Pala o Luca 10:1-42

  • O Isus bișialel codolen 70 (1-12)

  • Vai le forurendar cai ci sicaven că fal-len nasul anda lenghe păcatea (13-16)

  • Codola 70 risaren-pe parpale (17-20)

  • O Isus așarel le Dades anda codoia că sicavel lașimos codolenghe umili (21-24)

  • I pilda anda o lașio samariteano (25-37)

  • O Isus jial ca i Marta hai ca i Maria (38-42)

10  Pala sea cadala, o Rai alosardea aver 70 discipoli hai bișialdea-len dui po dui caște jian angla leste, ande fiesavo foro hai ande fiesavo than cai avelas te jial vo. 2  Hai vo phendea lenghe: „Da, i recolta cai trebul chidini si bari, tha codola cai cheren buchi si țâra. Anda codoia, manghen le Raiestar saveschi si i phuv te bișialel manușen caște avel chidini i recolta”. 3  Jian! Dichta că bișialav tumen sar le bacrișen ando mașcar le ruvengo. 4  Te na len tumența nici gonorro* lovența, nici traista habeneschi, nici sandale, hai po drom te na den ghies lașio chanicas. 5  Ande orisavo chăr jian andre, te phenen mai anglal: «I pacea te avel cadale chăresa!». 6  Hai, dacă code si iech manuș cai iubil i pacea*, tumari pacea te așel opral leste. Tha, dacă ci silo, tumari pacea te risarel-pe parpale tumende. 7  Te așen ande codo chăr, hai te han hai te pien so va dela-pe tumenghe, că codo cai cherel buchi meritil pesco pochinimos. Te na jian anda iech chăr ande aver. 8  Sa cadea, cana jian andre ande iech foro hai san primime, te han so si șiuto angla tumende, 9  te sastiaren le nasfalen de othar hai te phenen: «O Regato le Devlesco pașilea tumendar». 10  Tha, cana jian andre ande iech foro hai ci san primime, te înclen pe lesche bare droma hai te phenen: 11  «Chiar vi o prafo cai șiutea-pe pe amare pânre anda tumaro foro, maras-les tele angla tumende. Tha te jianen că o Regato le Devlesco pașilea». 12  Me phenav tumenghe că ande codo ghies va avela mai ușoro anda i Sodoma sar anda codo foro. 13  „Vai tutar, Corazin! Vai tutar, Betsaida! Dacă le miracolea cai sas cărde ande tumende avenas cărde ando Tiro hai ando Sidono, le manușa de othar avenas deja de but timpo hureade ando gono* hai beșenas ando uciar* caște sicaven că fal-len nasul anda lenghe păcatea*. 14  Anda codoia, ca i judecata va avela mai ușoro anda o Tiro hai anda o Sidono sar anda tumende. 15  Hai tu, Capernaum, va avela te aves vazdino ji opre co cerii? Na, va avela te jias tele ji ando Mormânto*! 16  Con așunel tumen va așunela vi man. Hai con ci sicavel tumenghe pachiv ci sicavel pachiv nici manghe. Hai codo cai ci sicavel manghe pachiv ci sicavel pachiv nici Codolesche cai bișialdea man”. 17  Codola 70 risaile parpale pherde bucuria hai phenenas: „Raia, chiar vi le benga așunen amendar cana folosisaras chio anav”. 18  Atunci vo phendea lenghe: „Dichav le Satanos sar pelea tele deja anda o cerii sar o fulgero. 19  Dichta că dem tumen zuralimos te uștaren ande pânrănde sapa hai scorpioni hai dem tumen zuralimos caște așen contra o dușmano. Chanci ci va cherela tumenghe nasul. 20  Cu sea cadala, te na bucurin tumen că le spiritea neuje* așunen tumendar, tha bucurin tumen că tumare anava sile scriime andel ceruri”. 21  Atunci o spirito sfânto le Devlesco* cărdea le Isusos te avel zurales bucurime hai phendea: „Așarav tut angla savore, Dade, o Rai le cerosco hai la phuveaco, anda codoia că garadean mișto cadala buchia le manușendar sicade hai codolendar goghiaver hai cărdean-len prinjiande le șiavorrenghe! Da, Dade, anda codoia că tu camlean te avel cadea. 