Pala o Luca 19:1-48
19 Pala codoia o Isus gălea andre ando Ierihono hai nachlea prin sea o foro.
2 Code sas iech manuș cai bușiolas Zacheu, iech mașcar codola tela savengo vast sas le jene cai chidenas le love*; vo sas iech manuș barvalo.
3 O Zacheu camelas te dichel con sas o Isus, tha ci daștilas anda codoia că code chidine-pe but manușa, hai vo ci sas-lo cadea de ucio.
4 Cadea că vo nașlea angle hai gălea opre ande iech cașt* caște dichel-les, anda codoia că o Isus avelas te nachel othar.
5 Cana arăslea ande codo than, o Isus dichlea opre caring leste hai phendea lesche: „Zacheu, av tele sigo, că aghies va avela te beșav ande chio chăr!”.
6 Atunci vo avilea tele sigo hai primisardea-les bucuriasa ande pesco chăr.
7 Cana dichle cadaia, savore astarde te den duma nasul anda o Isus hai phende: „Gălea te beșel ando chăr ieche manușesco păcătoso”.
8 Tha o Zacheu vazdea-pe hai phendea le Raiesche: „Raia, dichta că dipaș anda mânre buchia dav-len codolenghe ciore hai le love cai ciordem-len prin hohaimata, dav-len parpale ștar-var mai but”.
9 Atunci o Isus phendea: „Aghies o Del salvisardea cadale manușes hai le jenen anda lesco chăr, anda codoia că vi vo si iech șiavo le Avraamosco.
10 Că o Șiavo le manușesco avilea te rodel hai te salvil so sas hasardo”.
11 Ando timpo so așunenas cadala buchia, vo phendea lenghe încă iech pilda, anda codoia că vo sas-lo pașă le Ierusalimostar hai von pachianas că o Regato le Devlesco avelas te sicavel-pe na pa but timpo.
12 Anda codoia, vo phendea: „Iech manuș anda iech baro neamo trebulas te jial ande iech them duriardo caște avel cărdo rege, hai pala codoia te risarel-pe parpale.
13 Vo achardea peste deș sclavi, dea-len deș mine* hai phendea lenghe: «Cheren buchi lența ji cana avav».
14 Tha le manușa anda lesco them urânas-les hai bișialde pala leste chichiva jenen caște phenen: «Ci camas ca vo te cărdiol amaro rege».
15 Ji la urmă, pala so sas-lo cărdo rege, vo risardea-pe parpale hai achardea le sclaven casche dea le love, caște jianel sode cărde anda lende.
16 Cadea că pașilea o iechto hai phendea: «Raia, chi mina mai cărdea deș mine».
17 O rai phendea lesche: «Mișto cărdean, sclavo lașio! Anda codoia că sicadean că sanas demno pachiamasco ande iech buchi zurales țâni, te avel tut zuralimos opral deș foruria».
18 Pala codoia avilea o duito hai phendea: «Raia, chi mina mai cărdea panji mine».
19 Vo phendea vi cadalesche: «Te avel vi tut zuralimos opral panji foruria».
20 Tha avilea aver hai phendea: «Raia, dichta cade si chi mina, cai încărdem-la garadi ande iech pohtan*.
21 Te jianes că sas manghe dar tutar, anda codoia că san iech manuș nasul, cai cames te cheres love andai buchi cai ci cărdean-la tu hai chides catar ci șiutean andi phuv».
22 Vo phendea lesche: «Pala le dumes cai phendean-len judechiv tut, sclavo nasul! Dacă jianglean că som iech manuș nasul, cai cherav love andai buchi cai ci cărdem-la hai chidav catar ci șiutem andi phuv,
23 sostar ci șiutean mânre love andi banca? Cadea că, cana avilemas parpale încalademas-len avri camătasa*».
24 Pala codoia phendea codolenghe cai beșenas code: «Len leschi mina hai den-la codolesche cai siles deș mine».
25 Tha von phende lesche: «Raia, les siles deș mine!».
26 Vo phendea lenghe: «Phenav tumenghe că codoles cai siles va mai dela-pe lesche, tha codoles cai na-i les va lela-pe lestar vi so siles.
