1. So mangena sa e Devljese sluge hem sose? (Dikh i slika ko početko ando akava časopis.)

O ISUS HRIST pe učenikondže phendža: „Džan hem čeren učenikon ando manuša kotar sa o narodija“ (Mat. 28:19). Sare amen, e Devljese verna sluge, mangaja te sikljova sar šaj potpuno te čera i služba koja tani dindi amendže (2. Tim. 4:5). Džandžola pe, odova delo tano považno, povredno hem pohitno ando bilo so aver so šaj te čera. Ama, dijekh puti šaj te ovel but pharo te dža ki služba odobor kobor bi mangaja.

2. Kola problemija isi amen dži čeraja amari služba?

² Isi hem avera važna buča kola ljena amaro vreme hem snaga. Šaj valjani svako dive te čera but buti te šaj amari porodica te ovel la sa so valjani. Amen šaj isi amen hem avera porodična odgovornostija, ja hijam naborme, šaj hijam ki depresija ja isi amen problemija kova anela o phuripe. Sar šaj potpuno te čera amari služba ko asavke okolnostija?

3. So šaj te sikljova kotar e Isusese lafija kola tane pisime ko Matej 13:23?

³ Ako amare okolnostija na mukhena amen te da sa amendar ki služba odobor kobor bi mangaja, na valjani te ova obeshrabrime. O Isus džandža so našti sare te ana isto plod. (Čitinen Matej 13:23.) O Jehova but cenini odova so čeraja oljese, sa dži daja o najšukar amendar (Jevr. 6:10-12). Ki aver strana, amen šaj osetinaja so amare okolnostija dozvolinena amendže te čera pobuter. Odoljese ko akava članko, ka dikha sar šaj i služba te ovel amendže ko prvo than ko dživdipe, sar šaj te ovel amen jednostavno dživdipe hem sar šaj pošukar te propovedina hem te sikava. Ama, najangljeder te dikha so značini potpuno te čera amari služba?

4. So značini te čera potpuno amari služba?

 ⁴ Te čera potpuno amari služba značini so valjani te propovedina hem te sikava kobor god šaj. Ama, te čera potpuno amari služba na odnosini pe samo kobor vreme amen propovedinaja. E Jehovase tano važno o razlog, sose amen odova čeraja. Amen hijam revna ki amari služba * odoljese so mangaja e Jehova hem amare pašutnen (Mar. 12:30, 31; Kol. 3:23). Te služina e Jehovase celona dušaja značini te da sa amari snaga hem te koristina sa amare sposobnostija ki služba koja čeraja oljese. Ked amen haljovaja so i služba tani čast, tegani amen ka da sa amendar te propovedina.

5-6. Prekalo primer objasnin sar i služba šaj te ovel amendže ko prvo than, čak iako isi amen but obaveze.

⁵ Te zamislina jekhe terne čhave kova mangela te bašalji gitara hem odova čerela ked god isi lje prilika. Ov dobini buti ko jekh kafići hem odothe bašalji ko vikend. Ama, pošto odoljeja so zaradini odothe našti te platini sa o troškija, ov ando ponedeljak pa dži o petak čerela ki kasa ki jekh prodavnica. Iako ki odija prodavnica čerela but buti, o bašaljibe tano odova so najviše mangela. Ov but mangela pana pošukar te bašalji i gitara hem odova te ovel oljesi jedino buti. Odoljese, uživini ki svako prilika ked god šaj te bašalji, pa makar hem hari.

⁶ Isto adžahar, šaj ni amen našti te ova ki služba odobor kobor bi mangaja. Ama, amen mangaja te čera odova. Odoljese, trudinaja amen te ova pana pošukar hem te vačera o šukar haberi te šaj te resa dži e manušengo vilo. Šaj pučeja tut, sar uzo sa odola obaveze i služba ipak šaj te ovel amendže ko prvo than ko amaro dživdipe.

7-8. Sar šaj te oponašina e Isuseso stav premalji služba?

⁷ O Isus ačhadža najšukar primer ando odova savo stav valjani te ovel amen  premalji služba. Oljese i služba hine najvažno buti ko dživdipe (Jov. 4:34, 35). Ov nakhlja but kilometrija te šaj te propovedini so pobuter manušendže. Koristindža svako prilika te vačeri e manušencar, ko oljenge čhera hem ko javna thana. E Isusese i služba hine ko prvo than ko dživdipe.

