Pala o Luca 18:1-43
18 Pala codoia o Isus phendea le discipolenghe iech pilda anda sostar trebulas te manghen-pe le Devlesche sea o timpo hai te na mechen-pe.
2 Vo phendea: „Ande iech foro sas iech judecătoro cai ci daralas le Devlestar hai ci sicavelas pachiv caring niciech manuș.
3 Ande codo foro sas vi iech phivli cai jialas sea o timpo leste hai phenelas lesche: «Judechisar ortomasa mașcar mande hai codo cai așel manghe contra».
4 Iech timpo, vo ci camlea, tha pala codoia phendea ande pesco ilo: «Chiar cana ci darav le Devlestar hai ci sicavav pachiv nicieche manușesche,
5 anda codoia că cadai phivli ci del man pacea, va avela te cherav lache ciacimos caște na mai marel mânro șăro»”.
6 Pala codoia o Rai phendea: „Așundean so phendea o judecătoro chiar cana sas-lo neorta?
7 Atunci, ci va cherela o Del ortomos codolenghe alosarde lestar cai den cingar caring leste ghies hai riat, ando timpo so sicavel răbdarea caring lende?
8 Phenav tumenghe că va cherela lenghe ortomos sigo. Cu sea cadala, cana va avela o Șiavo le manușesco, va arachela vo iech pachiamos sar cado pi phuv?”.
9 Sa cadea, vo phendea iech aver pilda codolenghe cai pachianas că sas-le orta hai cai dichenas le coaveren că ci sile lașe chancesche:
10 „Dui manușa găle opre co templo caște manghen-pe le Devlesche: iech sas fariseo*, hai o coaver sas iech jeno cai chidelas le love*.
11 O fariseo beșelas ande pânrănde hai manghelas-pe le Devlesche ande pesco ilo: «O, Devla, mulțumisarav tuche că ci som sar sea le coaver – cai țârden tele i morci pa aver, cai si neorta, cai athaven penga rromnia aver varecasa* – hai nici sar cado manuș cai chidel le love.
12 Me încărav posto dui-var po curco hai dav deș anda iech șăl anda sea so cherav».
13 Tha codo cai chidelas le love, beșelas ande pânrănde iech țâra mai dur hai ci camelas nici te vazdel pesche iacha caring o cerii, tha marelas-pe ando colin, hai phenelas: «O, Devla, sicav manghe lașimos, că som iech manuș păcătoso!».
14 Phenav tumenghe că cado manuș gălea chăre hai vo sas-lo mai orta sar o fariseo andel iacha le Devlesche. Că con vazdel-pe mai opral sar aver va perela hai con silo umilo va avela vazdino opre”.
15 Le manușa anenas leste vi penghe șiavorren caște șiol pesche vast pe lende, tha, cana dichle cadaia, le discipoli astarde te han-pe le manușența.
16 Tha o Isus manglea ca le șiavorre te aven andine leste, hai phendea: „Mechen le șiavorren te aven mande hai na roden te așiaven-len, că o Regato le Devlesco silo codolengo cai sile sar von!
17 Ciaces phenav tumenghe că con ci primil o Regato le Devlesco sar iech șiavorro ci va avela te jial ande leste”.
18 Hai iech mașcar le conducători pușlea-les: „Lașe Sicaitorina, so trebul te cherav caște avel man viața veșnico?”.
19 O Isus phendea lesche: „Sostar phenes manghe că som lașio? Chonic na-i lașio, numai iech corcoro: o Del.
20 Prinjianes le porunci: te na athaves chia rromnia aver varecasa, te na mudares, te na ciores, te na phenes hohaimata anda aver varecaste, te des pachiv che dadesche hai chia deiache”.
21 Atunci vo phendea lesche: „Sea cadala buchia cherav-len anda mânro tărnimos”.
22 Cana așundea cadaia, o Isus phendea lesche: „Iech corcori buchi mai trebul tuche: Bichin sea so si tut hai de le love codolenghe ciore, hai cadea va avela tut iech barvalimos andel ceruri. Pala codoia av pala mande”.
23 Cana așundea cadaia, o manuș simțosardea iech bari duch ando ilo, anda codoia că sas-lo zurales barvalo.
24 O Isus dichlea caring leste hai phendea: „Va avela zurales pharo anda codola cai silen love te jian andre ando Regato le Devlesco!”.
25 Si ciaces, mai sigo nachel iech cămila prin o can iecha suveaco sar iech barvalo te jial andre ando Regato le Devlesco”.
26 Codola cai așunde cadaia phende: „Atunci con daștil te avel salvime?”.
27 Vo phendea: „So ci daștil te avel cărdo le manușendar, o Del daștil te cherel”.
28 Tha o Petru phendea: „Dichta că amen mechleam sea so sas amaro hai avileam pala tute”.
29 O Isus phendea lenghe: „Ciaces phenav tumenghe că na-i chonic cai mechlea chăr sau rromni sau phrala sau dad sau dei sau șiave anda o Regato le Devlesco
30 hai te na primil mai but acana, hai andel ghiesa cai va avena, viața veșnico”.
31 Atunci vo lea de iech rig codolen Deșudui hai phendea lenghe: „Dichta că jias opre caring o Ierusalimo hai sea so sas scriime prin le profeți anda o Șiavo le manușesco va pherela-pe.
32 Sar avelas, vo va avela dino andel vast le manușenghe anda aver neamuri, va avela prasado, va phiravena-pe lesa bi lajiavesco hai va avela ciungardino.
33 Hai, pala so va marena-les le biciosa, va mudarena-les, tha o trinto ghies vo va uștiela andal mule*”.
34 Cu sea cadala, von ci dine penghi sama so însemnonas cadala buchia, anda codoia că cadala dumes sas-le garade lendar. Hai ci hachiarde so phendea lenghe o Isus.
35 Ando timpo so o Isus pașiolas catar o Ierihono, iech corro manuș beșelas pașa o drom hai manghelas love.
36 Cana așundea că othar nachenas but manușa, vo pușlea so întâmplolas-pe.
37 Von phende lesche: „Nachel o Isus o Nazarineano!”.
38 Atunci vo dea cingar: „Isus, Șiavo le Davidosco, sicav manghe mila!”.
39 Codola cai jianas anglal astarde te han-pe lesa hai phenenas lesche te așel anda o mui, tha vo delas cingar vi mai zurales: „Șiavo le Davidosco, sicav manghe mila!”.
40 Atunci o Isus așilea po than hai phendea te avel andino leste codo manuș. Cana cado pașilea lestar, o Isus pușlea-les:
41 „So cames te cherav anda tute?”. Vo phendea: „Raia, camav te dichav pale!”.
42 Hai o Isus phendea lesche: „Te diches pale! Chio pachiamos sastiardea tut”.
43 Hai pe thaneste vo dichlea pale hai astardea te jial pala o Isus, hai delas iech bari pachiv* le Devlesche. Cana dichle cadaia, sea codola manușa așarde vi von le Devles.
Note de subsol
^ Le farisei sas iech grupo evreiengo zurales religioso cai încărenas fiesavi țâni buchi anda i Legea le Devleschi hai cai mai șionas late vi aver reguli.
^ Lit. „iech jeno cai chidelas le taxe”. Cadala manușa chidenas love anda le taxe șiute le guvernostar Romano; von sas-le urâme le coavere evreiendar.
^ Lit. „adultero”. Dich o Dicționaro.
^ Sau „jiuvindime”.
^ Lit. „gloria”.
