1. Segun Efesionan 6:10-13, kon Yehova ta demostrá ku e ta interesá den su sirbidónan? Splika.

YEHOVA ta un Dios amoroso i e ta interesá den su sirbidónan. P’esei e ke yuda nos resistí nos enemigunan. Nos enemigunan prinsipal ta Satanas i e demoñonan. Yehova ta spièrta nos di nan, i e ta duna nos loke nos tin mester pa resistí nan. (Lesa Efesionan 6:10-13.) E úniko manera ku nos por resistí Diabel ta di aseptá Yehova su yudansa i dependé kompletamente riba dje. Nos por tin e mesun konfiansa ku apòstel Pablo. El a skirbi: “Si Dios ta ku nos, ken por ta kontra nos?”—Rom. 8:31.

2. Kiko nos lo analisá den e artíkulo akí?

² Komo kristian berdadero, nos no ta enfoká demasiado riba Satanas i su demoñonan. Nos ta mas interesá den siña tokante Yehova i sirbié. (Sal. 25:5) Pero, nos mester sa ki método Satanas ta usa. Dikon? Pasobra esei lo evitá ku e ta gaña òf dominá nos. (2 Kor. 2:11) Den e artíkulo akí, nos lo analisá un di e métodonan prinsipal ku Satanas i su demoñonan ta usa pa purba di gaña hende. Ademas, nos lo siña kon pa resistí nan ku éksito.

3-4. (a) Kiko ta spiritismo? (b) Kiko algun enkuesta a revelá enkuanto spiritismo?

³ Satanas i su demoñonan ta hasi tur loke nan por pa gaña hende. Un di e métodonan ku mas nan ta usa ta  spiritismo. Hende ku ta praktiká spiritismo ta bisa ku nan sa i por kontrolá kos ku otro hende no sa ni por kontrolá. Por ehèmpel, algun ta bisa ku pa medio di miramentu di destino i astrologia nan por pronostiká futuro. Otronan ta laga parse ku nan a papia ku e mortonan. Algun ta praktiká bruheria òf magia, i nan ta purba di hasi malu pa otro hende. *

⁴ Awe, hopi hende rònt mundu ta kere den spiritismo. Un enkuesta ku nan a hasi na 18 pais den Latinoamérika i Karibe ta mustra ku 1 di kada 3 hende ku nan a entrevistá ta kere den magia i bruheria, i kasi mes tantu hende ta kere ku ta posibel pa komuniká ku spiritu. Nan a hasi un otro enkuesta na 18 pais den Afrika. Mas ku mitar di esnan entrevistá a bisa ku nan ta kere den bruheria. Ta klaru ku nos mester paga tinu ku spiritismo sin importá unda nos ta biba. Al fin i al kabo, Satanas ta buska pa “gaña henter e tera habitá.”—Rev. 12:9.

5. Kiko Yehova ta pensa tokante spiritismo?

⁵ Yehova ta e “Dios di bèrdat.” (Sal. 31:5, BPK) P’esei, e ta odia spiritismo i tur loke ta relashoná kuné. El a bisa e israelitanan: “Entre boso no mag wòrdu hañá ningun hende ku ta hasi su yu hòmber òf su yu muhé pasa dor di kandela, ni ningun hende ku ta praktiká adivinashon òf ku ta praktiká bruheria, òf ku ta pronostiká, òf ku ta praktiká magia, ni ningun hende ku ta plega hende, òf ku ta montadó òf spiritista, òf ku ta konsultá ku e mortonan. Pasobra ken ku hasi e kosnan akí ta un abominashon na SEÑOR.” (Deu. 18:10-12) Ta bèrdat ku komo kristian nos no ta bou di e Lei ku Yehova a duna e israelitanan. Pero, nos sa ku su pensamentu tokante spiritismo no a kambia.—Mal. 3:6.

6. (a) Kon Satanas ta usa spiritismo pa hasi hende daño? (b) Segun Eklesiástes 9:5, kiko ta e bèrdat tokante e mortonan?

⁶ Yehova ta spièrta nos di spiritismo pasobra e sa ku Satanas ta usa esei pa hasi hende daño. Satanas ta usa spiritismo pa gaña hende. Por ehèmpel, e ta laga nan kere ku e mortonan ta sigui biba na un otro lugá. (Lesa Eklesiástes 9:5.) E ta usa spiritismo tambe pa hinka miedu den hende i pa nan bira lomba pa Yehova. Satanas su meta ta pa hende ku ta praktiká spiritismo konfia den spiritu malbado i no den Yehova.

