Pala o Luca 2:1-52

  • Sar cărdilea o Isus (1-7)

  • Le îngeri sicaven-pe angla le păstori (8-20)

  • O șinimos împrejur hai o ujiarimos (21-24)

  • O Simeon dichel le Cristosos (25-35)

  • I Ana del duma anda o șiavorro (36-38)

  • O Iosif hai leschi familia risaren-pe parpale ando Nazareto (39, 40)

  • O Isus ando templo cana sas-les 12 bărșa (41-52)

2  Ande codola ghiesa, o Cezar August dea iech decreto ca savore manușa te aven ghinde hai lenghe anava te aven scriime andel lila*. 2  (I iechto data cana sas cărdi cadai buchi, sas cana o Quirinius railas sar guvernatoro andi Siria.) 3  Hai savore manușa găle te aven scriime andel lila, fiesavo ando foro cai cărdilea. 4  Cadea că, vi o Iosif tiliardea andai Galileea, anda o foro Nazareto, hai gălea caring i Iudeea, ando foro le Davidosco, cai bușiol Betleemo, că vo țârdelas-pe anda o chăr hai o neamo le Davidosco. 5  Vo gălea caște avel scriime andel lila ande iech than la Mariasa, cai sas deja leschi rromni hai acana sas-li pașă te cherel le șiavorres. 6  Cana sas-le code, avilea o timpo ca voi te năștil. 7  Hai voi cărdea pesche șiavorres, laco iechto șiavorro; pachiardea-les ando pohtan* hai șiutea-les te sovel ando than cai hanas le animalea*, anda codoia că ci mai arachle iech than cai te soven. 8  Ande codo than sas chichiva păstori cai trainas avri po câmpo hai lenas sama penghe bacreandar ande fiesavi riat. 9  De iech data, o îngero le Iehovasco sicadea-pe angla lende hai iech bari lumina cai avelas le Iehovastar* strălucisardea mașcar lende, hai von daraile zurales but. 10  Tha o îngero phendea lenghe: „Na daran, că dichta, avilem te phenav tumenghe iech vestea lași, cai va anela iech bari bucuria sea le manușenghe. 11  Aghies cărdilea tumenghe ando foro le Davidosco iech salvatoro, cai si o Cristoso* o Rai. 12  Cadea va jianena că vo si: va arachena iech șiavorro pachiardo ando pohtan hai cai sovel ando than cai han le animalea”. 13  De iech data, pașa o îngero avile but aver îngeri anda o cerii*, cai așarenas le Devles hai phenenas: 14  „Te avel dini iech bari pachiv* le Devlesche ando cerii hai pacea pi phuv mașcar le manușa cai vo dichel-len lașe iachența!”. 15  Cana le îngeri tiliarde lendar hai găle parpale ando cerii, le păstori astarde te phenen iech averesche: „Aven te jias sigo co Betleemo te dichas so întâmplosardea-pe code, cadea sar phendea amenghe o Iehova”. 16  Cadea că, von găle sigo code hai arachle la Maria, le Iosifos hai le țânorres, cai sovelas ando than cai hanas le animalea. 17  Cana dichle cadaia, cărde lenghe prinjiando sea so sas lenghe phendo anda o șiavorro. 18  Savore cai așunenas so phenenas le păstori așenas uimime, 19  tha i Maria încărelas ande peschi goghi sea cadala dumes hai gândilas-pe lende ande laco ilo. 20  Pala codoia, le păstori risaile parpale, denas iech bari pachiv le Devlesche hai așarenas-les că sea le buchia cai așunde-len hai dichle-len sicade că so sas lenghe phendo sas ciaces. 21  Pala ohto ghiesa, cana avilea o timpo ca o șiavorro te avel șindo împrejur*, sas lesche șiuto o anav Isus, anav cai sas lesche dino le îngerostar angla ca i Maria te așel phari. 22  Sa cadea, cana avile le ghiesa caște ujiaren-pe pala i Legea le Moiseschi, von îngărde-les opre co Ierusalimo caște sicaven-les le Iehovasche, 23  cadea sar si scriime andi Legea le Iehovaschi: „O iechto șiavorro cai cărdiol murș te avel numime sfânto anda o Iehova”. 24  Hai andine sar jertfa cadea sar phenel i Legea le Iehovaschi: „dui bare porumbei sau dui țânorre porumbei chăresche”. 25  Hai dichta că ando Ierusalimo sas iech manuș po anav Simeon. Cado manuș sas-lo orta hai daralas le Devlestar. Vo ajucărelas o timpo cana o Del va zuriarela o Israelo, hai o spirito sfânto le Devlesco* sas-lo opral leste. 26  Mai but, o Del sicadea lesche prin o spirito sfânto că ci va merela angla te dichel le Cristosos, Codo alosardo le Iehovastar. 