⁸ Amen šaj te oponašina e Isuse adžahar so kokri arakhaja prilike te vačera o šukar haberi, kuri god hem ked god odova šaj. Spremna hijam te žrtvujina odova soj tano amendže šukar, te šaj te učestvujina ki služba (Mar. 6:31-34; 1. Petr. 2:21). Ki skupština šaj džiko te služini sar specijalno, opšto ja pomoćno pioniri. Avera sikljilje aver čhib ja dželje ko dijekh than kuri isi hari objaviteljija. Ama, najbaro deo ki služba čerena o obaviteljija kola našti te oven pionirija ama čerena najšukar so šaj. Ki bilo savi situacija te ova, o Jehova na rodela amendar pobuter nego li so šaj te da oljese. Ov mangela svako amendar te uživini ki služba dži vačeri o slavno šukar haberi „ando bahtalo Devel“ (1. Tim. 1:11; 5. Moj. 30:11).

9. (a) Sar o apostol Pavle čhidža i služba ko prvo than iako morandilo te čerel buti? (b) So o Čeriba e apostolengo 28:16, 30, 31 vačeri ando Pavleso stav premalji služba?

⁹ E Pavlese i služba hine ko prvo than hem ov ačhadža but šukar primer amendže. Ked hine ko Korint dži trajindža oljeso dujto misionarsko putovanje, na hine lje dovoljno sostar te živini, pa jekh vreme ov čerdža buti adžahar so čerdža šatorija. Ama, odija buti na hine oljese najvažno. Ov čerdža odija buti te šaj te ovel lje odova so valjani oljese hem te šaj te vačeri o šukar haberi e Korintskonendže „bizo te platinen diso“ (2. Kor. 11:7). Iako o Pavle valjandža te čerel buti, ov i dalje čhidža i služba ko prvo than hem odoljese propovedindža svako sabat. Palo odova ked oljese okolnostija promenindže pe, o Pavle šaj hine te del „sa pestar te propovedini o lafi, adžahar so svedočindža e Judejcendže so o Isus tano čače Hrist“ (Čer. 18:3-5; 2. Kor. 11:9). Palo odova, ked ko Rim hine duj berš phanlo ko čher, ov svedočindža okoljendže kola alje te posetinen lje hem pisindža ljila e skupštinendže. (Čitinen Čeriba e apostolengo 28:16, 30, 31.) Na mukhlja ništa te ovel ljese považno kotar služba. Ov pisindža: „Odoljese so isi amen akija služba [...] amen na daja amen“ (2. Kor. 4:1). Isto sar e Pavlestar hem amendar i buti šaj te ljel but vreme, ama i služba paljem šaj te ovel amendže najvažno ko dživdipe.

10-11. Sar šaj potpuno te čera amari služba iako isi amen problemija sastipaja?

¹⁰ Ako našti te propovedina kotar čher ko čher sebepi so hijam phure ja naborme, amen šaj te propovedina ko aver načinja. O prva hrišćanja svuda propovedindže. On koristindže svako prilika te vačeren ando čačipe – kotar čher ko čher, ko javna thana hem neformalno – šaj te phena, kuri god hine manuša (Čer. 17:17; 20:20). Ako našti but te phira, šaj te beša negde kuri ka vačera e manušencar kola nakhena. Ja šaj te svedočina neformalno, te pisina ljila ja te svedočina prekalo telefoni. But objaviteljija kola našti te džan ki služba kotar čher ko čher, odoljese soj tane naborme ja isi ljen avera problemija, paljem osetinena bari radost sose svedočinena ko avera načinja.

¹¹ Čak hem ako hijam naborme, šaj potpuno te čera amari služba. Te dikha pana jekh puti o primer ando apostol Pavle. Ov phendža: „Sa šaj te čerav prekalo okoljeste kova dela man zoraljipe“ (Fil. 4:13). Asavki snaga valjandža ljese ked naborsalo  ko jekh ando poklo misionarsko putovanje. Ov e hrišćanendže ki Galatija pisindža: „Džanena so o prvo puti iako hijum lje nabormo, vačerdžum tumendže o šukar haberi“ (Gal. 4:13). Isto adžahar, šaj hem tu odoljese so hijan nabormo ka ovel tut prilika te vačere o šukar haberi e doktorendže, e medicinsko sestrendže hem averendže. But oljendar nane čhere ked avera objaviteljija džana koro ljende.

