Pala o Luca 6:1-49

  • O Isus si „Rai le sabatosco” (1-5)

  • Iech manuș savesco vast sas șuco silo sastiardo (6-11)

  • Le 12 apostoli (12-16)

  • O Isus sicavel le manușen hai sastiarel (17-19)

  • Fericirea hai ducha (20-26)

  • Iubirea caring le dușmani (27-36)

  • „Na mai judechin” (37-42)

  • O cașt prinjianel-pe pala lesche fructea (43-45)

  • Iech manuș vazdel iech chăr po baro barr; iech manuș vazdel o chăr pi covli phuv bi te săpil (46-49)

6  Ande iech ghies cana încărelas-pe o sabato, o Isus nachelas prin iech than cai bariolas o ghiv, hai lesche discipoli chidenas ghiv, ujiarenas-les ande penghe vast hai hanas-les. 2  Atunci chichiva mașcar le farisei* phende: „Sostar cheren so na-i mechlo ando sabato?”. 3  Tha o Isus phendea lenghe: „Ci citisardean niciechdata so cărdea o David cana vo hai lesche manușa sas-le bochale? 4  Vo gălea andre ando chăr le Devlesco hai sas lesche dine le manre cai sas șiute angla o Del. Vo halea hai dea vi le manușen cai sas lesa, chiar cana chanicasche na-i mechlo te hal-len avreal le rașaia”. 5  Pala codoia, phendea lenghe: „O Șiavo le manușesco si Rai le sabatosco”. 6  Ande aver ghies cana încărelas-pe o sabato, vo gălea andre andi sinagoga* hai astardea te sicavel le manușen. Code sas iech manuș savesco ciacio vast sas șuco. 7  Le sicaitori la Legeache* hai le farisei sas le iachența po Isus; von camenas te dichen dacă avelas te sastiarel codole manușes ando sabato caște arachen vareso te doșaren-les. 8  Tha vo prinjianelas mișto lenghe gânduri; anda codoia, phendea le manușesche le vastesa șuco: „Vazde tut ande pânrănde hai av ando mașcar!”. Hai vo vazdea-pe hai așilea ande pânrănde. 9  Atunci o Isus phendea lenghe: „Pușiav tumen: Si mechlo ando sabato te cheres iech buchi lași sau iech buchi nasul, te salvis sau te les iech viața?”. 10  Pala so dichlea caring savore, vo phendea le manușesche: „Sicav chio vast*!”. Vo sicadea-les hai lesco vast sastilea. 11  Tha von chironas holiatar* hai astarde te den duma mașcar pende anda so daștinas te cheren le Isusosche. 12  Ande iech ghies, vo gălea po plain caște manghel-pe hai sea i riat manglea-pe le Devlesche. 13  Cana cărdilea ghies, achardea pesche discipolen hai alosardea 12 mașcar lende, savenghe șiutea o anav „apostoli”: 14  o Simon, savesche șiutea vi o anav Petru, o Andrei, lesco phral, o Iacov, o Ioan, o Filip, o Bartolomeu, 15  o Matei, o Toma, o Iacov, o șiavo le Alfeosco, o Simon cai sas-les iech bari iag ando ilo, 16  o Iuda, o șiavo le Iacovosco, hai o Iuda Iscariot, cai arăslea te bichinel le Isusos. 17  Pala codoia, vo gălea tele lența pa o plain hai șiute-pe te beșen pe iech than orta. Code sas but mașcar lesche discipoli hai vi but manușa cai avile andai Iudeea, anda o Ierusalimo hai anda o Tiro hai o Sidono cai beșenas pașa i marea. Cadala avile te așunen-les hai te aven sastiarde penghe nasfalimatandar. 18  Vi codola cai sas-le chinuime catar le spiritea neuje* sas-le sastiarde. 19  Sea le manușa rodenas te șion o vast pe leste, anda codoia că anda leste înclelas iech zuralimos cai sastiarelas savoren. 20  Vo vazdea pesche iacha caring pesche discipoli hai phendea: „Fericime san tumen, codola ciore, anda codoia că tumaro si o Regato le Devlesco! 21  Fericime san tumen, codola cai acana san bochale, anda codoia că va avena ciailiarde! Fericime san tumen, codola cai acana roven, anda codoia că va asana! 22  Fericime san tumen cana le manușa urân tumen, nașaven tumen de mașcar lende, prasan tumen hai meliaren tumaro anav anda i doș* le Șiaveschi le manușesco! 23  Bucurin tumen ande codo ghies hai aven zurales fericime, că dichta, tumaro pochinimos si baro ando cerii, anda codoia că vi lenghe phure cherenas sa cadala buchia le profețenghe*! 24  Tha vai tumendar, manușa barvale, anda codoia că so si tumen acana si tumaro corcoro miștimos! 25  Vai tumendar, codola cai acana san ciaile, anda codoia că va avena bochale! Vai tumendar, codola cai acana asan, anda codoia că va avela tumen iech bari duch ando ilo hai va rovena! 26  Vai tumendar cana sea le manușa den duma mișto anda tumende, anda codoia că sa cadea cherenas vi lenghe phure le hohamne profețenghe! 27  Tha me phenav tumenghe, codolenghe cai așunen man: Iubin codolen cai si tumare dușmani, cheren mișto codolenghe cai urân tumen, 28  binecuvântin codolen cai den tumen armai hai manghen tumen le Devlesche anda codola cai prasan tumen. 