Pala o Luca 4:1-44

  • O Beng zumavel le Isusos (1-13)

  • O Isus astarel te phenel i vestea lași andi Galileea (14, 15)

  • Le manușa anda o Nazareto ci pachian ando Isus (16-30)

  • Andi sinagoga anda o Capernaum (31-37)

  • I sasui le Simonoschi hai aver manușa sile sastiarde (38-41)

  • Le but manușa arachen le Isusos ande iech than mai garado (42-44)

4  Pala codoia, o Isus pherdilea le spiritosa sfânto le Devlesco*, hai tiliardea anda o Iordano hai sas-lo îngărdo le spiritostar ando șuco than 2  40 ghiesa hai code sas-lo zumado le Benghestar. Anda codoia că ci halea chanci ande codola ghiesa, lea-les i boch. 3  Atunci o Beng phendea lesche: „Dacă san iech șiavo le Devlesco, phen cadale barresche te cărdiol manro”. 4  Tha o Isus phendea lesche: „Si scriime: «O manuș ci trebul te trail numai manresa»”. 5  Hai o Beng îngărdea-les ande iech than ucio hai sicadea lesche sigo sea le regatea la phuveache. 6  Pala codoia o Beng phendea lesche: „Me va avela te dav tut zuralimos opral sea cadala regatea hai lengo barvalimos*, anda codoia că manghe sas dino hai me dav-les casche camav me. 7  Cadea că, dacă des cianga iech data angla mande, sea va avela chiro”. 8  O Isus phendea lesche parpale: „Si scriime: «Numai angla o Iehova, chio Del, te des cianga hai numai anda leste te cheres iech buchi sfânto»”. 9  Atunci o Beng îngărdea-les ando Ierusalimo, șiutea-les po mai ucio than anda o templo* hai phendea lesche: „Dacă san iech șiavo le Devlesco, șiude tut tele, 10  anda codoia că si scriime: «Vo va dela porunca pesche îngerenghe anda tute, caște ferin tut» 11  hai «Von va phiravena tut pe lenghe vast caște na des tut dab le pânresa ande vroiech barr»”. 12  O Isus phendea lesche parpale: „Sas phendo: «Te na șios co zumaimos le Iehovas, chio Del»”. 13  Atunci o Beng ci mai zumadea-les, tiliardea lestar hai ajucărdea ji cana daștilas te cherel pale cadaia. 14  Hai o Isus, tela o zuralimos le spiritosco sfânto le Devlesco, gălea parpale andi Galileea, hai i vestea anda leste așundea-pe ande sea le thana de othar. 15  Vo astardea te sicavel le manușen ande lenghe sinagogi* hai savore așarenas-les. 16  Pala codoia vo gălea ando Nazareto, cai barilea, hai, cadea sar cherelas ande fiesavo ghies cana încărelas-pe o sabato, gălea andre andi sinagoga hai uștilea ande pânrănde caște citisarel. 17  Sas lesche dino o lil* le profetosco* Isaia. Vo pâtărdea o lil hai arachlea o than cai sas scriime: 18  „O spirito le Iehovasco silo opral mande, că vo machlea man te phenav i vestea lași codolenghe ciore. Vo bișialdea man te phenav codolenghe phandade că va avena scăpime hai codolenghe corre că va dichena pale, te dav drom codolen phagărde 19  hai te phenav* lenghe anda o bărș le lașimasco le Iehovasco”. 20  Pala codoia phandadea o lil, dea-les parpale le slujitorosche hai beșlea tele. Savore andai sinagoga dichenas pe leste. 21  Atunci vo phendea lenghe: „Aghies cadala dumes cai așundean-len anda o Lil le Devlesco, pherdile-pe”. 22  Savore denas duma mișto anda leste hai așenas uimime cana așunenas le șucar dumes cai înclenas anda lesco mui; von phenenas: „Na-i cado o șiavo le Iosifosco?”. 23  Atunci vo phendea lenghe: „Jianav că va phenena cadai duma anda mande: «Dacă san doctoro, atunci sastiar tut!» hai va phenena: «Cher vi cade, ando than cai barilean, le buchia cai așundeam că cărdean-len ando Capernaum!»”