Pala o Luca 22:1-71

  • Le bare rașaia cheren sfato mașcar pende anda sar te mudaren le Isusos (1-6)

  • Pregătiri anda i palutni Patraghi (7-13)

  • O Isus încărel i iechto data i meseili cai anel amenghe amintea lesche merimastar (14-20)

  • „Codo cai va bichinela man silo manța ca i meseili” (21-23)

  • Le discipoli han-pe anda con si o mai baro (24-27)

  • O solaharimos le Isusosco anda iech regato (28-30)

  • O Isus phenel de mai anglal că o Petru va phenela că ci prinjianel-les (31-34)

  • Trebul te avas pregătime; dui săbii (35-38)

  • O Isus manghel-pe le Devlesche po plain le Măslinengo (39-46)

  • O Isus silo astardo (47-53)

  • O Petru phenel că ci prinjianel le Isusos (54-62)

  • O Isus silo prasado le manușendar (63-65)

  • O Isus silo judechime angla o Sanhedrino (66-71)

22  I Sărbătoarea le Manrenghi* Nedospime, cai bușiol Patraghi, pașiolas. 2  Le bare rașaia hai le sicaitori la Legeache* cărde sfato mașcar pende anda sar te mudaren-les, tha daranas le manușendar. 3  Atunci o Satan gălea andre ando Iuda, codo cai bușiolas Iscariot, iech mașcar le Deșudui. 4  Cado gălea ca le bare rașaia hai ca le ofițeri tela savengo vast sas le gărzi catar o templo hai dea duma lența caște del-les ande lenghe vast. 5  Von bucurisarde-pe hai hachiarde-pe te den-les love rupune. 6  O Iuda camlea te cherel cadai buchi hai astardea te rodel cana avelas mai mișto te del-les ande lenghe vast bi te aven but manușa pașa leste. 7  Pala codoia avilea o ghies le Manrengo Nedospime, cana trebulas te avel dini i jertfa la Patraghiachi. 8  O Isus bișialdea le Petros hai le Ioanos hai phendea lenghe: „Jian hai pregătin amenghe i meseili la Patraghiachi caște has”. 9  Von pușle-les: „Cai cames te pregătisaras-la?”. 10  Vo phendea lenghe: „Dichta, cana va jiana andre ando foro va avela angla tumende iech manuș cai îngărel iech vaso paiesco. Jian pala leste ji co chăr cai va jiala andre. 11  Hai te phenen le manușesche casco si o chăr: «O Sicaitoro phenel: „Cai si i camera ande savi daștiv te hav i Patraghi mânre discipolența?”». 12  Codo manuș va sicavela tumenghe iech bari camera de opral, ande savi si sea so trebul. Te pregătin i meseili la Patraghiachi code”. 13  Von tiliarde hai arachle sea le buchia cadea sar phendea lenghe vo hai pregătisarde-pe anda i Patraghi. 14  Cana avilea o ceaso, vo șiutea-pe ca i meseili le apostolența. 15  Hai phendea lenghe: „Camlem but te hav tumența cado haben la Patraghiaco angla so te nachav prin bare ducha, 16  anda codoia că phenav tumenghe: Ci va mai avela te hav cado haben ji cana sea le buchia ci va pherena-pe ando Regato le Devlesco”. 17  Hai, pala so sas lesche dino iech paharo, andea mulțumiri hai phendea: „Len-les hai den-les vast vastestar, 18  anda codoia că phenav tumenghe: De acanara angle ci va mai avela te piav mol ji cana ci va avela o Regato le Devlesco”. 19  Sa cadea, lea iech manro, andea mulțumiri, phaglea-les hai dea-les lenghe, hai phendea: „Cado si* mânro corpo, cai va avela dino anda tumende. Cheren mai dur cadai buchi caște anen tumenghe amintea mandar”. 20  Pala so hale, cărdea sa cadea le paharosa, hai phendea: „Cado paharo si o nevo solaharimos, cai astarel cana mânro rat va avela șiordo ande tumaro miștimos. 21  Tha dichta că codo cai va bichinela man silo manța ca i meseili. 22  Anda codoia că ciaces, o Șiavo le manușesco jial pesche, cadea sar sas phendo de mai anglal, tha vai le manușestar prin savo silo vo bichindo!”