Pala o Luca 7:1-50

  • O pachiamos ieche ofițerosco andai armata (1-10)

  • O Isus uștiavel andal mule le șiaves la phivleaco anda Nain (11-17)

  • O Isus așarel le Ioanos o Botezătorii (18-30)

  • Le manușa anda cadala ghiesa cai ci așunen sile dine armai (31-35)

  • Iech jiuvli păcătoso sili iertime (36-50)

    • I pilda andal manușa cai trebunas te den parpale le love ieche manușesche (41-43)

7  Pala so phendea cadala buchia le manușenghe, vo gălea andre ando Capernaum. 2  Ieche ofițeros andai armata sas-les iech sclavo saveste încărelas but hai cai sas-lo zurales nasfalo, vo țârdelas te merel. 3  Cana așundea anda o Isus, vo bișialdea leste chichiva phuren de mașcar le iudei caște manghel-les te avel caște sastiarel lesche sclavos. 4  Von avile co Isus hai astarde te manghen-les: „Cher cadai buchi anda leste hai ajutisar-les că si iech lașio manuș, 5  iubil amaro neamo hai vo sas codo cai vazdea amari sinagoga*”. 6  O Isus tiliardea lența; tha, cana sas pașă lesche chărestar, o ofițero andai armata bișialdea chichiva amalen caște phenen lesche: „Raia, na mai de chi zor te aves, anda codoia că ci som me cadea de lașio caște aves ande mânro chăr. 7  Me ci dichlem man cadea de lașio nici barem te avav ji tute. Tha phen iech duma hai mânro slujitoro va avela sastiardo. 8  Anda codoia că vi me som tela averengo zuralimos hai vi tela mânro vast si but soldați; hai phenav iechesche: «Jia!» hai jial, hai averesche: «Av!» hai avel, hai mânre sclavosche: «Cher cadaia!» hai vo cherel-la”. 9  Cana așundea cadala buchia, o Isus așilea uimime hai risailea caring le but manușa cai avenas pala leste, hai phendea lenghe: „Phenav tumenghe că nici ando Israelo ci arachlem iech pachiamos cadea de baro”. 10  Cana risaile chăre codola cai sas-le bișialde le ofițerostar andai armata, arachle le sclavos sastevesto. 11  Ca țâra timpo pala codoia, o Isus tiliardea caring iech foro cai bușiolas Nain, hai lesche discipoli hai but manușa jianas lesa. 12  Cana arăslea pașă le udarestar le forosco, dichta că sas andino avri iech mulo, o corcoro șiavo iecha jiuvleaco, cai sas-li phivli. Lasa sas vi but manușa anda o foro. 13  Cana o Rai dichlea-la, cărdilea lesche mila latar hai phendea lache: „Na mai rov!”. 14  Pala codoia pașilea hai șiutea o vast pi targa cai sas o mulo, hai codola cai îngărenas-la așile po than. Atunci vo phendea: „Tărneia, phenav tuche: Uștie opre!”. 15  Hai o tărno manuș cai sas-lo mulo uștilea opre hai astardea te del duma, hai o Isus dea-les lesca deiache. 16  Atunci savore așile uimime hai astarde te den iech bari pachiv* le Devlesche, hai phenenas: „Iech baro profeto* vazdea-pe mașcar amende” hai „O Del dichlea caring pesco poporo”. 17  Cadai vestea anda leste așundea-pe andi sasti Iudeea hai ande sea le thana de pașa late. 18  O Ioan așundea sea cadala buchia pesche discipolendar. 19  Atunci o Ioan achardea peste duien mașcar lende hai bișialdea-len co Rai caște pușen-les: „Tu san Codo cai trebul te avel sau te ajucăras aver varecas?”. 20  Cana arăsle leste, le murșa phende lesche: „O Ioan o Botezătorii bișialdea amen tute caște pușias tut: «Tu san Codo cai trebul te avel sau te ajucăras aver varecas?»”. 21  Ande codo ceaso, vo sastiardea bute manușen lenghe nasfalimatandar, hai vi codolen cai sas-le chinuime catar bare ducha. Sa cadea, vo încaladea avri spiritea nasul* hai cărdea bute corren te dichen pale. 22  Hai vo phendea lenghe: „Jian hai phenen le Ioanosche so dichlean hai so așundean: Acana le corre dichen, le banghe phiren, codola cai sas-len lepra* sile ujiarde, le cașuche așunen, le mule sile uștiade*, hai codolenghe ciore si phendi i vestea lași. 23  Fericime si codo cai ci hasarel pesco pachiamos anda mânri doș*”. 24  Pala so tiliarde codola cai sas-le bișialde le Ioanostar, o Isus astardea te del duma le manușenghe anda o Ioan: „So gălean te dichen ando șuco than? Iech trestia phurdini la barvaleatar? 25  So gălean te dichen? Iech manuș andel hureaimata raicane? Codola cai phiraven hureaimata raicane hai train ando barvalimos beșen andel chăra le regenghe. 26  Atunci so gălean te dichen? Iech profeto? Da, phenav tumenghe, vo si profeto, hai chiar vi mai but sar iech profeto. 