Pala o Luca 8:1-56

  • Le jiuvlea cai jian pala o Isus (1-3)

  • I pilda anda o manuș cai șiol semințea andi phuv (4-8)

  • Sostar dea duma o Isus andel pilde (9, 10)

  • Sar trebul hachiardi i pilda le manușesa cai șiol semințea andi phuv (11-15)

  • I lampa ci garavel-pe (16-18)

  • I dei hai le phrala le Isusosche (19-21)

  • O Isus așiavel iech bari barval (22-25)

  • O Isus bișialel le benghen andel bale (26-39)

  • I șei le Iairoschi; iech jiuvli șiol o vast po hureaimos le Isusosco (40-56)

8  Ca țâra timpo pala codoia, vo gălea foro forostar hai gav gavestar, caște sicavel hai te phenel i vestea lași anda o Regato le Devlesco. Lesa sas Codola deșudui, 2  hai vi chichiva jiuvlea anda save sas încalade le spiritea nasul* hai cai sas sastiarde penghe nasfalimatandar: i Maria, cai bușiolas Magdalena, anda savi încliste efta benga, 3  i Ioana – i rromni le Cuzaschi, codo cai lelas sama po chăr le Irodosco – , i Suzana hai but aver jiuvlea, cai slujinas lesche penghe lașe buchianța. 4  Cana but manușa chidine-pe ande iech than codolența cai avenas leste anda aver foruria, vo phendea lenghe iech pilda: 5  „Iech manuș gălea te șiol semințea andi phuv. Cana șiudelas le semințea, chichiva arăsle te peren pașa o drom hai sas-le uștarde andel pânrănde, hai le ciriclea le cerosche hale-len. 6  Chichiva arăsle te peren ande iech than barralo hai, pala so astarde te barion, șuchile anda codoia că ci sas-len pai. 7  Aver arăsle te peren mașcar le canră, tha le canră cai barile iech data lența tasade-len. 8  Tha aver arăsle te peren pi phuv lași, astarde te barion hai dine rodo 100-var mai but”. Pala so phendea sea cadala buchia, phendea lenghe zurales: „Cas si can te așunel!”. 9  Tha lesche discipoli pușle-les sar trebun te hachiaren cadai pilda. 10  Vo phendea lenghe: „Tumenghe sas mechlo te hachiaren le buchia garade hai sfânto anda o Regato le Devlesco, tha le coaverența dav duma andel pilde, că chiar cana dichen, te dichen de ivea hai, chiar cana așunen, te na hachiaren. 11  Dichta so si cadai pilda: I sămânța si o cuvânto le Devlesco. 12  Le semințea cai arăsle te peren pașa o drom si codola cai așunde, tha pala codoia avel o Beng hai lel o cuvânto anda lengo ilo caște na pachian hai te na aven salvime. 13  Codola anda o than barralo si codola cai, cana așunen o cuvânto, primin-les bucuriasa, tha na-i len rădăcina. Von pachian iech timpo, tha, cana aven le pharimata, mechen pengo pachiamos. 14  Tha anda codola cai arăsle te peren mașcar le canră, cadala si codola cai așunde, tha, anda codoia că mechen-pe athade catar le pharimata la viațache hai camen te aven barvale caște bucurin-pe cadala viațatar, sile cu sea tasade hai ci arăsăn te den rodo niciechdata. 15  Tha anda codola cai arăsle te peren pi phuv lași, cadala si codola cai, pala so așunde o cuvânto ieche ilesa lașio, încăren-les, așen zurale ando pachiamos hai den rodo. 16  Cana varecon astarel iech lampa, ci garavel-la tela iech vaso, nici na șiol-la tela o pato, tha șiol-la pi meseili, ca codola cai aven andre te dichen i lumina. 17  Că na-i chanci garado caște na avel arachlo hai na-i chanci cai varecon camel te încărel-les mișto garado te na arăsăl prinjiando. 18  Anda codoia, len sama sar așunen, că codoles cai siles va mai dela-pe lesche, tha codoles cai na-i les va lela-pe lestar vi so pachial că siles”. 19  Leschi dei hai lesche phrala avile te dichen-les, tha ci daisarde te arăsăn leste anda codoia că code sas chidine but manușa. 20  Atunci varecon phendea lesche: „Chi dei hai che phrala sile avri hai camen te dichen tut”. 21  Vo phendea lenghe parpale: „Mânri dei hai mânre phrala sile codola cai așunen o cuvânto le Devlesco hai încăren-les”. 22  Ande iech ghies, o Isus hai lesche discipoli găle opre ande iech barca hai vo phendea lenghe: „Te nachas pi coaver rig le paieschi”. Hai von tiliarde. 23  Tha, ando timpo so jianas angle la barcasa, le Isusos lea-les i lindri hai sutea. Hai pi marea avilea iech bari barval brâșândesa, hai i barca astardea te pherel-pe paiesa, cadea de but că sas pașă te mechel-pe tele ando pai. 24  Atunci găle leste, uștiade-les hai phende lesche: „Sicaitorina, Sicaitorina, meras!”. Vo uștilea opre, dea cingar caring i barval hai i holiardi marea hai von așile po than. Hai cărdilea iech bari liniștea. 25  Pala codoia phendea lenghe: „Cai si tumaro pachiamos?”. Tha von daraile zurales hai așile uimime hai phenenas iech averesche: „Con si cado manuș? Chiar vi le barvalea hai le paia așunen lestar”. 26  Hai țârdine i barca co malo ando than cai beșenas le gheraseni, cai si pi coaver rig le paieschi andai Galileea. 