29  Cana varecon del tut iech palma po mui, risar lesche vi i coaver partea le moschi, hai dacă varecon lel chio hureaimos, mech-les te lel vi chio gad. 30  Oricon manghel tutar vareso, de-les, hai dacă varecon lel che buchia, na mang-len lestar parpale. 31  Mai but, sar camen ca le manușa te phiraven-pe tumența sa cadea te phiraven tumen vi tumen lența. 32  Dacă iubin numai codolen cai iubin tumen, sostar ajucăren te aven așarde? Că vi le manușa păcătoși iubin codolen cai iubin-len. 33  Dacă sicaven lașimos numai codolenghe cai sicaven tumenghe lașimos, sostar ajucăren te aven așarde? Vi le manușa păcătoși cheren sa cadea. 34  Tha dacă împrumutin codolen savendar jianen că va primina parpale, sostar ajucăren te aven așarde? Vi le manușa păcătoși împrumutin codolen păcătoși caște primin parpale sa cadichi sode dine. 35  Tha tumen te iubin codolen cai si tumare dușmani, sicaven lașimos hai împrumutin bi te ajucăren vareso parpale. Tumaro pochinimos va avela baro hai va avena le șiave Codolesche cai si o Mai Baro, anda codoia că vo si lașio codolența cai ci mulțumin hai codolența nasul. 36  Sicaven mai dur mila, cadea sar vi tumaro Dad sicavel mila. 37  Na mai judechin averen hai ci va avena judechime nici tumen. Na mai doșaren hai nici tumen ci va avena doșarde. Iertin sea o timpo hai va avena iertime. 38  Den hai vi le manușa va dena tumenghe. Von va dena tumen cadea de but, că ci va arăsăla ande tumari angali*, hai va avela cadea de pherdi, că va dela avri. Cadea sar phiraven tumen averența, sa cadea va phiravena-pe vi von tumența*”. 39  Pala codoia mai phendea lenghe iech pilda: „Daștil iech corro te sicavel avere corresche caring te jial? Ci va perena vi le dui andi groapa? 40  O discipolo na-i mai baro sar pesco sicaitoro, tha con silo sicado mișto va avela sar pesco sicaitoro. 41  Sostar diches o sulum anda i iach che phraleschi hai ci diches o baro cașt anda chi iach? 42  Sar daștis te phenes che phralesche: «Phrala, mech man te încalavav avri o sulum anda chi iach», cana tu ci diches că ande chi iach si iech baro cașt? Manuș hohamno*! Încalav avri mai anglal o baro cașt anda chi iach hai pala codoia va avela te diches mai mișto sar te încalaves avri o sulum anda i iach che phraleschi. 43  Anda codoia că niciech cașt lașio ci cherel fructea rimome hai niciech cașt cherno ci cherel fructea lașe. 44  Fiesavo cașt prinjianel-pe pala lesche fructea. Sar avelas, niciechdata ci chiden-pe fructea gule* andal canră, hai nici na chiden-pe dracha* andal burra. 45  Iech manuș lașio phenel lașe buchia anda codoia că lesco ilo silo pherdo lașimos, tha iech manuș nasul phenel buchia nasul anda codoia că lesco ilo silo pherdo nasulimos, că so phenel iech manuș sicavel so si ande lesco ilo*. 46  Sostar phenen manghe «Raia!, Raia!», tha ci cheren so phenav tumenghe me? 47  Va avela te phenav tumenghe sar si codo cai avel mande, așunel mânre dumes hai cherel so phenav lesche me: 48  Si sar iech manuș cai camlea te vazdel pesche iech chăr. Cadea că vo săpisardea ji cana arăslea ca iech baro barr* hai astardea te vazdel-les pe leste. Pala codoia, dea o brâșând cadea de but că le paia andai len marde ande codo chăr, tha ci daisarde te mișchin-les, anda codoia că sas-lo cărdo mișto. 49  Tha con așunel mânre dumes hai ci cherel so phenav lesche me si sar iech manuș cai vazdea iech chăr pi covli phuv, bi te săpil. Le paia andai len marde ande leste, hai o chăr pelea tele sigo hai ci mai așilea chanci anda leste”.

Note de subsol

^ Le farisei sas iech grupo evreiengo zurales religioso cai încărenas fiesavi țâni buchi anda i Legea le Devleschi hai cai mai șionas late vi aver reguli.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Lit. „scribi”.
^ Lit. „tinzosardea pesco vast” sau „zinghiardea pesco vast”.
^ Sau „thabonas holiatar”.
^ Sau „benga”.
^ Sau „anda i cauza”.
^ Sau „poghin”, „broc”.
^ Lit. „la măsurasa saveasa măsurin va măsurila-pe tumenghe parpale”.
^ Sau „duie muiengo”, „ciardo machlo”; „codo cai cherel-pe angla le manușa că silo lașio”.
^ Lit. „smochine”.
^ Sau „struguri”.
^ Lit. „o mui phenel so si ando ilo”.
^ Sau „pi stânca”.

Le drepturi de autor anda cadai publicația