. 23  Atunci von astarde te den duma mașcar pende savo anda lende daștilas te cherel cadai buchi. 24  Tha hanas-pe vi anda savo mașcar lende si o mai baro. 25  Cadea că, vo phendea lenghe: „Le regi le themenghe rain opral lende hai codola cai silen zuralimos opral lende sile prinjiande sar manușa cai cheren lașimos averenghe. 26  Tha tumen te na aven cadea. Mai mișto, codo cai si o mai baro mașcar tumende te avel sar codo o mai tărno hai codo cai silo angla tumende, sar codo cai slujil. 27  Con si o mai baro: codo cai beșel ca i meseili sau codo cai slujil averenghe? Na codo cai beșel ca i meseili? Tha me som mașcar tumende sar codo cai slujil tumenghe. 28  Cu sea cadala, tumen san codola cai așilean pașa mande ande sea mânre pharimata prin save nachlem. 29  Me cherav tumența iech solaharimos, cadea sar mânro Dad cărdea manța iech solaharimos, anda iech regato, 30  caște han hai te pien ca mânri meseili, ande mânro Regato, hai te beșen po tronuri caște judechin le 12 triburi le Israelosche. 31  Simon, Simon, dichta că o Satan camel te cherel tumența cadea sar cherel iech manuș cana ujiarel o ghiv. 32  Tha, me cărdem manglimata zurale le Devlesche anda tute, te na hasares chio pachiamos. Hai tu, cana va avela te risares tut parpale, te zuriares che phralen!”. 33  Atunci o Petru phendea lesche: „Raia, som gata te jiav tusa vi ando phandaimos hai vi te merav tusa”. 34  Tha vo phendea: „Petru, me phenav tuche că ci va ghilabela aghies o bașno* ji cana ci va avela te phenes trin-var că ci prinjianes man”. 35  Hai vo mai phendea lenghe: „Cana bișialdem tumen bi te len tumența iech gonorro lovența*, iech traista habeneschi hai sandale, lipsosardea tumenghe vareso?”. Von phende: „Nici”. 36  Atunci vo phendea lenghe: „Tha acana, cas si iech gonorro lovența te lel-les hai, sa cadea, cas si iech traista habeneschi te lel-la; hai cas nai-les iech sabia te bichinel pesco hureaimos hai te chinel pesche iech. 37  Me phenav tumenghe că so si scriime anda mande trebul te pherel-pe: «Vo sas-lo ghindo mașcar codola cai uștaren i legea». Mai but, cadala dumes cai sile scriime anda mande pheren-pe acana”. 38  Atunci von phende: „Raia dichta, cade si dui săbii!”. Vo phendea lenghe: „Arăsăn”. 39  Pala codoia tiliardea, hai cadea sar cherelas sea o timpo, gălea po Plain le Măslinengo, hai le discipoli găle pala leste. 40  Cana arăsle code, phendea lenghe: „Manghen tumen mai dur le Devlesche, caște na peren ando athaimos!”. 41  Hai duriardea-pe lendar iech țâra*, dea cianga hai astardea te manghel-pe le Devlesche 42  hai phendea: „Dade, dacă cames, duriar mandar cado paharo! Cu sea cadala, te na avel cadea sar camav me, tha cadea sar cames tu!” 43  Atunci iech îngero avilea anda o cerii, sicadea-pe lesche hai zuriardea-les. 44  Tha vo sas-lo cadea de duchado, că vi mai dur manglea-pe le Devlesche anda sea o ilo, hai le paia pa lesco mui cărdile sar o rat, cai perenas pi phuv. 45  Pala so manglea-pe le Devlesche, o Isus vazdea-pe opre, gălea ca le discipoli hai arachlea-len sar sovenas, că sas-le chine anda codoia că sas-le perade. 46  Hai phendea lenghe: „Sostar soven? Uștien opre hai manghen tumen le Devlesche sea o timpo, caște na peren ando athaimos!”. 47  Ando timpo so vo delas duma, dichta că avile but manușa hai angla lende jialas codo cai bușiolas Iuda, iech mașcar le Deșudui. Vo pașilea le Isusostar caște ciumidel-les. 48  Tha o Isus phendea lesche: „Iuda, bichines le Șiaves le manușesco ieche ciumidimasa?”