7. Kiko Yehova ta bisa nos?

⁷ Manera nos a menshoná anteriormente, Yehova ta bisa nos kiko nos mester sa pa evitá ku Satanas i su demoñonan ta gaña nos. Laga nos wak algun kos ku nos por hasi pa para firme den nos lucha kontra Satanas i su demoñonan.

8. (a) Kiko ta e manera prinsipal ku nos ta protehá nos mes kontra spiritu malbado? (b) Kon Salmo 146:4 ta saka Satanas su mentira tokante e mortonan na kla?

⁸ Lesa e Palabra di Dios i meditá riba dje. Esaki ta e manera prinsipal ku nos ta  protehá nos mes kontra e mentiranan di spiritu malbado. E Palabra di Dios ta manera un spada skèrpi. E por saka e mentiranan di Satanas na kla i mustra kiko ta e bèrdat. (Efe. 6:17) Por ehèmpel, e Palabra di Dios ta mustra bon kla ku e mortonan no por komuniká ku e bibunan. (Lesa Salmo 146:4.) E ta kòrda nos tambe ku ta Yehova so por pronostiká futuro ku eksaktitut. (Isa. 45:21; 46:10) P’esei, semper hasi esfuerso pa lesa e Palabra di Dios i meditá riba dje. Esei lo yuda bo rechasá i odia e mentiranan di spiritu malbado.

9. Menshoná algun práktika relashoná ku spiritismo ku nos mester rechasá.

⁹ Rechasá tur kos ku tin di haber ku spiritismo. Komo kristian berdadero, nos no ta praktiká niun tipo di spiritismo. Por ehèmpel, nos no ta bai serka médiùm spiritista ni purba di komuniká ku e mortonan den ningun manera. Manera nos a siña den e artíkulo anterior, nos ta evitá kustumber di entiero ku ta basá riba e kreensia ku e mortonan ta sigui biba na un otro lugá. I nos no ta usa astrologia ni miramentu di destino pa purba di haña sa kiko lo pasa den futuro. (Isa. 8:19) Nos sa ku tur e práktikanan ei ta masha peligroso pasobra nan por pone nos den kontakto direkto ku Satanas i su demoñonan.

10-11. (a) Kiko algun hende di promé siglo a hasi ora nan a siña e bèrdat? (b) Segun 1 Korintionan 10:21, dikon nos mester imitá e ehèmpel di e kristiannan di promé siglo, i kon nos por hasi esei?

¹⁰ Deshasí di tur kos relashoná ku spiritismo. Durante promé siglo, algun habitante di Efeso tabata praktiká spiritismo. Ora nan a siña e bèrdat, nan a tuma medida drástiko. Beibel ta bisa: “Un kantidat grandi di esnan ku tabata praktiká magia a trese nan bukinan huntu i a kima nan dilanti di tur hende.” (Echo.  19:19) E hendenan ei a hasi tur loke nan tabata por pa resistí spiritu malbado. Nan bukinan di magia tabata kosta basta plaka. Pero, en bes di duna otro hende òf bende e bukinan ei, nan a destruí nan. Agradá Yehova tabata muchu mas importante pa nan ku e balor di e bukinan.

¹¹ Kon nos por imitá e ehèmpel di e kristiannan ei di promé siglo? Lo ta sabí pa nos deshasí di kualke kos ku ta relashoná ku spiritismo, manera amuleto òf kualke otro opheto ku ta sirbi pa protehá un hende kontra mal spiritu.—Lesa 1 Korintionan 10:21.

12. Kiko nos mester puntra nos mes?

¹² Analisá bo entretenimentu bon. Puntra bo mes: ‘Mi ta lesa buki, revista òf artíkulo riba Internet relashoná ku spiritismo? Kiko di e músika, pelíkula, seri i wega di vidio ku mi gusta? Tin algun di nan ku ta relashoná ku spiritismo? Den nan tin kos sobrenatural òf kos manera vampiro òf zòmbi? Nan ta presentá magia òf bruheria komo algu leuk i inofensivo?’ Ta klaru ku no ta tur entretenimentu basá riba fantasia òf kuenta ta relashoná ku spiritismo. Ora bo ta evaluá bo entretenimentu, hasi sigur ku bo desishon ta yuda bo keda leu for di tur kos ku Yehova ta odia. Nos ke hasi nos esfuerso pa mantené “un konsenshi limpi” dilanti nos Dios.—Echo. 24:16. *

13. Kiko nos no mester hasi?

¹³ No kana konta historia tokante e demoñonan. Nos mester imitá e ehèmpel di  Hesus. (1 Ped. 2:21) Ora Hesus tabata den shelu, e tabata sa hopi kos tokante Satanas i su demoñonan. Pero, ora el a bini na tera, e no a kana konta historia tokante nan. Hesus tabata kier a siña hende di Yehova i no di Satanas. Meskos ku Hesus, nos no mester kana konta historia tokante e demoñonan. En bes di esei, nos mester demostrá ku nos kurason ta brota “di palabranan bon,” esta, ku e bèrdat.—Sal. 45:1.