27  Tela o zuralimos le spiritosco, vo avilea co templo. Cana o dad hai i dei le Isusoschi andine-les co templo caște cheren anda leste so manghelas i Legea, 28  o Simeon lea le țâne șiavorres andi angali hai așardea le Devles hai phendea: 29  „Devla tu san o mai Baro Rai, acana chio sclavo daștil te merel andi pacea, cadea sar phendean, 30  anda codoia că mânre iacha dichle prin caste va avela te anes i salvarea, 31  saves tu bișialdean-les caște avel dichlo savore manușendar. 32  Vo si iech lumina cai pâtrel le iacha le manușenghe anda aver neamuri hai vo va avela baro mașcar chio poporo*, Israel”. 33  O dad hai i dei le șiavorreschi așenas uimime le buchiandar cai phenenas-pe anda leste. 34  O Simeon binecuvântisardea-len hai pala codoia phendea caring i Maria, i dei le șiavorreschi: „Dichta că cado șiavorro va cherela bute jenen anda o Israelo te peren sau te aven vazdine opre hai va avela iech semno contra savo va dela-pe duma 35  (da, iech bari sabia va șinela chio ilo*), caște aven sicade le gânduri anda but ile”. 36  Code sas vi iech profetesa, i Ana, i șei le Fanueloschi, anda o neamo le Așerosco. Cadai jiuvli sas-li phuri; pala so lea-pe pesche rromesa voi beșlea lesa efta bărșa 37  hai pala codoia așilea phivli. Acana sas-la 84 bărșa. Voi jialas sea o timpo co templo, hai ghies hai riat, voi cherelas iech buchi sfânto anda o Del, încărelas posto hai cherelas manglimata le Devlesche. 38  Chiar ande codo ceaso, voi pașilea lendar, andea mulțumiri le Devlesche hai astardea te del duma anda o șiavorro savorenghe cai ajucărenas ca o Ierusalimo te avel scăpime. 39  Pala so cărde sea le buchia cai manghelas-len i Legea le Iehovaschi, von găle parpale andi Galileea, ande lengo foro, ando Nazareto. 40  Hai o șiavorro bariolas hai cărdiolas sea mai zuralo, pherdiolas goghiaverimasa hai o lașimos le Devlesco sas opral leste. 41  Lesco dad hai leschi dei jianas ande fiesavo bărș co Ierusalimo anda i sărbătoarea la Patraghiachi. 42  Cana les sas-les 12 bărșa, von găle opre cadea sar cherenas de fiesavi data cana sas i sărbătoarea. 43  Cana le ghiesa andai sărbătoarea nachle, von tiliarde caring chăre. Tha o tărno Isus așilea ando Ierusalimo, bi te jianen lesco dad hai leschi dei. 44  Anda codoia că pachianas că silo mașcar le manușa cai jianas lența po drom, von găle pe pânrănde iech sasto ghies; pala codoia, astarde te roden-les mașcar le neamuri hai le prinjiande. 45  Tha anda codoia că ci arachle-les, von risarde-pe parpale co Ierusalimo hai rodine-les peste sea. 46  Pala trin ghiesa, von arachle-les ando templo, sar beșelas tele mașcar le sicaitori, așunelas-len hai șiolas lenghe pușimata. 47  Savore cai așunenas-les așenas uimime cana dichenas sar hachiarelas le buchia hai so phenelas. 48  Cana dichle-les, lesco dad hai leschi dei așile uimime. Atunci leschi dei phendea lesche: „Șavorreia, sostar phiradean tut cadea amența? Dichta că me hai chio dad daraileam zurales hai rodeam tut but”. 49  Tha vo phendea lenghe: „Sostar rodean man? Ci jianglean că trebul te avav ando chăr mânre Dadesco?”. 50  Tha von ci hachiarde so phendea lenghe. 51  Pala codoia, vo gălea tele lența, risailea parpale co Nazareto hai așundea vi mai dur lendar. Leschi dei garavelas sea cadala dumes ande laco ilo. 52  Hai o Isus bariolas, cărdiolas sea mai goghiaver hai arăslea te avel mișto dichlo andel iacha le Devlesche hai le manușenghe.

Note de subsol

^ Daștil-pe că cadai buchi cherelas-pe caște jianel-pe sode manușa sas code, caște pochinen le taxe hai caște aven acharde andi armata.
^ Sau „pânza”.
^ Lit. „ieslea”.
^ Lit. „i gloria le Iehovaschi”.
^ Sau „Mesia”, „Codo Machlo”.
^ Lit. „iech mulțimea andai armata cerisco”.
^ Lit. „gloria”.
^ Sau „te cheren le șiavorresche i circumcizia”.
^ Sau „o zuralimos le Devlesco”. Dich o Dicționaro.
^ Lit. „iech gloria anda chio poporo”.
^ Lit. „sufleto”. Dich o Dicționaro.

Le drepturi de autor anda cadai publicația