Pala o Luca 20:1-47
20 Ande iech ghies, cana vo sicavelas le manușen ando templo hai phenelas i vestea lași, le bare rașaia hai le sicaitori la Legeache* ande iech than le phurența avile
2 hai phende lesche: „Phen amenghe, catar si tut o zuralimos te cheres cadala buchia? Con dea tut cado zuralimos?”.
3 Vo phendea lenghe: „Pușav tumen vi me vareso hai tumen te phenen manghe:
4 O bolimos* le Ioanosco sas anda o cerii sau le manușendar?
5 Atunci von astarde te den duma mașcar pende hai phenenas: „Dacă phenas: «Anda o cerii», va phenela amenghe: «Sostar ci pachiaian ando Ioan?».
6 Hai dacă phenas: «Le manușendar», sea le manușa va mudarena amen barrența, anda codoia că pachian că o Ioan sas profeto*”.
7 Cadea că, von phende că ci jianenas catar avelas.
8 O Isus phendea lenghe: „Nici me ci phenav tumenghe catar si man o zuralimos te cherav cadala buchia”.
9 Atunci vo phendea le manușenghe cadai pilda: „Iech manuș șiutea andi phuv te bariol iech răz, mechlea-la ando vast codolengo cai lenas sama pi răz hai tiliardea ande aver them mai but timpo.
10 Cana avilea o timpo te aven chidine le dracha* bișialdea ieche sclavos codolende cai lenas sama pi răz caște lel lendar iech partea andal dracha. Tha, pala so marde-les, bișialde-les de othar bi te den-les chanci.
11 Tha o manuș mai bișialdea iech sclavo lende. Vi cadales marde-les, cărde-les lajiavestar hai bișialde-les de othar bi te den-les chanci.
12 Cu sea cadala, vo bișialdea lende iech trinto sclavo. Von marde-les hai șiudine avri vi cadales.
13 Atunci codo caschi sas i răz phendea: «So te cherav? Va avela te bișialav mânre șiaves, cai iubiv-les. Daștil-pe că lesche va sicavena pachiv».
14 Cana dichle-les, codola cai lenas sama pi răz astarde te den duma mașcar pende hai phende: «Cadai răz va așela lesche. Te mudaras-les hai cadea lesco barvalimos va avela amaro!».
15 Hai șiudine-les avri andai răz hai mudarde-les. Cadea că, so va cherela codo caschi si i răz codolenghe cai line sama pe late?
16 Va avela hai va mudarela-len, hai va dela peschi răz averenghe”.
Cana așunde cadala dumes, von phende: „Te na întâmplol-pe niciechdata cadaia!”.
17 Tha vo dichlea orta caring lende hai phendea lenghe: „Atunci so însemnol cadaia so si scriime: «O barr cai șiudine-les codola cai vazden chăra cărdilea o barr cai încărel o sasto chăr*»?
18 Con perel opral cado barr va avela phagărdo, hai opral caste va perela cado barr va avela nichiardo*”.
19 Cana hachiarde că i pilda cai phendea-la sas anda lende, le sicaitori la Legeache hai le bare rașaia camle te șion o vast pe leste chiar atunci, tha daranas le manușendar.
20 Pala so phirde pala leste caște dichen so cherelas, von pochinde chichiva manușen garades hai bișialde-len leste caște cheren-pe că sile orta. Von camenas te cheren le Isusos te phenel vareso nasul hai cadea te den-les andel vast le guvernatorosche.
21 Von pușle-les: „Sicaitorina, jianas că so phenes hai so sicaves si ciacio, că ci încăres i partea chanicaschi, tha sicaves o drom le Devlesco pala o ciacimos.
22 Si mișto te pochinas o impozito* le Cezarosche sau nici?”.
23 Tha vo dea peschi sama că camenas te astaren-les hai phendea lenghe:
24 „Sicaven manghe iech dinaro. Casco șăro hai anav si cado?”. Von phende: „Le Cezarosco”.
