Pala o Luca 23:1-56
23 Cadea că, le but manușa vazdine-pe opre hai îngărde-les co Pilat.
2 Hai astarde te doșaren-les hai phenenas: „Arachleam cadale jenes că cherelas amare manușen te așen contra o guverno. Phenelas lenghe te na pochinen le impozitea* le Cezarosche hai phenelas că si o Cristoso, iech rege”.
3 Atunci o Pilat pușlea-les: „San tu o rege le iudeiengo?”. Vo phendea lesche parpale: „Chiar tu phenes-la che mosa!”.
4 O Pilat phendea le bare rașaienghe hai le bute manușenghe: „Ci arachav niciech doș ande cado manuș”.
5 Tha von încărenas vi mai zurales ca penghi duma hai phenenas: „Prin pesco sicaimos cărdea le manușen anda sea i Iudeea te na așunen le guvernostar; astardea andai Galileea hai arăslea ji cade”.
6 Cana așundea cadaia, o Pilat pușlea dacă sas-lo galileeano.
7 Pala so jianglea că o Isus țârdelas-pe anda o than cai railas o Irod, bișialdea-les co Irod, cai sas-lo ando Ierusalimo ande codola ghiesa.
8 Cana dichlea le Isusos, o Irod sas-lo zurales bucurime. Vo camelas te dichel de but timpo le Isusos, anda codoia că așundea but buchia anda leste hai ajucărelas te dichel iech miracolo cărdo lestar.
9 Anda codoia, astardea te pușel-les but buchia, tha o Isus ci phendea lesche parpale chanci.
10 Cu sea cadala, le bare rașaia hai le sicaitori la Legeache* vazdenas-pe iech pala aver hai doșarenas-les pherde holi.
11 Atunci o Irod, ande iech than pesche soldațența, phirade-pe nasul lesa, huriade-les ande iech șucar hureaimos hai asaie lestar. Pala codoia bișialdea-les parpale co Pilat.
12 Anda codo ghies, o Irod hai o Pilat, cai mai anglal sas-le dușmani, cărdile amala.
13 Atunci o Pilat achardea le bare rașaien, le conducătoren hai sea le manușen
14 hai phendea lenghe: „Andean mande cadale manușes hai phendean că cherel le manușen te vazden-pe contra o guverno. Dichta că șiutem lesche pușimata angla tumende, tha ci arachlem-les doșalo anda niciech buchi anda savi doșaren-les.
15 Mai but, nici o Irod ci arachlea-les doșalo, că bișialdea-les parpale amende. Dichta că vo ci cărdea chanci caște avel mudardo.
16 Anda codoia, șioav te avel mardo hai pala codoia mechav-les avri”.
17 ——
18 Tha sea le manușa denas cingar: „Mudar cadale manușes hai mech amenghe avri le Barabas!”.
19 (O Baraba sas-lo phandado anda codoia că cărdea le manușen anda o foro te vazden-pe contra o guverno hai anda codoia că mudardea.)
20 O Pilat dea duma pale lența, anda codoia că camelas te mechel avri le Isusos.
21 Atunci von astarde te den cingar: „Șiu-les po stâlpo*! Șiu-les po stâlpo!”.
22 Vo phendea lenghe i trinto data: „Sostar? So nasulimos cărdea cado manuș? Me ci arachlem leste niciech doș caște avel mudardo. Anda codoia, șioav te avel mardo hai pala codoia mechav-les avri”.
23 Tha von încărenas vi mai zurales ca penghi duma hai manghenas voceasa zurali te avel mudardo; von dine cingar cadea de but,
24 că o Pilat alosardea te cherel cadea sar mangle von.
25 Cadea că, vo mechlea lenghe avri codoles cai von camenas. Codoles cai sas-lo phandado anda codoia că cărdea le manușen te vazden-pe contra o guverno hai anda codoia că mudardea. Tha le Isusos mechlea-les ande lenghe vast caște cheren lesa so camenas von.
26 Cana îngărenas-les de othar, așiade po than ieche manușes cai bușiolas Simon andai Cirena, cai avelas avreal o foro, hai șiute pe lesco dumo* o stâlpo caște îngărel-les pala o Isus.
27 Pala o Isus jianas but manușa, mașcar save sas vi jiuvlea cai marenas-pe ando colin duchatar hai rovenas anda leste.
28 O Isus risailea caring le jiuvlea hai phendea: „Șeia le Ierusalimosche, na mai roven anda mande! Roven anda tumende hai anda tumare șiavorre,
29 că dichta că aven ghiesa cana le manușa va phenena: «Fericime si le jiuvlea cai ci daștin te așen phare, codola cai ci cărde șiavorre hai codola cai ci dine thud!».