27  Vo si codo anda savo sas scriime: «Dichta că bișialav angla tute iech jeno cai phenel mânro cuvânto, hai vo va lașiarela o drom angla tute». 28  Phenav tumenghe că mașcar sea codola cai cărdile andal jiuvlea na-i niciech mai baro sar o Ioan, tha o mai țâno anda o Regato le Devlesco si mai baro lestar”. 29  (Cana așunde cadai buchi, sea le manușa hai vi codola cai chidenas le love* phende că o Del silo orta, anda codoia că sas-le bolde le bolimasa* le Ioanosco. 30  Tha le farisei* hai codola cai prinjianenas zurales mișto i Legea ci mechle te aven bolde lestar chiar cana cadaia camlea o Del anda lende.) 31  „Cadea că so daștiv te phenav andal manușa anda cadala ghiesa* hai sar con sile von? 32  Von sile sar le șiavorre cai beșen ando târgo hai den cingar iech caring aver: «Ghilabadeam tumenghe, tha ci chăldean, ruiam zurales, tha ci mardean tumen ando colin duchatar». 33  Sa cadea, avilea o Ioan o Botezătorii, cai ci hal manro hai ci piel mol, tha cu sea cadala tumen phenen: «Ande leste si iech beng!». 34  Avilea vi o Șiavo le manușesco, cai hal hai piel, hai cu sea cadala tumen phenen: «Dichta iech manuș cai hal but hai piel mol, o amal codolengo cai chiden le love hai codolengo păcătoși!». 35  Cu sea cadala, iech manuș sicavel că silo goghiaver prin le buchia cai cherel-len”. 36  Hai iech mașcar le farisei manglea-les te jial leste caște han ande iech than. Cadea că, o Isus gălea andre ando chăr le fariseosco hai beșlea ca i meseili. 37  Hai dichta că iech jiuvli cai sas-li prinjiandi ando foro sar păcătoso așundea că vo halas ando chăr le fariseosco hai andea iech parfumo*. 38  Voi șiutea-pe pala lesco dumo*, ca lesche pânre, hai astardea te rovel; halavelas lesche pânre pesche asfența hai choselas-len pesche balența. Sa cadea, ciumidelas lesche pânre hai șiorelas pe lende parfumo. 39  Cana dichlea cadai buchi, o fariseo cai achardea-les peste phendea ande pesco ilo: „Dacă cado manuș avelas ciaces iech profeto, jianelas con si cadai jiuvli cai șiol o vast pe leste hai că si prinjiandi sar iech jiuvli păcătoso”. 40  Atunci o Isus phendea lesche: „Simon, camav te phenav tuche vareso”. Vo phendea lesche: „Phen manghe, Sicaitorina!”. 41  „Dui manușa trebunas te den parpale le love ieche manușesche: iech trebulas te del-les 500 dinari, hai o coaver, 50. 42  Anda codoia că nas-len catar te den parpale lesche love, vo iertisardea vi le duien anda sea o ilo. Savo mașcar lende va iubila-les mai but?”. 43  O Simon phendea lesche parpale: „Pachiav că codo casche iertisardea mai but”. Vo phendea lesche: „Mișto phendean”. 44  Pala codoia risailea caring i jiuvli hai phendea le Simonosche: „Diches cadala jiuvlea? Me avilem ande chio chăr hai tu ci dean man pai caște aven halade mânre pânre. Tha cadai jiuvli haladea mânre pânre pesche asfența hai choslea-len pesche balența. 45  Tu ci ciumidean man, tha, de cana avilem cade, cadai jiuvli ci așilea po than te ciumidel mânre pânre. 46  Tu ci șiordean uleio pe mânro șăro, tha cadai jiuvli șiordea parfumo pe mânre pânre. 47  Anda codoia, phenav tuche că lache păcatea, chiar cana sile but, sile iertime, anda codoia că iubisardea but. Tha casche iertil-pe țâra, iubil țâra”. 48  Pala codoia phendea la jiuvleache: „Che păcatea sile iertime”. 49  Atunci codola cai beșenas ca i meseili lesa phenenas iech averesche: „Con si cado manuș cai iertil chiar vi le păcatea?”. 50  Tha vo phendea la jiuvleache: „Chio pachiamos salvisardea tut. Jia hai na mai dara*!”.

Note de subsol

^ Cadai duma referil-pe ca o than cai chidenas-pe le evrei caște citin anda o Lil le Devlesco, caște aven sicade, caște așunen predici hai caște manghen-pe le Devlesche.
^ Lit. „gloria”.
^ Sau „benga”.
^ Sau „jiuvindime”.
^ Sau „anda mânri cauza”.
^ Lit. „le jene cai chidenas le taxe”. Cadala manușa chidenas love anda le taxe șiute le guvernostar Romano; von sas-le urâme le coavere evreiendar.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Lit. „cadai generația”.
^ Lit. „vaso anda alabastru ande savo sas parfumo”. Dich o Dicționaro.
^ Sau „zăia”.
^ Lit. „Jia la paceasa”.

Le drepturi de autor anda cadai publicația