Pala o Luca 12:1-59

  • I drojdia le fariseienghi (1-3)

  • Te daras le Devlestar, na le manușendar (4-7)

  • Te na avel amenghe lajiav te phenas că prinjianas le Isusos (8-12)

  • I pilda anda o barvalo manuș cai sas-lo bigoghiaco (13-21)

  • „Na mai daran anda tumari viața” (22-34)

    • Turma țâni (32)

  • Trebul te așias uștiade (35-40)

  • O slujitoro demno pachiamasco hai iech slujitoro cai na-i demno pachiamasco (41-48)

  • O Isus ci avilea te anel pacea, tha nehachiarimata mașcar le manușa (49-53)

  • Trebul te hachiaras le ghiesa ande save traisaras (54-56)

  • Sar te lașiaras amare nehachiarimata (57-59)

12  Ande sea codo timpo chidine-pe mii manușa; sas cadea de but manușa, că uștarenas-pe iech averes ande pânrănde. O Isus dea duma mai anglal caring pesche discipoli hai phendea lenghe: „Ferin tumen la drojdiatar le fariseienghi*, adică ferin tumen catar lengo ilo hohamno. 2  Cu sea cadala, na-i chanci cai varecon camel te încărel-les mișto garado caște na avel arachlo hai na-i chanci garado te na arăsăl prinjiando. 3  Cadea că, so phenen ando tunearico va așunela-pe ca i lumina, hai so den duma locăs* ande tumare chăra va phenela-pe* pa o acoperișo le chărengo. 4  Mai but, mânre amala, me phenav tumenghe: Te na daran codolendar cai mudaren o corpo hai pala codoia ci mai daștin te cheren aver vareso. 5  Va avela te sicavav tumenghe castar te daran: Daran Codolestar cai, pala so mudarel, siles o zuralimos te șiudel andi iag la Gheenachi*. Da, me phenav tumenghe: Lestar te daran. 6  Ci bichinen-pe panji țâne ciriclea pe dui hurde love? Cu sea cadala, niciech mașcar lende na-i bâstărdi le Devlestar. 7  Tha tumenghe, vi sea le bala anda tumaro șăro sile ghinde. Na daran: Tumen san mai cuci* sar but țâne ciriclea. 8  Me phenav tumenghe: Dacă varecon phenel angla le manușa că si mânro discipolo, vi o Șiavo le manușesco va phenela angla le îngeri le Devlesche că si lesco discipolo. 9  Tha, dacă varecon phenel că ci prinjianel man angla le manușa, nici o Șiavo le manușesco ci va prinjianela-les angla le îngeri le Devlesche. 10  Hai oricon phenel iech duma jiungali contra o Șiavo le manușesco va avela iertime, tha codo cai cușel* o spirito sfânto le Devlesco* ci va avela iertime. 11  Cana va îngărena tumen angla le but manușa, angla codola cai rain hai angla le autorități, te na daran hai te na gândin tumen sar hai so va phenena caște sicaven că ci san doșale, 12  anda codoia că o spirito sfânto le Devlesco va sicavela tumen chiar ande codo ceaso so trebul te phenen”. 13  Atunci varecon de mașcar le but manușa phendea lesche: „Sicaitorina, phen mânre phralesche te del vi man iech partea andal buchia cai mechlea-len amenghe amaro dad”. 14  Vo phendea lesche: „Con șiutea man judecătoro mașcar tumende sau jeno cai phenel so te așel fiesavesche?”. 15  Pala codoia phendea lenghe: „Pâtrăn tumare iacha hai ferin tumen catar orisavo felo lăcomia, anda codoia că, chiar cana varecas siles but, leschi viața ci încărel le buchiandar cai siles”. 16  Pala codoia phendea lenghe iech pilda: „I phuv ieche manușeschi barvalo dea but rodo. 17  Atunci vo astardea te gândil-pe ande pesco ilo: «So va avela te cherav acana? Că na-i man cai te mai chidav mânro ghiv*». 18  Hai phendea: «Dichta so va avela te cherav: Va avela te peravav mânre hambarea, va avela te vazdav aver mai bare hai va avela te chidav ande lende sea mânro ghiv hai sea mânre buchia. 19  Hai va avela te phenav manghe: „Si man but buchia șiute de iech rig anda but bărșa. Ci mai cherav chanci, hav, piav hai simțosarav man mișto!”». 20  Tha o Del phendea lesche: «Manuș bigoghiaco, ande cadai riat va manghela-pe tutar chi viața. Casche va așena le buchia cai chidean-len?». 21  Cadea si le manușesa cai chidel barvalimata anda peste, tha ci silo barvalo andel iacha le Devlesche”. 22  Pala codoia phendea pesche discipolenghe: „Anda codoia phenav tumenghe: Na mai daran anda tumari viața, anda so va hana, sau anda tumaro corpo, so va lena pe tumende. 23  Că i viața cherel mai but sar o haben, hai o corpo, cherel mai but sar o hureaimos. 24  Dichen le corbi: von ci șion semințea andi phuv hai ci chiden so barilea anda lende, hai ci șion vareso de iech rig; cu sea cadala, o Del del-len te han. Ci san tumen mai cuci sar le ciriclea? 25  Savo mașcar tumende cai daral prea but anda peschi viața, daștil te cherel-la mai lungo vi numai ieche ghiesesa*? 26  Cadea că, dacă ci daștin te cheren iech buchi cadea de țâni sostar te daran anda le coaver buchia? 27  Dichen sar barion le lulughia: von ci cheren phares buchi hai nici na suven penghe hureaimos, tha phenav tumenghe că nici chiar o Solomon, o mai barvalo manuș, ci sas-lo hureado sar iech mașcar lende. 