25 Vo phendea lenghe: „Trebul te den le Cezarosche so si le Cezarosco, tha le Devlesche so si le Devlesco”.
26 Cadea că, von ci daisarde te cheren le Isusos te phenel vareso nasul angla le manușa, tha, așile uimime cana așunde so phendea hai ci mai phende chanci.
27 Cu sea cadala, chichiva mașcar le saduchei*, cai phenen că na-i sar te aven uștiade le mule*, avile hai pușle-les:
28 „Sicaitorina, o Moise scriisardea amenghe: «Dacă iech murș cai siles rromni merel bi te aven-les șiavorre, lesco phral trebul te lel lesca rromnia caște așen-les șiavorre».
29 Dichta că sas efta phrala. O iechto lea pesche rromni, tha mulea bi te aven-les șiavorre.
30 Anda codoia lea-la o duito,
31 pala codoia o trinto. Cadea că, sea le efta phrala line-la sar rromni tha mule bi te mechen șiavorre.
32 Ji la urmă, mulea vi i jiuvli.
33 Cadea că, cana va uștiena andal mule, saveschi rromni va avela voi? Anda codoia că sas i rromni sea le efta phralenghi”.
34 O Isus phendea lenghe: „Le manușa anda cadala ghiesa len penghe rromni hai sile dine rromeste,
35 tha codola cai meritin te primin viața ando sistemo* cai va avela hai va avena uștiade andal mule ci va lena penghe rromni hai ci va jiana rromeste.
36 Mai but, von ci va mai daștina te meren, că va avena sar le îngeri hai anda codoia că va uștiena andal mule va avena le șiave le Devlesche.
37 Tha că le mule va avena uștiade sicadea chiar o Moise cana dea duma anda i tufa andal canră, cana phenel că o Iehova si «O Del le Avraamosco, o Del le Isaacosco hai o Del le Iacobosco».
38 Vo na-i o Del codolengo mule, tha codolengo jiuvinde, anda codoia că anda leste savore sile jiuvinde”.
39 Atunci chichiva mașcar le sicaitori la Legeache phende: „Sicaitorina, mișto dean duma”.
40 Hai ci mai sas-len tromai* te pușen-les vareso.
41 Tha vo pușlea-len: „Sostar phenel-pe că o Cristoso si o șiavo le Davidosco?
42 Că chiar o David phenel ando lil Psalmi: «O Iehova phendea mânre Raiesche: „Beș ca mânri ciaci rig
43 ji cana va avela te șioav che dușmanen tela che pânre”».
44 Cadea că, o David phenel lesche «Rai». Atunci sar daștil te avel vo lesco șiavo?”.
45 Pala codoia, ando timpo so le manușa așunenas-les, phendea pesche discipolenghe:
46 „Ferin tumen le sicaitorendar la Legeache cai placial-len te phiren angle hai parpale andel hureaimata lungo hai le manușa te den-len ghies lașio andel piețe, te beșen po-l anglune thana andai sinagoga* hai te avel-len le mai lașe thana ca i meseili,
47 cai len le buchia le phivleanghe hai phenen but dumes cana manghen-pe le Devlesche caște aven dichle le manușendar. Cadala va primina iech pedeapsa but mai bari”.
Note de subsol
^ Lit. „scribi”.
^ Dich o Dicționaro.
^ Dich o Dicționaro.
^ Sau „struguri”.
^ Cado barr si șiuto ando colțo de opral le chăresco cai dui ziduri phanden-pe ande iech than.
^ Sau „liciardo”.
^ Pochinimos cai trebulas dino ieche manușestar ande fiesavo bărș.
^ Le saduchei sas iech secta iudaico cai ci pachianas ando jiuvindimos hai andel îngeri.
^ Sau „jiuvindime”.
^ Dich o Dicționaro.
^ Sau „curajo”.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