. 49  Cana hachiarde so avelas te întâmplol-pe, codola de pașa leste phende: „Raia, te vazdas i sabia caring lende?”. 50  Iech mașcar lende lea peschi sabia hai șindea o can le sclavosco cai sas-lo bișialdo le bare rașaiestar. 51  Tha o Isus phendea: „Arăsăl!”. Hai șiutea o vast pe lesco can hai sastiardea-les. 52  Atunci o Isus phendea le bare rașaienghe, le ofițerenghe tela savengo vast sas le gărzi catar o templo hai le phurenghe cai avile te astaren-les: „Avilean pala mande le săbiența hai le rovlianța sar pala iech baro cior? 53  Cana somas ande fiesavo ghies tumența ando templo ci șiutean o vast pe mande. Tha cado si tumaro ceaso hai o timpo ca codola cai sile ando tunearico te sicaven pengo zuralimos”. 54  Atunci astarde-les hai line-les de othar, hai îngărde-les co chăr le bare rașaiesco; o Petru jialas pala leste de durial. 55  Von cărde iech iag ando mașcar la bareaco hai șiute-pe te beșen tele savore ande iech than. O Petru beșelas mașcar lende. 56  Tha iech mașcar le jiuvlea cai cherelas buchi code ando chăr dichlea-les sar beșelas pașa i iag; dichlea orta caring leste hai phendea: „Vi cado manuș sas-lo lesa!”. 57  Tha vo phendea lache: „Ci prinjianav-les, juvlie!”. 58  Pala iech țâra timpo dichlea-les aver varecon hai phendea: „Vi tu san iech mașcar lende!”. Tha o Petru phendea: „Manușa, me ci som!”. 59  Pala so nachlea cam iech ceaso, aver manuș astardea te phenel zorasa: „Jianav ciaces, vi cado manuș sas-lo lesa, anda codoia că si galileeano!”. 60  Tha o Petru phendea: „Manușa, ci jianav so phenes!”. Hai pe thaneste, cana încă vo delas duma, ghilabadea o bașno. 61  Atunci o Rai risardea-pe hai dichlea orta caring o Petru, hai o Petru andea pesche amintea so phendea lesche o Rai: „Angla te ghilabel aghies o bașno, va avela te phenes trin-var că ci prinjianes man”. 62  Hai gălea avri hai astardea te rovel cărche asfența. 63  Le manușa cai păzinas le Isusos astarde te asan lestar hai te den-les dab. 64  Von pachiarde* lesco mui hai pușenas-les: „Dacă san profeto*, phen amenghe, con dea tut dab?”. 65  Hai phende but aver dumes jiungale contra o Isus prin save cușle le Devles*. 66  Cana cărdilea ghies, chidine-pe ande iech than le phure le themesche, adică le bare rașaia hai le sicaitori la Legeache. Von îngărde-les angla o Sanhedrino* hai phende: 67  „Dacă tu san o Cristoso, phen amenghe!”. Tha vo phendea lenghe: „Vi dacă phenav tumenghe, nici cadea ci pachian. 68  Hai dacă pușiav tumen, ci phenen manghe parpale chanci. 69  Cu sea cadala, de acanara angle, o Șiavo le manușesco va beșela ca i ciaci rig pherdi zuralimos le Devleschi”. 70  Cadea că savore pușle-les: „Atunci, san tu o Șiavo le Devlesco?”. Vo phendea lenghe: „Chiar tumen phenen-la tumare mosa că som”. 71  Von phende: „Sostar te mai rodas aver martori? Că chiar amen așundeam le dumes anda lesco mui”.

Note de subsol

^ Sau „Turte”.
^ Lit. „scribi”.
^ I duma grecisco „si” cade însemnol „reprezentil” sau „si iech simbolo”.
^ Sau „cocoș”.
^ Sau „pusuchi”.
^ Sau „ca iech șiudimos ieche barresco”.
^ Sau „acoperisarde”.
^ Lit. „blasfemia”. Referil-pe ca le dumes nasul sau jiungale phende caring o Del sau le buchia sfânto.
^ Cado sas o mai baro tribunalo le iudeiengo cai arachelas-pe ando Ierusalimo. Dich o Dicționaro.

Le drepturi de autor anda cadai publicația