. 24  Pala codoia phendea: „Ciaces phenav tumenghe că niciech profeto nai-lo primime ando than cai barilea. 25  Tha, phenav tumenghe ciaces că andel ghiesa le Iliesche sas but phivlea ando Israelo, cana trin bărșa hai șiov șiona o cerii sas-lo phandado hai avilea iech bari boch ando sasto them. 26  Cu sea cadala, o Ilie ci sas-lo bișialdo ca niciech mașcar codola jiuvlea, numai ca iech phivli andai Sarepta, anda o than le Sidonosco. 27  Sa cadea, sas but manușa cai sas-len lepra* ando Israelo ando timpo le profetosco Elisei. Cu sea cadala, niciech mașcar lende ci sas-lo ujiardo, avreal o Naaman, o siriano”. 28  Savore cai așunenas cadala buchia andi sinagoga pherdile holiatar; 29  von vazdine-pe opre, încalade-les sigo avri anda o foro hai îngărde-les po mai ucio than le plainesco pe savo sas vazdino lengo foro, caște șiuden-les tele. 30  Tha vo nachlea mașcar lende hai gălea mai dur pe pesco drom. 31  Pala codoia gălea tele ando Capernaum, iech foro andai Galileea, hai sicavelas le manușen ando sabato, 32  hai von așenas uimime cana dichenas sar sicavelas-len, anda codoia că delas duma sar iech manuș cai sas-les zuralimos le Devlestar. 33  Andi sinagoga sas iech manuș ande savo sas iech beng, iech spirito neujo, cai delas cingar zurales: 34  „Ah! So si tut amența, Isus Nazarineanona? Avilean te chinuis amen? Jianav mișto con san: o Sfânto le Devlesco!”. 35  Tha o Isus halea-pe lesa hai phendea lesche: „Aș anda o mui hai jia avri anda leste!”. Pala so o beng șiudea le manușes ca i phuv mașcar lende, vo înclistea avri* anda leste bi te cherel lesche chanci nasul. 36  Atunci savore așile uimime hai astarde te phenen iech averesche: „Așunen, so baro zuralimos si ande lesche dumes! Chiar vi le spiritea neuje așunen lestar hai înclen avri!”. 37  Hai i vestea anda leste așundea-pe ande sea codola thana. 38  Pala so tiliardea andai sinagoga, vo gălea andre ando chăr le Simonosco. I sasui* le Simonoschi sas-li nasfali anda codoia că sas-la bari febra hai von mangle-les te ajutil-la. 39  Atunci vo gălea pașa late hai sastiardea-la, hai i febra mechlea-la. Voi uștilea opre sigo hai astardea te cherel lenghe haben. 40  Cana mechlea-pe tele o cham, savore astarde te anen co Isus penghe nasfalen. Vo șiolas pesche vast pe fiesavo mașcar lende hai sastiarelas-len catar orisavo nasfalimos cai sas-len. 41  Hai anda but jene înclenas avri benga, cai denas cingar: „Tu san o Șiavo le Devlesco!”. Tha o Isus halas-pe lența hai ci mechelas-len te den duma, anda codoia că jianenas că vo si o Cristoso. 42  Tha, cana pharolas o ghies, vo tiliardea de othar hai gălea ande iech than mai garado. Le but manușa astarde te roden-les, hai cana arăsle ando than cai sas-lo vo, ci camle te mechen-les te tiliarel lendar. 43  Tha vo phendea lenghe: „Trebul te phenav vi ande aver foruria i vestea lași anda o Regato le Devlesco, că anda codoia somas bișialdo”. 44  Cadea că vo gălea hai phendea vi mai dur i vestea lași andel sinagogi andai Iudeea.

Note de subsol

^ Sau „o zuralimos le Devlesco”. Dich o Dicționaro.
^ Lit. „gloria”.
^ Sau „parapeto le templosco”.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Lit. „sulo”. Cado sas iech lil lungo cărdo anda o papiruso sau pergamento hai savo sas șiuto pe iech cotor cașt.
^ Lit. „te predichiv”.
^ Sau „gălea avri”.
^ Sau „soacra”.

Le drepturi de autor anda cadai publicația