Pala o Luca 1:1-80

  • O Luca scriil le Teofilosche (1-4)

  • O îngero Gabriel phenel de mai anglal sar va cărdiola o Ioan o Botezătorii (5-25)

  • O îngero Gabriel phenel de mai anglal sar va cărdiola o Isus (26-38)

  • I Maria jial ca i Elisabeta (39-45)

  • I Maria așarel le Iehovas (46-56)

  • Sar cărdilea o Ioan hai so anav si lesche dino (57-66)

  • I profeția le Zahariaschi (67-80)

1  But jene dine penghi zor te scriin anda sea le buchia cai întâmplosarde-pe hai ande save vi amen pachias anda sea o ilo, 2  cadea sar sas amenghe phende codolendar cai, de mai anglal, dichle penghe iachența cadala buchia hai phende i duma le Devleschi. 3  Cadea că, alosardem vi me pala so rodem mișto sea le buchia de mai anglal, te scriiv-len tuche șucar, Teofil, manuș pachivalo, cadea sar întâmplosarde-pe ciaces. 4  Cărdem cadaia caște jianes că le buchia cai așundean-len hai sas tuche sicade sile demno pachiamasche. 5  Andel ghiesa cana o Irod* sas rege andi Iudeea, code sas iech rașai po anav Zaharia, anda o grupo le Abiiasco. Leschi rromni sas iech andal șeia le Aaronosche hai bușiolas Elisabeta. 6  Vi le dui sas-le orta angla o Del, anda codoia că phirenas bi doșaco hai încărenas sea le porunci hai le legi cadea sar manghelas-len o Iehova. 7  Tha ci sas-len șiave, anda codoia că i Elisabeta ci daștilas te așel phari, hai vi le dui sas-le phure. 8  Ande iech ghies, o Zaharia cherelas peschi buchi sar rașai angla o Del, anda codoia că avilea o timpo ca lesco grupo te slujil co templo. 9  Cadea sar trebunas te cheren le rașaia, avilea lesco rândo te jial andre ando than sfânto le Iehovasco caște thabarel tămâia. 10  Co ceaso cana thabarelas-pe tămâia, savore manușa beșenas avri hai manghenas-pe le Devlesche. 11  Atunci sicadea-pe lesche o îngero le Iehovasco. Vo beșelas andi ciaci rig le altaroschi* cai thabarelas-pe i tămâia. 12  Tha, cana o Zaharia dichlea-les, lesco ilo astardea te marel zurales hai darailea. 13  Tha o îngero phendea lesche: „Na dara, Zaharia, anda codoia că chio manglimos sas-lo așundo. Chi rromni, i Elisabeta, va cherela tuche iech șiavorro, hai tu va avela te șios lesche o anav Ioan. 14  Va avela te aves bucurime hai zurales fericime hai but jene va bucurina-pe catar leschi nașterea, 15  anda codoia că vo va avela baro andel iacha le Iehovasche. Tha ci va trebula te piel nici mol, hai nici aver pimos. Angla so te cărdiol vo va avela pherdo le spiritosa sfânto le Devlesco* 16  hai va cherela bute israelițen te aven parpale co Iehova, lengo Del. 17  Sa cadea, vo va jiala angla leste le spiritosa hai le zuralimasa cai sas le Ilies caște cherel ca o ilo le dadengo te avel sar le șiavorrengo hai te anel parpale codolen cai ci așunen le Devlestar caște avel-len o goghiaverimos codolengo cai cheren so si mișto andel iacha le Devlesche. Cadea, vo va pregătila iech poporo anda o Iehova”. 18  O Zaharia phendea le îngerosche: „Sar daștiv te jianav că va avela ciaces cadaia? Că som phuro, hai mânri rromni si vi voi phuri”. 19  O îngero phendea lesche parpale: „Me som o Gabriel, codo cai beșel angla o Del, hai somas bișialdo te dav duma tusa hai te phenav tuche cadai vestea lași. 20  Tha dichta că ci va mai avela te daștis te des duma ji ando ghies cana va avena cadala buchia, anda codoia că ci pachiaian mânre dumes, cai va pherena-pe co timpo alosardo”. 21  Ande sa cado timpo, le manușa ajucărenas le Zaharias hai ci hachiarenas sostar beșelas cadea de but ando than sfânto. 