12. So značini te ovel amen jednostavno jakh?

¹² O Isus phendža: „I svetiljka ando telo tani i jakh. Odoljese, ako celo tiklji jakh tani bistro [ja „jednostavno“, fusn.], celo toklo telo ka ovel svetlo“ (Mat. 6:22). So manglja te phenel odoljeja? Amaro dživdipe valjani te ovel jednostavno ja te dikha samo ko jekh cilj hem ništa te na ljel amari pažnja odoljestar. O Isus kokri ačhadža primer adžahar so i služba hine ljese ko prvo than. Isto odova sikadža hem pe učenikon so i služba e Jehovase hem oljeso Kraljevstvo valjani te oven ko prvo than. Hem amen ka ova sar o Isus ako i služba ovela amendže ko prvo than ko amaro dživdipe hem ako najangljeder rodaja o kraljevstvo hem e Devljesi pravednost (Mat. 6:33).

13. So ka pomožini amen i služba te ovel amendže ko prvo than?

¹³ Jekh ando načinja sar šaj i služba te ovel amendže ko prvo than tano te na našala amaro vreme ko buča kola nane važna. Amen mangaja te koristina pobuter vreme te pomožina averendže te  pendžaren hem te mangen e Jehova. * Na primer, da li šaj te smanjina o vreme kova trošinaja ki buti te šaj ko radna dive te dža pobuter ki služba? Da li šaj te smanjina o vreme kova trošinaja ki zabava hem rekreacija?

14. So čerdža jekh rom hem i romni te šaj te džan pobuter ki služba?

¹⁴ Odova čerdže o starešina kova vičini pe Elajas hem oljesi romni. Ov vačeri: „Našti hine odma te ova pionirija, ama disostar morandiljam te počmina. Odoljese čerdžam disave tikne buča te šaj te dža pobuter ki služba. Na primer, smanjindžam o troškija, pohari vreme dželo amendže ki zabava hem pučljam e šefe te menini amaro radno vreme. Adžahar šaj hine te dža ki služba ko akšami, te ovel amen pobuter biblijake kursija hem čak duj puča ko masek te dža ki služba ko tereni ko radno dive. Odova hine but šukar!“

15-16. Premalo 1. Timotejese 4:13, 15, sar šaj pana pošukar te ova ki služba? (Dikh hem o okvir „ Ciljija kola ka pomožinen man potpuno te čerav miklji služba.“)

¹⁵ Pana jekh način sar te čera potpuno amari služba tano te ova pošukar ko propovedibe. O manuša kola čerena disavi određeno buti valjani stalno te sikljon te šaj so pobuter te džanen hem pošukar te oven ki pi buti. Hem amen valjani uvek te sikljova sar šaj pana pošukar te ova ki služba (Godž. 1:5; čitinen 1. Timotejese 4:13, 15).

¹⁶ Sar šaj hem ponodri te napredujina ki amari služba? Adžahar so pažljivo ka šuna o savetija kola dobinaja ko sastanko Amaro  hrišćansko dživdipe hem služba. Ko odova sastanko dobinaja korisna savetija kola šaj te pomožinen amen te ova pošukar ki služba. Na primer, ked o predsedavajući dela savet okoljendže kola hine ljen zadatkija, šaj te sikljova diso so ka pomožini amen te ova pošukar ki služba. Odola savetija šaj te primenina ked aver puti ka svedočina nekase. Amen šaj te puča e nadgledniko andi služba te pomožini amen ja te džal amencar ki služba. Ja šaj te dža dijekhe iskusno objaviteljeja, pionireja ja e pokrajinsko nadglednikoja. Sigurno ka uživina ki služba hem ko odova te sikava ako trudinaja amen pana pošukar te koristina amare glavna publikacije e službače.

17. So šaj te očekujine ako potpuno čereja ti služba?

¹⁷ O Jehova mothodža amendže bari čast odoljeja so mukhlja te ova oljese „saradnikija“ (1. Kor. 3:9). Ked amen prosudinaja „soj tano najvažno“ hem ked čhivaja i služba ko prvo than, tegani ka služina „e Jehovase bahtaljipaja“ (Fil. 1:10; Ps. 100:2). Sar e Devljeso sluga, šaj te ove sigurno so ov ka del tut snaga koja valjani tuče te čere potpuno ti služba iako isi tut problemija (2. Kor. 4:1, 7; 6:4). Bilo te šaj te dža ki služba but ja hari, tu ka ovel tut razlog te ove bahtalo ako odova čereja celone viljeja (Gal. 6:4). Ked potpuno čereja ti služba, tu tegani mothoveja so mangeja e Jehova hem te pašutnen. „Ked čereja odova ka spasine hem tut hem okoljen so šunena tut“ (1. Tim. 4:16).