28  Dacă cadea hureavel o Del le lulughia pa o câmpo, cai aghies barion hai tehara sile thabarde andi iag, ci camel vo vi mai but te hureavel tumen? Manușa cai si tumen țâra pachiamos! 29  Cadea că, na mai daran anda so va hana hai anda so va piena hai na mai chiniaren tumen, 30  anda codoia că le manușa anda aver neamuri phiren pala cadala buchia. Tha tumaro Dad andal ceruri jianel mișto că trebun tumenghe cadala buchia. 31  Mai mișto, roden sea o timpo te șion po iechto than ande tumari viața lesco Regato, hai sea cadala buchia va avena tumenghe dine. 32  Na dara, turma țâni, anda codoia că tumaro Dad silo bucurime te del tumenghe o Regato! 33  Bichinen sea so si tumen hai pâtrăn tumare vast caring le ciore*. Cheren tumenghe gonorre andal love cai ci șindion, chiden iech barvalimos ando cerii cai ci hasarel-pe niciechdata, cai o cior ci arăsăl hai le cherme ci han-les. 34  Anda codoia că, cai si tumaro barvalimos code va avela vi tumaro ilo. 35  Phanden tumaro mașcar* hai tumare lămpi te aven astarde 36  hai te aven sar codola cai ajucăren penghe raies te avel parpale catar o abiav, ca atunci cana va avela hai marel co udar, te pâtrăn lesche sigo. 37  Fericime sile codola sclavi cai așile uștiade cana arăslea lengo rai! Ciaces phenav tumenghe: Vo va phandela pesco mașcar, va șiola-len te beșen ca i meseili hai va dela-len te han. 38  Dacă vo avel ande iech ceaso cana pașiol o mașcar la ratiaco* sau avel pala so nachlea o mașcar la ratiaco*, hai arachel-len pregătime, fericime sile von! 39  Tha te jianen că, dacă o Rai le chăresco jianelas o ceaso cana avel o cior, ci mechelas-les te del andre ande lesco chăr. 40  Te aven vi tumen pregătime, că o Șiavo le manușesco avel ca iech ceaso cana ci ajucăren tumen”. 41  Atunci o Petru pușlea: „Raia, phenes cadai pilda numai anda amende sau anda savore?”. 42  Hai o Rai phendea lesche parpale: „Con si ciaces o slujitoro demno pachiamasco hai goghiaver, cai lesco rai va șiola-les opral sea le manușa anda lesco chăr caște del-len sea o timpo chichi haben silen nevoia hai cana trebul? 43  Fericime si codo sclavo savesco rai, cana avel, arachel-les că cherel cadai buchi! 44  Ciaces phenav tumenghe că va șiola-les opral sea lesche buchia caște lel sama lendar. 45  Tha, dacă vroiechdata codo sclavo phenel ande pesco ilo: «Mânro rai ci avel încă», hai astarel te marel le slujitoren anda o chăr, vi le murșen hai vi le jiuvlean, șiol-pe te hal, te piel hai te machiol, 46  o rai codole sclavosco va avela ande iech ghies cana vo ci ajucărel-les hai ca iech ceaso cai vo ci prinjianel-les, hai va anela pe leste iech bari duch* hai va șiola-les ande iech than codolența bi pachiamasco. 47  Atunci codo sclavo cai hachiardea so manghel lesco rai, tha ci pregătisardea-pe anda o ghies cana lesco rai trebulas te avel hai ci cărdea so manglea lestar vo, va avela mardo mai but. 48  Tha codo cai ci hachiardea so manghel lesco rai hai cărdea buchia anda save trebulas te avel mardo va avela mardo mai țâra. Si ciaces, codolesche cai dea-pe but va manghela-pe lestar but hai ande casco vast sas dine but buchia va manghela-pe lestar vi mai but sar ajucărel-pe lestar. 49  Me avilem te astarav iech iag pi phuv tha so daștiv te camav mai but dacă i iag thabol deja? 50  Tha man si man iech bolimos savesa trebul te avav boldo hai so baro pharimos si pe mânro ilo ji cana va nachela! 51  Pachian că avilem te anav pacea pi phuv? Phenav tumenghe că nici, tha mai sigo holi. 52  Că de acanara angle, va avela holi ando chăr. Dacă ando chăr va avena panji jene, trin va avena contra dui hai dui contra trin. 53  Va avela holi mașcar o dad hai o șiavo hai mașcar o șiavo hai o dad, mașcar i dei hai i șei hai mașcar i șei hai i dei, mașcar i sasui* hai i bori hai mașcar i bori hai i sasui”. 54  Hai mai phendea caring le but manușa: „Cana dichen că vazdel-pe iech noro caring o than cai perel o cham*, tumen phenen sigo: «Avel iech baro brâșând» hai cadea întâmplol-pe. 55  Tha cana dichen că phurdel iech tati barval cai avel anda o șuco than*, tumen phenen: «Va avela baro tachimos» hai cadea va avela. 56  Manușa hohamne*, tumen jianen te phenen sar va avela i vremea cana dichen i phuv hai o cerii, tha le buchia cai întâmplon-pe acana sostar ci daștin te hachiaren-len? 57  Sostar ci den tumari zor te hachiaren tumen corcore so si orta? 58  Sar exemplo, cana jias angla iech conducătoro codolesa cai camel te îngărel tut co tribunalo, de chi zor te lașiares le nehachiarimata cai si tut lesa, cana san lesa po drom, caște na del tut po vast codolesco cai cherel i judecata hai o judecătoro te del tut mai dur po vast le gardianosco hai cadea te peres phandado. 59  Phenav tuche că ci va avela te jias avri othar ji cana ci va avela te pochines parpale vi o mai țâno lovorro”.

