Pala o Luca 5:1-39
5 Iech data, cana o Isus beșelas pașa o pai Ghenezaret*, le but manușa spidenas-pe pașa leste caște așunen o cuvânto le Devlesco.
2 Hai vo dichlea dui bărci cai sas-le țârdine de iech rig pașa o laco. Tha codola cai astarenas mașe dine-pe tele anda lende hai halavenas penghe plase.
3 Pala so gălea opre ande iech mașcar le bărci, cai sas le Simonoschi, o Isus manglea-les te duriarel-la iech țâra catar o malo. Pala codoia beșlea tele hai astardea te sicavel le bute manușen andai barca.
4 Cana terminisardea te del duma, vo phendea caring o Simon: „Jia cai si o pai mai baro hai șiuden tumare plase caște astaren mașe”.
5 Tha o Simon phendea lesche parpale: „Sicaitorina, amen cărdeam buchi phares sea i riat hai ci astardeam chanci, tha dacă tu phenes va avela te șiudav le plase andal mașe”.
6 Pala so cărde cadaia, von astarde cadea de but mașe, că lenghe plase începosarde te șindion.
7 Atunci von cărde le vastesa caring le jene andai coaver barca caște aven te ajutin-len. Cadala avile hai șiute-pe te pheren vi le dui bărci mașența. Arăsle te aven cadea de pherde că astarde te mechen-pe tele ando pai.
8 Cana dichlea cadaia, o Simon Petru pelea ca le cianga le Isusosche hai phendea: „Duriar tut mandar, Raia, că som iech manuș păcătoso”.
9 Vo phendea cadai buchi, anda codoia că savore, vi vo hai vi codola cai sas-le lesa, așile uimime cana dichle chichi de but mașe astarde.
10 Sa cadea, așile uimime vi o Iacov hai o Ioan, le șiave le Zebedeiosche, savența cherelas buchi o Simon. Tha o Isus phendea caring o Simon: „Na mai dara! De acanara angle va avela te astares manușen cadea sar astares mașe”.
11 Atunci von andine parpale le bărci co malo, mechle sea le buchia hai găle pala leste.
12 Aver data, cana o Isus sas-lo ande iech foro, iech manuș cai sas-lo pherdo lepra* dichlea-les hai pelea sigo le mosa ca i phuv, hai manglea-les anda sea o ilo: „Raia, dacă cames, daștis te cheres man ujo”.
13 Atunci o Isus șiutea o vast pe leste hai phendea: „Camav! Te aves ujo!”. Hai pe thaneste nachlea lestar i lepra.
14 Vo phendea le manușesche te na del duma chanicasa anda cadai buchi hai mai phendea: „Tha jia, sicav tut le rașaiesche hai de o daro cai manghel-les i legea le Moiseschi anda iech leproso cai sas-lo ujiardo, caște dichen vi le rașaia că sastilean ciaces”.
15 Cu sea cadala, i vestea anda leste așunelas-pe vi mai dur hai but manușa chidenas-pe caște așunen-les hai te aven sastiarde lenghe nasfalimatandar.
16 Tha vo jialas butivar ande thana mai garade te avel corcoro caște manghel-pe le Devlesche.
17 Ande iech ghies, cana sicavelas le manușen, le farisei* hai le sicaitori la Legeache* cai avile anda sea le gava andai Galileea, andai Iudeea hai anda o Ierusalimo beșenas vi von code. O zuralimos le Iehovasco sas opral leste, caște sastiarel le manușen.
18 Hai dichta că chichiva manușa andine pe iech targa ieche manușes cai ci daștilas te phirel hai camle te îngăren-les andre caște șion-les angla o Isus.
19 Tha, anda codoia că ci daisarde te îngăren-les andre le bute manușendar, von găle opre po acoperișo, dine tele le țigle hai mechle tele i targa angla o Isus.
20 Cana dichlea lengo pachiamos, o Isus phendea le nasfalesche: „Che păcatea sile iertime!”.
21 Atunci le sicaitori la Legeache hai le farisei astarde te den duma mașcar pende: „Con si cado manuș cai cușel* le Devles? Con daștil te iertil le păcatea avreal iech corcoro, o Del?”.
