel-pe. 12  Cana dichlea-la, o Isus phendea lache: „Jiuvlie, san sastiardi che nasfalimastar”. 13  Atunci vo șiutea pesche vast opral late, hai voi ortosardea-pe pe thaneste hai astardea te del iech bari pachiv* le Devlesche. 14  Cana dichlea cadaia, o conducătoro andai sinagoga, holiardea-pe anda codoia că o Isus sastiardea ando sabato, hai phendea le bute manușenghe: „Si șov ghiesa ande save trebul te cherel-pe buchi. Aven ande cadala ghiesa te aven sastiarde, na ando ghies cana încărel-pe o sabato”. 15  Tha o Rai phendea lesche: „Manușa hohamne*, ci jial fiesavo mașcar tumende ando grajdo caște lel pesco guruv sau măgaro hai te îngărel-les te piel pai ando ghies le sabatosco? 16  Atunci cadai jiuvli, cai si iech șei le Avraamoschi hai cai o Satan încărdea-la nasfali 18 bărșa, ci trebulas te avel sastiardi pesche nasfalimastar ando ghies le sabatosco?”. 17  Cana phendea cadala buchia, sea codola cai așile lesche contra lajaile. Tha, le but manușa bucurinas-pe catar sea le bare buchia cai cărdea-len vo. 18  Anda codoia, vo mai phendea: „Sar daisarav te phenav că si o Regato le Devlesco? Prin savi pilda daisarav te sicavav so si? 19  Vo silo sar iech cuchin muștareschi* cai iech manuș lea-la hai șiutea-la ande peschi bar. I cuchin barilea hai cărdilea iech cașt, hai le ciriclea le cerosche șiute pengo cuibo pe lesche ranica”. 20  Hai phendea pale: „Sar mai daisarav te phenav că si o Regato le Devlesco? 21  Vo si sar i drojdia cai iech jiuvli lea-la hai hamisardea-la ande deș kilogramea arro hai sea o aluato* phuchilea”. 22  Hai, po drom caring o Ierusalimo, vo jialas foro forostar hai gav gavestar caște sicavel le manușen. 23  Iech manuș pușlea-les: „Raia, si țâra codola cai va avena salvime?”. Vo phendea lenghe: 24  „Den sea tumari zor te jian andre po udar tang, că me phenav tumenghe, but jene va camena te jian andre, tha ci va daștina. 25  Cana o rai le chăresco va vazdela-pe hai va phandavela o udar, tumen va beșena avri, va marena co udar hai va phenena: «Raia, pâtăr amenghe!». Tha vo va phenela tumenghe: «Ci jianav con san». 26  Atunci tumen va phenena: «Amen haleam hai pileam tusa ca iech meseili, hai tu sicadean le manușen pe amare bare droma». 27  Tha vo va phenela tumenghe: «Ci jianav con san. Duriaren tumen mandar, tumen, savore cai cheren buchia nasul!». 28  Code va rovena hai tumare danda va izdrana daratar* cana va dichena că o Avraam, o Isaac, o Iacob hai sea le profeți* sile ando Regato le Devlesco, tha tumen san șiudine avri. 29  Hai va avena manușa anda sea le riga la phuveache* hai va beșena ca i meseili ando Regato le Devlesco. 30  Dichta că codola palutne va avena le anglune, hai codola anglune va avena le palutne”. 31  Chiar ande codo ceaso, chichiva farisei* pașile lestar hai phende lesche: „Jia avri hai tiliar de catar, anda codoia că o Irod camel te mudarel tut”. 32  Vo phendea lenghe: „Jian hai phenen codola vulpeache: «Dichta că me încalavav avri benga hai sastiarav manușen aghies hai tehara, hai o trinto ghies va avela te terminiv». 33  Tha trebul te jiav mai dur pe mânro drom aghies, tehara hai vi ando ghies cai avel, anda codoia că ci daștil-pe ca iech profeto te avel mudardo avreal o Ierusalimo. 34  Ierusalimo, Ierusalimo, cai mudares le profețen hai mudares barrența codolen cai sile bișialde tute, butivar camlem te chidav che șiavorren cadea sar chidel i chaini pesche pui tela pesche phaca! Tha tumen ci camlean. 35  Dichta! Anda codoia o Del va mechela tumaro chăr. Me phenav tumenghe: Ci va mai dichena man ji cana ci va phenena: «Binecuvântime si codo cai avel ando anav le Iehovasco!»”.

Note de subsol

^ Lit. „savengo rat o Pilat hamisardea-les le ratesa catar le jertfe cai andine-len von”.
^ Sau „ci căin tumen”, „ci sicaven căința”. Dich o Dicționaro.
^ Sau „goșnia”.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Sau „iech beng”.
^ Lit. „gloria”.
^ Sau „duie muienghe”, „ciarde machle”; „codola cai cheren-pe angla le manușa că sile lașe”.
^ Sau „bobo muștaresco”.
^ Sau „humer”.
^ Cadai expresia sicavel i dar hai i holi cai caliarel lengo ilo.
^ Lit. „catar o esto hai catar o vesto, catar o nordo hai catar o sudo”.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.

Le drepturi de autor anda cadai publicația