14-15. (a) Dikon nos no mester tin demasiado miedu di spiritu malbado? (b) Ki prueba tin ku Yehova ta protehá su pueblo awe?

¹⁴ Nos no mester tin demasiado miedu di spiritu malbado. Den e mundu akí, kos malu por pasa ku nos tur. Hende por haña aksidente, bira malu òf te asta muri. Pero, nos no mester pensa ku ta spiritu malbado ta kousa e kosnan ei. Beibel ta splika ku tempu i suseso imprevisto por bini riba nos tur. (Ekl. 9:11) Di otro banda, Yehova a demostrá ku e ta mas poderoso ku e demoñonan. Por ehèmpel, e no a laga Satanas mata Yòb. (Yòb 2:6) Den tempu di Moises, el a demostrá ku e tin mas poder ku e saserdotenan di Egipto ku tabata praktiká magia. (Éks. 8:18; 9:11) Ademas, el a duna Hesus e poder pa saka Satanas i su demoñonan for di shelu i benta nan abou riba tera. I un bes aki, lo benta nan den abismo; i nan no por hasi niun hende daño.—Rev. 12:9; 20:2, 3.

¹⁵ Awe nos tin hopi prueba ku Yehova ta protehá su pueblo. Pensa riba esaki: Nos ta prediká i siña hende e bèrdat rònt mundu. (Mat. 28:19, 20) E trabou ei ta saka tur e kosnan malu ku Diabel ta hasi na kla. Si Satanas tabata por, lo el a stòp nos trabou di prediká, pero e no por. Pues, nos no mester tin demasiado miedu di spiritu malbado. Nos sa ku e wowonan di Yehova “ta move bai bini dor di henter tera, pa e por sostené fuertemente esnan ku nan kurason ta kompletamente di dje.” (2 Kró. 16:9) Si nos ta fiel na Yehova, e demoñonan no por kousa nos daño permanente.

16-17. Duna un ehèmpel di e kurashi ku nos tin mester pa resistí spiritu malbado.

¹⁶ Nos mester tin hopi kurashi pa resistí spiritu malbado, spesialmente ora ku famia i amigu, ku bon intenshon, ta preshoná nos pa partisipá den sierto kustumber. Pero, Yehova ta bendishoná esnan ku ta demostrá e tipo di kurashi ei. Wak e ehèmpel di un ruman ku yama Erica ku ta biba na Gana. Ora e tabatin 21 aña, el a kuminsá studia Beibel. Komo ku e ta yu di un saserdote ku ta praktiká magia, su famia a ferwagt ku lo e partisipá den un kustumber di kome karni sakrifiká na e diosnan di su tata. Erica a nenga di partisipá i su famia a mira esei komo un insulto pa e diosnan. Nan a kere ku e diosnan lo a kastigá nan ku malesa físiko i mental.

¹⁷ E famia di Erica a purba di fòrs’é partisipá den e kustumber, pero el a nenga, aunke esei a nifiká ku e mester a bai for di kas. Algun Testigu a permitié keda serka nan. Den e sentido ei, Yehova a bendishoná Erica ku un famia nobo di ruman spiritual. (Mar. 10:29, 30) Aunke ku e famia di Erica a kore kuné i a asta kima su pertenensianan, el a keda leal na Yehova, batisá, i awor e ta pionero regular. Erica no tin miedu di e demoñonan. El a bisa tokante su famia: “Mi ta hasi orashon tur dia pa nan por tin e goso di konosé Yehova i e libertat ku ta bini di sirbi nos Dios amoroso.”

18. Ki bendishon nos lo haña si nos konfia den Yehova?

¹⁸ No ta nos tur mester enfrentá un prueba di fe asina difísil. Pero, nos tur mester resistí spiritu malbado i konfia den Yehova. Si nos hasi esei, nos lo haña hopi bendishon, i nos lo evitá ku Satanas ta gaña nos. Ademas, nos lo no laga miedu di e demoñonan stòp nos di sirbi Yehova. I riba tur kos, nos lo fortalesé nos amistat ku Yehova. Disipel Santiago a skirbi: “Someté boso na Dios; ma oponé Diabel, i lo e hui for di boso. Hala serka Dios, i lo e hala serka boso.”—Sant. 4:7, 8.