Note de subsol

^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Sau „andi șoapta”.
^ Lit. „va predichila-pe”.
^ I Gheena sas iech than cai sas thabardo o gunoio avreal o foro Ierusalimo. Dich o Dicționaro.
^ Sau „prețioso”.
^ Lit. „blasfemia”. Referil-pe ca le dumes nasul sau jiungale phende caring o Del sau le buchia sfânto.
^ Sau „o zuralimos le Devlesco”. Dich o Dicționaro.
^ Sau „mânre recolte”.
^ Lit. „ieche vastesa”.
^ Lit. „cheren daruri lașimasche”. Dich o Dicționaro.
^ Cadaia însemnol „te aven gata te cheren vareso”.
^ Lit. „andi duito straja”. Cadaia sas i perioada cana le manușa așenas de pază andi riat mașcar o ceaso 9 ji co 12.
^ Lit. „andi trinto straja”. Cadaia sas i perioada cana le manușa așenas de pază andi riat mașcar o ceaso 12 ji co 3.
^ Lit. „va avela șindo ande dui”.
^ Sau „soacra”.
^ Sau „o vesto”.
^ Sau „anda o sudo”.
^ Sau „duie muienghe”, „ciarde machle”; „codola cai cheren-pe angla le manușa că sile lașe”.

Le drepturi de autor anda cadai publicația