30 Atunci va phenena le plainenghe: «Peren opral amende!», hai le thanenghe uce*: «Pachiaren amen*!».
31 Dacă cheren cadala buchia cana o cașt si zeleno, so va avela cana o cașt va avela șuco?”.
32 Aver dui murșa, cai sas-le cior, sas-le îngărde iech data lesa caște aven mudarde.
33 Cana arăsle ando than cai bușiol „O Than le Mule Șăresco”, șiute-les po stâlpo hai ande iech than lesa codolen dui cai sas-le cior, iech ca leschi ciaci rig hai o coaver ca leschi stângo rig.
34 Tha o Isus phenelas: „Dade, iertisar-len, că ci jianen so cheren!”. Mai but, von șiudine le sorți* caște dichen savo cotor anda lesche hureaimata așel fiesavesche mașcar lende.
35 Le manușa beșenas hai dichenas. Tha le conducători asanas lestar hai phenenas: „Averen salvisardea! Te salvil vi pes dacă si o Cristoso le Devlesco, Codo Alosardo!”.
36 Vi le soldați asanas lestar hai pașionas caște den-les șucli mol
37 hai phenenas: „Dacă san o rege le iudeiengo, salvisar tut!”.
38 Sa cadea, opral lesco șăro sas iech tăblița pe savi sas scriime: „Cado si o rege le iudeiengo”.
39 Atunci iech mașcar le cior cai sas-le șiute po stâlpo astardea te prasal-les hai phenelas: „Ci san tu o Cristoso? Salvisar vi tut hai vi amen!”.
40 Tha o coaver ortosardea-les hai phendea lesche: „Ci daras nici iech țâra le Devlestar, acana, că primisardean sa codoi pedeapsa?
41 Amen nachas prin cadala ducha pe ciacimaste, că si amenghe dino so meritisaras anda le buchia cai cărdeam-len. Tha cado manuș ci cărdea chanci nasul”.
42 Pala codoia phendea: „Isus, an tuche amintea mandar cana va avela te arăsăs ande chio Regato!”.
43 Vo phendea lesche parpale: „Ciaces phenav tuche aghies: Va avela te aves manța ando Paradiso!”.
44 Sas cam o ceaso 12 co mismeri* hai cu sea cadala pe sea i phuv cărdilea tunearico cai încărdea ji co ceaso trin pala-mismeri*,
45 anda codoia că ci mai dichiolas i lumina le chameschi. Atunci i perdeaua anda o templo șindilea ando mașcar.
46 O Isus dea cingar zurales hai phendea: „Dade, ande che vast mechav mânri viața”. Pala so phendea cadaia, vo dea pesco palutno phurdimos.
47 Cana dichlea so întâmplosardea-pe, o ofițero andai armata astardea te del iech bari pachiv* le Devlesche hai phendea: „Cado sas ciaces iech manuș orta”.
48 Hai, cana dichle so întâmplosardea-pe, savore manușa cai sas-le chidine code te dichen, marenas-pe ando colin sar jianas caring chăre.
49 Sea codola cai prinjianenas-les beșenas iech țâra mai dur; le jiuvlea cai găle le Isusosa andai Galileea sas-le vi von code hai dichle cadala buchia.
50 Hai dichta că sas iech murș cai bușiolas Iosif, iech phuro anda o Sanhedrino*, iech manuș lașio hai orta.
51 (Vo ci camlea te așel de lenghi rig caște mudaren le Isusos.) Cado manuș sas-lo andai Arimateea, iech foro le iudeiengo, hai ajucărelas o Regato le Devlesco.
52 Vo gălea andre co Pilat hai manglea-les te mechel te prahol le Isusos.
53 Hai, pala so dea tele le Isusos pa o stâlpo, pachiardea-les* ando raicano pohtan* hai șiutea-les ande iech mormânto, cai sas cărdo andi stânca, ande savo ci mai sas șiuto chonic.
54 Sas o ghies andai pregătirea le sabatoschi, hai na pa but timpo astarelas o sabato.
55 Tha le jiuvlea cai avile lesa andai Galileea găle vi von code, dichle o mormânto hai dichle sar sas șiuto o corpo le Isusosco;
56 pala codoia găle parpale caște pregătin mirodenii hai uleiuri cai chandenas șucar. Tha, si ciaces, von ci cărde chanci ando sabato, cadea sar manghel i Legea.
Note de subsol
^ Pochinimos cai trebulas dino ieche manușestar ande fiesavo bărș.
^ Lit. „scribi”.
^ Dich o Dicționaro.
^ Sau „pe lesche zăia”.
^ Sau „dealo”, „plai”.
^ Sau „uciaren amen”, „acoperin amen”.
^ Dich o Dicționaro.
^ Sas o șiov-to ceaso.
^ Ji co enia-to ceaso.
^ Lit. „gloria”.
^ Cado sas o mai baro tribunalo le iudeiengo cai arachelas-pe ando Ierusalimo. Dich o Dicționaro.
^ Sau „acoperisardea-les”.
^ Sau „pânza anda ino zurales lașio”.