27  Cana o Isus dea-pe tele andai barca, avilea angla leste, anda o foro, iech manuș ande savo sas benga. De but timpo, cado manuș ci mai phiravelas hureaimata hai ci mai beșelas ande iech chăr, tha trailas mașcar le mormintea. 28  Cana dichlea le Isusos, dea cingar, pelea andel cianga angla leste hai phendea zurales: „So cames mandar, Isus, Șiavo le Bare Devlesco? Mangav tut te na chinuis man”. 29  (Că o Isus phendea le spiritosche neujo* te înclel avri anda o manuș. O spirito încărelas le manușes tela pesco zuralimos butivar, hai lesche vast hai pânre sas-le phangle lanțurența butivar hai sas-lo încărdo tela paza, tha de fiesavi data vo șinelas le lanțuri hai o beng îngărelas-les ande thana mai garade.) 30  O Isus pușlea-les: „Savo si chio anav?”. Vo phendea: „Legiunea”, că ande leste sas but benga. 31  Hai von manghenas le Isusos te na bișialel-len ando abiso*. 32  Code, po plain, sas but bale cai hanas. Cadea că von mangle-les te mechel-len te jian andre andel bale. Hai vo mechlea-len. 33  Atunci le benga încliste avri anda o manuș hai găle andre andel bale, hai sea i turma nașlea tele pa o plain, pelea tele ando pai hai sea le bale tasile. 34  Cana dichle so întâmplosardea-pe, codola cai lenas sama le balendar nașle hai phende cadai buchi savorenghe anda o foro hai ando than de pașa leste. 35  Atunci le manușa găle te dichen so întâmplosardea-pe. Von arăsle co Isus hai arachle le manușes ande savo sas but benga: vo sas-lo hureado hai sastevesto co șăro hai beșelas ca le pânre le Isusosche. Hai savore daraile zurales. 36  Codola cai dichle sea so întâmplosardea-pe phende lenghe sar sas-lo sastiardo o manuș ande savo sas benga. 37  Atunci but manușa anda o than cai beșenas le gheraseni mangle le Isusos te tiliarel lendar, anda codoia că astardea-len iech bari dar. Cadea că vo gălea opre andi barca hai camelas te tiliarel. 38  Tha o manuș anda savo încliste le benga manghelas-les te mechel-les te așel lesa, tha vo bișialdea-les hai phendea lesche: 39  „Risar tut parpale chăre hai phen savorenghe so cărdea o Del anda tute”. Vo tiliardea hai phendea ande sea o foro so cărdea o Isus anda leste. 40  Cana o Isus gălea parpale, le but manușa primisarde-les bucuriasa, anda codoia că savore ajucărenas-les. 41  Tha dichta că avilea iech murș cai bușiolas Iair. Cado murș sas iech conducătoro andai sinagoga*. Vo pelea tele ca le pânre le Isusosche hai manglea-les zurales te avel leste chăre, 42  anda codoia că leschi corcori șei, cai sas-la cam 12 bărșa, țârdelas te merel. Cana o Isus jialas code, le but manușa spidenas-pe pașa leste. 43  Hai code sas iech jiuvli cai de 12 bărșa sas nasfali hai hasarelas rat hai chonic ci daisardea te sastiarel-la. 44  Voi avilea pala lesco dumo* hai șiutea o vast po thava lesche hureaimasco*. Pe thaneste, laco șiordimos ratesco așiadea-pe. 45  Atunci o Isus phendea: „Con șiutea o vast pe mande?”. Anda codoia că savore phende că na von sas, o Petru phendea: „Sicaitorina, si but manușa chidine pașa tute hai spiden tut”. 46  Tha o Isus phendea: „Varecon șiutea o vast pe mande, anda codoia că jianav că anda mande înclistea iech zuralimos”. 47  Cana dea peschi sama că ci nachlea bi te avel dichli, i jiuvli astardea te izdral zurales hai avilea leste, pelea tele angla leste hai phendea angla savore sostar șiutea o vast pe leste hai sar sas-li sastiardi pe thaneste. 48  Tha vo phendea lache: „Mânri șei, chio pachiamos sastiardea tut. Jia hai na mai dara*!”. 49  Cana o Isus încă delas duma, iech manuș anda o chăr le conducătorosco andai sinagoga avilea hai phendea: „Chi șei mulea! Sostar te mai șios po drom le Sicaitores?”. 50  Pala so așundea cadaia, o Isus phendea caring o Iair: „Na dara! Numai sicav pachiamos hai voi va avela salvime!”. 51  Cana arăslea ca lesco chăr, ci mechlea chanicas te jial andre lesa, numai le Petros, le Ioanos, le Iacovos hai le dades hai la deia la șeiache. 52  Savore manușa rovenas hai marenas-pe ando colin duchatar anda late, tha vo phendea lenghe: „Na mai roven, că ci mulea, numai sovel!”. 53  Atunci von astarde te asan lestar, anda codoia că jianenas că voi mulea. 54  Tha vo lea-la vastestar hai dea cingar: „Șeiorrie, uștie opre!”. 55  I șeiorri avilea parpale viațate hai vazdea-pe sigo opre, hai vo phendea lenghe te den-la vareso te hal. 56  Laco dad hai lachi dei sas-le zurales fericime, tha vo phendea lenghe te na phenen chanicasche so întâmplosardea-pe.

Note de subsol

^ Sau „benga”.
^ Sau „le benghesche”.
^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Sau „pala lesche zăia”.
^ Sau „franjuri”, „i partea de telal le hureaimaschi”.
^ Lit. „Jia la paceasa”.

Le drepturi de autor anda cadai publicația