22 Tha o Isus hachiardea so gândinas hai phendea lenghe parpale: „Ca so gândin tumen ande tumaro ilo?
23 So si mai ușoro? Te phenes: «Che păcatea sile iertime» sau te phenes: «Vazde tut opre hai phir»?
24 Tha, te jianen că le Șiaves le manușesco siles zuralimos pi phuv te iertil le păcatea . . .”. Pala codoia, risailea caring o manuș cai ci daștilas te phirel hai phendea lesche: „Me phenav tuche: Vazde tut opre, le chi targa hai jia chăre!”.
25 Atunci vo vazdea-pe ande pânrănde angla savore, lea peschi targa pe savi beșelas hai, sar jialas caring chăre, așarelas le Devles.
26 Savore manușa așile uimime, daraile hai astarde te den iech bari pachiv* le Devlesche hai phenenas: „Aghies dichleam bare buchia!”.
27 Pala codoia o Isus gălea avri hai dichlea ieche manușes cai chidelas le love*, cai bușiolas Levi, sar beșelas ando than cai pochinenas-pe le love andal taxe hai phendea lesche: „Av pala mande!”.
28 Vo mechlea sea le buchia palal, vazdea-pe hai gălea pala leste.
29 Hai o Levi pregătisardea iech bari meseili anda o Isus peste chăre. Code sas but jene cai chidenas le love hai vi aver manușa cai hanas lența.
30 Atunci le farisei hai lenghe sicaitori la Legeache astarde te den duma nasul anda lesche discipoli hai phende lenghe: „Sostar han hai pien codolența cai chiden le love hai le manușența păcătoși?”.
31 O Isus phendea lenghe: „Na le manușen sasteveste trebul-len doctoro, tha codolen nasfale.
32 Ci avilem te acharav codolen orta, tha codolen păcătoși, caște fal-len nasul anda lenghe păcatea*”.
33 Von phende lesche: „Le discipoli le Ioanosche încăren posto butivar hai cheren manglimata zurale le Devlesche hai sa cadea cheren vi le discipoli le fariseienghe, tha che discipoli han hai pien”.
34 O Isus phendea lenghe: „Daștin te cheren le amalen le jiamutresche* te încăren posto chichi timpo o jiamutro silo lența?
35 Tha va avena ghiesa cana o jiamutro va avela lino lendar hai atunci, ande codola ghiesa, ci va mai hana chanci”.
36 Hai mai phendea lenghe iech pilda: „Chonic ci șinel iech cotor anda iech hureaimos nevo caște suvel-les ca iech hureaimos purano. Dacă suvelas, o cotor nevo șinelas o hureaimos purano, hai o cotor lino anda o hureaimos nevo ci avelas lașio anda o hureaimos purano.
37 Sa cadea, chonic ci șiol mol nevi ande purane burdufuri*. Dacă cherelas cadaia, i mol nevi pharavelas le burdufuri hai șiorelas-pe avri, hai le burdufuri ci mai avenas lașe chancesche.
38 I nevi mol trebul șiuti ande burdufuri neve.
39 Niciech manuș cai pilea mol purani ci camel mol nevi, anda codoia că phenel: «I purani mol si mai lași»”.
Note de subsol
^ Adică i Marea Galileei.
^ Dich o Dicționaro.
^ Le farisei sas iech grupo evreiengo zurales religioso cai încărenas fiesavi țâni buchi anda i Legea le Devleschi hai cai mai șionas late vi aver reguli.
^ Lit. „scribi”.
^ Lit. „blasfemia”. Referil-pe ca le dumes nasul sau jiungale phende caring o Del sau le buchia sfânto.
^ Lit. „gloria”.
^ Lit. „iech jeno cai chidelas le taxe”. Cadala manușa chidenas love anda le taxe șiute le guvernostar Romano; von sas-le urâme le coavere evreiendar.
^ Sau „caște căin-pe”, „sicaven căința”. Dich o Dicționaro.
^ Sau „mire”.
^ Cadala sas gone cărde andai morci le animalenghi cai încărelas-pe i mol. Dich o dicționaro
