Pala o Luca 21:1-38
-
Le dui hurde love cai șiutea-len i ciori phivli (1-4)
-
SAVO VA AVELA O SEMNO? (5-36)
-
Marimata, bare izdraimata phuveache, nasfalimata, bochalimos (10, 11)
-
Le armate șiute penghe țărhe pașa o Ierusalimo (20)
-
„O timpo cai sas dino le manușenghe cai ci slujin le Devlesche” (24)
-
Sar va avela o Șiavo le manușesco (27)
-
I pilda anda o cașt cai cherel smochine (29-33)
-
„Așen uștiade” (34-36)
-
-
O Isus sicavel le manușen ando templo (37, 38)
21 Cana vazdea pesche iacha, dichlea le barvalen sar șionas penghe daruri andel cutii le templosche.
2 Pala codoia dichlea sar iech ciori phivli șiutea dui hurde love*
3 hai phendea: „Ciaces phenav tumenghe că cadai ciori phivli șiutea mai but sar savore.
4 Că sea cadala șiute daruri anda pengo barvalimos, tha voi șiutea anda pesco ciorâmos sea so mai sas-la caște trail”.
5 Mai târzio, cana chichiva denas duma anda o templo, sar sas-lo hureado șucare barrența hai buchianța dine le Devlesche*,
6 vo phendea: „Va avena ghiesa cana sea cadala buchia cai dichen-len acana, va avena perade hai ci va așela cade barr pe barreste”.
7 Atunci von pușle-les: „Sicaitorina, cana va avena ciaces cadala buchia hai savo va avela o semno cai sicavel că avilea o timpo te întâmplon-pe cadala?”.
8 Vo phendea: „Len sama te na aven athade, că va avena but jene ande mânro anav hai va phenena: «Me som codo» hai «O timpo si pașă». Te na jian pala lende!
9 Mai but, cana va așunena anda marimata* hai sar le manușa vazden-pe iech contra aver, te na daran. Că mai anglal cadala buchia trebun te întâmplon-pe, tha o sfârșito ci va avela atunci pe thaneste”.
10 Pala codoia phendea lenghe: „Va vazdela-pe them contra them hai regato contra regato.
11 Va avena bare izdraimata phuveache hai anda iech than ande aver bochalimos hai nasfalimata. Le manușa va dichena buchia cai va daravena-len hai va avena bare semnea anda o cerii.
12 Tha, mai anglal te întâmplon-pe sea cadala buchia, va șiona o vast pe tumende hai va așena tumenghe contra, va îngărena tumen andel sinagogi* hai va șiudena tumen ando phandaimos. Va avena îngărde angla le regi hai le guvernatori anda mânro anav.
13 Cadea va daștina te așunen vi von anda mande.
14 Cadea că, alosaren ande tumaro ilo te na pregătin tumen de mai anglal anda so va phenena caște sicaven că ci san doșale,
15 că me va avela te dav tumen goghiaverimos hai va avela te ajutiv tumen caște jianen so te phenen hai sea tumare dușmani ande iech than ci va daștina te phenen tumenghe parpale chanci.
16 Mai but, va avena bichinde chiar tumare dadendar hai deiandar, tumare phralendar, tumare neamurendar hai tumare amalendar, hai von va dena co merimos chichivan mașcar tumende.
17 Savore manușa va urâna tumen anda mânro anav.
18 Tha niciech firo bal ci va perela anda tumaro șăro.
19 Dacă va așena zurale ando pachiamos va salvina tumari viața.
20 Tha, cana va dichena că le armate șiute penghe țărhe pașa o Ierusalimo, te jianen că lesco hasarimos pașilea.
21 Atunci codola andai Iudeea te nașen ca le plaina, codola anda o Ierusalimo te tiliaren hai codola andal gava de pașa leste te na jian andre ando foro,
22 că ande codola ghiesa va cherela-pe ortomos, ca sea le buchia scriime te pheren-pe.
23 Vai le jiuvleandar cai sile phare hai le jiuvleandar cai den thud penghe șiavorren ande codola ghiesa! Că va avena but ducha pi phuv hai holi contra cadala manușa.
24 Von va avena mudarde la sabiatar hai aver va avena line sar phandade avere neamurendar, hai o Ierusalimo va avela uștardo ande pânrănde le themendar ji cana ci va nachela o timpo cai sas dino le manușenghe cai ci slujin le Devlesche.
25 Sa cadea, va avena semnea ando cham, ando șionoto hai andel cerhaia, hai pi phuv le manușa va avena astarde daratar hai ci va jianena so te cheren cana va așunena o bașimos la mareaco holiardi.
26 Le manușa va perena tele daratar ando timpo so ajucăren le buchia cai va avena pi phuv, anda codoia că le zuralimata le cerosche va izdrana.
27 Atunci va dichena le Șiaves le manușesco sar avel ande iech noro ande pesco zuralimos hai bari pachiv*.
28 Tha, cana va astarena cadala buchia, așen ande pânrănde hai vazden tumare șăre, anda codoia că o timpo te aven scăpime le Devlestar si pașă!”.
29 Pala codoia phendea lenghe iech pilda: „Gândin tumen ca o cașt cai cherel smochine hai ca sea le coaver cașta.
30 Cana dichen că cadala astaren te cheren neve patrina, jianen că o milai si pașă.
31 Sa cadea, cana va dichena cadala buchia, te jianen că o Regato le Devlesco si pașă.
32 Ciaces phenav tumenghe că cadai generația* ci va nachela ji cana ci va întâmplona-pe sea cadala buchia.
33 O cerii hai i phuv va nachena, tha le dumes cai phenav-len me ci va nachena niciechdata.
34 Tha len sama tumendar ca na varesar te pheren tumare ile bute habenesa hai bute pimasa hai le pharimatanța la viațache, hai codo ghies te avel opral tumende bi te ajucăren tumen,
35 sar iech athaimos. Anda codoia că niciech manuș cai beșel pi phuv ci va daștila te nașel cadale ghiesestar.
36 Cadea că așen uștiade, cheren sea o timpo manglimata zurale le Devlesche, caște daștin te scăpin sea cadale buchiandar cai trebun te întâmplon-pe hai te așen ande pânrănde angla o Șiavo le manușesco!”.
37 Po ghies o Isus sicavelas le manușen ando templo, hai pi riat tiliarelas hai așelas po plain cai bușiolas o Plain le Măslinengo.
38 Sea le manușa avenas de teharin leste co templo caște așunen-les.
Note de subsol
^ Lit. „dui leptoni”, lovorre cai sas-len iech țâni valoarea.
^ Sau „buchianța dedichime”.
^ Sau „războaie”.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Lit. „gloria”.
^ Butivar i duma „generația” referil-pe ca-l manușa de diferime bărșa cai traisarde ande sa codo timpo.