22  Cana avilea avri, ci daștilas te del duma. Atunci von hachiarde că o Del sicadea lesche vareso nemaidichlo ando than sfânto. Vo sicavelas lenghe le vastența, tha ci daștilas te phenel chanci. 23  Cana nachle le ghiesa anda leschi buchi sfânto, vo gălea chăre. 24  Pala chichiva ghiesa, i Elisabeta, leschi rromni, așilea phari hai ci gălea avri anda o chăr panji șiona; voi phenelas: 25  „Dichta so bari buchi cărdea o Iehova anda mande ande cadala ghiesa! Vo dichlea caring mande caște chosel mânro lajiav anda o mașcar le manușengo”. 26  Cana voi sas-li ando șiov-to șion, o îngero Gabriel sas-lo bișialdo le Devlestar ande iech foro andai Galileea, savo bușiolas Nazaret, 27  ca iech șei bari cai sas promitime sar rromni ieche murșesche po anav Iosif, anda o chăr le Davidosco. I șei bari bușiolas Maria. 28  Cana gălea andre, o îngero phendea lache: „I pacea te avel tusa, jiuvli binecuvântime le Devlestar! O Iehova silo tusa”. 29  Tha, voi darailea zurales cana așundea-les hai delas peschi zor te hachiarel le dumes cai phendea-len cana dea-la ghies lașio. 30  Atunci o îngero phendea lache: „Na dara, Maria, că o Del binecuvântisardea tut! 31  Dichta, că va avela te așes phari hai va avela te cheres ieche șiavorres, hai tu va avela te șios lesche o anav Isus. 32  Vo va avela baro hai va phenela-pe anda leste că si o Șiavo Codolesco o Mai Baro, hai o Iehova Del va dela lesche o trono le Davidosco, lesco dad. 33  Vo va raila sar Rege opral o chăr le Iacobosco anda sea o timpo hai lesche Regatos ci va avela-les sfârșito”. 34  Tha i Maria phendea le îngerosche: „Sar va avela cadai buchi dacă me ci somas nicieche murșesa?”. 35  O îngero phendea lache parpale: „O spirito sfânto le Devlesco va avela opral tute hai o zuralimos le Bare Devlesco va pachiarela* tut sar iech ușial*. Anda codoia, o șiavorro cai va cărdiola va avela sfânto hai va phenela-pe lesche că si o Șiavo le Devlesco. 36  Hai dichta că i Elisabeta, cai si anda chio neamo, ajucărel vi voi iech șiavorro, chiar cana si phuri. Anda late phenelas-pe că ci daștil te așel phari. Tha acana si ando șiov-to șion, 37  anda codoia că sea so phenel o Del pherel-pe”. 38  Atunci i Maria phendea: „Dichta, i sclava le Iehovaschi! Te cherel-pe manghe cadea sar phendean”. Pala codoia, o îngero tiliardea latar. 39  Pala codoia, i Maria tiliardea dromeste hai sighiardea te jial caring o than plainalo, ande iech foro anda Iuda. 40  Voi gălea andre ando chăr le Zahariasco hai dea ghies lașio la Elisabeta. 41  Cana i Elisabeta așundea că i Maria dea-la ghies lașio, o șiavorro hutea* ande laco păr. Hai i Elisabeta pherdilea le spiritosa sfânto le Devlesco 42  hai phendea zurales: „Binecuvântime san tu mașcar le jiuvlea hai binecuvântime si o șiavorro anda chio păr! 43  Con som me te sicavel-pe manghe cadai bari pachiv te avel mande i dei mânre Raieschi? 44  Că dichta, sar așundem că dean man ghies lașio, o șiavorro hutea ande mânro păr bucuriatar. 45  Fericime si i jiuvli cai pachiaia, că sea le buchia cai sas lache phende le Iehovastar va pherena-pe”. 46  Hai i Maria phendea: „Me* așarav le Iehovas 47  hai mânro ilo bucuril-pe zurales but ando Del, mânro Salvatoro, 48  că vo dichlea caring mande, leschi ciori sclava. Hai dichta, de acanara angle, savore manușa va phenena manghe că som fericime, 49  anda codoia că o Del zuralo cărdea bare buchia anda mande hai sfânto si lesco anav. 50  Vo sicavel mila sea o timpo* codolenghe cai daran lestar. 51  Vo cărdea bare buchia pesche zurale vastesa; nașadea codolen cai sile baricane ande pengo ilo. 52  Dea tele pa-l tronuri manușa zurale hai vazdea opre codolen ciore; 53  ciailiardea codolen bochale buchianța lașe hai bișialdea codolen barvale bi te del-len chanci. 