Pala o Luca 17:1-37
17 Atunci vo phendea pesche discipolenghe: „Na-i sar te na aven manușa cai cheren averen te hasaren pengo pachiamos. Tha vai codolestar cai cherel averes te hasarel pesco pachiamos!
2 Avelas mai mișto anda leste te șiol-pe ca leschi cor iech barr asavesco* hai te avel șiudino andi marea sar te cherel ieches mașcar cadala țânorre te hasarel pesco pachiamos.
3 Len sama mișto tumendar! Dacă chio phral cherel iech păcato, ortosar-les hai, dacă fal-les nasul anda lesco păcato*, iertisar-les.
4 Chiar cana păcătuil angla tute efta-var po ghies hai risarel-pe parpale tute efta-var, hai phenel: «Fal man nasul anda mânro păcato», te iertis-les”.
5 Le apostoli phende le Raiesche: „De amen mai but pachiamos!”.
6 Atunci o Rai phendea: „Dacă si tumen pachiamos sar iech cuchin muștareschi*, va phenena cadale caștesche*: «Încalav tut avri andai phuv hai șiu che rădăcini andi marea» hai vo va așunela tumen.
7 Dacă ieches mașcar tumende siles iech sclavo cai cherel buchi i phuv sau lel sama le bacreandar, va phenela vo le sclavosche cana cado risarel-pe parpale pa o câmpo: «Av sigo cade hai beș tele ca i meseili»?
8 Ci va phenela lesche mai sigo: «Cher manghe vareso te hav, phande o șorțo ca chio mașcar hai slujisar manghe ji cana me hav hai piav hai pala codoia daștis te has hai te pies vi tu»?
9 Va așarela vo le sclavos anda codoia că cărdea so sas lesche phendo?
10 Sa cadea vi tumen, cana va cherena sea le buchia cai sas tumenghe dine te cheren, te phenen: «Sam numai niște sclavi, ci meritisaras chanci. Cărdeam so trebuisardea te cheras»”.
11 Pe pesco drom caring o Ierusalimo, o Isus nachlea mașcar i Samaria hai i Galileea.
12 Hai sar jialas andre ande iech gav, avile angla leste deș manușa cai sas-len lepra*, hai beșenas dur lestar.
13 Von dine cingar: „Isus, Sicaitorina, sicav amenghe mila!”.
14 Cana dichlea-len, vo phendea lenghe: „Jian hai sicaven tumen le rașaienghe”. Hai, ando timpo so jianas po drom, sas-le ujiarde catar i lepra.
15 Cana dichlea că sas-lo sastiardo, iech mașcar lende risailea parpale, hai delas iech bari pachiv* le Devlesche voceasa zurali.
16 Hai pelea le mosa ca i phuv ca le pânre le Isusosche, hai mulțumisardea lesche. Vo sas samariteano.
17 Atunci o Isus phendea: „Ci sas ujiarde sea le deș jene? Cai si le coaver enia jene?
18 Ci risailea parpale niciech te del pachiv le Devlesche, numai cado manuș anda aver neamo?”.
19 Pala codoia phendea lesche: „Vazde tut opre hai jia! Chio pachiamos sastiardea tut”.
20 Anda codoia că le farisei* pușle-les cana va avela o Regato le Devlesco, vo phendea lenghe parpale: „O Regato le Devlesco ci avel cadea caște avel dichlo savorendar;
21 nici ci va phenela-pe: «Si cade!» sau «Si code!». Că dichta că o Regato le Devlesco si mașcar tumende”.
22 Pala codoia phendea pesche discipolenghe: „Va avela o timpo cana va camena te dichen iech mașcar le ghiesa le Șiavesche le manușesco, tha ci va dichena-les.
23 Le manușa va phenena tumenghe: «Si code!» sau «Si cade!». Te na jian hai te na nașen pala lende.
24 Că, cadea sar i lumina le fulgeroschi cai strălucil po sasto cerii, cadea va avela vi o Șiavo le manușesco ande pesco ghies.
25 Mai anglal trebul te nachel prin but ducha hai te avel urâme le manușendar cai train ande cadala ghiesa*.
26 Vi mai but, cadea sar sas andel ghiesa le Noesche, sa cadea va avela vi andel ghiesa le Șiavesche le manușesco:
27 le manușa hanas hai pienas, le murșa lenas penghe rromnia hai le jiuvlea sas-le dine rromeste, ji ando ghies cana o Noe gălea andre andi arca hai avilea o Potopo hai savore mule.
28 Sa cadea, va avela sar andel ghiesa le Lotosche: le manușa hanas, pienas, chinenas, bichinenas, șionas andi phuv hai vazdenas chăra.
29 Tha, ando ghies cana o Lot înclistea avri andai Sodoma, pelea iag hai sulfo* anda o cerii hai savore mule.
30 Sa cadea va avela vi ando ghies cana o Șiavo le manușesco va sicavela-pe le manușenghe.
31 Ande codo ghies, con si opre po chăr*, tha siles buchia ando chăr, te na avel tele pala lende hai, sa cadea, con si po câmpo te na risarel-pe parpale pala le buchia cai așile-les code.
32 Anen tumenghe amintea la rromniatar le Lotoschi!
33 Că con rodel te salvil peschi viața va hasarela-la, tha con hasarel peschi viața va salvila-la.
34 Phenav tumenghe că ande codoi riat, dui manușa va avena ande iech pato: iech va avela lino, hai o coaver va avela mechlo code.
35 Dui jiuvlea va cherena arro ca sa codo asav*: iech va avela lini hai i coaver va avela mechli code”.
36 ——
37 Atunci von pușle-les: „Cai, Raia?”. Vo phendea lenghe: „Cai si o corpo, code va chidena-pe vi le vulturi*”.
Note de subsol
^ Sau „barr moaraco”.
^ Sau „căil-pe”, „sicavel căința”. Dich o Dicționaro.
^ Sau „bobo muștaresco”.
^ Cado cașt bușiol „dud”.
^ Dich o Dicționaro.
^ Lit. „gloria”.
^ Le farisei sas iech grupo evreiengo zurales religioso cai încărenas fiesavi țâni buchi andai Legea le Devleschi hai cai mai șionas late vi aver reguli.
^ Lit. „cadai generația”.
^ Sau „barra cai thabonas”.
^ Lit. „po acoperișo le chăresco”.
^ Sau „moara”.
^ Lit. „acvile”.
