Runasqa, pillapis familianchejmanta wañupojtin tukuy imata niwasunman, chaywanpis niwasqanchejqa mana yanapawasunmanpunichu. Ichá wakenqa mana waqananchejta, nitaj llakikunanchejta niwasun. Wakinrí, llakiyninchejmanta mana pʼenqakuspa waqananchejta niwasunman. Chaywanpis, Bibliaqa maychus kajllata yuyaychan, doctorespis Bibliaj nisqanman jinallataj yuyanku.

Wakin lugarespeqa, qharis waqasqankuta mana allinpajchu qhawanku. Jinapis, ¿runaspa ñaupaqenpi waqayta pʼenqakunachu? Wakin doctoresqa ninku, llakisqa kashaspa waqay mana juchachu kasqanta. Chayrayku llakiyninchejta rikucheyqa aguantanapaj yanapawasunman. Chaywanpis llakiyninchejta pakayqa mana yanapawasunmanchu. Biblia nisqanman jina, waqayqa mana juchachu, qharis waqasqankupis nillataj juchachu. Astawanqa, Jesuspis wañusqasta kausarichimunanpaj atiyniyoj kaspapis, amigon Lázaro wañupojtin tukuypa ñaupaqenpi waqarikorqa (Juan 11:33-35).

Wakin kuteqa, mana suyashajtillanchej pillapis wañupojtin mayta llakikusunman, phiñakusunmantaj. Wakenqa, phiñakunkuman allinpaj qhawasqan runa mana reparakuspalla imatapis parlarparejtin. Sudafricamanta Mike nin: “Tatayqa 14 watayoj kashajtiy wañuporqa. Tatayta pʼampashajtiykutaj, uj pastor nerqa kʼacha runasta Dios cielopi necesitasqanta, chayraykutaj pusakapusqanta. * Chay nisqanqa mayta phiñachiwarqa, imaraykuchus noqayku necesitarqayku astawan. Chay nisqanmanta 63 watasña pasajtinpis sapa yuyarikojtiy sonqoy nanallawanpuni”, nispa.

Wakenqa, mana suyashajtillanku pillapis wañupojtin, paykuna juchayoj kasqankuta yuyakunku. Ninkumantaj: “Kayta chayri jaqayta ruwayman karqa chayqa, mana wañupunmanchu karqa”, nispa. Wakintarí wañupojwan phiñanakusqankurayku astawanraj sonqonku juchachanman.

Qan juchayoj kasqaykita yuyaspa, phiñasqataj kaspaqa, ama aguantakullaychu. Amigoykiwan parlariy, payqa wañupojmanta llakikuy mana juchachu kasqanta entiendenaykipaj yanaparisunkiman. Imajtinchus Bibliaqa nin: “Uj kawsaqeqa tukuy tiempopi munakuyniyoj, uj wawqetaj runawan khuska llakiypi sayaykunampaj”, nispa (Proverbios 17:17).

Jehovaqa, chay kutispi aswan sumaj amigonchej. Tukuy sonqo Paymanta mañakuy, imajtinchus payqa qanmanta llakikun (1 Pedro 5:7). Ajinamantaqa “chay mana unanchay atina sonqo tiyaykuyninta” Dios qosonqa (Filipenses 4:6, 7). Chantapis Diosqa Palabrannejta sonqochasonqa. Yanapallasunkimantaj kallpachanapaj jina kaj versiculosta qhelqakuy, umaykipitaj japʼiy (kay paginapi kaj  recuadrota qhawariy). Chaypi tʼukureyqa  sapallayki kashajtiyki, mana puñuyta atejtiyki ima yanapasunkiman (Isaías 57:15).

Kunallanraj, Jack sutiyoj runaj warmin cáncer onqoywan wañuporqa, chay runaqa 40 watayoj. Wakin kutisqa mayta sapayakun, jinapis Diosmanta mañakuy mayta yanapan. Nintaj: “Jehovamanta mañakuspaqa, mana sapayakunichu. Puñushaspa sapa kuti sayarini, nitaj puñuyta atiniñachu. Bibliata leespa chaypi tʼukurispa ima, Diosmantaj imaynachus kashasqayta willakuspa, manaña anchata llakikunichu. Ajinamanta sonqo tiyasqa puñukapuni”, nispa.

Vanessa sutiyoj sipastapis, maman uj onqoyrayku wañupojtin Diosmanta mañakusqan yanapallarqataj. Pay nin: “Sinchʼi llakiypi kashaspa waqarikoj kani, Diospa sutintataj oqharej kani. Jehovaqa mañakusqayta uyariwarqa, yanapawarqapunitaj”, nispa.

Doctoresqa ninku, sinchʼi llakiypi kajkuna, wajkunata imallapipis yanaparinankuta. Chaytaj mana anchata llikikunankupaj yanapasqanta (Hechos 20:35). Ashkha cristianospis ninku chay jina llakiypi rikukuspa, wajkunata yanaparispa kusiyta tarisqankuta (2 Corintios 1:3, 4).