54  Vo avilea te ajutil le Israelos, lesco slujitoro. Cărdea cadaia caște sicavel că ci bâstărdea peschi promisiunea te sicavel mila 55  anda sea o timpo caring o Avraam hai lesche șiave, cadea sar phendea amare phurenghe”. 56  Hai i Maria așilea la Elisabetasa cam trin șiona, pala codoia gălea parpale chăre. 57  Hai avilea o timpo ca i Elisabeta te năștil; voi cărdea ieche șiavorres. 58  Le vecini hai lache neamuri așunde anda i bari mila cai sicadea-la lache o Iehova hai von bucurisarde-pe lasa. 59  Ando ohto-to ghies, von avile te șinen împrejur le șiavorres* hai camenas te șion lesche o anav lesche dadesco, Zaharia. 60  Tha leschi dei phendea: „Na! Va bușiola Ioan”. 61  Atunci von phende lache: „Chanicas anda chio neamo nai-les cado anav”. 62  Pala codoia, von cărde semnea le vastența caște pușen lesche dades so anav camelas te șiol le șiavorresche. 63  Vo manglea iech tăblița hai scriisardea: „Ioan si lesco anav”. Hai savore așile uimime. 64  Pe thaneste, lesco mui pâtărdilea, leschi șib dea-pe drom hai vo astardea te del duma hai așarelas le Devles. 65  Savore cai beșenas pașa lende daraile, hai ande sea o than plainalo anda Iudeea astardea te del-pe duma anda cadala buchia. 66  Hai savore cai așunenas cadala buchia încărenas-len ande pengo ilo hai pușenas-pe: „So va arăsăla cado șiavorro?”. Că o vast le Iehovasco sas-lo ciaces lesa. 67  Atunci o Zaharia, lesco dad, pherdilea le spiritosa sfânto le Devlesco hai astardea te phenel le dumes cai avenas le Devlestar: 68  „Așardo te avel o Iehova, o Del le Israelosco, anda codoia că vo dichlea caring pesco poporo hai scăpisardea-les! 69  Vo dea amen iech zuralo salvatoro ando chăr le Davidosco, lesco slujitoro, 70  cadea sar phendea prin pesche profeți* sfinți andal purane ghiesa, 71  că va salvila amen amare dușmanendar hai anda o vast savorengo cai urân amen. 72  Vo cărdea cadaia caște sicavel mila, cadea sar phendea amare phurenghe, hai caște sicavel că ci bâstărdea pesco solaharimos sfânto. 73  O Del va anela pesche amintea catar i promisiunea cai solahardea-la amare paposche o Avraam. 74  Prin cado solaharimos, pala so va scăpila amen andal vast le dușmanenghe, vo va dela amen i bari pachiv te cheras anda leste iech buchi sfânto bi daraco, 75  bi doșaco hai anda o sasto ilo angla leste, ande sea amare ghiesa. 76  Hai tu, șiavorreia, tu va avela te aves o profeto Codolesco o Mai Baro, că tu va avela te jias angla o Iehova caște lașiares lesco drom, 77  caște cheres prinjiando lesche poporosche că va avela salvime cana lenghe păcatea va avena iertime, 78  prin i bari mila amare Devleschi. Prin cadai mila, va avela te dichas iech lumina anda o cerii cai strălucil sar o cham cai vazdel-pe de teharin 79  caște cherel lumina opral codola cai beșen ando tunearico hai andi ușial le merimaschi hai caște îngărel amare pânre po drom la paceaco”. 80  O șiavorro barilea hai cărdilea zuralo ando spirito. Hai vo beșlea mai dur ando șuco than ji ando ghies cana sicadea-pe le Israelosche.

Note de subsol

^ Sau „o zuralimos le Devlesco”. Dich o Dicționaro.
^ Sau „va acoperila”.
^ Sau „umbra”.
^ Sau „huclea”.
^ Sau „mânro sufleto”. Dich o Dicționaro.
^ Lit. „catar iech generația ca aver”. Butivar i duma „generația” referil-pe ca-l manușa de diferime bărșa cai traisarde ande sa codo timpo.
^ Sau „te cheren le șiavorresche i circumcizia”.

Le drepturi de autor anda cadai publicația