Pala o Luca 16:1-31
16 Pala codoia mai phendea le discipolenghe: „Ieche barvale manușes sas-les iech slujitoro ande savesco vast sas mechlo lesco chăr. Cado sas-lo doșardo că ci lelas sama mișto lesche barvalimastar.
2 Vo achardea-les hai phendea lesche: «So si cadala buchia cai așunav-len anda tute? Sicav manghe le lila caște dichav so cărdean mânre barvalimasa, că ci mai daștis te les sama mânre chărestar».
3 Atunci o slujitoro cai lelas sama po chăr phendea ande pesco ilo: «So va avela te cherav acana? Mânro Rai ci mai mechel man te lav sama lesche chărestar; zuralimos te cherav buchi i phuv, na-i man, hai te mangav le manușendar love po droma, si manghe lajiav.
4 Aha, jianav so va avela te cherav ca le manușa te primin man ande penghe chăra cana ci va mai avela te lav sama cadale chărestar».
5 Hai, achardea peste fiesave manușes cai trebulas te del parpale vareso lesche raiesche, hai phendea le iechto manușesche: «So trebul te des parpale mânre raiesche?».
6 Cado phendea lesche: «Trebul te dav-les parpale 2 200 litri* uleio măslinengo». Vo phendea lesche: «Le o lil* cai cărdeam-les, beș tele hai scriisar sigo ande leste 1 100».
7 Pala codoia phendea averesche: «Hai tu, so trebul te des-les parpale?». Cado phendea: «Trebul te dav-les parpale 17 000 kilogramea* ghiv». Vo phendea: «Le o lil cai cărdeam-les hai scriisar ande leste 14 000».
8 Hai o rai așardea le slujitoros cai lelas sama po chăr, chiar cana sas-lo neorta, anda codoia că cărdea buchi goghiaver. Că le manușa cadala lumeache* sile mai goghiaver cana trebun te cheren buchi codolența cai train ande lenghe ghiesa* sar le manușa le Devlesche*.
9 Mai but, me phenav tumenghe: Cheren tumenghe amala le barvalimatanța neorta cadala lumeache, ca atunci cana cadala ci va mai avena, von te primin tumen andel chăra veșnico.
10 Con si demno pachiamasco andel țâne buchia silo demno pachiamasco vi andel bare buchia hai con si neorta andel țâne buchia silo neorta vi andel bare buchia.
11 Cadea că, dacă ci sicaven că san demno pachiamasche andel barvalimata neorta, con va dela ande tumare vast le ciace barvalimata?
12 Hai, dacă ci sicaven că san demno pachiamasche anda so si aver varecasco, con va dela tumenghe so si tumaro?
13 Niciech slujitoro ci daștil te avel sclavo duie raienghe. Cana va iubila ieches anda lende va urâla le coaveres; hai cana va așunela iechestar anda lende ci va sicavela pachiv caring o coaver. Cadea că, ci daștin te slujin vi le Devlesche hai vi le Barvalimasche”.
14 Le farisei*, cai iubinas le love, așunenas sea cadala buchia hai asanas lestar.
15 Anda codoia, vo phendea lenghe: „Tumen phenen că san orta angla le manușa, tha o Del prinjianel tumaro ilo. Că so pachian le manușa că si iech bari buchi, angla le Devlesche iacha si iech buchi melali.
16 I Legea hai le lila cai scriisarde-len le profeți sas ji co Ioan. Anda codo ghies, o Regato le Devlesco silo phendo sar vestea lași hai manușa de orisavo felo den sea penghi zor te jian andre ande leste.
17 Da, mai sigo va nachela o cerii hai i phuv sar te așel bi te pherel-pe o mai țâno cotor literaco andai Legea.
18 Con șinel o solaharimos pesca rromniasa hai lel pesche aver rromni cherel-pe doșalo anda codoia că athadea pesca rromnia* hai con lel iecha jiuvlea cai mechlea-la laco rrom, cherel-pe doșalo vi vo le păcatostar.
19 Sas iech barvalo manuș cai phiravelas cuci hureaimata hai bucurilas-pe ande fiesavo ghies le mai lașe buchiandar.
20 Ca leschi poarta sas șiuto iech manuș po anav Lazăr cai manghelas le manușendar love po droma, vo sas-lo pherdo phugneanța.
21 Hai camelas te ciailiarel-pe le buchianța cai perenas catar i meseili le barvaleschi. Chiar vi le jucăla avenas hai ciarenas lesche phugnea.
22 Pala iech timpo, codo cai manghelas le manușendar love po droma mulea hai sas-lo îngărdo le îngerendar pașa o Avraam.
Mulea vi o barvalo hai sas-lo prahome.
23 Hai ando Mormânto*, anda codoia că sas-lo chinuime, vazdea pesche iacha hai dichlea de durial le Avraamos, hai pașa leste, sas o Lazăr.
24 Atunci dea cingar hai phendea: «Dade Avraam, sicav manghe mila hai bișial le Lazăros te covliarel pesco nai ando pai hai te șudrarel mânri șib, anda codoia că țârdav bare ducha ande cadai bari iag».
25 Tha o Avraam phendea: «Șiavorreia, an tuche amintea că sas tut but lașe buchia cana traisardean, tha le Lazăros sas-les numai buchia nasul. Vo acana arachel bucuria cade, hai tu san duchado.
26 Sa cadea, mașcar amende hai tumende si iech baro șinimos phuveaco*, cadea că codola cai camen te nachen de catar tumende te na daștin hai nici codola de othar te na daștin te nachen amende».
27 O barvalo phendea: «Atunci, mangav tut, dade, bișial-les ca o chăr mânre dadesco,
28 anda codoia că si man panji phrala, caște phenel lenghe te paruven-pe hai te na arăsăn vi von ande cado than cai le manușa sile zurales duchade».
29 Tha o Avraam phendea: «Silen le lila cai scriisarde-len o Moise hai le profeți; te așunen lendar».
30 Atunci vo phendea: «Na, dade Avraam, tha, dacă va jiala varecon mașcar le mule, va fala-len nasul anda lenghe păcatea*».
31 Tha vo phendea lenghe: «Dacă ci așunen catar le lila cai scriisarde-len o Moise hai le profeți, ci va pachiana nici dacă va uștiela* varecon andal mule»”.
Note de subsol
^ Lit. „100 măsuri”. Iech măsura sas 22 litri.
^ Sau „o contracto”.
^ Lit. „100 măsuri”. Iech mâsura sas 170 kilogramea.
^ Dich o Dicționaro.
^ Sau „lenghi generația”.
^ Lit. „șiave la luminache”.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Lit. „adultero”. Dich o Dicționaro.
^ Sau „Hades”. Dich o Dicționaro.
^ Sau „bari prăpastia”.
^ Sau „va căina-pe”, „va sicavena căința”. Dich o Dicționaro.
^ Sau „va avela jiuvindime”.