27 Mai but, anen cade mânre dușmanen, codolen cai ci camle te cărdioav lengo rege, hai mudaren-len angla mande»”.
28 Pala so phendea cadala buchia, o Isus tiliardea mai dur hai gălea opre caring o Ierusalimo.
29 Cana arăslea pașa o Betfaghe hai i Betania, cai arachenas-pe po plain cai bușiol o Plain le Măslinengo, vo bișialdea duien mașcar pesche discipoli
30 hai phendea lenghe: „Jian ando gav cai dichen-les angla tumende hai, pala so va jiana andre ande leste, va arachena iech țâno măgaro phanglo, pe savo ci mai beșlea niciechdata iech manuș. Pâtrăn-les hai anen-les cade.
31 Tha dacă varecon pușel tumen: «Sostar pâtrăn o măgaro?», te phenen: «Trebul le Raiesche»”.
32 Cadea că, codola cai sas-le bișialde găle hai arachle-les cadea sar phendea lenghe vo.
33 Ando timpo so von pâtrănas le țâne măgaros, codola casco sas phende lenghe: „Sostar pâtrăn cado țâno măgaro?”.
34 Von phende: „Trebul le Raiesche”.
35 Hai îngărde-les co Isus, șiudine penghe hureaimata po țâno măgaro hai șiute le Isusos te beșel pe leste.
36 Sar jialas vo angle, le manușa șionas pengo hureaimos angla leste po drom.
37 Cana arăslea pașă le dromestar cai îngărelas tele pa o Plain le Măslinengo, sea le discipoli astarde te bucurin-pe hai te așaren le Devles voceasa zurali anda sea le miracolea cai dichle-len.
38 Hai phende: „Binecuvântime si codo cai avel sar Rege ando anav le Iehovasco! Pacea ando cerii hai iech bari pachiv* andel mai uce thana!”.
39 Tha chichiva farisei* cai sas-le mașcar le but manușa phende: „Sicaitorina, ortosar che discipolen!”.
40 Tha vo phendea lenghe parpale: „Phenav tumenghe că, dacă cadala ci phenenas chanci, le barra denas cingar”.
41 Cana pașilea le Ierusalimostar, dichlea caring o foro hai ruia anda leste,
42 hai phendea: „Dacă tu, da, tu, hachiardeanas ande cado ghies le buchia cai anen pacea! Tha acana von sas-le garade che iachendar.
43 Că va avena opral tute ghiesa cana che dușmani va vazdena pașa tute iech bar anda cașt ascuțime*, va chidena-pe pașa tute hai va avena contra tuche anda sea le riga.
44 Va șiudena tumen ca i phuv, tut hai le manușen cai beșen ande tute hai ci va mechena ande tute barr pe barreste, anda codoia că o Del avilea te judechil tut, tha tu ci hachiardean cadaia”.
45 Pala codoia gălea andre ando templo hai astardea te del avri codolen cai bichinenas,
46 hai phenelas lenghe: „Si scriime: «Mânro chăr va avela iech chăr cai le manușa manghen-pe le Devlesche», tha tumen cărdean anda leste iech than cai garaven-pe le cior!”.
47 Hai vo sicavelas mai dur le manușen ando templo. Tha le bare rașaia, le sicaitori la Legeache* hai le bare manușa le themesche rodenas te mudaren-les.
48 Tha ci arachle niciech buchi prin savi te cheren cadaia, anda codoia că sea le manușa încărenas-pe pala leste caște așunen-les.
Note de subsol
^ Lit. „le jene cai chidenas le taxe”. Cadala manușa chidenas love anda le taxe șiute le guvernostar Romano; von sas-le urâme le coavere evreiendar.
^ Cado cașt sas iech sicomoro.
^ Iech mina sas o pochinimos anda trin șiona buchiache hai sas love rupune cai cherelas 100 drahme.
^ Sau „pânza”.
^ Sau „dobândasa”.
^ Lit. „gloria”.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Sau „chile”.
^ Lit. „scribi”.