22  Sea le buchia sas manghe dine mânre Dadestar. Chonic ci jianel con si o Șiavo avreal o Dad hai chonic ci jianel con si o Dad avreal o Șiavo hai codo casche o Șiavo camel te cherel-les prinjiando”. 23  Pala codoia risailea caring le discipoli hai phendea numai lenghe: „Fericime si le iacha cai dichen le buchia cai dichen-len tumen! 24  Că me phenav tumenghe că but profeți* hai regi camle te dichen le buchia cai dichen-len tumen, tha ci dichle-len, hai te așunen le buchia cai așunen-len tumen, tha ci așunde-len”. 25  Hai dichta că iech manuș cai prinjianelas zurales mișto i Legea vazdea-pe ande pânrănde caște șiol-les co zumaimos hai pușlea: „Sicaitorina, so trebul te cherav caște avel man viața veșnico?”. 26  O Isus phendea lesche: „So si scriime andi Legea? So hachiardean anda so citisardean?”. 27  Vo phendea lesche: „«Te iubis le Iehovas, chio Del, sea che ilesa, sea chia viațasa*, sea che zuralimasa hai sea chia goghiasa» hai «che pașardes cadea sar tut»”. 28  O Isus phendea lesche: „Mișto phendean. Cher mai dur cadea hai va avela te primis viața”. 29  Tha, anda codoia că camelas te sicavel că silo orta, o manuș phendea le Isusosche: „Hai con si mânro pașardo?”. 30  O Isus phendea lesche: „Iech manuș gălea tele catar o Ierusalimo hai jialas caring o Ierihono. Po drom chichiva cior astarde-les, line lesco hureaimos, marde-les hai pala codoia tiliarde, hai mechle-les pe dipaș mulo. 31  Chiar atunci pe codo drom jialas tele iech rașai, tha, cana dichlea codole manușes, vo nachlea pi coaver rig le dromeschi hai gălea mai dur. 32  Sa cadea, iech levito*, cana arăslea code hai dichlea-les, nachlea pi coaver rig le dromeschi hai gălea mai dur. 33  Tha, cana iech samariteano cai jialas pe codo drom arăslea leste hai dichlea-les, cărdilea lesche mila lestar. 34  Vo pașilea lestar, șiordea uleio hai mol pe lesche răni hai phanglea-len. Pala codoia șiutea-les pe pesco animalo, îngărdea-les ca iech chăr* hai lea sama lestar. 35  O duito ghies încaladea dui dinari, dea-len codolesche casco sas o chăr hai phendea lesche: «Le sama lestar, hai oriso va mai avela te cheres anda leste, pochinav tuche cana avav parpale». 36  Savo mașcar cadala trin pachias că sicadea că si o pașardo le manușesco saves astarde-les le cior?”. 37  Vo phendea: „Codo cai sicadea lesche mila”. Atunci o Isus phendea lesche: „Jia hai cher vi tu sa cadea”. 38  Von găle mai dur pe pengo drom hai arăsle ande iech gav. Cade, iech jiuvli cai bușiolas Marta achardea le Isusos te hal ande laco chăr. 39  Cadala sas-la vi iech phei, cai bușiolas Maria. Voi șiutea-pe te beșel ca le pânre le Raiesche hai așunelas so phenelas vo. 40  Tha i goghi la Martachi așelas ca le but buchia cai trebulas te cherel-len. Atunci voi gălea leste hai phendea: „Raia, ci diches că mânri phei mechlea man te cherav sea le buchia corcori? Phen lache te avel te ajutil man”. 41  O Rai phendea lache: „Marta, Marta, tu gândis tut hai chiniares tut anda but buchia. 42  Tha numai țâra buchia trebun amenghe, arăsăl vi numai iech corcori. I Maria alosardea i mai lași buchi hai cadaia ci va avela lini latar”.

Note de subsol

^ Sau „punga”.
^ Lit. „șiavo la paceaco”.
^ Sau „pânza goneschi”, „pânza de sac”.
^ Sau „cenușa”.
^ Sau „caște căin-pe”, „caște sicaven căința”. Dich o Dicționaro.
^ Sau „Hades”. Dich o Dicționaro.
^ Sau „benga”.
^ Sau „o zuralimos le Devlesco”. Dich o Dicționaro.
^ Lit. „sea che sufletosa”. Dich o Dicționaro.
^ Cado sas iech chăr cai le manușa cai phirenas po droma, daștinas te pochinen iech camera caște soven iech riat sau mai but.

Le drepturi de autor anda cadai publicația